ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແຕ່ວັນທີ 16 ຫາວັນທີ 31 ກໍລະກົດນີ້, ກອງປະຊຸມໃຫຍ່ມໍລະດົກໂລກຄັ້ງທີ 44 ໄດ້ຈັດຂຶ້ນຢູ່ນະຄອນຟູໂຈ່ວແຂວງຟູຈ້ຽນຂອງຈີນ ເຊິ່ງກອງປະຊຸມໄດ້ສະເໜີໃຫ້ຄະນະກຳມະການມໍລະດົກໂລກພິຈາລະນາຈັດເອົາແນວຫີນປະກາລັງເດີເກຣດບາຣີເອີຣິຟ(The Great Barrier Reef)ຂອງອົສຕຣາລີເຂົ້າໃນບັນຊີລາຍຊື່ມໍລະດົກໂລກທີ່ຕ້ອງລະບຸສະຖານະຕົກຢູ່ໃນສະພາບອັນຕະລາຍ.
The Great Barrier Reef ແມ່ນເຂດສະຫງວນທາງທຳມະຊາດທີ່ມີຊື່ສຽງໂດ່ງດັງໃນໂລກ, ແມ່ນເຂດທຳມະຊາດແຫ່ງທຳອິດຂອງອົສຕຣາລີທີ່ໄດ້ຮັບການຈັດເຂົ້າໃນ “ບັນຊີລາຍຊື່ມໍລະດົກໂລກ”. ແຕ່ວ່າ, ສິ່ງແວດລ້ອມຊີວະພາບຢູ່ເຂດນີ້ທີ່ສົມຄວນຕ້ອງໄດ້ຮັບການອະນຸລັກໃຫ້ດີໆນັ້ນ,ແຕ່ໃນຊຸມປີຜ່ານມາພັດໄດ້ມີສະພາບຊຸດໂຊມລົງຢ່າງຕໍ່ເນື່ອງ.
ອົງການລັດຖະບານທີ່ຄຸ້ມຄອງ The Great Barrier Reef ຂອງອົສຕຣາລີໄດ້ເຜີຍແຜ່ບົດລາຍງານສະບັບໜຶ່ງໃນປີ 2019 ໂດຍໄດ້ສະຫຼຸບວ່າ: ພາຍຫຼັງເກີດມີສະພາບທີ່ຫີນປະກາລັງກາຍເປັນສີຂາວຫຼາຍຂຶ້ນທີ່ມີສ່ວນກ່ຽວຂ້ອງກັບອຸນຫະພູມນ້ຳທະເລສູງຂຶ້ນແລ້ວ, ອະນາຄົດຂອງ The Great Barrier Reef ມີຄວາມມືດມົນຫຼາຍ.ກ່ອນຈັດກອງປະຊຸມໃຫຍ່ມໍລະດົກໂລກຄັ້ງນີ້, ສະຫະພັນອະນຸລັກທຳມະຊາດໂລກກໍ່ໄດ້ເປີດເຜີຍບົດລາຍງານສະບັບໜຶ່ງກ່ຽວກັບສະພາບ The Great Barrier Reef ໃນປັດຈຸບັນໂດຍສະແດງໃຫ້ເຫັນວ່າ: ໃນເວລາ 5 ປີຜ່ານມາ, ເນື່ອງຈາກການຂຸດຄົ້ນຊັບພະຍາກອນຈາກຟອດຊິວ, ການຜະລິດກະສິກຳປົນເປື້ອນສານພິດ,ການປ່ຽນແປງຂອງດິນຟ້າອາກາດແລະສາເຫດອື່ນໆ, ແນວຫີນປະກາລັງຂອງ The Great Barrier Reef ຈຶ່ງເກີດມີປະກົດການຫີນຂາວຂຶ້ນຢ່າງກວ້າງຂວາງ,ເຮັດໃຫ້ມັນເສຍຄຸນຄ່າທາງທຳມະຊາດ.
ເພື່ອສະກັດກັ້ນບໍ່ໃຫ້ອົງການການສຶກສາ,ວິທະຍາສາດແລະວັດທະນະທຳຂອງອົງການສະຫະປະຊາຊາດຫຼືອຸຍເນັສໂກ(UNESCO)ຈັດເອົາແນວຫີນປະກາລັງເດີເກຣດບາຣີເອີຣິຟ(The Great Barrier Reef)ເຂົ້າໃນບັນຊີລາຍຊື່ມໍລະດົກໂລກທີ່ຕ້ອງລະບຸສະຖານະຕົກຢູ່ໃນສະພາບອັນຕະລາຍ,ລັດຖະບານອົສຕຣາລີໄດ້ວິ່ງເຕັ້ນຊັກຊວນຄະນະກຳມະການມໍລະດົກໂລກ,ສິ່ງທີ່ໜ້າຕະຫຼົກກວ່ານັ້ນຄືລັດຖະບານອົສຕຣາລີອ້າງວ່າກອງປະຊຸມໃຫຍ່ມໍລະດົກໂລກຄັ້ງນີ້ແມ່ນຈັດຂຶ້ນຢູ່ຈີນ,ຈຶ່ງໄດ້ສະເໜີຄວາມຄິດເຫັນທີ່ລະແວງສົງໄສວ່າປັກກິ່ງໄດ້ເພີ່ມອິດທິພົນຕໍ່ອົງການຈັດຕັ້ງສາກົນ,ແລະບີບບັງຄັບໃຫ້ຄະນະກຳມະການມໍລະດົກໂລກພິຈາລະນາຈັດເອົາແນວຫີນປະກາລັງເດີເກຣດບາຣີເອີຣິຟເຂົ້າໃນບັນຊີລາຍຊື່ມໍລະດົກໂລກທີ່ຕ້ອງລະບຸສະຖານະຕົກຢູ່ໃນສະພາບອັນຕະລາຍຍ້ອນຖືກຄວບຄຸມທາງການເມືອງຈາກຈີນ.
ແຕ່ນັກວິທະຍາສາດແລະບຸກຄົນທີ່ອະນຸລັກສິ່ງແວດລ້ອມສ່ວນຫຼາຍລ້ວນແຕ່ບໍ່ເຫັນດີຕໍ່ກັບຄຳເວົ້າດັ່ງກ່າວ.
ທ່ານ ຊາລີ ເບວລອນ ນັກສະໝຸດທະສາດກ່າວວ່າ: “ບັນຊີລາຍຊື່“ມໍລະດົກໂລກທີ່ຕ້ອງລະບຸສະຖານະຕົກຢູ່ໃນສະພາບອັນຕະລາຍ”ບໍ່ມີສ່ວນພົວພັນໃດໆກັບຈີນ, ແຕ່ມີສ່ວນກ່ຽວຂ້ອງກັບລັດຖະບານອົສຕຣາລີທີ່ບໍ່ຍອມແບກຫາບໜ້າທີ່ຄວາມຮັບຜິດຊອບຕໍ່ບັນຫາທີ່ມີສ່ວນກ່ຽວຂ້ອງກັບການປ່ຽນແປງຂອງດິນຟ້າອາກາດ.”
ທ່ານ ຈອນ ຕານເຈີ ອະດີດຜູ້ອຳນວຍການບໍລິຫານງານຂອງອົງການຄຸ້ມຄອງສວນສາທາລະນະມະຫາສະໝຸດ The Great Barrier Reef ໄດ້ສະແດງຄວາມຄິດເຫັນລົງໃນເວັບໄຊ Mongabay ໃນວັນທີ 21 ກໍລະກົດນີ້ວ່າ: UNESCO ບໍ່ໄດ້ມີຈຸດປະສົງທາງການເມືອງໃດໆທີ່ຫຼຸດລະດັບ The Great Barrier Reef. “ລັດຖະບານອົສຕຣາລີບໍ່ຄວນເວົ້າວ່າບັນຊີລາຍຊື່ມໍລະດົກໂລກຄວນໄດ້ຮັບຄວາມເຄົາລົບ,ແລະສວຍໂອກາດຊຸກຍູ້ອຸດສາຫະກຳທ່ອງທ່ຽວຢູ່ເຂດ The Great Barrier Reef ທີ່ມີມູນຄ່າ 5,7 ຕື້ໂດລາອົສຕຣາລີຕໍ່ປີ, ແຕ່ປັດຈຸບັນພັດກ່າວວ່າມັນເປັນກົນລວງທີ່ມັກຖືກອິດທິກຳລັງການເມືອງຄວບຄຸມຢ່າງງ່າຍ.”
ທ່ານ ຣີຊາດ ເລກ ຫົວໜ້າວຽກງານມະຫາສະໝຸດຂອງອົງການກອງທຶນທຳມະຊາດໂລກໄດ້ກ່າວວ່າ: “ລັດຖະບານອົສຕຣາລີຕຳໜິການປະເມີນຜົນຂອງຄະນະກຳມະການດັ່ງກ່າວແມ່ນເພື່ອຈຸດປະສົງທາງການເມືອງ, ແຕ່ຕົນພັດໄດ້ດຳເນີນການເຄື່ອນເກັຍກ່ອມເພື່ອຈຸດປະສົງທາງການເມືອງຂອງຕົນ.”
ພາຍໃຕ້ການຂັດຂວາງແບບປ່ວງບ້າຈາກລັດຖະບານອົສຕຣາລີ, ຄະນະກຳມະການມໍລະດົກໂລກໄດ້ຜ່ານການພິຈາລະນາແລ້ວຈຶ່ງຕົກລົງໃນວັນທີ 23 ກໍລະກົດນີ້ໂດຍໄດ້ຮຽກຮ້ອງໃຫ້ອົສຕຣາລີຍື່ນບົດລາຍງານກ່ຽວກັບສະພາບການອະນຸລັກ The Great Barrier Reef ກໍຄືສະພາບການປະຕິບັດງານໃຫ້ສູນມໍລະດົກໂລກໃນປີ 2022, ພ້ອມທັງເລື່ອນເວລາການພິຈາລະນາຫົວຂໍ້ກອງປະຊຸມທີ່ກ່ຽວຂ້ອງໃຫ້ນຳໄປຄົ້ນຄວ້າພິຈາລະນາອີກໃນກອງປະຊຸມໃຫຍ່ມໍລະດົກໂລກຄັ້ງຕໍ່ໄປຄືຄັ້ງທີ 45. ແຕ່ຖ້າອົສຕຣາລີບໍ່ຄິດຫາວິທີແກ້ໄຂບັນຫາທີ່ກະທົບຕໍ່ The Great Barrier Reef ໂດຍພື້ນຖານແລ້ວ, ການຈັດເອົາ The Great Barrier Reef ເຂົ້າໃນບັນຊີລາຍຊື່ມໍລະດົກໂລກທີ່ຕ້ອງລະບຸສະຖານະຕົກຢູ່ໃນສະພາບອັນຕະລາຍຈະຕ້ອງເປັນໄປບໍ່ໄວກໍ່ຊ້າ.
ຄຳເຫັນ
0