ການ​ເຕີບ​ໃຫຍ່ຢ່າງ​ມີ​ສຸ​ຂະ​ພາບ​ແຂງ​ແຮງ​ຂອງ​ເດັກ​ນ້ອຍ​ເຍົາ​ວະ​ຊົນ​ເປັນ​ເລື່ອງ​​ທີ່​ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ຈີນເປັນ​ຫ່ວງ​ເປັນ​ໃຍ​ທີ່​ສຸດ​. ທ່ານ​ໄດ້ໄປຢາມ​ເດັກ​ນ້ອຍ​ທັງຫຼາຍ​ເລື້ອຍໆ ເພື່ອ​ສະ​ແດງ​ຄວາມ​ຮັກ​ແພງ​ເອົາ​ໃຈ​ໃສ່ແລະ​​ຝາກຄວາມ​ຫວັງ​ໃຫ້​ກັບ​ພວກ​ເດັກ​ນ້ອຍ ເຊິ່ງ​ເດັກ​ນ້ອຍ​ທັງ​ຫຼາຍ​ມັກ​ເອີ້ນ​ທ່ານດ້ວຍ​ຄວາມ​ສະ​ໜິດ​ສະ​ໜົມ​ວ່າ “ເພື່ອນ​ໃຫຍ່”.

ທ່ານ​ສີ​ຈິ້ນ​ຜິງ​ກຳ​ເນີດ​ໃນ​ຄອບ​ຄົວ​​ທີ່​ມີ​ລະ​ບຽບ​ອັນ​ເຄັ່ງ​ຄັດເຂັ້ມ​ງວດ​, ຕອນ​ຍັງ​ນ້ອຍ​ກໍ​ໄດ້​ໃຊ້​ຊີ​ວິດ​ແບບ​ປະ​ຢັດ​ມັດ​ທະ​ຍັດ​ແລະ​ລຽບ​ງ່າຍ. ປີ 2003, ທ່ານ​ສີ​ຈິ້ນ​ຜິງ​ໄດ້ຫວນ​ຄືນ​ອະ​ດີດໃນ​ເວ​ລາ​ໃຫ້​ສຳ​ພາດ​ຕໍ່​ໂທ​ລະ​ພາບ​ສູນ​ກາງ​ຈີນຫຼື CCTV ​ວ່າ: “ເຄື່ອງ​ນຸ່ງ​ຂອງ​ພວກ​ຂ້າ​ພະ​ເຈົ້າ​ຕາມ​ປົກ​ກະ​ຕິ​ແລ້ວ​ແມ່ນ​ມີ​ຮອຍ​ຕາບຫຼາຍ, ແລະ​ຕ້ອງ​ໃສ່​ເຄື່ອງ​ນຸ່ງ​ຂອງ​ອ້າຍ​ເອື້ອຍ​ອີກ.”ທ່ານ​ສີ​ຈິ້ນ​ຜິງ​ມີ​ເອື້ອຍ 4 ຄົນ​,ມີ​ອ້າຍ1ຄົນແລະ​ນ້ອງ​ຊາຍ​ອີກ1ຄົນ, ສະ​ນັ້ນ, ຍາມ​ຍັງ​ນ້ອຍ, ສ່ວນຫຼາຍທ່ານ​ໄດ້​ນຸ່ງເຄື່ອງ​ເກົ່າ​ຂອງ​ເອື້ອຍ. ທ່ານ​ກ່າວ​ວ່າ: “​ການ​ໃສ່ເສື້ອດອກ​ລາຍ​ແລະ​ເກີບ​ຜ້າ​ລາຍ, ຂ້າ​ພະ​ເຈົ້າ​ບໍ່​ຍອມ​ເດັດ​ຂາດ, ແຕ່​ກໍ​ຈຳ​ເປັນ​ຕ້ອງ​ໃສ່.”