ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 23 ພຶດສະພາປີ 1951 ແມ່ນວັນເຊັນສັນຍາລະຫວ່າງລັດຖະບານປະຊາຊົນສູນກາງຈີນກັບອຳນາດການປົກຄອງຕິເບດກ່ຽວກັບວິທີການປົດປ່ອຍຕິເບດໂດຍສັນຕິແລະກໍ່ເປັນວັນທີ່ປະກາດການປົດປ່ອຍຕິເບດໂດຍສັນຕິ. ຫຼັງຈາກການປົດປ່ອຍໂດຍສັນຕິແລ້ວ, ພັກກອມມູນິດຈີນໄດ້ເຕົ້າໂຮມຄວາມສາມັກຄີແລະນຳພາທາດກະສິກອນນັບເປັນລ້ານຄົນທີ່ໄດ້ຮັບການປົດປ່ອຍດຳເນີນການປະຕິຮູບປະຊາທິປະໄຕ,ສ້າງລະບອບສັງຄົມນິຍົມ,ປະຕິບັດຕາມຫຼັກການປົກຄອງຕົນເອງຂອງປະຊາຊົນບັນດາເຜົ່າໃນເຂດຕິເບດ,ຊຸກຍູ້ການປະຕິຮູບແລະການເປີດປະຕູສູ່ພາຍນອກ. ພາຍຫຼັງ ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ສິ້ນສຸດລົງ, ສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນນຳໄດ້ໃຫ້ຄວາມເອົາໃຈໃສ່ທີ່ສຸດຕໍ່ເຂດຕິເບດໃນດ້ານນະໂຍບາຍ,ທຶນຮອນ,ໂຄງການແລະດ້ານອື່ນໆ,ໄດ້ນຳພາປະຊາຊົນຕິເບດເອົາຊະນະການຕໍ່ສູ້ໃນບັ້ນລຶບລ້າງຄວາມທຸກຍາກແລະສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ.
ຕິເບດເກົ່າບໍ່ມີອຸດສາຫະກຳແລະການຄ້າສະໄໝໃໝ່, ການຜະລິດກະສິກຳແມ່ນການປູກຝັງແບບປະຖົມປະຖານເປັນເວລາດົນນານ,ລວມຍອດມູນຄ່າການຜະລິດພາຍໃນຢູ່ຕິເບດໃນໄລຍະນັ້ນມີພຽງແຕ່ 129 ລ້ານຢວນເທົ່ານັ້ນ. ປີ 2020, ຍອດປະລິມານເສດຖະກິດຢູ່ທົ່ວເຂດຕິເບດໄດ້ບັນລຸຫຼາຍກວ່າ 190 ຕື້ຢວນ, ເພີ່ມຂຶ້ນ 321,5 ເທົ່າຂອງປີ 1951 ເມື່ອຄິດໄລ່ຕາມລາຄາສົມທຽບໄດ້ແລ້ວ.
ຕິເບດກ່ອນໜ້ານີ້ 70 ປີ, ຢູ່ເທິງດິນແດນທີ່ມີເນື້ອທີ່ 1,2 ລ້ານກິໂລຕາແມັດ, ບໍ່ມີທາງຫຼວງແຫ່ງຊາດແມ່ນແຕ່ເສັ້ນດຽວ, ທາງລົດໄຟແຮ່ງບໍ່ຕ້ອງເວົ້າເຖິງເລີຍ. ປັດຈຸບັນ, ທາງລົດໄຟຊິ່ງໄຫ-ຕິເບດໄດ້ສ້າງສຳເລັດແລະໄດ້ນຳໃຊ້ແລ້ວ, ທາງລົດໄຟເສສວນ-ຕິເບດໄດ້ເລີ່ມລົງມືກໍ່ສ້າງໝົດສາຍ, ລົດໄຟມີລວງຍາວທັງໝົດເກືອບ 1.400 ກິໂລແມັດ. ຢູ່ໃນເມືອງ,ຕາແສງແລະຊົນນະບົດໄດ້ນຳໃຊ້ເສັ້ນທາງຫຼວງໝົດແລ້ວ, ລວງຍາວຂອງທາງຫຼວງມີເຖິງ 118,8 ພັນກິໂລແມັດ, ທາງດ່ວນມີໄລຍະທາງທັງໝົດເຖິງ 1.105 ກິໂລແມັດ. ໄດ້ສ້າງສະໜາມບິນພົນລະເຮືອນສຳເລັດແລ້ວ 5 ແຫ່ງ, ໄດ້ເປີດເສັ້ນທາງການບິນທັງພາຍໃນປະເທດແລະສາກົນ 140 ກວ່າສາຍ.
ຢູ່ຕິເບດເກົ່າ, ຢ່າສູ່ເວົ້າເລື່ອງໄຟຟ້າເລີຍ, ສ່ວນການໃຊ້ຕະກຽງນ້ຳມັນເນີຍ ປະຊາຊົນຮູ້ສຶກເສຍດາຍຈົນບໍ່ມີໃຜຢາກໃຊ້ມັນເຖິງຈະແມ່ນຍາມຄ່ຳຄືນກໍ່ຕາມ. ປັດຈຸບັນ, ເຂດຕິເບດໄດ້ສ້າງສາຍສົ່ງໄຟຟ້າສຳເລັດແລ້ວ 4 ສາຍເຊັ່ນ: ສາຍສົ່ງໄຟຟ້າຊິ່ງໄຫ-ຕິເບດແລະອື່ນໆ, ຕາໜ່າງໄຟຟ້າຕົ້ນຕໍກວມເຖິງເມືອງ,ຕາແສງແລະຊົນນະບົດທັງໝົດ.
ຢູ່ຕິເບດເກົ່າ, ທາດກະສິກອນທີ່ກວມປະຊາກອນຕິເບດ 95% ຂຶ້ນໄປນັ້ນບໍ່ມີປັດໄຈການຜະລິດ, ອັດຕາການເຂົ້າຮຽນຂອງເດັກນ້ອຍທີ່ມີອາຍຸໃນໄວຮຽນມີບໍ່ເຖິງ 2%, ອັດຕາການກືກໜັງສືສູງເຖິງ 95%, ອາຍຸຍືນສະເລ່ຍຕໍ່ຫົວຄົນມີພຽງແຕ່ 35,5 ປີ. ປັດຈຸບັນ,ການສຶກສາພາກບັງຄັບໂດຍບໍ່ຕ້ອງເສຍຄ່າຮຽນ 15 ປີໄດ້ຮັບການຈັດຕັ້ງປະຕິບັດຢ່າງເຖິງຖອງ, ອັດຕາການເຂົ້າຮຽນຂອງການສຶກສາພາກບັງຄັບໄດ້ຮັກສາໃຫ້ຢູ່ໃນລະດັບ 95,03%,ອາຍຸການສຶກສາຂອງຜູ້ອອກແຮງງານເພີ່ມໃໝ່ສະເລ່ຍຕໍ່ຫົວຄົນໄດ້ຮັບການຍົກສູງຂຶ້ນເປັນ 13,1 ປີ, ອາຍຸຍືນສະເລ່ຍຕໍ່ຫົວຄົນໄດ້ຮັບການຍົກສູງຂຶ້ນເປັນ 71,1 ປີ.
ເຂດປ່າໄມ້ຢູ່ຕິເບດເກົ່າໄດ້ຢູ່ໃນສະພາບທີ່ເກີດຂຶ້ນເອງດັບມອດໄປເອງໂດຍພື້ນຖານ, ອັດຕາການປົກຫຸ້ມຂອງປ່າໄມ້ໃນເຂດກະສິກຳທັງໝົດຢູ່ເຂດລ້ອງແມ່ນ້ຳຢາລຸງຈາງໂບ, ແມ່ນ້ຳໜຽນສູ້ແລະແມ່ນ້ຳລາຊາກວມບໍ່ເຖິງ 1%. ແຕ່ປັດຈຸບັນ, ເຂດສະຫວງນທຳມະຊາດຕິເບດກວມ 38,75% ຂອງເນື້ອທີ່ທີ່ດິນຂອງທົ່ວເຂດ, ອັດຕາການປົກຫຸ້ມປ່າໄມ້ມີເຖິງ 12,31%, ຕິເບດຍັງແມ່ນໜຶ່ງໃນເຂດທີ່ມີສິ່ງແວດລ້ອມນິເວດທີ່ດີທີ່ສຸດໃນໂລກ.
ຕິເບດເກົ່າ, ທາດກະສິກອນບໍ່ມີສິດເສລີພາບສ່ວນບຸກຄົນເລີຍ,ແລະຍິ່ງບໍ່ມີສິດປະຊາທິປະໄຕ,ຖືກເອີ້ນວ່າເປັນ “ເຄື່ອງມືທີ່ປາກໄດ້ເທົ່ານັ້ນ”. ນັບແຕ່ການສ້າງຕັ້ງເຂດປົກຄອງຕົນເອງຕິເບດເປັນຕົ້ນມາ, ຕິເບດໄດ້ອອກກົດໝາຍ-ກົດລະບຽບທ້ອງຖິ່ນແລະເອກະສານທີ່ມີລັກສະນະເປັນລະບຽບແບບແຜນ 152 ສະບັບຕາມລຳດັບ,ເປັນການຮັບປະກັນທາງດ້ານກົດໝາຍທີ່ສຳຄັນໃຫ້ແກ່ການປົກປັກຮັກສາສິດແລະຜົນປະໂຫຍດຕ່າງໆຂອງປະຊາຊົນບັນດາເຜົ່າ.
ພຶດຕິກຳຕົວຈິງຕະຫຼອດໄລຍະ 70 ປີຜ່ານມາໄດ້ພິສູດໃຫ້ເຫັນວ່າ: ມີແຕ່ຍຶດໝັ້ນການນຳພາຂອງພັກກອມມູນິດຈີນ,ລະບອບສັງຄົມນິຍົມທີ່ມີສີສັນພິເສດຂອງຈີນແລະລະບົບການປົກຄອງຕົນເອງຢູ່ເຂດຊົນເຜົ່າສ່ວນໜ້ອຍ,ຈຶ່ງຈະສາມາດຮັບປະກັນສິດປົກຄອງຕົນເອງໂດຍພື້ນຖານທີ່ມີຄວາມສະຫງົບແລະຄວາມເປັນລະບຽບຮຽບຮ້ອຍຖາວອນ,ມີການພັດທະນາແລະມີຄວາມຈະເລີນຮຸ່ງເຮືອງຢູ່ເຂດຕິເບດ. ບໍ່ມີພັກກອມມູນິດຈີນກໍ່ບໍ່ມີປະເທດຈີນໃໝ່ແລະກໍ່ບໍ່ມີຕິເບດໃໝ່.
ຄຳເຫັນ
0