ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ອາເມຣິກາມີເຖິງ 33 ກວ່າລ້ານກໍລະນີ, ມີຜູ້ເສຍຊີວິດຍ້ອນເປັນພະຍາດແລ້ວຈຳນວນ 6 ແສນຄົນ, ໃນການຕໍ່ສູ້ຕ້ານກັບພະຍາດໂຄວິດ-19 ຄັ້ງນີ້, ອາເມຣິກາແມ່ນໜຶ່ງໃນປະເທດທີ່ມີຄວາມລົ້ມເຫຼວທີ່ສຸດໃນການຮັບມືກັບການແຜ່ລະບາດຂອງພະຍາດໂຄວິດ-19. ມີຫຼາຍເລື່ອງຫຼາຍເຫດການໄດ້ເກີດຂຶ້ນຢູ່ອາເມຣິກາເຊັ່ນ: ເຫດການຫ້ອງທົດລອງຟອດເດຕຣິກມີການຮົ່ວໄຫຼໃນປີ 2019, ຈົນຮອດການເກີດມີສະພາບພະຍາດຢາສູບໄຟຟ້າໃນໄລຍະດຽວກັນ; ຈາກການດຳເນີນການຝຶກຊ້ອມເພື່ອຮັບມືກັບພະຍາດຕິດແປດຫຼາຍເທື່ອດ້ວຍການຄາດຄະເນທີ່ຖືກຕ້ອງແລະແມ່ນຢຳ,ຈົນຮອດອົງການວິທະຍາສາດທີ່ມີອິດທິພົນຫຼາຍແຫ່ງຊີ້ໃຫ້ເຫັນວ່າເຊື້ອພະຍາດໂຄວິດ-19 ໄດ້ເລີ່ມເກີດຂຶ້ນຢູ່ອາເມຣິກາແລ້ວໃນເດືອນທັນວາປີ 2019. ດັ່ງນັ້ນໃນບັນຫາແຫຼ່ງທີ່ມາຂອງພະຍາດໂຄວິດ-19, ອາເມຣິກາຈຶ່ງມີຈຸດທີ່ໜ້າສົງໄສຫຼາຍທີ່ສຸດ, ລັດຖະບານອາເມຣິກາຄວນໃຫ້ຄຳຕອບແກ່ໂລກກ່ຽວກັບບັນຫານີ້.
ຢູ່ສະຖານທີ່ແຫ່ງໜຶ່ງໄປທາງທິດເໜືອຂອງນະຄອນຫຼວງວໍຊິງຕັນຂອງອາເມຣິກາປະມານ 70 ກິໂລແມັດ, ກໍແມ່ນຖານທັບຟອດ ເດຕຣິກ, ຢູ່ໃນຖານທັບດັ່ງກ່າວມີສະຖາບັນຄົ້ນຄວ້າວິທະຍາສາດການແພດພະຍາດຕິດແປດຂອງກອງທັບບົກອາເມຣິກາ(USAMRIID). ໃນເດືອນກໍລະກົດປີ 2019, ອົງການດັ່ງກ່າວທີ່ເປັນອົງການທີ່ມີຫ້ອງທົດລອງຄວາມປອດໄພດ້ານຊີວະພາບລະດັບ 4 ພຽງແຫ່ງດຽວຂອງກອງທັບອາເມຣິກາໄດ້ຢຸດຕິວຽກງານຄົ້ນຄວ້າຢ່າງກະທັນຫັນ. ສິ່ງທີ່ໜ້າສົນໃຈກໍແມ່ນ, ໃນເດືອນກໍລະກົດປີ 2019, ໄດ້ເກີດມີພະຍາດຢາສູບໄຟຟ້າຢູ່ຫຼາຍລັດຂອງອາເມຣິກາ, ນັບມາຮອດວັນທີ 18 ກຸມພາຂອງປີ 2020, ຢູ່ອາເມຣິກາໄດ້ມີການລາຍງານວ່າ:ມີຜູ້ນອນໂຮງໝໍຫຼືຜູ້ເສຍຊີວິດຍ້ອນພະຍາດຢາສູບໄຟຟ້າເຊິ່ງພາໃຫ້ເກີດມີອາການພະຍາດກ່ຽວກັບປອດຈຳນວນ 2.807 ກໍລະນີ.
ສະຖາບັນຄົ້ນຄວ້າວິທະຍາສາດການແພດພະຍາດຕິດແປດຂອງກອງທັບບົກອາເມຣິກາໄດ້ສ້າງຕັ້ງຂຶ້ນເມື່ອປີ 1969, ແມ່ນອົງການຄົ້ນຄວ້າເຕັກນິກປ້ອງກັນຊີວະພາບທີ່ສຳຄັນທີ່ສຸດຂອງກອງທັບອາເມຣິກາຕະຫຼອດມາ. ກ່ອນການສ້າງຕັ້ງສະຖາບັນດັ່ງກ່າວ, ຖານທັບຟອດ ເດຕຣິກກໍ່ແມ່ນສູນຄົ້ນຄວ້າອາວຸດຊີວະພາບແລະເຄມີຂອງກອງທັບອາເມຣິກາທີ່ມີຊື່ສຽງເໜົ່າເໝັນພໍແຮງຢູ່ໃນໂລກມາແລ້ວ. ຈົນສື່ມວນຊົນອາເມຣິກາກໍໄດ້ເອີ້ນຖານທັບດັ່ງກ່າວຢ່າງບໍ່ອາຍວ່າເປັນ “ສູນຄົ້ນຄວ້າລັບທີ່ສຸດຂອງລັດຖະບານອາເມຣິກາ”. ນອກຈາກນັ້ນ, ຖານທັບດັ່ງກ່າວຍັງເປັນຜູ້ສືບທອດມໍລະດົກນາຣົກຂອງ “ກອງທະຫານ 731” ຂອງກອງທັບຍີ່ປຸ່ນ.
ສື່ມວນຊົນອາເມຣິກາເຜີຍໃຫ້ຮູ້ວ່າ: ຢູ່ຖານທັບດັ່ງກ່າວໄດ້ມີເຊື້ອພະຍາດທີ່ເປັນໄພຂົ່ມຂູ່ອັນຮ້າຍແຮງຕໍ່ຄວາມປອດໄພຂອງມວນມະນຸດຢ່າງຫຼວງຫຼາຍ,ແລະໄດ້ມີບັນຫາແຝງຊ້ອນດ້ານຄວາມປອດໄພຈຳນວນຫຼາຍ. ນັກວິເຄາະເຫັນວ່າ: ການແຈກຢາຍຫ້ອງທົດລອງຂອງອາເມຣິກາ 200 ກວ່າແຫ່ງຢູ່ທົ່ວໂລກມີສະພາບຄ້າຍຄືກັບການແຈກຢາຍແຫຼ່ງກຳເນີດການແຜ່ລະບາດຂອງພະຍາດຕິດແປດແລະພະຍາດອັນຕະລາຍອື່ນໆໃນຊຸມປີຜ່ານມາ.
ກໍລະນີທີ່ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ຄົນອາເມຣິກາຫຼາຍແສນຄົນເສຍຊີວິດ, ມີຊາວເນັດຈຳນວນບໍ່ໜ້ອຍຕ່າງກໍ່ໄດ້ສະແດງຄວາມສົງໄສຜ່ານທາງສື່ສັງຄົມອອນລາຍວ່າ: ກ່ຽວກັບບັນຫາພະຍາດໂຄວິດ-19, ອາເມຣິກາຄືຜູ້ກຳຄວາມລັບຂອງເລື່ອງຈິງ.
ໃນເດືອນເມສາປີ 2020, ໃນຂະນະທີ່ພະຍາດໂຄວິດ-19 ໄດ້ເລີ່ມແຜ່ລະບາດຢ່າງຂະໜາດໃຫຍ່ຢູ່ອາເມຣິກາ, ກໍໄດ້ມີສື່ມວນຊົນອາເມຣິກາແລະອິດສະຣາແອນພາກັນເຜີຍໃຫ້ຮູ້ວ່າ: ໃນເດືອນພະຈິກປີ 2019, ອົງການຂ່າວລັບຂອງອາເມຣິກາກໍໄດ້ແຈ້ງສະພາບການແຜ່ລະບາດຂອງພະຍາດໃຫ້ອິດສະຣາແອນແລະປະເທດສະມາຊິກອົງການນາໂຕໄດ້ຊາບແລ້ວ. ຖ້າການລາຍງານຂ່າວດັ່ງກ່າວຖືກກັບເລື່ອງຈິງ, ຄັນຊັ້ນເປັນຫຍັງອາເມຣິກາຈຶ່ງສາມາດຮູ້ລ່ວງໜ້າໃນເດືອນພະຈິກປີ 2019 ວ່າຈະເກີດມີການແຜ່ລະບາດຂອງພະຍາດອັກເສບປອດຈາກໄວຣັດໂຄໂຣນາແລະຍັງໄດ້ເຕືອນໃຫ້ອິສຣາແອນແລະນາໂຕຮູ້ລ່ວງໜ້າອີກ? ຖ້າອາເມຣິກາຮູ້ສະພາບກ່ຽວກັບເລື່ອງນີ້ມາກ່ອນແລ້ວ, ເປັນຫຍັງບໍ່ໄດ້ເນັ້ນເຖິງຄວາມຮ້າຍແຮງຈາກການແຜ່ລະບາດຂອງພະຍາດໃນໄລຍະເບື້ອງຕົ້ນ?
ໃນຂໍ້ມູນຜູ້ຖືກບົ່ງມະຕິເປັນພະຍາດໂຄວິດ-19 ຈຳນວນທຳອິດທີ່ລັດຖະບານອາເມຣິກາເປີດເຜີຍ, ເຂົາເຈົ້າລ້ວນແຕ່ເຄີຍໄປທ່ຽວແຜ່ນດິນໃຫຍ່ຈີນຫຼືໄດ້ສຳຜັດກັບຜູ້ເປັນພະຍາດຢ່າງໃກ້ຊິດ, ຈົນຮອດວັນທີ 26 ກຸມພາປີ 2020, ອາເມຣິກາຈຶ່ງໄດ້ແຈ້ງວ່າມີຜູ້ຖືກບົ່ງມະຕິເປັນພະຍາດໂຄວິດ-19 ຢູ່ເຂດຊຸມຊົນທີ່ບໍ່ມີການບັນທຶກປະຫວັດການທ່ອງທ່ຽວກໍລະນີທຳອິດ. ນີ້ກໍໝາຍຄວາມວ່າໃນໄລຍະເບື້ອງຕົ້ນ,ລັດຖະບານອາເມຣິກາໄດ້ຖືເອົາບຸກຄົນທີ່ເດີນທາງຈາກຈີນໄປອາເມຣິກາເປັນເປົ້າໝາຍແຜ່ເຊື້ອ. ແຕ່ມີຜົນການຄົ້ນຄວ້ານັບມື້ນັບຫຼາຍໄດ້ຊີ້ໃຫ້ເຫັນວ່າ: ກ່ອນລັດຕ່າງໆຂອງອາເມຣິກາລາຍງານວ່າພົບຜູ້ຖືກບົ່ງມະຕິເປັນພະຍາດໂຄວິດ-19 ກໍລະນີທຳອິດຢູ່ລັດຕົນ, ເຊື້ອພະຍາດໂຄວິດ-19 ກໍໄດ້ແຜ່ລະບາດຢູ່ອາເມຣິກາແລ້ວ.
ໃນເດືອນທັນວາປີ 2020, ສູນປ້ອງກັນແລະຄວບຄຸມພະຍາດແຫ່ງຊາດອາເມຣິກາຫຼື CDC ໄດ້ເປີດເຜີຍບົດລາຍງານຜົນການຄົ້ນຄວ້າສະບັບໜຶ່ງໂດຍສະແດງໃຫ້ເຫັນວ່າ: ຜ່ານການຄົ້ນຄວ້າແລະກວດຫາຕົວຢ່າງເລືອດຂອງສະພາກາແດງອາເມຣິກາແລ້ວພົບເຫັນວ່າ: ໃນໄລຍະແຕ່ວັນທີ 13 ຫາວັນທີ 16 ຂອງເດືອນທັນວາປີ 2019, ຢູ່ໃນເລືອດຂອງປະຊາຊົນໃນລັດຄາລີຟໍເນຍ, ລັດໂອຣີແກນແລະລັດວໍຊິງຕັນຂອງອາເມຣິກາຢ່າງໜ້ອຍມີຈຳນວນ 39 ຄົນໄດ້ມີພູມຕ້ານທານເຊື້ອພະຍາດໂຄວິດ-19 ຢູ່ໃນຮ່າງກາຍແລ້ວ.
ກ່ຽວກັບການຄາດເດົາທີ່ກ່ຽວຂ້ອງກັບຖານທັບຟອດເດຕຣິກ, ທ່າທີຂອງລັດຖະບານອາເມຣິກາແມ່ນຫຼີກລ່ຽງບັນຫານີ້ມາໂດຍຕະຫຼອດ. ຖ້າອາເມຣິກາມີຄວາມໝັ້ນໃຈຕົນເອງພໍສົມຄວນ, ຊັ້ນເວລາໃດຈະສາມາດເຊື້ອເຊີນຜູ້ຊ່ຽວຊານຂອງອົງການອະນາໄມໂລກໄປສຳຫຼວດກວດເບິ່ງຖານທັບຟອດເດຕຣິກ?
ຄຳເຫັນ
0