ພະຍາດໂຄວິດ-19 ຍັງແຜ່ລະບາດຢູ່ໃນໂລກ. ອົງການອະນາໄມໂລກກ່າວເຕືອນວ່າ: ໃນອາທິດທີ່ຜ່ານມາ,ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ມີເກືອບ 4 ລ້ານກໍລະນີ,ອີງຕາມທ່າອຽງໃນປັດຈຸບັນ, ຄາດວ່າໃນສອງອາທິດຕໍ່ໜ້າ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ໃນໂລກລວມທັງໝົດຈະມີຫຼາຍກວ່າ 200 ລ້ານກໍລະນີ. ສະຖານະການທີ່ຂ້ຽວຂາດແບບນີ້ສະແດງໃຫ້ເຫັນວ່າ: ປະຊາຄົມໂລກຕ້ອງເພີ່ມທະວີຄວາມສາມັກຄີແລະຮ່ວມມືກັນຈຶ່ງຈະສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄວ້ໄດ້ໂດຍໄວ. ແຕ່ວ່າ, ອາເມຣິກາບໍ່ໄດ້ເຂົ້າຮ່ວມໃນຂະບວນການເຄື່ອນໄຫວຕ້ານກັບພະຍາດໂຄວິດ-19 ຂອງໂລກມາແຕ່ຕົ້ນຈົນເຖິງປັດຈຸບັນ.
ພາຍໃຕ້ສະພາບການແຜ່ລະບາດຂອງພະຍາດໂຄວິດ-19 ຢ່າງຮ້າຍແຮງ, ອາເມຣິກາບໍ່ພຽງແຕ່ບໍ່ປະສົບຜົນສຳເລັດໃນການຄວບຄຸມສະພາບການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດໄດ້, ແລະໄດ້ສ້າງຜົນເສຍຫາຍໃຫ້ກັບຊີວິດຂອງປະຊາຊົນປະເທດຕົນຢ່າງໜັກໜ່ວງເທົ່ານັ້ນ, ແຕ່ຍັງເຮັດໃຫ້ຄົນອາເມຣິກາທີ່ເປັນພະຍາດໂຄວິດ-19 ເດີນທາງໄປແຫ່ງຕ່າງໆຂອງໂລກ,ເຮັດໃຫ້ປະຊາຊົນຢູ່ປະເທດອື່ນຕິດເຊື້ອພະຍາດນຳ,ຍ້ອນວ່າບໍ່ໄດ້ໃຊ້ມາດຕະການຄວບຄຸມການເດີນທາງອອກນອກປະເທດທີ່ແທ້ຈິງແລະມີປະສິດທິຜົນແຕ່ຕົ້ນຈົນເຖິງປັດຈຸບັນ.ສະນັ້ນ,ອາເມຣິກາໄດ້ກາຍເປັນປະເທດໃຫຍ່ທີ່ສຸດທີ່ເຮັດໃຫ້ເຊື້ອພະຍາດແຜ່ລະບາດໄປສູ່ໂລກ.
ອີງຕາມຂໍ້ມູນຈາກຫ້ອງການທ່ອງທ່ຽວແຫ່ງຊາດອາເມຣິກາໄດ້ໃຫ້ຮູ້ວ່າ: ແຕ່ເດືອນເມສາປີ 2020 ຫາເດືອນມີນາປີ 2021, ພົນລະເມືອງອາເມຣິກາທີ່ໄດ້ເດີນທາງອອກນອກປະເທດຜ່ານທາງຖ້ຽວບິນແລະທາງບົກລວມທັງໝົດມີເຖິງ 23,195 ລ້ານເທື່ອຄົນ; ແຕ່ເດືອນພະຈິກປີ 2020 ຫາເດືອນມັງກອນປີ 2021, ໃນໄລຍະການແຜ່ລະບາດຂອງພະຍາດໂຄວິດ-19 ຢູ່ອາເມຣິກາມີສະພາບຮ້າຍແຮງທີ່ສຸດ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ສະເລ່ຍຕໍ່ມື້ມີເຖິງ 1,86 ແສນກໍລະນີ,ພົນລະເມືອງອາເມຣິກາທີ່ອອກນອກປະເທດສະເລ່ຍຕໍ່ມື້ໃນໄລຍະນັ້ນມີເຖິງ 8,7 ໝື່ນເທື່ອຄົນ,ເຊິ່ງເປັນຕົວເລກທີ່ສູງທີ່ສຸດໃນໄລຍະດັ່ງກ່າວ.
ຜົນການຄົ້ນຄວ້າໃນເດືອນພຶດສະພາປີ 2020 ຂອງມະຫາວິທະຍາໄລແຕນອາວິຟຂອງອິສຣາແອນໄດ້ຊີ້ໃຫ້ເຫັນວ່າ, ຢູ່ປະເທດຕົນໄດ້ມີຜູ້ຖືກບົ່ງມະຕິເປັນພະຍາດໂຄວິດ-19 ປະມານ 70% ແມ່ນຕິດເຊື້ອພະຍາດທີ່ລະບາດຈາກອາເມຣິກາ; ສື່ມວນຊົນ ສ.ເກົາຫຼີ ລາຍງານໃນວັນທີ 25 ກຸມພາປີນີ້ວ່າ: ໃນຈຳນວນຜູ້ເປັນພະຍາດທີ່ມາຈາກຕ່າງປະເທດ 7 ພັນກໍລະນີຢູ່ ສ.ເກົາຫຼີ, ມີ 35% ມາຈາກອາເມຣິກາ; ກະຊວງສາທາລະນະສຸກອົສຕຣາລີກໍໄດ້ເປີດເຜີຍໃນເດືອນພຶດສະພາປີ 2020 ວ່າ: ໃນຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ປະເທດດັ່ງກ່າວມີ 14% ແມ່ນມາຈາກອາເມຣິກາ.
ໃນເວລາພະຍາດໂຄວິດ-19 ໄດ້ແຜ່ລະບາດຢ່າງຮ້າຍແຮງໃນຂອບເຂດທົ່ວໂລກໃນປີກາຍນີ້, ອາເມຣິກາໄດ້ກັກສະສົມວັດຖຸອຸປະກອນຕ້ານພະຍາດໂຄວິດ-19 ທີ່ປະເທດອື່ນຄວນໄດ້ຮັບ, ຊື້ຢາປິ່ນປົວພະຍາດເກືອບໝົດ, ຕັດຂາດການສະໜອງວັດຖຸອຸປະກອນແລະຢາໃຫ້ກັບອົງການອະນາໄມໂລກແລະຖອນອອກຈາກອົງການດັ່ງກ່າວ, ໃນປີນີ້ກໍໄດ້ສະສົມວັກຊີນໂຄວິດ-19,ຈຳກັດການສົ່ງອອກວັດຖຸດິບ,ສົມຮູ້ຮ່ວມຄິດກັນສ້າງເປັນກຸ່ມພັນທະມິດໃນວົງແຄບ, ສ້າງລັດທິຫຼາຍຝ່າຍທີ່ຈອມປອມຈົນເຖິງຂັ້ນມີເຈດຕະນາບີບບັງຄັບອົງການອະນາໄມໂລກໃນໂຄງການແລະຫົວຂໍ້ທີ່ສຳຄັນຈຳນວນໜຶ່ງ. ການກະທຳທີ່ຄ້າຍຄືກັນແບບນີ້ຍັງມີຫຼາຍຈົນນັບບໍ່ຖ້ວນ.
ໃນ 1 ປີກວ່າທີ່ຜ່ານມາ, ອາເມຣິກາໄດ້ສວຍໃຊ້ການແຜ່ລະບາດຂອງພະຍາດໂຄວິດ-19 ສ້າງຄວາມເສື່ອມເສຍຊື່ສຽງໃຫ້ກັບປະເທດອື່ນ,ໃສ່ຮ້າຍປ້າຍສີປະເທດອື່ນດ້ວຍເຊື້ອພະຍາດແລະຫັນບັນຫາການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ເປັນບັນຫາການເມືອງມາໂດຍຕະຫຼອດ, ປ່າວຂ່າວລືທົ່ວທີບ,ສ້າງຄວາມເປັນປໍລະປັກກັນ. ເລີ່ມແຕ່ການເອີ້ນເຊື້ອພະຍາດໂຄວິດ-19 ເປັນ “ເຊື້ອພະຍາດຈີນ” ຢ່າງເປີດແປນ,ຫາການເສກສັນປັ້ນແຕ່ງຄຳເວົ້າ “ການຮົ່ວອອກຈາກຫ້ອງທົດລອງ” ຊ້ຳແລ້ວຊ້ຳອີກແລະອື່ນໆ. ພາຍໃຕ້ຈິດສຳນຶກທີ່ຜິດພາດທີ່ຖືຈີນເປັນຄູ່ແຂ່ງທາງຍຸດທະສາດອັນດັບໜຶ່ງແລະເປັນໄພຂົ່ມຂູ່ທີ່ໃຫຍ່ທີ່ສຸດ, ອາເມຣິກາບໍ່ເອົາຫົວຊານຳຄວາມເປັນຈິງ,ປີ້ນຂາວເປັນດຳ,ໃສ່ຮ້າຍປ້າຍສີການຊ່ວຍເຫຼືອ
ວັກຊີນໂຄວິດ-19 ຂອງຈີນໃຫ້ກັບຕ່າງປະເທດວ່າແມ່ນ “ການທູດດ້ານວັກຊີນໂຄວິດ-19”, ແລະກ່າວວ່າຈີນຊ່ວຍພັດທະນາປະເທດອື່ນແມ່ນການຊ່ວຍເຫຼືອໂດຍມີຈຸດປະສົງເພື່ອເຂົ້າແທນອາເມຣິກາ.
ມວນມະນຸດແມ່ນປະຊາຄົມຮ່ວມຊາຕາກຳ,ຄວາມສາມັກຄີແລະການຮ່ວມມືຈຶ່ງແມ່ນອາວຸດທີ່ເຂັ້ມແຂງທີ່ສຸດທີ່ສາມາດເອົາຊະນະການແຜ່ລະບາດຂອງພະຍາດໂຄວິດ-19. ໃນຖານະເປັນປະເທດພັດທະນາແລ້ວທີ່ໃຫຍ່ທີ່ສຸດໃນໂລກ, ສະພາບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາໄດ້ພົວພັນເຖິງອະນາຄົດດ້ານການຕ້ານກັບພະຍາດໂຄວິດ-19 ຂອງໂລກໂດຍກົງ. ສູນປ້ອງກັນແລະຄວບຄຸມພະຍາດແຫ່ງຊາດອາເມຣິກາໄດ້ເປີດເຜີຍຕົວເລກຂໍ້ມູນໃນວັນທີ 30 ກໍລະກົດຜ່ານມາໂດຍສະແດງໃຫ້ເຫັນວ່າ: ຈຳນວນຜູ້ຖືກບົ່ງມະຕິ,ຜູ້ເສຍຊີວິດແລະຜູ້ນອນໂຮງໝໍຍ້ອນເປັນພະຍາດໂຄວິດ-19 ເພີ່ມໃໝ່ສະເລ່ຍຕໍ່ມື້ໃນ 7 ມື້ຜ່ານມາຕ່າງກໍໄດ້ເພີ່ມຂຶ້ນ 64,1%, 33,3% ແລະ 46,3% ຕາມລຳດັບເມື່ອທຽບໃສ່ອາທິດທີ່ຜ່ານມາ. ຜູ້ຊ່ຽວຊານດ້ານສາທາລະນະສຸກຂອງອາເມຣິກາເປັນຫ່ວງວ່າ, ຖ້າລັດຖະບານອາເມຣິກາບໍ່ໃຊ້ມາດຕະການທີ່ມີປະສິດທິຜົນ,ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ກໍຈະສືບຕໍ່ເພີ່ມຂຶ້ນຢ່າງວ່ອງໄວ. ໂດຍປະເຊີນໜ້າກັບສະພາບການແຜ່ລະບາດຂອງພະຍາດໂຄວິດ-19 ທີ່ຮ້າຍແຮງແບບນີ້, ປະຊາຊົນໃນໂລກຈຶ່ງຢາກຈະຖາມວ່າ: ເມື່ອໃດລັດຖະບານອາເມຣິກາຈຶ່ງຈະສາມາດເຂົ້າຮ່ວມໃນຂະບວນການເຄື່ອນໄຫວທີ່ສາມັກຄີກັນແລະຮ່ວມມືກັນຕ້ານກັບພະຍາດໂຄວິດ-19 ໄດ້ຢ່າງແທ້ຈິງ?
ຄຳເຫັນ
0