ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 16 ກໍລະກົດນີ້, ຢູ່ທີ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີປາຊີຟິກ ຫຼື ເອເປັກ ແລະກ່າວຄຳປາໄສຜ່ານທາງວິດີໂອອອນລາຍຕາມການເຊື້ອເຊີນ.
ທ່ານສີຈິ້ນຜິງຊີ້ໃຫ້ເຫັນວ່າ: ພາກພື້ນອາຊີປາຊີຟິກແມ່ນແຮງຂັບເຄື່ອນທີ່ສຳຄັນຂອງການເຕີບໂຕຂອງເສດຖະກິດໂລກ. ການເອົາຊະນະການແຜ່ລະບາດຂອງພະຍາດໂຄວິດ-19 ໂດຍໄວເທົ່າທີ່ຈະໄວໄດ້, ຟື້ນຟູການເຕີບໂຕດ້ານເສດຖະກິດ, ຊຸກຍູ້ໃຫ້ເສດຖະກິດໂລກຟື້ນຄືນໃໝ່, ແມ່ນໜ້າທີ່ສຳຄັນທີ່ສຸດຂອງບັນດາປະເທດສະມາຊິກອົງການເອເປັກໃນປະຈຸບັນນີ້.
ໜຶ່ງ, ຄວນເພີ່ມທະວີການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດໂຄວິດ-19. ຈີນໄດ້ສະໜອງວັກຊີນໂຄວິດ-19 ຈຳນວນຫຼາຍກວ່າ 500 ລ້ານຫຼອດໃຫ້ແກ່ປະເທດທີ່ພວມພັດທະນາແລ້ວ, ໃນ 3 ປີຂ້າງໜ້ານີ້, ຍັງຈະໃຫ້ການຊ່ວຍເຫຼືອສາກົນຈຳນວນ 3 ຕື້ໂດລາສະຫະລັດອີກ.
ສອງ, ລົງເລິກການຫັນເສດຖະກິດພາກພື້ນເປັນອັນໜຶ່ງອັນດຽວກັນ. ຄວນຊຸກຍູ້ໃຫ້ການຄ້າແລະການລົງທຶນຫັນເປັນແບບເສລີແລະແບບສະດວກ, ປົກປັກຮັກສາລະບົບການຄ້າຫຼາຍຝ່າຍທີ່ຖືເອົາອົງການການຄ້າໂລກ ຫຼື WTO ເປັນແກນກາງ.
ສາມ, ຍຶດໝັ້ນການພັດທະນາແບບຍືນຍົງທີ່ໂອບອ້ອມອາລີ. ຄວນຍຶດໝັ້ນຫຼັກການທີ່ຖືຄົນເປັນຫຼັກ, ບັນລຸການພັດທະນາແບບສີຂຽວ. ຈີນໃຫ້ຄວາມສຳຄັນຢ່າງສູງຕໍ່ການຮັບມືກັບການປ່ຽນແປງຂອງດິນຟ້າອາກາດ, ຈະພະຍາຍາມບັນລຸເປົ້າໝາຍການປ່ອຍກາກບອນດີອົກຊິດເຖິງລະດັບສູງສຸດກ່ອນປີ 2030, ແລະພະຍາຍາມບັນລຸການປອດການປ່ອຍກາກບອນດີອົກຊິດກ່ອນປີ 2060.
ສີ່, ກຳໂອກາດການປະດິດສ້າງດ້ານວິທະຍາສາດເຕັກໂນໂລຊີ. ຄວນເພີ່ມທະວີການກໍ່ສ້າງພື້ນຖານໂຄງລ່າງດ້ານດີຈີຕອນ, ຈີນຈະຈັດກອງປະຊຸມສຳມະນາກ່ຽວກັບການສ້າງສາຄວາມສາມາດດ້ານດີຈີຕອນ, ແລະຊຸກຍູ້ຂໍ້ລິເລີ່ມການຮ່ວມມືຕ່າງໆ ເຊັ່ນ ການເຮັດໃຫ້ເຕັກນິກດີຈີຕອນສາມາດຊ່ວຍຟື້ນຟູການທ່ອງທ່ຽວ ແລະອື່ນໆ.
ຄຳເຫັນ
0