ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ພຶດສະພານີ້, ກອງປະຊຸມບັນດິດສະຖາບັນວິທະຍາສາດຈີນແລະສະຖາບັນວິສະວະກຳຈີນ, ກອງປະຊຸມຜູ້ແທນທົ່ວປະເທດຂອງສະມາຄົມວິທະຍາສາດເຕັກນິກຈີນໄດ້ໄຂຂຶ້ນຢູ່ນະຄອນຫຼວງປັກກິ່ງ. ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສສຳຄັນໂດຍເນັ້ນໜັກວ່າ ຍຶດໝັ້ນໃນການຖືເອົາການເພິ່ງຕົນເອງແລະສ້າງຄວາມເຂັ້ມແຂງດ້ວຍຕົນເອງໃນດ້ານວິທະຍາສາດເປັນເສົາຄ້ຳດ້ານຍຸດທະສາດແຫ່ງການພັດທະນາຂອງຊາດ. ອີງໃສ່ໄລຍະການພັດທະນາໃໝ່ຂອງຈີນ,ຫັນໜ້າສູ່ວິທະຍາສາດເຕັກນິກນຳໜ້າຂອງໂລກ, ຫັນໜ້າສູ່ສະໜາມຮົບຫຼັກດ້ານເສດຖະກິດ,ຫັນໜ້າສູ່ຄວາມຕ້ອງການທີ່ສຳຄັນຂອງຊາດ, ຫັນໜ້າສູ່ຊີວິດແລະສຸຂະພາບຂອງປະຊາຊົນ. ລົງເລິກປະຕິບັດຍຸດທະສາດພັດທະນາປະເທດດ້ວຍວິທະຍາສາດແລະການສຶກສາ,ຍຸດທະສາດສ້າງປະເທດໃຫ້ເຂັ້ມແຂງດ້ວຍຜູ້ມີຄວາມຮູ້ຄວາມສາມາດ,ຍຸດທະສາດຂັບເຄື່ອນການພັດທະນາດ້ວຍການປະດິດສ້າງໃໝ່,ປັບປຸງລະບົບປະດິດສ້າງແຫ່ງຊາດໃຫ້ສົມບູນຂຶ້ນ, ເພື່ອບັນລຸເປົ້າໝາຍເພິ່ງຕົນເອງແລະສ້າງຄວາມເຂັ້ມແຂງດ້ວຍຕົນເອງດ້ວຍວິທະຍາສາດເຕັກນິກໃນລະດັບສູງ.
ທ່ານກ່າວເນັ້ນວ່າ: ການປະດິດສ້າງໃໝ່ບໍ່ຕ້ອງຈຳແນກສະຖານະພາບ, ວິລະຊົນແມ່ນບໍ່ຕ້ອງຈຳແນກຊີວະປະຫວັດ. ຄວນໃຫ້ຜູ້ນຳໜ້າດ້ານວິທະຍາສາດເຕັກນິກທີ່ຢາກສ້າງຜົນງານ,ສາມາດສ້າງຜົນງານໄດ້ ແລະມີຜົນສຳເລັດນັ້ນເປັນຜູ້ຊີ້ນຳໃນການພັດທະນາພາລະກິດ, ຄວນໃຫ້ພະນັກງານວິທະຍາສາດເຕັກນິກທີ່ມີຄວາມຮູ້ຄວາມສາມາດຢ່າງແທ້ຈິງສາມາດເສີມຂະຫຍາຍບົດບາດຂອງຕົນໃຫ້ມີປະສິດທິຜົນ.
ນອກນີ້, ຄຳເວົ້າບາງຕອນຂອງທ່ານສີຈິ້ນຜິງໄດ້ຮັບຄວາມເຫັນດີເຫັນພ້ອມແລະສ້າງຄວາມປະດັບໃຈຢ່າງເລິກເຊິ່ງໃຫ້ກັບບັນດາຜູ້ແທນທີ່ເຂົ້າຮ່ວມກອງປະຊຸມ. ໃນເວລາກ່າວເຖິງບັນຫາກ່ຽວກັບຜູ້ມີຄວາມຮູູ້ຄວາມສາມາດ, ທ່ານກ່າວວ່າ: “ເດັດຂາດບໍ່ໃຫ້ພະນັກງານວິທະຍະສາດເສຍເວລາຈຳນວນຫຼວງຫຼາຍເຂົ້າໃນກິດຈະກຳທີ່ໄຮ້ປະໂຫຍດຈຳນວນໜຶ່ງ, ການປະກວດແລະການຕີລາຄາທີ່ບໍ່ຈຳເປັນ ແລະກິດຈະກຳຕ່າງໆໃນລັກສະນະລັດທິຮູບການແລະລັດທິອາຍາສິດ! ”
ຄຳເວົ້າຂອງທ່ານສີຈິ້ນຜິງໄດ້ສ່ອງແສງໃຫ້ເຫັນເຖິງຄວາມປາຖະໜາຂອງຄົນທັງຫຼາຍ ເຊິ່ງໄດ້ຮັບສຽງຕົບມືຊົມເຊີຍຢ່າງຟົດສະໜັ່ນໃນທີ່ປະຊຸມ.
ຄຳເຫັນ
0