ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ກອງປະຊຸມສຳມະນາກ່ຽວກັບທິດສະດີພັກການເມືອງລັດທິມາກໂລກໄດ້ຈັດຂຶ້ນໂດຍຜ່ານຮູບແບບວີດີໂອ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ທ່ານທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດລາວ ແລະ ຜູ້ນຳພັກການເມືອງຫຼາຍປະເທດໄດ້ສະແດງຄວາມຊົມເຊີຍຕໍ່ກອງປະຊຸມຄັ້ງນີ້.
ລັດທິມາກແມ່ນທິດສະດີກ່ຽວກັບການປົດປ່ອຍຊົນຊັ້ນກຳມະຊີບທົ່ວໂລກ ແລະ ມວນມະນຸດໄດ້ຢ່າງສິ້ນເຊີງ, ໄດ້ເປີດເຜີຍກົດເກນການພັດທະນາສັງຄົມມະນຸດ, ໄດ້ຊີ້ແຈງເສັ້ນທາງໃຫ້ມວນມະນຸດໃນການສະແຫວງຫາການປົດປ່ອຍຕົນເອງ, ແລະຊຸກຍູ້ຂະບວນການອະລິຍະທຳຂອງມະນຸດ. ລັດທິມາກບໍ່ພຽງແຕ່ໄດ້ປ່ຽນແປງໂລກຢ່າງເລິກເຊິ່ງເທົ່ານັ້ນ, ຍັງໄດ້ປ່ຽນແປງປະເທດຈີນຢ່າງເລິກເຊິ່ງອີກດ້ວຍ. ນັບແຕ່ການເຜີຍແຜ່ “ຖະແຫຼງການພັກກອມມູນິດ” ມາຮອດປະຈຸບັນ, ເວລາໄດ້ຜ່ານໄປ 170 ກວ່າປີແລ້ວ, ສັງຄົມມະນຸດໄດ້ເກີດມີການປ່ຽນແປງແບບໜ້າມືເປັນຫຼັງມື, ແຕ່ຫຼັກມູນທົ່ວໄປທີ່ລະບຸໄວ້ໃນທິດສະດີລັດທິມາກຍັງຖືກຕ້ອງທີ່ສຸດ.
ປີນີ້ແມ່ນປີທີ່ພັກກອມມູນິດຈີນສ້າງຕັ້ງຂຶ້ນຄົບຮອບ 100 ປີ. ນັບແຕ່ມື້ສ້າງຕັ້ງຂຶ້ນມາ, ພັກກອມມູນິດຈີນກໍໄດ້ຖືເອົາລັດທິມາກເປັນແນວຄິດຊີ້ນຳ, ຍຶດໝັ້ນໃນການຖືເອົາຫຼັກມູນພື້ນຖານຂອງລັດທິມາກເຊື່ອມໂຍງກັບສະພາບຄວາມເປັນຈິງຂອງປະເທດຈີນ, ນຳພາປະຊາຊາດຈີນກ້າວຂຶ້ນສູ່ເສັ້ນທາງຍາດເອົາຄວາມເປັນເອກະລາດແຫ່ງຊາດ ແລະ ປົດປ່ອຍປະຊາຊົນທ່າມກາງສະພາບການທີ່ມີຄວາມຫຍຸ້ງຍາກລຳບາກທັງພາຍໃນ ແລະ ຕ່າງປະເທດ; ທັງຊຸກຍູ້ປະເທດຈີນດຳເນີນການປະຕິຮູບ ແລະເປີດປະຕູສູ່ພາຍນອກ ຈຶ່ງສາມາດກ້າວເດີນໄປໜ້າໄດ້ຢ່າງວ່ອງໄວທັນກັບຍຸກສະໄໝ. ຫຼັງຈາກກ້າວເຂົ້າສູ່ຍຸກໃໝ່, ຜົນງານອັນໃໝ່ທີ່ລັດທິມາກເຊື່ອມໂຍງກັບສະພາບຄວາມເປັນຈິງຂອງປະເທດຈີນກໍຄື ແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່.
ປະຈຸບັນ, ສະພາບການຂອງໂລກມີການຜັນແປໄວຂຶ້ນ, ຄວາມແຕກໂຕນກັນດ້ານການພັດທະນາລະຫວ່າປະເທດທີ່ພວມພັດທະນາກັບປະເທດທີ່ພັດທະນາແລ້ວພວມຂະຫຍາຍກວ້າງອອກເທື່ອລະກ້າວ, ບາງຊົນຊາດຍັງພະຍາຍາມສູ້ຊົນຢ່າງລຳບາກເພື່ອປົດປ່ອຍຊາດ ແລະ ຄວາມເປັນເອກະລາດຂອງຊົນຊາດຕົນ, ສັງຄົມມະນຸດກໍພວມຜະເຊີນໜ້າກັບການແຜ່ລະບາດຂອງພະຍາດໂຄວິດ -19 ຢ່າງຮຸນແຮງ. ປະເທດລາວກໍແມ່ນປະເທດສັງຄົມນິຍົມທີ່ຍຶດໝັ້ນຖືເອົາລັດທິມາກເປັນທິດຊີ້ນຳ. ໃນຂະບວນການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດນັ້ນ, ພັກປະຊາຊົນປະຕິວັດລາວໄດ້ຍຶດໝັ້ນການຖືເອົາລັດທິມາກ ເຊື່ອມໂຍງເຂົ້າກັບສະພາບຄວາມເປັນຈິງຂອງປະເທດຕົນ, ໄດ້ສ້າງແນວຄິດໄກສອນ ພົມວິຫານ ແລະໝູນໃຊ້ເຂົ້າໃນພຶດຕິກຳຕົວຈິງ, ກາຍເປັນແນວຄິດຊີ້ນຳ ພາລະກິດພັດທະນາປະເທດຊາດ.
ສະນັ້ນຈຶ່ງເຫັນໄດ້ວ່າ, ການຍຶດໝັ້ນລັດທິມາກເພື່ອສ້າງຄວາມເຂັ້ມແຂງທາງແນວຄິດ, ຊຸກຍູ້ທິດສະດີວິທະຍາສາດປະສົມປະສານກັບສະພາບຄວາມເປັນຈິງ ມູນເຊື້ອວັດທະນະທຳປະຫວັດສາດ, ແລະຄວາມຮຽກຮ້ອງຂອງຍຸກສະໄໝຢ່າງແໜ້ນແຟ້ນ, ເສີມສ້າງລະບົບທິດສະດີໃຫ້ອຸດົມສົມບູນຂຶ້ນ ແລະ ພັດທະນາດ້ວຍການປະດິດສ້າງໃໝ່ຢ່າງບໍ່ຢຸດຢັ້ງ, ຊີ້ນຳພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ,ແມ່ນມີຄວາມໝາຍສຳຄັນຢ່າງຍິ່ງໃນທາງທິດສະດີ ແລະ ສະພາບຄວາມເປັນຈິງຕໍ່ກັບປະເທດລາວ ກໍຄືປະເທດຈີນທີ່ຢູ່ໃນໄລຍະພັດທະນາຢ່າງວ່ອງໄວ.
(ຂຽນໂດຍທ່ານ ອະນຸພອນ ນັກຂ່າວສະຖານີວິທະຍຸໂທລະພາບສູນກາງຈີນ)
ຄຳເຫັນ
0