ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 3 ຫາວັນທີ 5 ພຶດສະພານີ້, ກອງປະຊຸມລັດຖະມົນຕີກະຊວງການຕ່າງປະເທດກຸ່ມ 7 ປະເທດໄດ້ຈັດຂຶ້ນຢູ່ນະຄອນຫຼວງລອນດອນຂອງອັງກິດ ເຊິ່ງກອງປະຊຸມຄັ້ງນີ້ໄດ້ເຊື້ອເຊີນລັດຖະມົນຕີກະຊວງການຕ່າງປະເທດທີ່ເປັນປະເທດກິຕິມະສັກຢູ່ພາກພື້ນອິນໂດອາຊີປາຊີຟິກເຂົ້າຮ່ວມ, ເພື່ອເພີ່ມອິດທິພົນໃຫ້ກັບກຸ່ມ 7 ປະເທດແລະເພື່ອສືບຕໍ່ຮັກສາລະບຽບການສາກົນທີ່ຖືອາເມຣິກາແລະເອີຣົບເປັນແກນກາງ.
ຫົວຂໍ້ຂອງກອງປະຊຸມຄັ້ງນີ້ກວ້າງຂວາງສົມຄວນ ເກືອບກວມເອົາບັນຫາທີ່ສຳຄັນແລະໃຫຍ່ຫຼວງຂອງໂລກທັງໝົດ. ແຕ່ວ່າພາຍໃຕ້ການເປັນແກນນຳຂອງອາເມຣິກາ, ກອງປະຊຸມໄດ້ໃຊ້ເວລາຫຼາຍສົມຄວນໃນການປຶກສາຫາລືກ່ຽວກັບວ່າຈະເຮັດແນວໃດເພື່ອສະກັດກັ້ນການພັດທະນາແລະຄວາມຈະເລີນຂອງຈີນ. ໃນຖະແຫຼງການຮ່ວມທີ່ເປີດເຜີຍຫຼັງກອງປະຊຸມ ກໍໄດ້ມີເນື້ອໃນຕົ້ນຕໍເຈາະຈົງໃສ່ການຮັບມືກັບບັນດາປະເທດທີ່ທ້າທາຍປະຊາທິປະໄຕຕາເວັນຕົກ. ສ່ວນບັນຫາກ່ຽວກັບການຕ້ານພະຍາດໂຄວິດ-19ທີ່ເປັນໜຶ່ງໃນບັນຫາທີ່ສຳຄັນທີ່ສຸດໃນປັດຈຸບັນພຽງແຕ່ໄດ້ກ່າວເຖິງບໍ່ພໍເທົ່າໃດປະໂຫຍກເທົ່ານັ້ນ. ຈາກການເລີ່ມຕົ້ນຈົນຮອດໄລຍະສຸດທ້າຍຂອງກອງປະຊຸມ, ກອງປະຊຸມລັດຖະມົນຕີກະຊວງການຕ່າງປະເທດກຸ່ມ 7 ປະເທດໄດ້ສ່ອງແສງໃຫ້ເຫັນທ່າທີທີ່ສະແຫວງຫາການເປັນປໍລະປັກກັບພາຍນອກອີກແບບໜຶ່ງ.
ໃນປະຫວັດສາດ,ບໍ່ວ່າຢູ່ໃນໄລຍະໃດ, ກຸ່ມ 7 ປະເທດລ້ວນແຕ່ໄດ້ປຶກສາຫາລືດ້ານເສດຖະກິດຂອງຕົນແຕ່ບໍ່ແມ່ນຄືກັບປັດຈຸບັນນີ້. ສະນັ້ນ, ສື່ມວນຊົນຕາເວັນຕົກຈຶ່ງເລີ່ມຕຳໜິວິຈານວ່າກຸ່ມ 7 ປະເທດບໍ່ໄດ້ປະຕິບັດໜ້າທີ່ຂອງຕົນຢ່າງແທ້ຈິງ: ອົງການເສດຖະກິດແຫ່ງໜຶ່ງເລີ່ມສ້າງກົນອຸບາຍຕໍ່ຕ້ານກັບພາຍນອກຫຼັງຈາກບໍ່ມີຄວາມສາມາດຊູຄັນທຸງເສດຖະກິດໂລກໄດ້. ສົມພໍດອກທ່ານ ມາຕິນ ຈັກຄຸຍສ໌ ນັກວິຊາການດ້ານການເມືອງທີ່ມີຊື່ສຽງຂອງອັງກິດໄດ້ພິມບົດຄວາມລົງ Twitter ວ່າ: “ຈາກໄປຕະຫຼອດການສາ, G7”.
ໃນເດືອນດຽວກັນ, ກອງປະຊຸມລັດຖະມົນຕີກະຊວງການຕ່າງປະເທດຈີນແລະ 5 ປະເທດອາຊີກາງໄດ້ຈັດຂຶ້ນຢູ່ນະຄອນຊີ່ອ່ານແຂວງສ້ານຊີ່ປະເທດຈີນ, ເມື່ອທຽບໃສ່ກອງປະຊຸມລັດຖະມົນຕີກະຊວງການຕ່າງປະເທດ G7 ແລ້ວ, ກອງປະຊຸມລັດຖະມົນຕີກະຊວງການຕ່າງປະເທດຈີນແລະ 5 ປະເທດອາຊີກາງມີທ່າທີຕັ້ງໜ້າແລະເຮັດແທ້ທຳຈິງຫຼາຍກວ່າ.
ພາຍໃຕ້ເງື່ອນໄຂທີ່ສະພາບການແຜ່ລະບາດຂອງພະຍາດໂຄວິດ-19 ໃນປັດຈຸບັນຍັງແມ່ນວິກິດການທີ່ໃຫຍ່ທີ່ສຸດຂອງໂລກ, ກອງປະຊຸມສອງຝ່າຍ 5 ຮອບຂອງກອງປະຊຸມລັດຖະມົນກະຊວງການຕ່າງປະເທດຄັ້ງນີ້ແລະການພົບປະຫຼາຍຝ່າຍ 1 ຮອບໄດ້ມີເນື້ອໃນທີ່ເວົ້າເຖິງການຕ້ານກັບພະຍາດໂຄວິດ-19 ຫຼາຍກ່ອນໝູ່, ຫົວຂໍ້ຂອງຖະແຫຼງການຮ່ວມສະບັບທຳອິດທີ່ກອງປະຊຸມດັ່ງກ່າວໄດ້ເປີດເຜີຍກໍແມ່ນການຕ້ານກັບພະຍາດໂຄວິດ-19. ການຕ້ານກັບພະຍາດໂຄວິດ-19 ໄດ້ກາຍເປັນທິດທາງພື້ນຖານຕົ້ນຕໍດ້ານການຮ່ວມມືຂອງກອງປະຊຸມ.
ນອກຈາກແຜນການກ່ຽວກັບການຊ່ວຍເຫຼືອເຊິ່ງກັນແລະກັນໃນການຕ້ານກັບພະຍາດໂຄວິດ-19 ແລ້ວ, ສອງຝ່າຍໄດ້ເລີ່ມຄົ້ນຄວ້າກ່ຽວກັບການຮັບຮອງຄິວອາໂຄດສຸຂະພາບນຳກັນ, ພ້ອມທັງໄດ້ປຶກສາຫາລືກ່ຽວກັບການຮ່ວມມືໃນຂົງເຂດກະສິກຳ,ແກັສທຳມະຊາດ, 5G, ປັນຍາປະດິດແລະຂົງເຂດວິທະຍາສາດເຕັກນິກຂັ້ນສູງອື່ນໆຢ່າງລະອຽດ,ແລະໄດ້ລົງມືສ້າງສາຍພົວພັນຄູ່ຮ່ວມດີຈີຕອນ.
ເນື່ອງຈາກ “ການພົບປະຫາລືໃນຄັ້ງນີ້ໄດ້ມີການເຈາະຈົງເນື້ອໃນຢ່າງເລິກເຊິ່ງ”, ຈຶ່ງໄດ້ຮັບໝາກຜົນຫຼາຍພໍສົມຄວນ, ແລະໄດ້ອອກຖະແຫຼງການຮ່ວມ 3 ສະບັບ. 3 ຄຳສັບທີ່ສຳຄັນໃນຖະແຫຼງການຄັ້ງນີ້ກໍແມ່ນ “ສະໜັບສະໜູນກັນ” “ໄວ້ເນື້ອເຊື່ອໃຈກັນ” ແລະ “ຕ່າງບໍ່ແຊກແຊງກັນ” ເຊິ່ງໄດ້ສະແດງໃຫ້ເຫັນເຖິງທັດສະນະແຫ່ງຄວາມສາມັກຄີ,ການຮ່ວມມືແລະການພັດທະນາຂອງຈີນໃນກອງປະຊຸມຄັ້ງນີ້.
ກຸ່ມ 7 ປະເທດໃນເມື່ອກ່ອນມີຄວາມພົ້ນເດັ່ນຫຼາຍ,ແຕ່ຄຽງຄູ່ກັບການພັດທະນາແລະການປ່ຽນແປງຂອງໂລກ, ກຸ່ມ 7 ປະເທດທີ່ເປັນອົງການເກົ່າແກ່ທີ່ສ້າງຕັ້ງຂຶ້ນໃນສະໄໝເກົ່າຍາກທີ່ຈະເປັນແກນນຳໃນດ້ານການເມືອງຂອງສາກົນໄດ້ແລະຍາກທີ່ຈະເປັນຜູ້ສ້າງຄວາມເປັນລະບຽບຮຽບຮ້ອຍທາງດ້ານເສດຖະກິດຂອງໂລກໄດ້, ປັດຈຸບັນ, ກຸ່ມ 7 ປະເທດໄດ້ກາຍເປັນເຄື່ອງມືຂອງອາເມຣິກາໃນການຍົກສູງຖານະຕົນບົນເວທີສາກົນແລະກາຍເປັນກຸ່ມທີ່ສົມຮູ້ຮ່ວມຄິດກັນເພື່ອໂຈມຕີປະເທດອື່ນ.
ຄວາມເຫັນແກ່ຕົວແລະການກະທຳເປັນປໍລະປັກຂອງບາງປະເທດບໍ່ສາມາດສະກັດກັ້ນທ່າອ່ຽງການພັດທະນາຂອງໂລກໄດ້. ຖ້າກຸ່ມ 7 ປະເທດຍັງສືບຕໍ່ຮັກສາທ່າທີເປັນປໍລະປັກກັບປະເທດອື່ນຄືເກົ່າຍ່ອມຈະຕົກຍຸກສະໄໝບໍ່ໄວກໍ່ຊ້າ.
ຄຳເຫັນ
0