ວັນທີ 20 ມັງກອນປີນີ້, ທ່ານ ໂຈ ໄບເດັນ ປະທານາທິບໍດີອາເມຣິກາຄົນທີ 46 ໄດ້ເລີ່ມບໍລິຫານງານຢູ່ທຳນຽບຂາວຄົບຮອບ 100 ວັນ. ໃນຖານະເປັນຜູ້ນຳຂອງປະເທດທີ່ຈະເລີນທີ່ສຸດຢູ່ໃນໂລກ, ການກະທຳຂອງທ່ານ ໂຈ ໄບເດັນບໍ່ພຽງແຕ່ໄດ້ກະທົບຕໍ່ຊີວິດການເປັນຢູ່ຂອງປະຊາຊົນອາເມຣິກາເທົ່ານັ້ນ, ຍັງໄດ້ຮັບຄວາມສົນໃຈຈາກບັນດາປະເທດໃນໂລກອີກດ້ວຍ. ສະນັ້ນ, ໃນວັນເວລາທີ່ທ່ານຂຶ້ນດຳລົງຕຳແໜ່ງຄົບຮອບ 100 ວັນ, ມາເບິ່ງກັນວ່າລັດຖະບານ ໂຈ ໄບເດັນໄດ້ນຳພາເຮັດເລື່ອງໃດແດ່.
ຫຼັງຈາກຂຶ້ນດຳລົງຕຳແໜ່ງບໍ່ດົນ, ທ່ານ ໂຈ ໄບເດັນໄດ້ສະເໜີແຜນການກະຕຸ້ນເສດຖະກິດທີ່ມີມູນຄ່າສູງເຖິງ 3.900 ຕື້ໂດລາສະຫະລັດ, ບົນພື້ນຖານທີ່ອາເມຣິກາຫາກໍ່ວາງແຜນການກະຕຸ້ນເສດຖະກິດທີ່ມີມູນຄ່າເຖິງ 2.900 ຕື້ໂດລາສະຫະລັດ,ໄດ້ກໍ່ໃຫ້ເກີດໜີ້ພາກລັດຂອງອາເມຣິກາສູງເຖິງ 2 ໝື່ນຕື້ໂດລາສະຫະລັດ, ຄັນຊັ້ນງົບປະມານ 3.900 ຕື້ໂດລາສະຫະລັດນີ້ຈະເອົາມາຈາກໃສໄດ້ກາຍເປັນບັນຫາທີ່ສຳຄັນແລະເປັນບັນຫາໃຫຍ່ບັນຫາໜຶ່ງ. ທ່ານ ໂຈ ໄບເດັນໄດ້ຊຸກຍູ້ແຜນການກະຕຸ້ນເສດຖະກິດແບບບັງຄັບ, ຈະຫຼຸດຄວາມໜ້າເຊື່ອຖືຂອງຄ່າເງິນໂດລາທີ່ມີຕໍ່ສາກົນໃຫ້ຕ່ຳລົງຢ່າງບໍ່ຢຸດຢັ້ງ, ເຮັດໃຫ້ເງິນໂດລາອ່ອນຄ່າ,ແລ້ວກະທົບຕໍ່ການຄ້າສາກົນທີ່ຊຳລະ ດ້ວຍສະກຸນເງິນໂດລາ. ວັນທີ 21 ເມສານີ້, ທ່ານ ໂຈ ໄບເດັນໄດ້ກ່າວຄຳປາໄສໂດຍປະກາດວ່າຢູ່ທົ່ວປະເທດອາເມຣິກາສາມາດສັກວັກຊີນໂຄວິດ-19 ໄດ້ແລ້ວຈຳນວນ 200 ລ້ານຫຼອດ, ອີງຕາມຜົນການລົງປະຊາມະຕິຫຼ້າສຸດ, ປະຊາຊົນອາເມຣິກາຫຼາຍກວ່າເຄິ່ງໜຶ່ງເຫັນດີນຳໝາກຜົນດ້ານການຕ້ານພະຍາດໂຄວິດ-19 ຂອງທ່ານ ໂຈ ໄບເດັນ.
ຖ້າວ່າລັດຖະບານໂຈ ໄບເດັນ ໄດ້ສະເໜີແຜນການກະຕຸ້ນເສດຖະກິດແລະການຕ້ານພະຍາດໂຄວິດ-19 ແມ່ນເລື່ອງທີ່ຢູ່ໃນຄວາມຄາດຄິດຂອງຊາວໂລກ, ຄັນຊັ້ນການທີ່ທ່ານ ໂຈ ໄບເດັນ ກໍ່ສົງຄາມຢູ່ຊີຣີໄດ້ເປັນເລື່ອງທີ່ເຮັດໃຫ້ຄົນທັງຫຼາຍຮູ້ສຶກງົງແມ່ນບໍ. ໃນກາງເດືອນກຸມພາປີນີ້, ພາຍຫຼັງຖານທັບອາເມຣິກາປະຈຳອີຣັກຖືກໂຈມຕີແລ້ວ, ທ່ານ ໂຈ ໄບເດັນ ໄດ້ອອກຄຳສັ່ງໃຫ້ກອງທັບອາເມຣິກາໂຈມຕີຊີຣີທາງອາກາດເພື່ອແກ້ແຄ້ນທີ່ເກີດຂຶ້ນໃນວັນທີ 26 ກຸມພາປີນີ້. ການກະທຳທີ່ກໍ່ສົງຄາມຢ່າງໄຮ້ເຫດຜົນຂອງທ່ານ ໂຈ ໄບເດັນ ແບບນີ້, ຈົນເຮັດໃຫ້ລັດຖະສະພາອາເມຣິກາມີຄວາມເຄັ່ງຕຶງຂຶ້ນແລະເຄີຍໄດ້ພິຈາລະນາກ່ຽວກັບການຍົກເລີກ “ກົດໝາຍວ່າດ້ວຍການໃຫ້ອຳນາດສັ່ງການກໍ່ສົງຄາມຂອງປະທານາທິບໍດີ”, ເພື່ອຍົກເລີກການມອບອຳນາດສັ່ງການກ່ຽວກັບສົງຄາມຂອງປະທານາທິບໍດີ.
ພາຍຫຼັງລັດຖະບານ ໂຈ ໄບເດັນເລີ່ມຄອງອຳນາດແລ້ວ, ໄດ້ຍົກເລີກລັດຖະດຳລັດທີ່ຮຸນແຮງຂອງທ່ານ ໂດໂນ ທຣຳ ອະດີດປະທານາທິບໍດີອາເມຣິກາຈຳນວນໜຶ່ງ ເຊິ່ງລວມທັງການກັບຄືນເຂົ້າສູ່ອົງການອະນາໄມໂລກແລະສັນຍາປາຣີ, ສ້າງສາປະຊາທິປະໄຕອາເມຣິກາຄືນໃໝ່ແລະອື່ນໆ; ທ່ານ ໂຈ ໄບເດັນໄດ້ສົນທະນາທາງໂທລະສັບຫຼືວິດີໂອກັບຜູ້ນຳຂອງປະເທດຈຳນວນໜຶ່ງແລະສະແດງຈຸດຢືນທາງການເມືອງຂອງຕົນ; ພາຍຫຼັງຂຶ້ນດຳລົງຕຳແໜ່ງເປັນເວລາ 1 ເດືອນແລ້ວທ່ານກໍໄດ້ຮຽກໂຮມປະເທດພັນທະມິດເຂົ້າຮ່ວມ “ການແຂ່ງຂັນກັບຈີນ” ທີ່ນຳພາໂດຍອາເມຣິກາ, ພ້ອມທັງໄດ້ສ້າງ “ກົດໝາຍວ່າດ້ວຍການແຂ່ງຂັນທາງຍຸດທະສາດປີ 2021”ໃນຕົ້ນເດືອນເມສານີ້ເພື່ອສ້າງຄວາມກົດດັນໃຫ້ແກ່ຈີນແລະຫຼຸດອິດທິພົນຂອງຈີນໃນເວທີສາກົນໃຫ້ຕ່ຳລົງ. ທ່ານ ໂຈ ໄບເດັນໄດ້ເຫັນດີນຳການລະບາຍນ້ຳປົນເປື້ອນລັງສີນິວເຄລຍຂອງຍີ່ປຸ່ນລົງທະເລພ້ອມທັງໄດ້ສະແດງຄວາມຂອບໃຈຕໍ່ຂໍ້ຕົກລົງຂອງຍີ່ປຸ່ນຜ່ານທາງສື່ສັງຄົມອອນລາຍ Twitter; ຍິ່ງກວ່ານັ້ນຍັງໄດ້ວາງແຜນແລະປະຕິບັດການເຄື່ອນໄຫວລອບສັງຫານແລະກໍ່ລັດຖະປະຫານຕໍ່ປະທານາທິບໍດີເບລາຣູຊີ, ເພື່ອເລື່ອງນີ້, ທ່ານ ວະລາດີເມຍ ປູຕິນ ປະທານາທິບໍດີຣັດເຊຍໄດ້ສອບຖາມທ່ານ ໂຈ ໄບເດັນວ່າ: ເປັນຫຍັງອາເມຣິກາຄືມີພຶດຕິກຳທີ່ຊົ່ວຮ້າຍຈົນເຖິງລະດັບນີ້?
ລັດຖະບານ ໂຈ ໄບເດັນມີເຈດຕະນາຢາກຜ່ານຊ່ອງທາງແບບນີ້, ເພື່ອຄອງຖານະນຳພາສາກົນໂດຍອາເມຣິກາຄືນໃໝ່, ບາງທີການກະທຳຂອງທ່ານຈະໄດ້ຮັບການສະໜັບສະໜູນຈາກປະຊາຊົນອາເມຣິກາຈຳນວນໜຶ່ງໃນເວລາສັ້ນ, ແຕ່ການກຳອຳນາດຂອງທ່ານພັດເປັນເຄາະຮ້າຍຊະນິດໜຶ່ງສຳລັບປະເທດອື່ນໆໃນໂລກນັ້ນກໍຄື: ໃນໄລຍະສັ້ນພຽງ 100 ວັນ, ລັດຖະບານອາເມຣິກາທີ່ທ່ານ ໂຈ ໄບເດັນເປັນຜູ້ນຳພາໄດ້ກໍ່ຄວາມວຸ້ນວາຍແລະຄວາມເຈັບປວດຈຳນວນຫຼວງຫຼາຍໃຫ້ກັບໂລກ.
ອັດຕາການສະໜັບສະໜູນປະທານາທິບໍດີອາເມຣິກາໃນຫຼາຍຊຸດຜ່ານມາໄດ້ເກີດມີກົດເກນຢ່າງໜຶ່ງຄື: ໄລຍະເວລາຂຶ້ນດຳລົງຕຳແໜ່ງແລະອັດຕາການສະໜັບສະໜູນກົງກັນຂ້າມກັນ. ພາຍຫຼັງການກຳອຳນາດຂອງທ່ານ ໂຈ ໄບເດັນ ໄດ້ເຂົ້າສູ່ໄລຍະໝັ້ນທ່ຽງແລ້ວ, ລັດຖະບານອາເມຣິກາຈະໄປທາງທິດໃດພາຍໃຕ້ການນຳພາຂອງທ່ານ,ພວກເຮົາພາກັນລໍຖ້າເບິ່ງ.
ຄຳເຫັນ
0