ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ21ພຶດສະພານີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດສຸຂະພາບໂລກຜ່ານທາງວິດີໂອຢູ່ນະຄອນຫຼວງປັກກິ່ງຕາມຄຳເຊີນ ແລະກ່າວຄຳປາໄສສຳຄັນທີ່ມີຫົວຂໍ້ວ່າ “ຮ່ວມກັນສ້າງປະຊາຄົມສາທາລະນະສຸກຂອງມວນມະນຸດ”.
ທ່ານສີຈິ້ນຜິງໄດ້ຊີ້ໃຫ້ເຫັນວ່າ: ໃນໄລຍະໜຶ່ງປີປາຍມານີ້, ສະພາບພະຍາດໂຄວິດ-19 ເກີດມີການປ່ຽນແປງເລື້ອຍໆ, ພະຍາດຕິດແປດທີ່ຮ້າຍແຮງທີ່ສຸດໃນຮອບຮ້ອຍປີມານີ້ຍັງແຜ່ລະບາດຢ່າງຮ້າຍແຮງຢູ່. ການເອົາຊະນະສະພາບພະຍາດແລະ ການຟື້ນຟູການເຕີບໂຕດ້ານເສດຖະກິດໂດຍໄວ ແມ່ນໜ້າທີ່ສຳຄັນອັນດັບໜຶ່ງຂອງປະຊາຄົມໂລກ. ສະມາຊິກກຸ່ມ G20 ຄວນແບກຫາບໜ້າທີ່ຮັບຜິດຊອບໃນການຮ່ວມມືຕ້ານກັບພະຍາດທົ່ວໂລກ, ສຸມໃສ່ການຍົກລະດັບຄວາມສາມາດແລະລະດັບການຮັບມືກັບເຫດການສາທາລະນະສຸກອັນໜັກໜ່ວງທີ່ເກີດຂຶ້ນຢ່າງກະທັນຫັນນີ້.
ທ່ານ ສີຈິ້ນຜິງໄດ້ມີຂໍ້ສະເໜີ 5 ຂໍ້ດັ່ງລຸ່ມນີ້:
ໜຶ່ງ: ຍຶດໝັ້ນການຖືເອົາປະຊາຊົນສຳຄັນກວ່າໝູ່, ຖືເອົາຊີວິດສຳຄັນກວ່າໝູ່. ການຕ້ານກັບພະຍາດໂຄວິດ-19 ແມ່ນເພື່ອປະຊາຊົນ, ແລະ ກໍຕ້ອງອາໄສປະຊາຊົນ, ຕ້ອງມີຄວາມຮັບຜິດຊອບ ແລະ ມີຄວາມກ້າຫານທາງການເມືອງອັນໃຫຍ່ຫຼວງ, ໃຊ້ການກະທຳທີ່ບໍ່ທຳມະດາເພື່ອຮັບມືກັບເຫດການທີ່ເກີດຂຶ້ນແບບຜິດປົກກະຕິນີ້, ຕ້ອງເຄົາລົບຄຸນຄ່າແລະກຽດສັກສີຊີວິດຂອງທຸກຄົນຢ່າງແທ້ຈິງ, ຮັບປະກັນໃຫ້ຊີວິດການເປັນຢູ່ຂອງປະຊາຊົນໄດ້ຮັບຜົນກະທົບໜ້ອຍລົງ, ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍໂດຍລວມ.
ສອງ: ຍຶດໝັ້ນການໃຊ້ມາດຕະການຕາມຫຼັກວິທະຍາສາດ, ຮັບມືຢ່າງເປັນລະບົບແລະ ເປັນເອກະພາບກັນ. ຄວນໃຊ້ມາດຕະການນຳໃຊ້ຢາ ແລະ ບໍ່ນຳໃຊ້ຢາຢ່າງເປັນເອກະພາບກັນ, ປະຕິບັດການປ້ອງກັນແລະຄວບຄຸມພະຍາດໃຫ້ຖືກຕ້ອງຕາມເປົ້າໝາຍຢ່າງເປັນປົກກະຕິ ແລະ ແກ້ໄຂບັນຫາສຸກເສີນໃຫ້ເປັນເອກະພາບກັນ, ປະສານສົມທົບການປ້ອງກັນ ຄວບຄຸມພະຍາດ ແລະ ການພັດທະນາເສດຖະກິດສັງຄົມໃຫ້ເປັນເອກະພາບກັນ. ສະມາຊິກກຸ່ມ G20 ຄວນໃຊ້ນະໂຍບາຍເສດຖະກິດມະຫາພາກທີ່ມີຄວາມຮັບຜິດຊອບ, ປົກປັກຮັກສາຕ່ອງໂສ້ອຸດສາຫະກຳແລະຕ່ອງໂສ້ການສະໜອງຂອງໂລກໃຫ້ສາມາດເຄື່ອນໄຫວດ້ວຍຄວາມສະດວກ ແລະ ປອດໄພ, ສືບຕໍ່ສະໜັບສະໜູນປະເທດພວມພັດທະນາໂດຍສະເພາະປະເທດທີ່ຍັງບໍ່ທັນເຂັ້ມແຂງທີ່ມີຄວາມຫຍຸ້ງຍາກຢ່າງຫຼວງຫຼາຍ.
ສາມ: ຍຶດໝັ້ນການຮ່ວມທຸກຮ່ວມສຸກ, ສົ່ງເສີມຄວາມສາມັກຄີແລະການຮ່ວມມື. ຄວນຍຶດໝັ້ນແນວຄວາມຄິດປະຊາຄົມສາທາລະນະສຸກຂອງມວນມະນຸດ, ເດັດດ່ຽວຄັດຄ້ານເຈດຕະນາທຸກຮູບແບບໃນການຫັນສະພາບພະຍາດເປັນບັນຫາການເມືອງ, ຕິດກາໝາຍ ແລະ ໃສ່ຮ້າຍປ້າຍສີກັນ. ການໃຊ້ເລ່ຫຼ່ຽມທາງການເມືອງ ຈະບໍ່ມີຜົນດີຈັກໜ້ອຍຕໍ່ການຕ້ານກັບພະຍາດຂອງປະເທດຕົນ, ມີແຕ່ຈະສ້າງຄວາມວຸ້ນວາຍໃຫ້ກັບການຮ່ວມມືຕ້ານກັບພະຍາດຂອງໂລກ ແລະທຳຮ້າຍປະຊາຊົນຂອງບັນດາປະເທດໃນໂລກຍິ່ງຫຼາຍກວ່າເກົ່າເທົ່ານັ້ນ.
ສີ່: ຍຶດໝັ້ນຄວາມຍຸຕິທຳແລະສົມເຫດສົມຜົນ, ແກ້ໄຂ “ຄວາມແຕກໂຕນກັນດ້ານພູມຕ້ານທານ”. ຄວນປະຖິ້ມ “ລັດທິຊາດນິຍົມດ້ານວັກຊີນ”, ແກ້ໄຂບັນຫາກ່ຽວກັບຄວາມສາມາດດ້ານການຜະລິດ ແລະການແບ່ງປັນວັກຊີນໃຫ້ດີ, ເຮັດໃຫ້ປະເທດພວມພັດທະນາເຂົ້າເຖິງວັກຊີນ ແລະ ສາມາດຊື້ໄດ້ໃຫ້ຫຼາຍກວ່າເກົ່າ. ປະເທດສຳຄັນໃນດ້ານການຄົ້ນຄວ້າພັດທະນາແລະຜະລິດວັກຊີນຄວນແບກຫາບຄວາມຮັບຜິດຊອບເພື່ອສະໜອງວັກຊີນໃຫ້ປະເທດພວມພັດທະນາທີ່ມີຄວາມຕ້ອງການຢ່າງຮີບດ່ວນນັ້ນໃຫ້ຫຼາຍກວ່າເກົ່າ, ສະຖາບັນການເງິນຫຼາຍຝ່າຍຄວນໃຫ້ການສະໜັບສະໜູນດ້ານການລະດົມທຶນແກ່ປະເທດພວມພັດທະນາໃນການຈັດຊື້ວັກຊີນ. ອົງການອະນາໄມໂລກຄວນເລັ່ງລັດການຊຸກຍູ້ແຜນດຳເນີນງານວັກຊີນໂຄວິດ-19.
ຫ້າ: ຍຶດໝັ້ນໃນການແກ້ໄຂບັນຫາໃຫ້ເຖິງກົກເຖິງຮາກ,ປັບປຸງລະລົບບໍລິຫານໃຫ້ສົມບູນຂຶ້ນ. ຄວນເພີ່ມທະວີແລະເສີມຂະຫຍາຍບົດບາດຂອງອົງການສະຫະປະຊາຊາດແລະອົງການອະນາໄມໂລກ,ຍຶດໝັ້ນໃນຫຼັກການປຶກສາຫາລືຮ່ວມກັນ,ສ້າງສາຮ່ວມກັນແລະຊົມໃຊ້ຮ່ວມກັນ, ສ່ອງແສງໃຫ້ເຫັນເຖິງຄວາມຮຽກຮ້ອງຕ້ອງການອັນສົມເຫດສົມຜົນຂອງປະເທດພວມພັດທະນາໃຫ້ມີປະສິດທິຜົນຫຼາຍກວ່າເກົ່າ.ຄວນຍົກສູງຄວາມສາມາດໃນການຕິດຕາມວັກແທກ,ເຕືອນໄພລ່ວງໜ້າແລະຮັບມືສຸກເສີນ, ຄວາມສາມາດໃນການປິ່ນປົວພະຍາດຕິດແປດຮ້າຍແຮງ,ຄວາມສາມາດດ້ານຄັງສຳຮອງແລະຮັບປະກັນດ້ານອຸປະກອນຮັບມືສຸກເສີນ,ຄວາມສາມາດໃນການກຳຈັດຂໍ້ມູນຂ່າວສານປອມ ແລະຄວາມສາມາດໃນການໃຫ້ການສະໜັບສະໜູນແກ່ປະເທດພວມພັດທະນາ.
ເພື່ອສືບຕໍ່ໃຫ້ການສະໜັບສະໜູນທົ່ວໂລກສາມັກຄີຮ່ວມກັນຕ້ານກັບພະຍາດ, ທ່ານສີຈິ້ນຜິງໄດ້ປະກາດວ່າ:
ຈີນຈະສະໜອງເງິນຊ່ວຍເຫຼືອສາກົນໃນມູນຄ່າອີກ 3 ຕື້ໂດລາສະຫະລັດພາຍໃນໄລຍະ 3 ປີຕໍ່ໜ້າ, ເພື່ອນຳໃຊ້ເຂົ້າໃນການສະໜັບສະໜູນປະເທດພວມພັດທະນາຕ້ານກັບພະຍາດ ແລະ ຟື້ນຟູການພັດທະນາເສດຖະກິດ-ສັງຄົມ.
ຈີນໄດ້ສະໜອງວັກຊີນ 300 ລ້ານຫຼອດໃຫ້ແກ່ທົ່ວໂລກແລ້ວ ແລະຈະສືບຕໍ່ສະ ໜອງວັກຊີນໃຫ້ຕ່າງປະເທດຫຼາຍກວ່າເກົ່າຕາມຄວາມສາມາດຂອງຕົນ.
ຈີນໄດ້ສະໜັບສະໜູນວິສາຫະກິດວັກຊີນຂອງປະເທດຕົນຖ່າຍທອດເຕັກນິກໃຫ້ປະເທດພວມພັດທະນາ ແລະ ດຳເນີນການຮ່ວມມືຜະລິດວັກຊີນ.
ຈີນໄດ້ປະກາດວ່າຈະສະໜັບສະໜູນການຍົກເລີກຊັບສິນທາງປັນຍາດ້ານວັກຊີນໂຄວິດ-19 ທັງຈະສະໜັບສະໜູນໃຫ້ອົງການຈັດຕັ້ງສາກົນເຊັ່ນ:ອົງການການຄ້າໂລກເຮັດຂໍ້ຕົກລົງດັ່ງກ່າວໂດຍໄວ.
ຈີນໄດ້ລິເລີ່ມສ້າງຕັ້ງເວທີປຶກສາຫາລືສາກົນກ່ຽວກັບການຮ່ວມມືດ້ານວັກຊີນເພື່ອໃຫ້ປະເທດຕ່າງໆທີ່ຄົ້ນຄວ້າພັດທະນາແລະຜະລິດວັກຊີນ, ວິສາຫະກິດ ກໍຄືຝ່າຍທີ່ມີຜົນປະໂຫຍດກ່ຽວຂ້ອງຮ່ວມກັນຄົ້ນຄວ້າປຶກສາຫາລືກ່ຽວກັບການຊຸກຍູ້ການແບ່ງປັນວັກຊີນຢ່າງຍຸຕິທຳແລະສົມເຫດສົມຜົນໃຫ້ກັບໂລກ.
ໃນຕອນສຸດທ້າຍ, ທ່ານສີຈິ້ນຜິງໄດ້ກ່າວເນັ້ນວ່າ: ຂໍໃຫ້ພວກເຮົາຈົ່ງເກາະແຂນກັນແລະ ຄຽງບ່າຄຽງໄຫຼ່ກັນເພື່ອຊຸກຍູ້ການສ້າງປະຊາຄົມສາທາລະນະສຸກຂອງມວນມະນຸດ, ຮ່ວມກັນປົກປັກຮັກສາອະນາຄົດທີ່ດີງາມດ້ານສຸຂະພາບຂອງມະນຸດ.
ກອງປະຊຸມສຸດຍອດສຸຂະພາບໂລກຄັ້ງນີ້ລິເລີ່ມຈັດຂຶ້ນຮ່ວມກັນໂດຍປະເທດອີຕາລີເຊິ່ງເປັນປະເທດປະທານກຸ່ມG20 ແລະຄະນະກຳມະການເອີຣົບໃນຮູບແບບຜ່ານທາງວິດີໂອ, ຕົ້ນຕໍໄດ້ປຶກສາຫາລືກັນກ່ຽວກັບບັນຫາຕ່າງໆເຊັ່ນ: ການຮ່ວມມືເພື່ອຮັບມືກັບສະພາບພະຍາດ, ການເພີ່ມທະວີການປ້ອງກັນການແຜ່ລະບາດຂອງພະຍາດຂະໜາດໃຫຍ່ໃນຕໍ່ໜ້າແລະອື່ນໆ.
ຄຳເຫັນ
0