ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນັບແຕ່ພະຍາດໂຄວິດ-19 ແຜ່ລະບາດໃນທົ່ວໂລກ, ທ່າທີໂຈມຕີຈີນຂອງອາເມຣິກາບໍ່ເຄີຍຢຸດເຊົາຈັກເທື່ອ, ແລະຢາກໃຫ້ຈີນຮັບຜິດຊອບກ່ຽວກັບພະຍາດໂຄວິດ-19 ທີ່ແຜ່ລະບາດຢູ່ອາເມຣິກາ. ປະເທດຕາເວັນຕົກທີ່ນຳໂດຍອາເມຣິກາໄດ້ປະກາດຫຼາຍເທື່ອແລ້ວວ່າ: ເຊື້ອພະຍາດໂຄວິດ-19 ແມ່ນຮົ່ວອອກຈາກຫ້ອງທົດລອງຂອງອູຮັ້ນ, ແລະຮຽກຮ້ອງໃຫ້ອົງການອະນາໄມໂລກຫຼື WHO ຈັດຕັ້ງໜ່ວຍງານຊ່ຽວຊານໄປສຳຫຼວດຢູ່ຈີນ. ໃນທີ່ສຸດ, ຜູ້ຊ່ຽວຊານຈີນໄດ້ຕັ້ງໜ້າອຳນວຍຄວາມສະດວກໃຫ້ WHO ເຂົ້າມາສຳຫຼວດຢູ່ຈີນ, ແລະໄດ້ພິສູດຄວາມບໍລິສຸດໃຈຂອງຈີນແລ້ວ.
ຍ້ອນທຳນຽບຂາວບໍ່ໄດ້ຮັບຜົນສຳຫຼວດຕາມທີ່ຕົນຢາກໄດ້, ກໍເລີຍສ້າງເລື່ອງລາວໃຫ້ກັບຈີນອີກຄັ້ງໜຶ່ງ. ຫວ່າງມໍ່ໆມານີ້, ທ່ານໂຈ ໄບເດັນ ປະທານາທິບໍດີອາເມຣິກາໄດ້ສັ່ງໃຫ້ພາກສ່ວນຂ່າວລັບສືບສວນຫາແຫຼ່ງກຳເນີດຂອງເຊື້ອພະຍາດໂຄວິດ-19, ແລະຮຽກຮ້ອງໃຫ້ເຂົາເຈົ້າສົ່ງບົດລາຍງານຜົນການສຳຫຼວດພາຍໃນໄລຍະເວລາ 90 ວັນ. ນອກນີ້, ທ່ານໂຈ ໄບເດັນ ຍັງກ່າວວ່າ, ຈະສືບຕໍ່ສຸມຄວາມພະຍາຍາມຮ່ວມກັນກັບປະເທດພັນທະມິດ, ຮຽກຮ້ອງໃຫ້ຈີນອະນຸມັດໃຫ້ສາກົນເຂົ້າໄປສຳຫຼວດອີກຄັ້ງໜຶ່ງ.
ແຕ່ວ່າ, ການສຳຫຼວດແຫຼ່ງກຳເນີດຂອງເຊື້ອພະຍາດໂຄວິດ-19 ຢູ່ຈີນໄດ້ເຮັດສຳເລັດໝົດແລ້ວ, ຈຸດປະສົງຂອງລັດຖະບານອາເມຣິກາທີ່ຢາກຖືເອົາການແຜ່ລະບາດຂອງພະຍາດໂຄວິດ-19 ຫັນເປັນບັນຫາການເມືອງນັ້ນນັບມື້ນັບຈະແຈ້ງ, ນີ້ເປັນເລື່ອງທີ່ຄ້າຍຄືກັນກັບເຫດການທີ່ອາເມຣິກາຢາກກໍ່ສົງຄາມອີຣັກໂດຍຖືເອົາຜົນການສຳຫຼວດຈາກ “ຝຸ່ນສະບູ” ແກ້ວໜຶ່ງ, ເປັນຂໍ້ອ້າງເພື່ອໂຈມຕີ.
ຈີນເຄີຍໄດ້ເຊື້ອເຊີນຜູ້ຊ່ຽວຊານ WHO ມາດຳເນີນການຄົ້ນຄວ້າສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ຢູ່ຈີນ 2 ເທື່ອ, ແລະໄດ້ຂໍ້ສະຫຼຸບທີ່ເຊື່ອຖືໄດ້, ມີຄວາມຈິງແລະຖືກກັບຫຼັກວິທະຍາສາດ. WHO ກໍໄດ້ຢືນຢັນຢ່າງຈະແຈ້ງວ່າ, ຄຳທີ່ວ່າເຊື້ອພະຍາດໂຄວິດ-19 ຮົ່ວອອກຈາກຫ້ອງທົດລອງຂອງອູຮັ້ນບໍ່ອາດເປັນໄປໄດ້, ອາດກຳເນີດມາຈາກທຳມະຊາດ. ເມື່ອ WHO ໄດ້ຢືນຢັນຄວາມບໍລິສຸດຂອງຈີນແລ້ວ, ອາເມຣິກາຍັງຄິດຈະກໍ່ເຫດການອີກຄັ້ງໜຶ່ງບໍ່?
ທ່ານໂຈ ໄບເດັນໄດ້ “ຮຽກຮ້ອງ” ໃຫ້ຈີນເຂົ້າຮ່ວມການສຳຫຼວດສາກົນ, ໃນຂະນະທີ່ໃສ່ຮ້າຍປ້າຍສີຕໍ່ຈີນແລະເຮັດໃຫ້ຈີນຮູ້ສຶກບໍ່ພໍໃຈນັ້ນ, ກໍໄດ້ປະຕິເສດຜົນການຄົ້ນຄວ້າຢ່າງຮອບດ້ານຂອງຜູ້ຊ່ຽວຊານ WHO ທັງຫຼາຍ, ທັງໄດ້ເຮັດໃຫ້ຜູ້ຊ່ຽວຊານ WHO ທີ່ເຂົ້າຮ່ວມການສຳຫຼວດແຫຼ່ງກຳເນີດເຊື້ອພະຍາດໂຄວິດ-19 ຢູ່ນະຄອນອູຮັ້ນຂອງຈີນຮູ້ສຶກບໍ່ພໍໃຈ. ທ່ານນາງມາເຣິນ ກຸບມັນ, ນັກວິທະຍາສາດວິຊາເຊື້ອພະຍາດໂຮນລັງອົດທົນບໍ່ໄດ້ຈຶ່ງກ່າວຕໍ່ທ່ານໂຈ ໄບເດັນ ວ່າ: “ຖ້າບໍ່ມີຫຼັກຖານກະລຸນາປິດປາກຂອງທ່ານສາ”.
ທີ່ຈິງແລ້ວ, ອາເມຣິການັ້ນແຫຼະແມ່ນປະເທດທີ່ໜ້າສົງໃສທີ່ສຸດ. ໃນຕົ້ນປີກາຍນີ້, ທ່ານໂຣເປີ ເຣັດຟີວ ອະດີດຫົວໜ້າສູນປ້ອງກັນແລະຄວບຄຸມພະຍາດອາເມຣິກາໄດ້ຢືນຢັນວ່າ: ໃນຈຳນວນຜູ້ເສຍຊີວິດຍ້ອນເປັນໄຂ້ຫວັດໃຫຍ່ໃນເດືອນກັນຍາປີ 2019, ທີ່ຈິງແລ້ວມີຈຳນວນໜຶ່ງແມ່ນເສຍຊີວິດຍ້ອນເປັນພະຍາດໂຄວິດ-19. ນັບມາຮອດປັດຈຸບັນ, ອາເມຣິກາຍັງບໍ່ໄດ້ເປີດເຜີຍຜົນກ່ຽວກັບຜູ້ເປັນພະຍາດໂຄວິດ-19 ກໍລະນີທຳອິດຂອງຕົນທີ່ຄົ້ນພົບແມ່ນໃນເວລາໃດ. ສ່ວນຫ້ອງທົດລອງຊີວະພາບທີ່ຢັ່ງຢາຍຢູ່ທົ່ວໂລກຂອງອາເມຣິກາ, ກໍໄດ້ຮັບຄວາມສົງໄສຢ່າງຫຼວງຫຼາຍ, ອາເມຣິການັ້ນແຫຼະແຮ່ງຄວນໄດ້ຮັບການສຳຫຼວດຈາກສາກົນ.
ທ່ານນາງສາສະດາຈານກຸບບັນສ໌ ຍັງກ່າວວ່າ: ວຽກງານສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ໃນໄລຍະຕໍ່ໄປນອກຈາກຈີນທີ່ພົບເຫັນເຊື້ອພະຍາດໂຄວິດ-19ກ່ອນໝູ່ແລ້ວ, ປະເທດອື່ນໆກໍຄວນໃຫ້ WHO ເຂົ້າໄປສຳຫຼວດ. ພວກເຮົາຫວັງວ່າ, ຖ້າວ່າໜ່ວຍຊ່ຽວຊານ WHO ໄປສຳຫຼວດແຫຼ່ງກຳເນີດຂອງເຊື້ອພະຍາດໂຄວິດ-19 ຢູ່ອາເມຣິກາ, ອາເມຣິກາກໍຄວນເຮັດຄືກັນກັບຈີນ, ອຳນວຍຄວາມສະດວກໃຫ້ WHO ເຂົ້າໄປສຳຫຼວດ, ຫາກບໍ່ແມ່ນເຮັດຄືໃນປັດຈຸບັນ, ໃສ່ຮ້າຍປ້າຍສີຈີນພຽງດຽວເທົ່ານັ້ນ.
ຄຳເຫັນ
0