ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກ່ອນຈະຈັດງານມະຫະກຳກິລາໂອລິມປິກໂຕກຽວ, ວຽກງານປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢູ່ຍີ່ປຸ່ນໄດ້ມີການວິພາກວິຈານກັນຢ່າງໜາຫູ. ນັບມາຮອດວັນທີ 16 ກໍລະກົດນີ້, ຈຳນວນຜູ້ສັກວັກຊີນໂຄວິດ-19 ສອງເຂັມຢູ່ຍີ່ປຸ່ນໄດ້ບັນລຸປະມານ 25,76 ລ້ານຄົນ, ອັດຕາການສັກວັກຊີນພຽງແຕ່ກວມ 20,3% ຂອງປະຊາກອນເທົ່ານັ້ນ. ເມື່ອນັກກິລາຂອງບັນດາປະເທດເດີນທາງມາເຖິງຍີ່ປຸ່ນຕາມໆກັນແລ້ວ, ບັນຫາການມີຊ່ອງທາງໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢູ່ຍີ່ປຸ່ນກໍ່ນັບມື້ນັບໜັກໜ່ວງຂຶ້ນຕື່ມ.
ຄະນະນັກກິລາປິ່ງປ໋ອງຂອງຈີນທີ່ໄດ້ເດີນທາງເຖິງຍີ່ປຸ່ນໃນວັນທີ 17 ກໍລະກົດນີ້ກໍໄດ້ຖືກລົບກວນຢູ່ໃນໄລຍະໃກ້ຊິດ. ຂ່າວຍັງແຈ້ງວ່າ:ຢູ່ສະໜາມບິນນາຣິຕະຂອງຍີ່ປຸ່ນກໍໄດ້ມີຄົນດັງໃນໂລກອອນລາຍຍີ່ປຸ່ນບໍ່ສົນໃຈນຳມາດຕະການຮັກສາໄລຍະຫ່າງທາງສັງຄົມໃນການຕ້ານພະຍາດໂຄວິດ-19, ເປີດຜ້າປິດປາກແລະຂໍຖ່າຍຮູບຮ່ວມກັບນາງ ຫຼີວຊື່ເຫວີນ ແລະນັກກິລາປິ່ງປ໋ອງຄົນອື່ນໆຂອງຈີນຕາມໃຈມັກ, ແຕ່ບໍ່ມີພະນັກງານຄົນໃດໄປກ່າວເຕືອນ. ການກະທຳທີ່ໄດ້ລະເມີດມາດຕະການຂອງຄະນະຈັດງານກິລາໂອລິມປິກໄດ້ເກີດຂຶ້ນຢ່າງເປີດແປນຢູ່ສະໜາມບິນນາຣິຕະທີ່ມີນັກກິລາຈຳນວນຫຼາຍ,ເຮັດໃຫ້ຄົນຮູ້ສຶກມີຄວາມລະແວງສົງໄສເຖິງມາດຕະການປ້ອງກັນຂອງຍີ່ປຸ່ນ.
ນອກນີ້, ຍັງມີນັກກິລາຫຼາຍຄົນສັງເກດເຫັນວ່າສະຖານທີ່ພັກຂອງຕົນບໍ່ໄດ້ແຍກຕ່າງຫາກຈາກຫ້ອງພັກຂອງຜູ້ໂດຍສານອື່ນໆ, ແລະແຕ່ລະມື້ ລ້ວນແຕ່ມີນັກທ່ອງທ່ຽວຈຳນວນຫຼວງຫຼາຍເຂົ້າພັກ. ການກະທຳດັ່ງກ່າວເຮັດໃຫ້ນັກກິລາມີຄວາມສ່ຽງຫຼາຍຂຶ້ນທີ່ອາດຈະຕິດເຊື້ອພະຍາດໂຄວິດ-19.
ວັນທີ 17 ກໍລະກົດນີ້, ຢູ່ບ້ານພັກນັກກິລາໂອລິມປິກໄດ້ພົບເຫັນຜູ້ຖືກບົ່ງມະຕິເປັນພະຍາດໂຄວິດ-19 ກໍລະນີທຳອິດ, ຜູ້ເປັນພະຍາດຄົນນີ້ແມ່ນພະນັກງານຄົນໜຶ່ງທີ່ຮັບໃຊ້ຢູ່ບ້ານພັກນັກກິລາໂອລິມປິກໂຕກຽວ. ຫຼັງຈາກນັ້ນໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 18 ກໍລະກົດນີ້, ຄະນະຈັດງານກິລາໂອລິມປິກໂຕກຽວໄດ້ຢືນຢັນອີກວ່າ:ຢູ່ບ້ານພັກນັກກິລາໂອລິມປິກມີນັກກິລາອີກສອງຄົນຖືກບົ່ງມະຕິເປັນພະຍາດໂຄວິດ-19.
ງານມະຫະກຳກິລາໂອລິມປິກຄັ້ງນີ້ໄດ້ຈັດຂຶ້ນທ່າມກາງສະພາບການແຜ່ລະບາດຂອງພະຍາດໂຄວິດ-19 ຢູ່ນະຄອນໂຕກຽວເຂົ້າສູ່ສະພາບສຸກເສີນ, ສະນັ້ນຄວນເຮັດແນວໃດເພື່ອຮັບປະກັນຄວາມປອດໄພດ້ານສຸຂະພາບຂອງນັກກິລາເພື່ອໃຫ້ເຂົາເຈົ້າສາມາດເຂົ້າຮ່ວມການແຂ່ງຂັນແລະສະແດງສີມືໃນເວລາແຂ່ງຂັນແບບປົກກະຕິຂອງຕົນໄດ້ນັ້ນ, ຈຶ່ງເປັນບັນຫາທີ່ຕ້ອງໄດ້ຮັບຄວາມເອົາໃຈໃສ່ຢ່າງຫຼວງຫຼາຍກວ່າເກົ່າຈາກລັດຖະບານຍີ່ປຸ່ນ. ການທີ່ຈະຈັດງານກິລາໂອລິມປິກໃນໄລຍະການແຜ່ລະບາດຂອງພະຍາດໂຄວິດ-19 ແມ່ນເລື່ອງທີ່ບໍ່ງ່າຍແນ່ນອນ, ແຕ່ໃນໄລຍະພິເສດແບບນີ້ຄວນມີຂໍ້ກຳນົດດ້ານການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ທີ່ລະອຽດຖີ່ຖ້ວນແລະເຂັ້ມງວດກວ່າເກົ່າ.
ຊາວໂລກທີ່ຕິດຕາມງານກິລາໂອລິມປິກຄັ້ງນີ້ທັງໝົດລ້ວນແຕ່ຫວັງຢາກໃຫ້ການຈັດງານລຸລ່ວງໄປດ້ວຍຜົນສຳເລັດອັນດີງາມ, ແຕ່ຂະນະດຽວກັນກໍ່ຫວັງໃຫ້ຄະນະຈັດງານໂອລິມປິກຍີ່ປຸ່ນສາມາດວາງແຜນການໃນການປ້ອງກັນແລະຄວບຄຸມພະຍາດໂຄວິດ-19 ໃຫ້ແກ່ຄະນະຜູ້ແທນນັກກິລາທີ່ເຂົ້າຮ່ວມງານທັງໝົດໄດ້ເປັນຢ່າງດີເຊັ່ນກັນ, ມີຄວາມຮັບຜິດຊອບຕໍ່ຄວາມປອດໄພດ້ານສຸຂະພາບຂອງນັກກິລາຂອງບັນດາປະເທດທີ່ເຂົ້າຮ່ວມການແຂ່ງຂັນ,ພ້ອມກັນນັ້ນກໍ່ຄວນເພີ່ມຄວາມຮັບຜິດຊອບຕໍ່ສະພາບການໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດຍີ່ປຸ່ນຂຶ້ນຕື່ມອີກ.
ຄຳເຫັນ
0