ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ສະພາບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາຮ້າຍແຮງຂຶ້ນຢ່າງວ່ອງໄວ, ຈຳນວນຜູ້ຖືກບົ່ງມະຕິເພີ່ມໃໝ່ຕໍ່ມື້ໄດ້ເພີ່ມຂຶ້ນຢ່າງຫຼວງຫຼາຍ. ສື່ມວນຊົນອາເມຣິກາລາຍງານວ່າ, ປັດຈຸບັນ, ເຂດຊຸມຊົນຢູ່ອາເມຣິກາມີຫຼາຍກວ່າ 98% ເປັນເຂດຊຸມຊົນທີ່ມີຄວາມສ່ຽງສູງທີ່ຈະຕິດເຊື້ອພະຍາດໂຄວິດ-19, ກ່ອນໜ້ານີ້ໜຶ່ງເດືອນ, ຕົວເລກດັ່ງກ່າວພຽງແຕ່ກວມ 19% ເທົ່ານັ້ນ.
ສະພາບການແຜ່ລະບາດຂອງພະຍາດໂຄວິດ-19 ທີ່ຮ້າຍແຮງຂຶ້ນຢ່າງວ່ອງໄວເຮັດໃຫ້ລະບົບສາທາລະນະສຸກຂອງອາເມຣິກາໄດ້ຮັບຄວາມກົດດັນຢ່າງໜັກອີກຄັ້ງໜຶ່ງ, ຕົວເມືອງໃຫຍ່ຫຼາຍແຫ່ງຂອງລັດເທັກຊັດໂດຍສະເພາະໃນຫ້ອງ ICU ຂາດແຄນຕຽນນອນຄົນເຈັບຢ່າງໜັກໜ່ວງ. ຈຳນວນຄົນເຈັບນອນປິ່ນປົວຢູ່ໂຮງໝໍຍ້ອນເປັນພະຍາດໂຄວິດ-19 ຢູ່ລັດຣຸຍເຊຍນາໄດ້ສ້າງສະຖິຕິໃໝ່ໃນອາທິດແລ້ວນີ້, ແຕ່ໃນອາທິດນີ້ຕົວເລກພັດເພີ່ມຂຶ້ນອີກ.
ບົດວິເຄາະຊີ້ໃຫ້ເຫັນວ່າ: ເຊື້ອພະຍາດກາຍພັນເດວຕາທີ່ມີອັດຕາການຕິດເຊື້ອສູງພວມແຜ່ລະບາດຢູ່ອາເມຣິກາຢ່າງວ່ອງໄວ. ແຕ່ວ່າຄວາມແຕກແຍກກັນໃນທາງການເມືອງເຮັດໃຫ້ປະຊາຊົນອາເມຣິກາມີຄວາມເຫັນແຕກຕ່າງກັນໃນບັນຫາໃສ່ຜ້າປິດປາກ, ການສັກວັກຊີນແລະບັນຫາອື່ນໆ, ສົ່ງຜົນເຮັດໃຫ້ສະພາບການແຜ່ລະບາດຂອງພະຍາດໂຄວິດ-19 ຮ້າຍແຮງຂຶ້ນຕື່ມອີກ. ນີ້ໄດ້ພິສູດໃຫ້ເຫັນອີກຄັ້ງໜຶ່ງວ່າລະບົບການເມືອງຂອງອາເມຣິກາປະສົບກັບຄວາມຫຼົ້ມແຫຼວ.
ຢູ່ອາເມຣິກາ, ການຕໍ່ສູ້ກັນທາງດ້ານການເມືອງລະຫວ່າງພັກເດໂມແຄລັດກັບພັກຣີພັບຣີກັນໄດ້ເຮັດໃຫ້ບັນຫາຕ່າງໆຂອງສັງຄົມລ້ວນແຕ່ຖືກຫັນເປັນບັນຫາການເມືອງ. ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19, ນັກກາເມືອງອາເມຣິກາທັງຫຼາຍມັກຈະກະທຳແບບເຫຼືອເຊື່ອຍ້ອນສາເຫດການເມືອງເຊັ່ນ: ເຂົາເຈົ້າໄດ້ເຮັດໃຫ້ບັນຫາເຊື້ອພະຍາດກາຍເປັນບັນຫາການເມືອງ, ແລະໄດ້ກ່າວໂຈມຕີເຊິ່ງກັນແລະກັນກ່ຽວກັບມາດຕະການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19; ນອກຈາກນັ້ນ, ອົງການປົກຄອງທ້ອງຖິ່ນແລະລັດຖະບານກາງກໍມີຄວາມເຫັນຂັດແຍ້ງກັນໃນດ້ານການປ້ອງກັນພະຍາດ, ແລະຍຸຍົງສົ່ງເສີມໃຫ້ປະຊານິຍົມຟື້ນຄືນໃໝ່ອີກ.
ຄວາມແຕກແຍກກັນໃນທາງດ້ານການເມືອງແບບນີ້, ສົ່ງຜົນເຮັດໃຫ້ອາເມຣິກາເຊິ່ງເປັນປະເທດທີ່ມີເຕັກນິກ, ມີຜູ້ມີຄວາມຮູ້ຄວາມສາມາດແລະຊັບພະຍາກອນດ້ານການປິ່ນປົວພະຍາດດີທີ່ສຸດໃນໂລກຈຶ່ງບໍ່ສາມາດປະຕິບັດງານຫຍັງໄດ້ເລີຍເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ-19. ລັດຖະບານອາເມຣິກາບໍ່ສາມາດຊີ້ນຳນຳພາກ່ຽວກັບມາດຕະການປ້ອງກັນແລະຄວບຄຸມການແຜ່ລະບາດຂອງພະຍາດໄດ້, ໃນເວລາສັບຊ້ອນແລະຈັດສັນວັດຖຸອຸປະກອນປິ່ນປົວພະຍາດກໍມີລັກສະນະຊັກຊ້າແລະສັບສົນ, ສົ່ງຜົນເຮັດໃຫ້ທົ່ວປະເທດອາເມຣິກາຕົກຢູ່ໃນສະພາບການທີ່ລັດຖະບານແລະອົງການປົກຄອງທ້ອງຖິ່ນຍາດກັນເອົາອຸປະກອນປ້ອງກັນພະຍາດໂຄວິດ-19, ບາງລັດຍັງໄດ້ກີດກັນແຜນການສັກວັກຊີນຕື່ມອີກ.
ຄວາມແຕກແຍກກັນໃນທາງດ້ານການເມືອງແບບນີ້, ກໍໄດ້ສະກັດກັ້ນການຮ່ວມມືສາກົນໃນດ້ານການຄວບຄຸມການແຜ່ລະບາດຂອງພະຍາດໂຄວິດ-19 ຂອງໂລກ. ອາເມຣິກາຍັງກົດດັນອົງການອະນາໄມໂລກຫຼື WHO ຢ່າງບໍ່ຢຸດຢັ້ງ, ຂົ່ມຂູ່ WHO ໃຫ້ດຳເນີນງານຝຶນກັບຈິດໃຈວິທະຍາສາດແລະດຳເນີນການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ໄລຍະທີສອງທີ່ແນໃສ່ປະເທດຈີນ; ເຂົາເຈົ້າປ່ອຍໃຫ້ເຊື້ອພະຍາດແຜ່ລະບາດໄປທົ່ວທີບ, ສົ່ງຜົນເຮັດໃຫ້ສະພາບການແຜ່ລະບາດຂອງພະຍາດໃນທົ່ວໂລກຮ້າຍແຮງຂຶ້ນຕື່ມ; ເຂົາເຈົ້າປະຕິບັດ “ລັດທິເຊື້ອຊາດດ້ານວັກຊີນ”, ທຳລາຍການຮ່ວມມືລະຫວ່າງປະເທດໃນດ້ານການຄົ້ນຄວ້າ, ຜະລິດແລະແບ່ງປັນວັກຊີນຢ່າງຍຸຕິທຳ.
ການຮັບມືກັບການແຜ່ລະບາດຂອງພະຍາດໂຄວິດ-19 ແມ່ນວຽກງານອັນຮີບດ່ວນທີ່ສຸດຂອງປະເທດຕ່າງໆໃນໂລກ, ຄວາມສາມັກຄີແລະຮ່ວມມືແມ່ນອາວຸດອັນເຂັມແຂງທີ່ສຸດໃນ ການຮັບມືກັບການແຜ່ລະບາດຂອງພະຍາດ. ແຕ່ວ່າຄວາມແຕກແຍກກັນໃນທາງດ້ານການເມືອງທີ່ບໍ່ມີຫຼັກການຖື້ນຖານຂອງອາເມຣິກາ, ກໍໄດ້ກາຍເປັນມືມືດສະກັດກັ້ນການຮ່ວມມືກັນເພື່ອຕ້ານກັບການແຜ່ລະບາດຂອງພະຍາດໃນໂລກ, ເປັນການທີ່ທຳລາຍຊີວິດຂອງປະຊາຊົນຂອງປະເທດຕ່າງໆໃນໂລກ, ທັງເປັນການທຳລາຍຊີວິດຂອງປະຊາຊົນອາເມຣິກາເອງອີກ. ຜູ້ນຳອາເມຣິກາຄວນຢຸດຕິການຄວບຄຸມທາງການເມືອງຕ່າງໆໄດ້ແລ້ວແລະຫັນໜ້າມາເອົາໃຈໃສ່ວຽກງານຕົວຈິງເພື່ອຕ້ານກັບການແຜ່ລະບາດຂອງພະຍາດໂຄວິດ-19, ຢ່າເຮັດໃຫ້ໂສກນາດຕະກຳເກີດຂຶ້ນຢູ່ອາເມຣິກາແລະປະເທດຕ່າງໆໃນໂລກຫຼາຍກວ່ານີ້.
ຄຳເຫັນ
0