ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນບ່າຍວັນທີ 25 ມິຖຸນາປີ 2021, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ນຳພາບັນດາສະຫາຍໃນກົມການເມືອງສູນກາງພັກກອມມູນິດຈີນໄປຢ້ຽມຢາມຕຶກແດງຂອງມະຫາວິທະຍາໄລປັກກິ່ງຢູ່ຖະໜົນ 4 ພຶດສະພາໃນນະຄອນຫຼວງປັກກິ່ງ, ເພື່ອຫວນຄືນປະຫວັດສາດຂອງການປະຕິວັດກ່ຽວກັບຜູ້ສ້າງຕັ້ງພັກກອມມູນິດຈີນ ໄດ້ຊຸກຍູ້ການເຜີຍແຜ່ລັດທິມາກຢູ່ຈີນໃນໄລຍະເບື້ອງຕົ້ນ, ແລະກະກຽມສ້າງຕັ້ງພັກອມມູນິດຈີນ ແລະອື່ນໆ.
ຕຶກແດງຂອງມະຫາວິທະຍາໄລປັກກິ່ງໄດ້ເລີ່ມສ້າງຂຶ້ນເມື່ອປີ 1916, ສ້າງສຳເລັດໃນປີ 1918, ແມ່ນຫ້ອງການຂອງອະທິການບໍດີ, ຫົວໜ້າພາກວິຊາວັນນະຄະດີ ແລະ ຫໍສະໝຸດຂອງມະຫາວິທະຍາໄລປັກກິ່ງທີ່ມີຊື່ສຽງໃນເວລານັ້ນ. ອາຄານກໍ່ດ້ວຍດິນຈີ່ສີແດງ, ຂອບປ່ອງຢ້ຽມກໍ່ດ້ວຍດິນຈີ່ສີຂຽວ, ແລະມຸງດ້ວຍດີນຂໍສີແດງ, ສະນັ້ນຄົນທັງຫຼາຍຈຶ່ງເອີ້ນວ່າ “ຕຶກແດງ”. ເຊິ່ງສີແດງໄດ້ເປັນສີຫຼັກຂອງຕຶກແຫ່ງນີ້, ທັງໄດ້ກາຍເປັນສັນຍາລັກ ແລະ ສີພື້ນຖານຂອງການປະຕິວັດຈີນ.
ໃນໄລຍະເບື້ອງຕົ້ນທີ່ຕຶກແດງຂອງມະຫາວິທະຍາໄລປັກກິ່ງໄດ້ຮັບການສ້າງຕັ້ງຂຶ້ນນັ້ນ, ກໍໄດ້ກາຍເປັນແຫຼ່ງກຳເນີດຂອງແນວຄິດ ແລະ ວັດທະນະທຳທີ່ກ້າວໜ້າຂອງຈີນ. ເດືອນທັນວາປີ 1917, ທ່ານຫຼີຕ້າຈ່າວ ຜູ້ນຳພາທາງຂອງຂະບວນການກອມມູນິດຈີນໄດ້ດຳລົງຕຳແໜ່ງເປັນຫົວໜ້າຫໍສະໝຸດຂອງມະຫາວິທະຍາໄລປັກກິ່ງ. ຈາກມື້ທີ່ສ້າງຕຶກແດງສຳເລັດຈົນຮອດເດືອນທັນວາປີ 1922, ທ່ານຫຼີຕ້າຈ່າວໄດ້ເຮັດວຽກຢູ່ສະຖານທີ່ແຫ່ງນີ້. ທ່ານໄດ້ຂຽນບົດຄວາມຕ່າງໆ, ເຊັ່ນ “ທັດສະນະລັດທິມາກຂອງຂ້າພະເຈົ້າ” ແລະບົດອື່ນໆ, ໂດຍໄດ້ແນະນຳທິດສະດີລັດທິມາກຢ່າງເປັນລະບົບ. ເດືອນຕຸລາປີ 1920, ອາຈານ ແລະ ນັກສຶກສາ 3 ຄົນຂອງມະຫາວິທະຍາໄລປັກກິ່ງທີ່ມີທ່ານຫຼີຕ້າຈ່າວເປັນຕົວແທນນັ້ນໄດ້ສ້າງໜ່ວຍກອມມູນິດຈີນທີ່ປັກກິ່ງ, ນີ້ເປັນການຈັດຕັ້ງພັກແຫ່ງທຳອິດຂອງພັກກອມມູນິດຈີນໃນປະຫວັດສາດຂອງປັກກິ່ງ.
ນັບແຕ່ເດືອນຕຸລາປີ 1918 ຫາເດືອນມີນາປີ 1919, ທ່ານເໝົາເຈີຕຸ່ງໄດ້ເຮັດວຽກຢູ່ຫໍສະໝຸດຂອງມະຫາວິທະຍາໄລປັກກິ່ງ, ເພື່ອຄຸ້ມຄອງໜັງສືພິມສະບັບພາສາຈີນ ແລະ ພາສາຕ່າງປະເທດຫຼາຍກວ່າ 15 ສະບັບ, ແຕ່ລະເດືອນທ່ານໄດ້ຮັບເງິນເດືອນ 8 ຢວນ. ທ່ານເໝົາເຈີຕຸ່ງເອີ້ນທ່ານຫຼີຕ້າຈ່າວວ່າເປັນ “ອາຈານທີ່ແທ້ຈິງ”, ຕໍ່ມາໃນເວລາສົນທະນາກັບທ່ານເອັດກາ ສະໂນ ນັກຂ່າວອາເມຣິກາທີ່ໄປຢ້ຽມຢາມຢຽນອ່ານ, ທ່ານເໝົາເຈີຕຸ່ງເວົ້າວ່າ, ພາຍໃຕ້ການຊີ້ນຳຂອງທ່ານຫຼີຕ້າຈ່າວ, ທ່ານເອງໄດ້ພັດທະນາຕົນເອງກ້າວໄປສູ່ລັດທິມາກຢ່າງວ່ອງໄວ.
ໃນເດືອນພຶດສະພາປີ 2014 ແລະ ເດືອນພຶດສະພາປີ 2018, ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ມະຫາວິທະຍາໄລປັກກິ່ງສອງເທື່ອ, ແຕ່ລະເທື່ອທ່ານກ່າວວ່າ: ໂຮງຮຽນແຫ່ງນີ້ມີການພົວພັນຢ່າງໃກ້ຊິດກັບການເຜີຍແຜ່ລັດທິມາກ ແລະ ການສ້າງຕັ້ງພັກກອມມູນິດຈີນ. ທ່ານສີຈິ້ນຜິງກ່າວວ່າ: “ຜູ້ສ້າງຕັ້ງພັກກອມມູນິດຈີນຕົ້ນຕໍ ແລະ ນັກເຄື່ອນໄຫວທີ່ມີຊື່ສຽງຈຳນວນໜຶ່ງໃນໄລຍະເບື້ອງຕົ້ນ ໄດ້ເລີ່ມອ່ານບົດຄວາມກ່ຽວກັບລັດທິມາກ ແລະ ໄດ້ເຜີຍແຜ່ລັດທິມາກໃນເວລາເຮັດວຽກ ຫຼື ຮ່ຳຮຽນຢູ່ມະຫາວິທະຍາໄລປັກກິ່ງ, ແລະໄດ້ຊຸກຍູ້ໃຫ້ມີການສ້າງຕັ້ງພັກກອມມູນິດຈີນ. ນີ້ແມ່ນສິ່ງທີ່ໜ້າພາກພູມໃຈ, ທັງແມ່ນສິ່ງທີ່ມີກຽດຂອງມະຫາວິທະຍາໄລປັກກິ່ງ.”
ຄຳເຫັນ
0