ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສະພາບການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນເຮັດໃຫ້ ຄົນເຮົາຜະເຊີນໜ້າກັບສິ່ງທ້າທາຍໃຫຍ່ທີ່ສຸດຫຼັງສົງຄາມໂລກຄັ້ງທີ 2 ເປັນຕົ້ນມາ. ການແຜ່ລະບາດຂອງພະຍາດດັ່ງກ່າວທີ່ເກີດຂຶ້ນໃນຮອບຮ້ອຍປີເທື່ອໜຶ່ງ, ຈີນໄດ້ຕັ້ງໜ້າຊຸກຍູ້ການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດ, ປະກອບສ່ວນແລະເພີ່ມຄວາມໝັ້ນໃຈໃຫ້ຫັບສັງຄົມໃນການຕ້ານກັບການແຜ່ລະບາດຂອງພະຍາດໂຄວິດ-19 ຂອງໂລກ, ເຊິ່ງໄດ້ສະແດງໃຫ້ເຫັນເຖິງຄວາມຮັບຜິດຊອບຂອງປະເທດຈີນໃນຖານະປະເທດໃຫຍ່.
ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19, ທົ່ວປະເທດຈີນໄດ້ຮ່ວມຈິດຮ່ວມໃຈກັນ, ຈັດຕັ້ງປະຕິບັດມາດຕະການປ້ອງກັນແລະຄວບຄຸມການແຜ່ລະບາດຂອງພະຍາດຢ່າງຮອບດ້ານທີ່ສຸດ, ເຂັ້ມງວດທີ່ສຸດແລະເຖິງຖອງທີ່ສຸດ, ແລະໄດ້ຮັບຜົນສຳເລັດທີ່ມີລັກສະນະຍຸດທະສາດສຳຄັນໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ໃນໄລຍະພຽງບໍ່ເທົ່າໃດເດືອນພາຍຫຼັງພະຍາດດັ່ງກ່າວແຜ່ລະບາດຢູ່ປະເທດຈີນ, ຈີນໄດ້ສ້າງກຳແພງປ້ອງກັນພະຍາດໂຄວິດ-19 ທີ່ໝັ້ນແກ່ນໃຫ້ກັບຄວາມປອດໄພດ້ານສາທາລະນະສຸກຂອງໂລກ.
ໃນເວລາທີ່ປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢູ່ປະເທດຕົນໃຫ້ດີນັ້ນ, ຈີນຍັງໄດ້ສົ່ງເສີມແລະປະຕິບັດລັດທິຫຼາຍຝ່າຍ, ຊຸກຍູ້ການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດໂຄວິດ-19, ແລະໄດ້ເພີ່ມພະລັງແຮງໃນການຕ້ານກັບການແຜ່ລະບາດຂອງພະຍາດໃຫ້ກັບທົ່ວໂລກ. ໃນກອງປະຊຸມສຸດຍອດສະໄໝພິເສດຂອງກຸ່ມ 20 ປະເທດເພື່ອຮັບມືກັບການແຜ່ລະບາດຂອງພະຍາດໂຄວິດ-19, ໃນກອງປະຊຸມໃຫຍ່ຂອງອົງການອະນາໄມໂລກສະໄໝທີ 73 ທາງວິດີໂອ, ກອງປະຊຸມສຸດຍອດສະໄໝພິເສດຈີນ-ອາຟຣິກາເພື່ອຕ້ານກັບການແຜ່ລະບາດຂອງພະຍາດໂຄວິດ-19 ແລະເວທີຫຼາຍຝ່າຍອື່ນໆ, ທ່ານສີຈິ້ນຜິງ ປະທານປະເທດຈີນໄດ້ສະເໜີຫຼາຍເທື່ອວ່າ: ຄວນເພີ່ມທະວີການຮ່ວມມືສາກົນຢ່າງຮອບດ້ານ, ເນັ້ນໜັກຄຳເວົ້າທີ່ວ່າສາມັກຄີກັນແລະຮ່ວມມືກັນແມ່ນວິທີດີທີ່ສຸດໃນການຮັບມືກັບການແຜ່ລະບາດຂອງພະຍາດໂຄວິດ-19. ນອກຈາກນີ້, ຈີນຍັງໄດ້ບໍລິຈາກເງິນ 50 ລ້ານໂດລາໃຫ້ແກ່ອົງການອະນາໄມໂລກເພື່ອສະໜັບສະໜູນອົງການດັ່ງກ່າວດຳເນີນການຮ່ວມມືຕ້ານກັບການແຜ່ລະບາດຂອງພະຍາດໃນທົ່ວໂລກ.
ວັກຊີນແມ່ນອາວຸດອັນເຂັ້ມແຂງທີ່ຈະເອົາຊະນະການແຜ່ລະບາດຂອງພະຍາດແລະຟື້ນຟູເສດຖະກິດ. ຈີນມີຈຸດຢືນລົງເລິກການຮ່ວມມືສາກົນດ້ານວັກຊີນມາໂດຍຕະຫຼອດ, ຮັບປະກັນ ຄວາມສາມາດຂອງປະເທດພວມພັດທະນາໃນການເຂົ້າເຖິງວັກຊີນແລະສາມາດຊື້ໄດ້, ເຮັດໃຫ້ວັກຊີນກາຍເປັນຜະລິດຕະພັນສາທາລະນະຂອງໂລກ. ຈີນໄດ້ປະຕິບັດງານໃຫ້ວັກຊີນເຂົ້າເຖິງປະເທດພວມພັດທະນາໄວຂຶ້ນດ້ວຍການກະທຳຕົວຈິງ, ປັດຈຸບັນໄດ້ສະໜອງວັກຊີນຫຼາຍກວ່າ 800 ລ້ານຫຼອດໃຫ້ແກ່ 100 ກວ່າປະເທດແລະອົງການຈັດຕັ້ງສາກົນ, ເປັນອັນດັບໜຶ່ງຂອງໂລກ.
ໃນພິທີມອບ-ຮັບວັກຊີນປ້ອງກັນພະຍາດໂຄວິດ-19 ງວດທີ 5 ທີ່ລັດຖະບານຈີນໃຫ້ການຊ່ວຍເຫຼືອ ສປປ ລາວທີ່ຈັດຂຶ້ນໃນວັນທີ 11 ສິງຫານີ້, ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວກ່າວວ່າ: ປັດຈຸບັນສະພາບການແຜ່ລະບາດຂອງພະຍາດໂຄວິດ-19ໂລກຍັງຂ້ຽວຂາດຢູ່, ຈີນໄດ້ມີຄວາມຮັບຜິດຊອບໃນຖານະປະເທດໃຫຍ່ຂອງໂລກ, ສະໜອງວັກຊີນແລະເຄື່ອງອຸປະກອນປິ່ນປົວທີ່ມີຄຸນນະພາບສູງ, ປອດໄພແລະມີປະສິດທິຜົນໃຫ້ແກ່ປະຊາຄົມໂລກ, ຊຸກຍູ້ການຮ່ວມມືຕ້ານກັບການແຜ່ລະບາດຂອງພະຍາດໂຄວິດ-19ຂອງໂລກໃຫ້ເຂົ້າສູ່ລວງເລິກຢ່າງບໍ່ຢຸດຢັ້ງດ້ວຍການກະທຳຕົວຈິງ, ໄດ້ປະກອບສ່ວນສ້າງປະຊາຄົມຮ່ວມສາທາລະນະສຸກດ້ວຍພະລັງແຮງຂອງຈີນ.
ຈາກການທີ່ແຈ້ງຂໍ້ມູນກ່ຽວກັບສະພາບການແຜ່ລະບາດຂອງພະຍາດໂຄວິດ-19 ຢ່າງທັນເວລາຮອດການສະໜອງຂໍ້ມູນລຳດຳແຊນຂອງເຊື້ອພະຍາດ, ຈາກການແບ່ງປັນບົດຮຽນຕ້ານກັບການແຜ່ລະບາດຂອງພະຍາດຮອດການສົ່ງໜ່ວຍຜູ້ຊ່ຽວຊານປິ່ນປົວພະຍາດໄປຊ່ວຍເຫຼືອຕ່າງປະເທດ, ຈາກການດຳເນີນການຊ່ວຍເຫຼືອຕ້ານກັບການແຜ່ລະບາດຂອງພະຍາດຮອດການສົ່ງອອກເຄື່ອງອຸປະກອນຕ້ານກັບການແຜ່ລະບາດຂອງພະຍາດ, ຈາກການຮ່ວມມືການຄົ້ນຄວ້າແລະຜະລິດວັກຊີນຮອດການສ້າງປະຊາຄົມຮ່ວມສາທາລະນະສຸກຂອງມວນມະນຸດ, ໃນເວລາສຳຄັນທີ່ສະພາບການແຜ່ລະບາດຂອງພະຍາດໂຄວິດ-19 ເກີດຂຶ້ນຊ້ຳແລ້ວຊ້ຳອີກ, ເຊື້ອພະຍາດກາຍພັນເລື້ອງໆ, ສະຖານະການຍັງສັບສົນຂ້ຽວຂາດຢູ່, ຈີນໄດ້ເດີນຕາມເສັ້ນທາງຖືກຕ້ອງທີ່ສາມັກຄີແລະຮ່ວມມືກັນຢ່າງເດັດດ່ຽວໜຽວແໜ້ນດ້ວຍການກະທຳຕົວຈິງທັງໝົດ.
ຄຳເຫັນ
0