ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 4 ມິຖຸນານີ້, ທ່ານອັນໂຕນີ ບລິນເກນ ລັດຖະມົນຕີກະຊວງການຕ່າງປະເທດອາເມຣິກາໄດ້ອອກຖະແຫຼງການ ໂດຍໄດ້ກ່າວຖ້ອຍຄວາມຜິດພາດຕໍ່ສະພາບສິດທິມະນຸດຂອງເຂດບໍລິຫານພິເສດຮົງກົງຂອງຈີນ ໂດຍກ່າວວ່າ: ຈະ “ຢືນຄຽງຂ້າງ” ປະຊາຊົນຈີນ. ນີ້ຈັ່ງແມ່ນເປັນຄຳເວົ້າທີ່ເປັນການສຽດສີເຂົາເອງແທ້ໆ! ທ່ານອັນໂຕນີ ບລິນເກນ, ທ່ານບໍ່ໄດ້ເຫັນຊັ້ນບໍ, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາໃນປັດຈຸບັນແມ່ນຫຼາຍກວ່າ 6 ແສນຄົນແລ້ວ, ເປັນຫຍັງທ່ານຄືບໍ່ສົນໃຈນຳສະພາບສິດທິມະນຸດຂອງປະຊາຊົນອາເມຣິກາແດ?
ສະພາບສິດທິມະນຸດດີຫຼືບໍ່ດີ, ປະຊາຊົນພາຍໃນປະເທດມີສິດປະກອບຄຳເຫັນທີ່ສຸດ. ນັບແຕ່ຮົງກົງກັບຄືນສູ່ອ້ອມກອດຂອງປະເທດຈີນໃນປີ 1997 ເປັນຕົ້ນມາ, ສິດທິມະນຸດຂອງປະຊາຊົນຮົງກົງໄດ້ຮັບການປົກປ້ອງຢ່າງເຕັມສ່ວນຈາກກົດໝາຍພື້ນຖານຂອງຮົງກົງ ແລະ ກົດໝາຍອື່ນໆ. ນັບແຕ່ໄດ້ປະຕິບັດກົດໝາຍຮັກສາຄວາມໝັ້ນຄົງແຫ່ງຊາດຢູ່ຮົງກົງໃນປີຜ່ານມາເປັນຕົ້ນມາ, ສັງຄົມຮົງກົງທີ່ເຄີຍເກີດມີຄວາມປັ່ນປ່ວນວຸ້ນວາຍໃນເມື່ອກ່ອນກໍ່ໄດ້ຟື້ນຟູໃຫ້ມີສະຖຽນລະພາບ, ປະຊາຊົນຮົງກົງກໍມີຮອຍຍິ້ມຫຼາຍຂຶ້ນ ແລະບໍ່ຢ້ານກົວ “ພວກຈະລາຈົນ” ອີກ. ສ່ວນປີນີ້, ໄດ້ປັບປຸງລະບຽບການເລືອກຕັ້ງຂອງຮົງກົງໃຫ້ສົມບູນຂຶ້ນ ເຊິ່ງເປັນການຮັບປະກັນໃຫ້ “ປະຊາຊົນຜູ້ຮັກຊາດປົກຄອງຮົງກົງ”, ປະຊາຊົນຮົງກົງໄດ້ມີສ່ວນຮ່ວມໃນທາງການເມືອງຫຼາຍຂຶ້ນກວ່າເກົ່າ, ສິດທິ ແລະ ເສລີພາບໄດ້ຮັບການປົກປ້ອງດີກວ່າເກົ່າ.
ສິ່ງທີ່ໜ້າເສຍດາຍນັ້ນກໍຄື: ນັກການເມືອງອາເມຣິກາຈຳນວນໜຶ່ງໄດ້ທຳທ່າເບິ່ງບໍ່ເຫັນເລື່ອງຈິງເຫຼົ່ານີ້, ໄດ້ແຊກແຊງວຽກງານພາຍໃນຮົງກົງ ກໍຄືວຽກງານພາຍໃນຂອງຈີນດ້ວຍຂໍ້ອ້າງ “ສິດທິມະນຸດ” ແລະ “ປະຊາທິປະໄຕ” ອີກແລ້ວອີກຕື່ມ. ສິ່ງທີ່ເຮັດໃຫ້ຊາວໂລກຕົກຕະລຶງນັ້ນກໍຄື: ປະເທດທີ່ມັກອ້າງຕົນເອງວ່າເປັນ “ຜູ້ອາລັກຂາສິດທິມະນຸດ”, ແຕ່ຢູ່ພາຍໃນປະເທດຂອງເຂົາເອງພັດມີສະພາບສິດທິມະນຸດທີ່ຂີ້ຮ້າຍທີ່ສຸດ, ແຕ່ບໍ່ຮູ້ວ່າ ເປັນຫຍັງເຂົາເຈົ້າມັກໃຊ້ສິດຊີ້ນີ້ຊີ້ນັ້ນຕໍ່ສະພາບສິດທິມະນຸດຂອງປະເທດອື່ນ?
ໜຶ່ງປີກວ່າມານີ້, ສະພາບການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ຫຼາຍບັນຫາທີ່ຄົງຄ້າງໃນສັງຄົມອາເມຣິກາມາເປັນເວລາດົນນານແລ້ວນັ້ນ ເຊັ່ນ: ບັນຫາການຈຳແນກເຊື້ອຊາດຜິວພັນ, ຄວາມແຕກໂຕນກັນລະຫວ່າງຜູ້ຮັ່ງມີກັບຜູ້ທຸກຍາກ ແລະບັນຫາອື່ນໆ ໄດ້ພົ້ນເດັ່ນຂຶ້ນ ແລະ ເສື່ອມໂຊມລົງເລື້ອຍໆ. ຕົວເລກຂໍ້ມູນໄດ້ສະແດງໃຫ້ເຫັນວ່າ: ອັດຕາການຕິດເຊື້ອພະຍາດໂຄວິດ-19 ຂອງຊາວອາເມຣິກາເຊື້ອສາຍອາຟຣິກາແມ່ນ 3 ເທົ່າຂອງຄົນຜິວຂາວ, ອັດຕາການຕາຍເປັນ 2 ເທົ່າຂອງຄົນຜິວຂາວ, ອັດຕາການຖືກເຈົ້າໜ້າທີ່ຕຳຫຼວດຍິງຕາຍເປັນ 3 ເທົ່າຂອງຄົນຜິວຂາວ. ເດືອນພຶດສະພາປີຜ່ານມາ, ທ້າວ ຈອສ ຟລອຍ ຊາວອາເມຣິກາເຊື້ອສາຍອາຟຣິກາ ໄດ້ຖືກເຈົ້າໜ້າທີ່ຕຳຫຼວດຄົນຜິວຂາວເອົາຫົວເຄົ່າເຕັງຄໍຈົນເຖິງຂັ້ນຫາຍໃຈບໍ່ອອກແລ້ວເສຍຊີວິດ, ເຫດການນີ້ໄດ້ພາໃຫ້ຢູ່ອາເມຣິກາເກີດເຫດການຈະລາຈົນດ້ານເຊື້ອຊາດຜິວພັນຂະໜາດໃຫຍ່ເລື້ອຍໆ. ຄົນທັງຫຼາຍຍັງໄດ້ເຫັນວ່າ: ຊີວິດຂອງປະຊາຊົນຄົນຊັ້ນຕ່ຳຢູ່ອາເມຣິກາໄດ້ຮັບຄວາມທຸກທໍລະມານຫຼາຍ. ຜົນການຄົ້ນຄວ້າຂອງມະຫາວິທະຍາໄລຊີກາໂກຂອງອາເມຣິກາສະແດງໃຫ້ເຫັນວ່າ: ອັດຕາຄວາມທຸກຍາກໃນເດືອນມີນາປີນີ້ຢູ່ອາເມຣິກາມີເຖິງ 11,7% ແລະ ເປັນສະຖິຕິສູງສຸດນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ.
ວຽກງານຮົງກົງແມ່ນວຽກງານພາຍໃນຂອງຈີນ, ນັກການເມືອງອາເມຣິກາບໍ່ຄວນມາຊີ້ນັ້ນຊີ້ນີ້ກ່ຽວກັບວຽກງານຮົງກົງ! ທາງທີ່ດີທີ່ສຸດ ທ່ານອັນໂຕນີ ບລິນເກນຄວນຢືນຄຽງຂ້າງປະຊາຊົນອາເມຣິກາຈະດີກວ່າ, ແກ້ໄຂບັນຫາສັບສົນວຸ້ນວາຍຂອງປະເທດຕົນຈະດີກວ່າມາຫຍຸ້ງກັບວຽກງານພາຍໃນຂອງປະເທດອື່ນ.
ຄຳເຫັນ
0