ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 6 ກໍລະກົດນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ກ່າວຄຳປາໄສໃນກອງປະຊຸມສຸດຍອດພັກກອມມູນິດຈີນກັບພັກການເມືອງໂລກຜ່ານທາງວິດີໂອຢູ່ທີ່ນະຄອນຫຼວງປັກກິ່ງ, ເນື້ອໃນບົດປາໄສມີດັ່ງລຸ່ມນີ້:
ບັນດາຜູ້ນຳພັກການເມືອງທຸກທ່ານທີ່ນັບຖື, ບັນດາທ່ານຍິງ ແລະທ່ານຊາຍ, ບັນດາເພື່ອນມິດ:
ຂ້າພະເຈົ້າຮູ້ສຶກປິຕິຊົມຊື່ນເປັນຢ່າງຍິ່ງ ເນື່ອງໃນໂອກາດວັນສ້າງຕັ້ງພັກກອມມູນິດຈີນຄົບຮອບ 100 ປີ, ຮ່ວມກັບບັນດາຜູ້ນຳຂອງພັກການເມືອງ 500 ກວ່າພັກທີ່ມາຈາກ 160 ກວ່າປະເທດ, ຜູ້ຕາງໜ້າພັກການເມືອງ ແລະວົງການຕ່າງໆຫຼາຍກວ່າ 1 ໝື່ນທ່ານໄດ້ເຕົ້າໂຮມກັນຜ່ານທາງອິນເຕີເນັດ, ປຶກສາຫາລືກ່ຽວກັບຫົວຂໍ້ທີ່ວ່າ “ສະແຫວງຫາຄວາມສຸກໃຫ້ກັບປະຊາຊົນຄືໜ້າທີ່ຮັບຜິດຊອບຂອງພັກການເມືອງ”. ໃນໄລຍະນີ້, ພັກການເມືອງ ແລະອົງການຈັດຕັ້ງທາງການເມືອງ 600 ກວ່າອົງການຈາກ 170 ກວ່າປະເທດໄດ້ສົ່ງສານຊົມເຊີຍ 1.500 ກວ່າສະບັບເພື່ອສະແດງຄວາມຊົມເຊີຍວັນສ້າງຕັ້ງພັກກອມມູນິດຈີນຄົບຮອບ 100 ປີ, ນີ້ສະແດງໃຫ້ເຫັນມິດຕະພາບ ແລະ ຄຳອວຍພອນທີ່ດີງາມທີ່ມີຕໍ່ພັກກອມມູນິດຈີນ. ຂ້າພະເຈົ້າຂໍຕາງໜ້າໃຫ້ພັກກອມມູນິດຈີນ, ສະແດງຄວາມຂອບໃຈຢ່າງສຸດໃຈຕໍ່ບັນດາທ່ານ!
ບໍ່ເທົ່າໃດມື້ກ່ອນ, ພວກເຮົາໄດ້ຈັດພິທີສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີ ຂື້ນຢ່າງຍິ່ງໃຫຍ່. ໃນໄລຍະ 100 ປີທີ່ຜ່ານມາ, ພັກກອມມູນິດຈີນໄດ້ເຕົ້າໂຮມຄວາມສາມັກຄີ ແລະ ນຳພາປະຊາຊົນຈີນບຸກບືນສູ້ຊົນຢ່າງຕໍ່ເນື່ອງ, ຊຸກຍູ້ປະຊາຊາດຈີນໃຫ້ບັນລຸການພັດທະນາແບບກ້າວກະໂດດຈາກການລຸກຢືນຂຶ້ນ ຮັ່ງມີຂຶ້ນ ຈົນຮອດ ເຂັ້ມແຂງຂຶ້ນ. ໃນໄລຍະ 100 ປີທີ່ຜ່ານມາ, ພັກກອມມູນິດຈີນໄດ້ຍຶດໝັ້ນໃນຫລັກການຮ່ວມຊາຕາກຳນຳກັນລະຫວ່າງປະຊາຊົນຈີນກັບປະຊາຊົນບັນດາປະເທດໃນທົ່ວໂລກ, ກຳແໜ້ນທິດທາງການພັດທະນາກ້າວເດີນໄປໜ້າຂອງຈີນ ແລະ ຊຸກຍູ້ການພັດທະນາ ແລະຄວາມຈະເລີນຮຸ່ງເຮືອງຮ່ວມກັນຂອງບັນດາປະເທດທ່າມກາງສະພາບການລວມຂອງໂລກ ແລະ ກະແສຂອງຍຸກສະໄໝ.
ຜົນສຳເລັດຄັ້ງປະຫວັດສາດຂອງພັກກອມມູນິດຈີນ ແລະປະຊາຊົນຈີນ, ບໍ່ສາມາດປາສະຈາກໄດ້ການສະໜັບສະໜູນທີ່ເຂັ້ມແຂງຂອງປະຊາຊົນບັນດາປະເທດໃນໂລກ. ນະທີ່ນີ້, ຂ້າພະເຈົ້າຂໍຕາງໜ້າໃຫ້ພັກກອມມູນິດຈີນ ແລະປະຊາຊົນຈີນ, ຂໍສະແດງຄວາມຂອບໃຈຢ່າງຈິງໃຈຕໍ່ພັກການເມືອງ ປະຊາຊົນ ແລະ ເພື່ອນມິດບັນດາປະເທດທີ່ໄດ້ເອົາໃຈໃສ່ ໃຫ້ການສະໜັບສະໜູນ ແລະຊ່ວຍເຫຼືອພັກກອມມູນິດຈີນກໍຄືພາລະກິດປະຕິວັດ, ການສ້າງສາພັດທະນາ ແລະ ປະຕິຮູບຂອງຈີນ.
ບັນດາທ່ານຍິງ ທ່ານຊາຍ ແລະເພື່ອນມິດ!
ໂລກໃນປັດຈຸບັນກຳລັງປະສົບກັບສະພາບການປ່ຽນແປງແບບບໍ່ເຄີຍມີມາກ່ອນໃນຮອບຮ້ອຍປີ, ໂລກຫັນເປັນຫຼາຍຂົ້ວ, ເສດຖະກິດໂລກາພິວັດພວມມີການປ່ຽນແປງຢ່າງເລິກເຊິ່ງ, ບັນດາປະເທດມີການພົວພັນກັນ, ເພິ່ງພາອາໄສກັນ ແລະ ສົ່ງຜົນສະທ້ອນໃຫ້ແກ່ກັນນັບມື້ນັບແໜ້ນແຟ້ນຂຶ້ນ. ເພື່ອຮັບມືກັບສິ່ງທ້າທາຍຈາກການແຜ່ລະບາດຂອງພະຍາດໂຄວິດ-19, ການຊຸກຍູ້ການຟື້ນຟູເສດຖະກິດ, ການຮັກສາສະຖຽນລະພາບຂອງໂລກ, ເພື່ອບັນລຸເປົ້າໝາຍເຫລົ່ານີ້, ປະຊາຄົມໂລກໄດ້ສຸມຄວາມພະຍາຍາມຢ່າງລຳບາກ, ພັກການເມືອງບັນດາປະເທດໄດ້ຕັ້ງໜ້າຄົ້ນຄວ້າ ເຊິ່ງໄດ້ສະແດງໃຫ້ເຫັນ ຄວາມຮັບຜິດຊອບຂອງຕົນ. ໃນຂະນະດຽວກັນ, ເຂດແຄວ້ນຈຳນວນໜຶ່ງໃນໂລກຍັງສືບຕໍ່ມີຄວາມປັ່ນປ່ວນຍ້ອນສົງຄາມແລະມີການປະທະກັນ, ຄວາມອຶດຫິວແລະພະຍາດຕິດແປດຍັງສືບຕໍ່ແຜ່ລະບາດ, ຄວາມຫ່າງເຫີນກັນດ້ານຈິດໃຈແລະການເປັນປໍລະປັກກັນຍັງສືບຕໍ່ເພີ່ມຂຶ້ນ, ປະຊາຊົນບັນດາປະເທດມີສຽງຮຽກຮ້ອງຢ່າງແຮງກ້າກວ່າເກົ່າທີ່ຢາກມີຊີວິດການເປັນຢູ່ທີ່ມີຄວາມສຸກ.
ທຸກມື້ນີ້, ສັງຄົມມະນຸດໄດ້ຢືນຢູ່ທາງແຍກຂອງປະຫວັດສາດອີກຄັ້ງໃໝ່ ແລະ ຄວນຈະກ້າວເດີນໄປທາງທິດໃດ? ຈະເປັນປໍລະປັກກັນຫຼືເຄົາລົບເຊິ່ງກັນແລະກັນ? ຈະປິດປະຕູ, ຕັດສາຍພົວພັນກັນ ຫຼື ເປີດປະຕູແລະຮ່ວມມືກັນ? ຈະແຂ່ງຂັນກັນແບບເກມຜົນລວມເປັນສູນ ຫຼື ຮ່ວມມືແບບຕ່າງຝ່າຍຕ່າງໄດ້ຜົນປະໂຫຍດ? ທາງເລືອກແມ່ນຢູ່ໃນກຳມືຂອງພວກເຮົາ, ຢູ່ເທິງບ່າໄຫຼ່ຂອງພວກເຮົາພວມແບກຫາບໜ້າທີ່ຮັບຜິດຊອບ.
ມວນມະນຸດແມ່ນເອກະພົບດຽວກັນ, ໜ່ວຍໂລກເປັນບ້ານເມືອງຮ່ວມອັນດຽວກັນ. ເມື່ອຜະເຊີນກັບສິ່ງທ້າທາຍຮ່ວມ, ບໍ່ວ່າຄົນໃດຫຼືປະເທດໃດກໍບໍ່ສາມາດຮັບມືໄດ້ພຽງລຳພັງ. ມະນຸດເຮົາມີທາງອອກພຽງເສັ້ນທາງດຽວເທົ່ານັ້ນຄື: ຮ່ວມແຮງຮ່ວມໃຈກັນ,ປອງດອງກັນແລະຮ່ວມມືກັນເພື່ອການຄົງຕົວຢູ່ຮ່ວມກັນ. ພັກການເມືອງໃນຖານະເປັນກຳລັງສຳຄັນໃນການຊຸກຍູ້ຄວາມກ້າວໜ້າຂອງມວນມະນຸດ, ຄວນມຸ້ງໝັ້ນເດີນຕາມທິດທາງກ້າວໄປໜ້າຢ່າງຖືກຕ້ອງ, ແບກຫາບໜ້າທີ່ປະຫວັດສາດໃນການສະແຫວງຫາຄວາມຜາສຸກໃຫ້ແກ່ປະຊາຊົນ,ສະແຫວງຫາຄວາມກ້າວໜ້າໃຫ້ແກ່ມວນມະນຸດ, ຂ້າພະເຈົ້າເຫັນວ່າ ພັກການເມືອງຄວນພະຍາຍາມສູ້ຊົນເຮັດໃຫ້ໄດ້ຫຼາຍດ້ານດັ່ງລຸ່ມນີ້:
ໜຶ່ງ: ພວກເຮົາຄວນແບກຫາບໜ້າທີ່ເປັນຜູ້ນຳໜ້າພາທາງ, ກຳແໜ້ນແລະສ້າງອະນາຄົດຮ່ວມຂອງມວນມະນຸດ. ປະຊາຊົນມີຄວາມປາຖະໜາຫາຄວາມຮັ່ງມີ ແລະ ສະຫງົບສຸກ, ປາຖະໜາຫາຄວາມຍຸດຕິທຳ ແລະ ຄວາມເປັນທຳ. ຍຸກສະໄໝຕ້ອງການວິໄສທັດເບິ່ງກວ້າງມອງໄກ, ຕ້ອງການຈິດໃຈກວ້າງຂວາງ. ເມື່ອເບິ່ງຈາກແງ່ມູມທີ່ຖື “ປະເທດຕົນເປັນບູລິມະສິດ”, ໂລກກໍ່ຈະມີຄວາມຄັບແຄບແອອັດ, ມີການແຂ່ງຂັນຢ່າງດຸເດືອດຢູ່ທຸກເວລາ. ຖ້າຫາກເບິ່ງຈາກແງ່ມູມທີ່ຖື “ ການຮ່ວມຊາຕາກຳນຳກັນ”, ໂລກນີ້ກໍ່ຈະເປັນໂລກທີ່ກວ້າງໃຫຍ່ໄພສານ, ມີໂອກາດຮ່ວມມືຢູ່ທຸກບ່ອນ. ພວກເຮົາຄວນຮັບຟັງຫາງສຽງຂອງປະຊາຊົນ, ໄປຕາມກະແສຂອງຍຸກສະໄໝ, ຊຸກຍູ້ບັນດາປະເທດເພີ່ມທະວີການປະສານງານແລະການຮ່ວມມືກັນ, ຖືເອົາຜົນປະໂຫຍດຂອງປະຊາຊົນປະເທດຕົນໃຫ້ເປັນເອກະພາບກັນກັບຜົນປະໂຫຍດຂອງປະຊາຊົນບັນດາປະເທດໃນໂລກ, ກ້າວເດີນໄປໜ້າຕາມທິດທາງທີ່ສ້າງປະຊາຄົມຮ່ວມຊາຕາກຳຂອງມວນມະນຸດ.
ສອງ, ພວກເຮົາຄວນແບກຫາບໜ້າທີ່ເຕົ້າໂຮມຄວາມເຫັນທີ່ເປັນເອກະພາບກັນ, ຍຶດໝັ້ນແລະເສີມຂະຫຍາຍຄ່ານິຍົມຮ່ວມຂອງມວນມະນຸດ. ປະເທດຕ່າງໆມີປະຫວັດສາດ, ວັດທະນະທຳ, ລະບອບແລະລະດັບການພັດທະນາທີ່ແຕກຕ່າງກັນ, ແຕ່ປະຊາຊົນບັນດາປະເທດລ້ວນແຕ່ສະແຫວງຫາຄ່ານິຍົມຮ່ວມຂອງມວນມະນຸດຄື:ສັນຕິພາບ, ການພັດທະນາ, ຄວາມຍຸຕິທຳ, ຄວາມເປັນທຳ, ປະຊາທິປະໄຕແລະເສລີພາບ. ພວກເຮົາຄວນມີທ່າທີຮັບຜິດຊອບຢ່າງສູງຕໍ່ອະນາຄົດແລະຊາຕາກຳຂອງມວນມະນຸດ, ເປັນຜູ້ສົ່ງເສີມຄ່ານິຍົມຮ່ວມຂອງມວນມະນຸດ, ເຂົ້າໃຈຄວາມຮັບຮູ້ຂອງອະລິຍະທຳທີ່ຕ່າງກັນທີ່ມີຕໍ່ເນື້ອໃນຄ່ານິຍົມດ້ວຍຈິດໃຈກວ້າງຂວາງ, ເຄົາລົບຄວາມພະຍາຍາມຂອງປະຊາຊົນບັນດາປະເທດໃນການຄົ້ນຄວ້າເສັ້ນທາງເພື່ອບັນລຸຄ່ານິຍົມ, ເຮັດໃຫ້ພຶດຕິກຳຕົວຈິງໃນການບັນລຸຜົນປະໂຫຍດຂອງປະຊາຊົນປະເທດຕົນສາມາດສ່ອງແສງເຖິງຄ່ານິຍົມຮ່ວມຂອງມວນມະນຸດຢ່າງແທ້ຈິງແລະເປັນຮູບປະທຳ.
ສາມ, ພວກເຮົາຄວນແບກຫາບໜ້າທີ່ຮັບຜິດຊອບໃນການຊຸກຍູ້ການພັດທະນາ, ເຮັດໃຫ້ຜົນຂອງການພັດທະນາສ້າງຜົນປະໂຫຍດໃຫ້ແກ່ປະຊາຊົນບັນດາປະເທດຫຼາຍກວ່າເກົ່າແລະຍຸຕິທຳກວ່າເກົ່າ. ການພັດທະນາແມ່ນຂໍກຸນແຈສຳຄັນໃນການສ້າງຄວາມສຸກໃຫ້ແກ່ປະຊາຊົນ. ຢູ່ບົນເສັ້ນທາງທີ່ມວນມະນຸດສະແຫວງຫາຄວາມຜາສຸກ, ບໍ່ປະປ່ອຍປະເທດໃດໜຶ່ງແລະຊົນຊາດໃດໜຶ່ງ. ປະເທດທັງໝົດ, ຊົນຊາດທັງໝົດໃນໂລກກໍຄວນມີໂອກາດແລະສິດໃນການພັດທະນາຢ່າງສະເໝີພາບກັນ. ພວກເຮົາຄວນກ້າຜະເຊີນໜ້າກັບບັນຫາຄວາມເປັນຈິງທີ່ໃຫຍ່ແລະສຳຄັນເປັນຕົ້ນແມ່ນຄວາມແຕກໂຕນກັນລະຫວ່າງຄວາມຮັ່ງມີແລະຄວາມທຸກຍາກແລະຊ່ອງຫວ່າງດ້ານການພັດທະນາ, ຄວນເອົາໃຈໃສ່ປະເທດແລະເຂດແຄ້ວນດ້ອຍພັດທະນາ, ເອົາໃຈໃສ່ແລະຮັກແພງປະຊາຊົນຜູ້ທຸກຍາກເພື່ອເຮັດໃຫ້ດິນແດນທຸກບ່ອນມີຄວາມຫວັງ. ຄົນບູຮານຈີນເວົ້າວ່າ: “ຜູ້ທີ່ສ້າງຜົນປະໂຫຍດໃຫ້ແກ່ຕົນເອງແຕ່ພັດບໍ່ເອົາໃຈໃສ່ນຳຄົນອື່ນ, ຄົນທັງຫຼາຍຈະປະຖີ້ມ; ຜູ້ທີ່ຈຳກັດຜົນປະໂຫຍດສ່ວນຕົວແຕ່ສ້າງຜົນປະໂຫຍດໃຫ້ແກ່ຄົນອື່ນ, ຄົນທັງຫຼາຍຈະໃຫ້ການອູ້ຊູສະໜັບສະໜູນ.”ການພັດທະນາແມ່ນສິດຂອງບັນດາປະເທດໃນໂລກແຕ່ບໍ່ແມ່ນສິດທິພິເສດຂອງປະເທດສ່ວນໜ້ອຍ. ພວກເຮົາຄວນຊຸກຍູ້ໃຫ້ປະເທດຕ່າງໆເພີ່ມທະວີການພັດທະນາແລະການຮ່ວມມືກັນ, ໃຫ້ປະຊາຊົນບັນດາປະເທດສາມາດຊົມໃຊ້ໝາກຜົນຂອງການພັດທະນາ, ຍົກສູງຄວາມສະເໝີພາບ, ປະສິດທິຜົນ, ການປະສານງານໃນການພັດທະນາຂອງໂລກ, ຮ່ວມກັນຄັດຄ້ານທຸກຄົນທີ່ປິດລ້ອມເຕັກນິກ, ສ້າງຊ່ອງຫວ່າງດ້ານວິທະຍາສາດເຕັກນິກແລະຕັດການພົວພັນດ້ານການພັດທະນາ. ຂ້າພະເຈົ້າເຊື່ອໝັ້ນວ່າ: ການຊັກໄຍທາງການເມືອງທຸກຮູບແບບທີ່ຂົ່ມຂູ່ປະເທດອື່ນດ້ວຍການຂັດຂວາງການພັດທະນາຂອງປະເທດອື່ນແລະທຳລາຍຊີວິດການເປັນຢູ່ຂອງປະຊາຊົນປະເທດອື່ນລ້ວນແຕ່ຈະບໍ່ໄດ້ຮັບການສະໜັບສະໜູນຈາກປະຊາຊົນທັງຫລາຍທັງເປັນການກະທຳທີ່ເສຍແຮງໄປລ້າໆໃນທີ່ສຸດ!
ສີ່, ພວກເຮົາຄວນແບກຫາບໜ້າທີ່ເພີ່ມທະວີການຮ່ວມມື, ຮ່ວມກັນຮັບມືກັບຄວາມສ່ຽງແລະສິ່ງທ້າທາຍຂອງໂລກ. ໂດຍຜະເຊີນໜ້າກັບສະພາບພະຍາດໂຄວິດ-19 ທີ່ພວມແຜ່ລະບາດນັ້ນ, ພວກເຮົາຄວນຍຶດໝັ້ນມາດຕະການຕາມຫຼັກວິທະຍາສາດ, ສົ່ງເສີມຄວາມສາມັກຄີແລະການຮ່ວມມືກັນ, ແກ້ໄຂບັນຫາຊ່ອງຫວ່າງດ້ານພູມຄຸ້ມກັນ, ຄັດຄ້ານການເຮັດໃຫ້ສະພາບພະຍາດໂຄວິດ-19 ກາຍເປັນບັນຫາການເມືອງແລະ ການຕິດເຄື່ອງໝາຍເຊື້ອໄວຣັດໃຫ້ປະເທດອື່ນ, ຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກຳດ້ານສາທາລະນະສຸກຂອງມວນມະນຸດ. ໂດຍຜະເຊີນໜ້າກັບລັດທິກໍ່ການຮ້າຍເຊິ່ງເປັນສັດຕູຮ່ວມຂອງມວນມະນຸດ, ພວກເຮົາຄວນຮ່ວນມືກັນເພື່ອສະແຫວງຫາຄວາມໝັ້ນຄົງແລະສະຖຽນລະພາບ, ຮ່ວມກັນສ້າງກຳແພງປ້ອງກັນຄວາມໝັ້ນຄົງ.ໂດຍຜະເຊີນໜ້າກັບສິ່ງແວດລ້ອມນິເວດທີ່ອ່ອນແອ, ພວກເຮົາຄວນຍຶດໝັ້ນການເຄົາລົບທຳມະຊາດ, ໄປຕາມກົດເກນທຳມະຊາດແລະອະນຸລັກທຳມະຊາດ, ຮ່ວມກັນສ້າງບ້ານເມືອງສີຂຽວ. ໂດຍຜະເຊີນໜ້າກັບສິ່ງທ້າທາຍອັນຂ້ຽວຂາດຈາກການປ່ຽນແປງຂອງດິນຟ້າອາກາດທີ່ມີຜົນກະທົບຕໍ່ການດຳລົງຄົງຕົວ ແລະການພັດທະນາຂອງມວນມະນຸດ, ພວກເຮົາຄວນກ້າແບກຫາບຄວາມຮັບຜິດຊອບ, ຮ່ວມແຮງຮ່ວມໃຈກັນ, ຮ່ວມກັນສະແຫວງຫາຊ່ອງທາງທີ່ມະນຸດແລະທຳມະຊາດສາມາດຢູ່ຮ່ວມກັນໄດ້ຢ່າງກົມກຽວ.
ຫ້າ, ພວກເຮົາຕ້ອງແບກຫາບຄວາມຮັບຜິດຊອບທີ່ປັບປຸງການຄຸ້ມຄອງ, ເພີ່ມທະວີຄວາມສາມາດທີ່ສະແຫວງຫາຄວາມສຸກໃຫ້ກັບປະຊາຊົນ. ເສັ້ນທາງທີ່ກ້າວໄປສູ່ຄວາມສຸກມີຄວາມແຕກຕ່າງກັນ, ປະຊາຊົນບັນດາປະເທດມີສິດເລືອກເອົາເສັ້ນທາງພັດທະນາ ແລະ ຮູບແບບລະບອບຂອງຕົນ, ນີ້ຄືຄວາມໝາຍທີ່ແທ້ຈິງຂອງຄວາມສຸກຂອງປະຊາຊົນ. ປະຊາທິປະໄຕກໍແມ່ນສິດທິຂອງປະຊາຊົນບັນດາປະເທດເຊັ່ນກັນ, ຫາກບໍ່ແມ່ນສິດທິພິເສດຂອງປະເທດສ່ວນໜ້ອຍ. ການບັນລຸປະຊາທິປະໄຕມີຫຼາຍຮູບການ, ຈະບໍ່ແມ່ນຮູບແບບດຽວກັນ. ປະເທດໜຶ່ງມີປະຊາທິປະໄຕຫຼືບໍ່, ຕ້ອງໃຫ້ປະຊາຊົນຂອງປະເທດນັ້ນເປັນຜູ້ຕັດສິນ, ຫາກບໍ່ຄວນປ່ອຍໃຫ້ຄົນສ່ວນໜ້ອຍເປັນຜູ້ຕັດສິນ! ພວກເຮົາຕ້ອງເພີ່ມທະວີການແລກປ່ຽນ ແລະ ຖອດຖອນບົດຮຽນເຊິ່ງກັນແລະກັນ, ປັບປຸງກົນໄກແລກປ່ຽນໃຫ້ສົມບູນຂຶ້ນ, ຮັບຮູ້ສະພາບການສັງຄົມ ແລະ ປະຊາມະຕິ, ບູລະນະລະບົບການຈັດຕັ້ງ, ຍົກສູງຄວາມສາມາດໃນການຄຸ້ມຄອງບໍລິຫານ, ຊຸກຍູ້ການສ້າງການເມືອງປະຊາທິປະໄຕທີ່ສອດຄ່ອງກັບສະພາບຄວາມເປັນຈິງຂອງປະເທດຕົນ, ຍົກສູງຄວາມສາມາດ ແລະ ປະສິດທິຜົນໃນການສະແຫວງຫາຄວາມສຸກໃຫ້ກັບປະຊາຊົນຢ່າງບໍ່ຢຸດຢັ້ງ.
ບັນດາທ່ານຍິງ ທ່ານຊາຍ ແລະເພື່ອນມິດ!
ການສະແຫວງຫາຄວາມສຸກໃຫ້ກັບປະຊາຊົນ, ແມ່ນອຸດົມການແຕ່ຫົວທີຂອງພັກກອມມູນິດຈີນທີ່ຍຶດໝັ້ນຢ່າງສະເໝີຕົ້ນສະເໝີປາຍ. ຊູ່ມື້ນີ້, ຈີນໄດ້ບັນລຸເປົ້າໝາຍສູ້ຊົນທີ່ສ້າງສັງຄົມທີ່ອີ່ມໜໍາສຳລານໃຫ້ສຳເລັດຢ່າງຮອບດ້ານ, ໄດ້ເປີດຂະບວນການໃໝ່ທີ່ສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ປະຊາຊົນຈີນມີຄວາມຮູ້ສຶກທີ່ໄດ້ຮັບຜົນປະໂຫຍດ, ມີຄວາມສຸກ ແລະ ຮູ້ສຶກປອດໄພເພີ່ມຂຶ້ນເລື້ອຍໆ. ການເຮັດພາລະກິດຂອງຈີນໃຫ້ດີ, ເຮັດໃຫ້ປະຊາຊົນຈີນ 1,4 ຕື້ກວ່າຄົນມີຊີວິດການເປັນຢູ່ທີ່ດີງາມກວ່າເກົ່າ,ຊຸກຍູ້ພາລະກິດອັນສູງສົ່ງຄືສັນຕິພາບແລະການພັດທະນາຂອງມວນມະນຸດ ເຊິ່ງແມ່ນເປົ້າໝາຍສູ້ຊົນທີ່ໝັ້ນໜ້ຽວບໍ່ປ່ຽນແປງຂອງພັກກອມມູນິດຈີນ. ພັກກອມມູນິດຈີນຈະຍຶດໝັ້ນໃນແນວຄິດການພັດທະນາທີ່ຖືປະຊາຊົນເປັນໃຈກາງ, ຄົ້ນຄິດຫົວຂໍ້ເລິກທີ່ມີຄວາມໝາຍເລິກເຊິ່ງກ່ຽວກັບການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ ແລະ ຄວາມກ້າວໜ້າຂອງມວນມະນຸດດ້ວຍສາຍຕາທີ່ເບິ່ງກວ້າງມອງໄກ, ເຕົ້າໂຮມສາມັກຄີ ແລະນຳພາປະຊາຊົນຈີນສຸມຄວາມພະຍາຍາມເພື່ອຄົ້ນຄວ້າ ແລະ ບຸກບືນຢ່າງກ້າຫານ, ສ້າງອະນາຄົດທີ່ດີງາມກວ່າເກົ່າ.
ປະຫວັດສາດບອກພວກເຮົາວ່າ, ຕ້ອງໂອບກອດໂລກ, ຈຶ່ງຈະສາມາດໂອບກອດອະນາຄົດໄດ້; ເກາະແຂນກັນກ້າວໄປໜ້າຮ່ວມກັນ, ຈຶ່ງຈະສາມາດກ້າວເດີນໄປໄກຢ່າງໜັກແໜ້ນ. ພັກກອມມູນິດຈີນຍິນດີຮ່ວມກັບພັກການເມືອງບັນດາປະເທດສຸມຄວາມພະຍາຍາມ, ເຮັດໃຫ້ຄວາມໃຝ່ຝັນປາກົດຜົນເປັນຈິງ, ໃຊ້ການກະທຳຕົວຈິງເພື່ອຍາດໄດ້ຜົນສຳເລັດໃນອະນາຄົດ, ເປັນຜູ້ສ້າງສັນຕິພາບໂລກ, ຜູ້ປະກອບສ່ວນເຂົ້າໃນການພັດທະນາໂລກ ແລະ ຜູ້ຮັກສາລະບຽບການ ສາກົນຢ່າງສະເໝີຕົ້ນສະເໝີປາຍ.
ພັກກອມມູນິດຈີນຈະເຕົ້າໂຮມສາມັກຄີ ແລະ ນຳພາປະຊາຊົນລົງເລິກຊຸກຍູ້ການຫັນເປັນທັນສະໄໝໃນແບບຂອງຈີນ, ປະກອບສ່ວນອັນໃໝ່ເຂົ້າໃນການຄົ້ນຄວ້າເສັ້ນທາງຫັນເປັນທັນສະໄໝຂອງມວນມະນຸດ. ພັກກອມມູນິດຈີນຍຶດໝັ້ນການເຮັດທຸກຢ່າງແມ່ນເລີ່ມຈາກຄວາມເປັນຈິງ, ນຳພາປະຊາຊົນຄົ້ນຄວ້າເສັ້ນທາງສັງຄົມນິຍົມທີ່ມີສີສັນພິເສດຂອງຈີນໃຫ້ສຳເລັດຜົນ. ປະຫວັດສາດ ແລະ ພຶດຕິກຳຕົວຈິງໄດ້ພິສູດ ແລະ ຈະພິສູດຕື່ມອີກວ່າ, ເສັ້ນທາງສາຍນີ້, ບໍ່ພຽງແຕ່ແມ່ນເສັ້ນທາງທີ່ຖືກຕ້ອງ ແລະ ສາມາດເປັນໄປໄດ້, ກໍຈະສາມາດກ້າວເດີນໄປໄດ້ຢ່າງໜັກແໜ້ນ ແລະມີປະສິດທິຜົນທີ່ດີ. ພວກເຮົາຈະສືບຕໍ່ກ້າວເດີນຕາມເສັ້ນທາງທີ່ສະຫວ່າງສະໄຫວສາຍນີ້ຢ່າງເດັດດ່ຽວໜ້ຽວແໜ້ນ, ພັດທະນາຕົນເອງໃຫ້ດີ ທັງສ້າງຜົນປະໂຫຍດໃຫ້ແກ່ທົ່ວໂລກ. ເສັ້ນທາງຫັນເປັນທັນສະໄໝບໍ່ມີຮູບແບບຕາຍຕົວ, ເສັ້ນທາງທີ່ສອດຄ່ອງກັບສະພາບຄວາມເປັນຈິງຂອງຕົນຈຶ່ງແມ່ນເສັ້ນທາງທີ່ດີທີ່ສຸດ, ບໍ່ຄວນບັງຄັບໃຫ້ທຸກປະເທດເລືອກເອົາເສັ້ນທາງທີ່ເປັນຮູບແບບດຽວກັນແຕ່ບໍ່ເໝາະສົມກັບສະພາບຄວາມເປັນຈິງຂອງຕົນ. ຄວາມພະຍາຍາມຂອງແຕ່ລະປະເທດໃນການສະແຫວງຫາເສັ້ນທາງຫັນເປັນທັນສະໄໝທີ່ສອດຄ່ອງກັບປະເທດຕົນຢ່າງເປັນເຈົ້າຕົນເອງນັ້ນລ້ວນແຕ່ຄວນໄດ້ຮັບຄວາມເຄົາລົບ. ພັກກອມມູນິດຈີນຍິນດີຖອດຖອນບົດຮຽນໃນການກໍ່ສ້າງການຫັນເປັນທັນສະໄໝກັບພັກການເມືອງທຸກປະເທດ, ຮ່ວມກັນເພີ່ມຊ່ອງທາງທີ່ກ້າວໄປສູ່ການຫັນເປັນທັນສະໄໝ, ສະແຫວງຫາຄວາມສຸກໃຫ້ແກ່ປະຊາຊົນປະເທດຕົນ ກໍຄືປະຊາຊົນບັນດາປະເທດໃນໂລກໃຫ້ດີກວ່າເກົ່າ.
ພັກກອມມູນິດຈີນຈະເຕົ້າໂຮມຄວາມສາມັກຄີແລະນຳພາປະຊາຊົນຈີນລົງເລິກການປະຕິຮູບຢ່າງຮອບດ້ານ ແລະເປີດກວ້າງການເປີດປະຕູສູ່ພາຍນອກ, ປະກອບສ່ວນອັນໃໝ່ເຂົ້າໃນການພັດທະນາໃຫ້ມີຄວາມຈະເລີນຮຸ່ງເຮືອງຮ່ວມກັນຂອງບັນດາປະເທດໃນໂລກ. ປັດຈຸບັນນີ້, ເຖິງວ່າເສດຖະກິດໂລກາພິວັດພວມຜະເຊີນໜ້າກັບກຳລັງກີດຂວາງບໍ່ໜ້ອຍ, ແຕ່ກໍຍັງມີກຳລັງຊຸກດັນຫຼາຍກວ່າເກົ່າ, ເບິ່ງໂດຍລວມແລ້ວ, ກຳລັງຊຸກດັນຫຼາຍກວ່າກຳລັງກີດຂວາງ, ທ່ວງທ່າລວມແຫ່ງການເປີດປະຕູສູ່ພາຍນອກ ແລະການຮ່ວມມືຂອງບັນດາປະເທດບໍ່ໄດ້ປ່ຽນແປງ ແລະກໍຈະບໍ່ປ່ຽນແປງໃນຕໍ່ໄປ. ພັກກອມມູນິດຈີນຍິນດີຮ່ວມກັບພັກການເມືອງຂອງບັນດາປະເທດເພີ່ມທະວີການແລກປ່ຽນ, ຮ່ວມກັນນຳພາເສດຖະກິດໂລກາພິວັດພັດທະນາໄປສູ່ທິດທາງທີ່ເປີດກວ້າງ, ກວມລວມ, ສ້າງຜົນປະໂຫຍດໃຫ້ທົ່ວເຖິງ, ດຸນດ່ຽງ ແລະໃຫ້ຕ່າງຝ່າຍຕ່າງມີຜົນປະໂຫຍດຫຼາຍກວ່າເກົ່າ. ພວກເຮົາຍິນດີຮ່ວມກັບປະຊາຄົມໂລກເພີ່ມທະວີການຮ່ວມມືທີ່ມີຄຸນນະພາບສູງໃນການສ້າງ “ໜຶ່ງແລວໜຶ່ງເສັ້ນທາງ”, ຮ່ວມກັນຊຸກຍູ້ການເຊື່ອມໂຍງເຊື່ອມຈອດກັນໃນທົ່ວໂລກໃຫ້ມີປະສິດທິຜົນຫຼາຍກວ່າເກົ່າ, ໃຫ້ປະເທດ ແລະປະຊາຊົນຫຼາຍກວ່າເກົ່າສາມາດແບ່ງປັນໝາກຜົນການພັດທະນາ.
ພັກກອມມູນິດຈີນຈະປະຕິບັດໜ້າທີ່ຮັບຜິດຊອບຕົນໃນຖານະເປັນພັກໃຫຍ່ຂອງປະເທດໃຫຍ່, ປະກອບສ່ວນອັນໃໝ່ເຂົ້າໃນການເພີ່ມຄວາມຜາສຸກໃຫ້ແກ່ປະຊາຊົນ. ການລຶບລ້າງຄວາມທຸກຍາກແມ່ນຄວາມໃຝ່ຝັນຮ່ວມກັນຂອງປະຊາຊົນບັນດາປະເທດ, ແມ່ນເປົ້າໝາຍສຳຄັນທີ່ພັກການເມືອງຂອງບັນດາປະເທດພະຍາຍາມສູ້ຊົນເພື່ອບັນລຸໃຫ້ໄດ້. ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ຈີນໄດ້ເຮັດໃຫ້ຜູ້ທຸກຍາກ 98,99 ລ້ານຄົນຕາມມາດຕະຖານປັດຈຸບັນນີ້ສາມາດຫຼຸດພົ້ນອອກຈາກຄວາມທຸກຍາກທັງໝົດ, ໄດ້ບັນລຸເປົ້າໝາຍຫຼຸດຜ່ອນຄວາມທຸກຍາກຕາມ “ວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ” ກ່ອນເວລາກຳນົດ 10 ປີ. ພັກກອມມູນິດຈີນຍິນດີປະກອບສ່ວນດ້ານແຜນການແກ້ໄຂ ແລະກຳລັງແຮງຂອງຈີນຫຼາຍກວ່າເກົ່າເຂົ້າໃນຂະບວນການຫຼຸດຜ່ອນຄວາມທຸກຍາກຂອງມວນມະນຸດ. ຈີນຈະສະໜັບສະໜູນການຮ່ວມມືສາກົນຕ້ານກັບພະຍາດໂຄວິດ-19, ເພີ່ມໂອກາດການເຂົ້າເຖິງວັກຊີນ ແລະ ໃຫ້ບັນດາປະເທດພວມພັດທະນາສາມາດຊຶ້ໄດ້. ຈີນຈະສຸມຄວາມພະຍາຍາມຢ່າງລຳບາກແລະໃຫຍ່ຫຼວງເພື່ອ ປະຕິບັດຕາມຄຳໝັ້ນສັນຍາໃນການບັນລຸເປົ້າໝາຍການລະບາຍກາກບອນດີອົກຊິດໃຫ້ເຖິງຈຸດສູງສຸດ ແລະການປອດການປ່ອຍກາກບອນດີອົກຊິດ, ປະກອບສ່ວນຫຼາຍກວ່າເກົ່າເຂົ້າໃນການຮັບມືກັບການປ່ຽນແປງຂອງດິນຟ້າອາກາດຂອງໂລກ. ຈີນຈະເປັນເຈົ້າພາບຈັດກອງປະຊຸມພາຄີ ຂອງ “ສັນຍາຄວາມຫຼາກຫຼາຍດ້ານຊີວະນານາພັນ”ຄັ້ງທີ 15, ຮ່ວມກັບບັນດາຝ່າຍປຶກສາຫາລືຍຸດທະສາດໃໝ່ໃນການຄຸ້ມຄອງຄວາມຫຼາກຫຼາຍດ້ານຊີວະນານາພັນ, ຮ່ວມກັນເປີດຂະບວນການໃໝ່ໃນການຄຸ້ມຄອງຄວາມຫຼາກຫຼາຍຂອງຊີວະນານາພັນໃນທົ່ວໂລກ.
ພັກກອມມູນິດຈີນຈະຕັ້ງໜ້າຊຸກຍູ້ ປັບປຸງການບໍລິຫານໂລກ, ປະກອບສ່ວນອັນ ໃໝ່ໃຫ້ສັງຄົມມະນຸດຮ່ວມມືກັນເພື່ອຮັບມືກັບສິ່ງທ້າທາຍຮ່ວມ. ທັດສະນະແກນກາງຂອງລະບົບສາກົນ ແລະລະບຽບການສາກົນທີ່ມີຢູ່ໃນປະຈຸບັນແມ່ນລັດທິຫຼາຍຝ່າຍ. ຖ້າປະຕິບັດຕາມລັດທິຫຼາຍຝ່າຍໄດ້ດີ, ກໍຈະສາມາດແກ້ໄຂບັນຫາຮ່ວມຂອງມວນມະນຸດໄດ້ດີ, ລະບຽບການສາກົນຄວນເປັນລະບຽບການທີ່ບັນດາປະເທດໃນໂລກຍອມຮັບຮ່ວມກັນ, ບໍ່ຄວນໃຫ້ປະເທດສ່ວນໜ້ອຍເປັນຜູ້ກຳນົດ. ການຮ່ວມມືລະຫວ່າງປະເທດຄວນຖືເອົາການຮັບໃຊ້ມວນມະນຸດເປັນຈຸດປະສົງ, ແຕ່ບໍ່ຄວນຖືເອົາການເມືອງຂອງກຸ່ມປະເທດສ່ວນໜ້ອຍເພື່ອສະແຫວງຫາການເປັນເຈົ້າອຳນາດຂອງໂລກເປັນຈຸດປະສົງ. ພວກເຮົາຄວນຮ່ວມກັນຄັດຄ້ານການກະທຳທຸກຢ່າງຂອງລັດທິຝ່າຍດຽວທີ່ປະຕິບັດໃນນາມລັດທິຫຼາຍຝ່າຍ. ຮ່ວມກັນຄັດຄ້ານລັດທິເຈົ້າອຳນາດ ແລະການເມືອງມະຫາອຳນາດ. ຈີນຈະເດັດດ່ຽວຮັກສາຈຸດປະສົງ ແລະຫຼັກການຂອງກົດບັດອົງການສະຫະປະຊາຊາດ, ສົ່ງເສີມຫຼັກການທີ່ວຽກງານສາກົນຄວນໃຫ້ຄົນທັງຫຼາຍປຶກສາຫາລືຮ່ວມກັນ, ຊຸກຍູ້ລະບຽບການສາກົນ ແລະລະບົບສາກົນໃຫ້ພັດທະນາກ້າວໄປສູ່ທິດທາງທີ່ມີຄວາມຍຸດຕິທຳ ແລະສົມເຫດສົມຜົນກວ່າເກົ່າ. ຂ້າພະເຂົ້າຂໍກ່າວຢືນຢັນອີກເທື່ອໜຶ່ງວ່າ: ຈີນຈະເປັນປະເທດສະມາຊິກໃນວົງຄະນາຍາດປະເທດພວມພັດທະນາຕະຫຼອດໄປ, ຈະສຸມຄວາມພະຍາຍາມເພື່ອຍົກສູງລັກສະນະຕົວແທນ ແລະ ສິດປະກອບຄຳເຫັນຂອງປະເທດພວມພັດທະນາໃນລະບົບການບໍລິຫານໂລກຢ່າງເດັດດ່ຽວ ແລະບໍ່ຫວັ່ນໄຫວຄອນແຄນ. ຈີນຈະບໍ່ສະແຫວງຫາການເປັນເຈົ້າອຳນາດ, ບໍ່ຂະຫຍາຍອຳນາດ ແລະ ບໍ່ສະແຫວງຫາການເປີດກວ້າງຂອບເຂດອິດທິພົນຕະຫຼອດໄປ, ພັກກອມມູນິດຈີນຈະຮ່ວມກັບພັກການເມືອງບັນດາປະເທດ, ໂດຍຜ່ານການປຶກສາຫາລື ແລະການຮ່ວມມືລະຫວ່າງພັກການເມືອງ ເພື່ອຊຸກຍູ້ການປະສານງານ ແລະການຮ່ວມມືລະຫວ່າງປະເທດ, ເສີມຂະຫຍາຍບົດບາດຂອງພັກການເມືອງໃນການບໍລິຫານໂລກໃຫ້ດີກວ່າເກົ່າ.
ບັນດາທ່ານຍິງ ທ່ານຊາຍ ແລະ ເພື່ອນມິດ!
ເຖິງວ່າເສັ້ນທາງທຸລະກັນດານ ແລະຍາວໄກ ແຕ່ຖ້າຍຶດໝັ້ນການກ້າວເດີນໄປໜ້າກໍສາມາດໄປຮອດຈຸດໝາຍປາຍທາງໄດ້ໃນທີ່ສຸດ; ການຍຶດໝັ້ນຄວາມພະຍາຍາມຢ່າງບໍ່ລົດລະ, ກໍຈະມີຄວາມຫວັງໄປຮອດອະນາຄົດທີ່ດີງາມ. ເສັ້ນທາງຢູ່ຂ້າງໜ້າອາດຈະຄົດໆລ້ຽວໆ, ແຕ່ກໍເຕັມໄປດ້ວຍຄວາມຫວັງ. ພັກກອມມູນິດຈີນຍິນດີຮ່ວມກັບພັກການເມືອງ ແລະອົງການຈັດຕັ້ງການເມືອງຂອງບັນດາປະເທດ, ຢືນຢູ່ຄຽງຂ້າງກັບຝ່າຍທີ່ຖືກຕ້ອງຂອງປະຫວັດສາດ, ຢືນຢູ່ໃນຝ່າຍທີ່ກ້າວໜ້າຂອງມວນມະນຸດ, ປະກອບສ່ວນອັນໃໝ່ໃຫຍ່ຫຼວງກວ່າເກົ່າເຂົ້າໃນພາລະກິດສ້າງປະຊາຄົມຮ່ວມຊາຕາກຳຂອງມວນມະນຸດ ແລະສ້າງໂລກທີ່ດີງາມກວ່າເກົ່າ.
ຂໍຂອບໃຈ.
ຄຳເຫັນ
0