ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໄຊ້ຫານປ້າ
ຄຳວ່າ “ໄຊ້ຫານປ້າ”ແມ່ນພາສາມົງໂກນ, ມີຄວາມໝາຍວ່າ: “ພູພຽງທີ່ສວຍງາມ”, ໄຊ້ຫານປ້າແມ່ນສະຖານທີ່ທີ່ຫ່າງຈາກນະຄອນຫຼວງປັກກິ່ງໄປທາງທິດເໜືອ 400 ກວ່າກິໂລແມັດ ເຊິ່ງມີປ່າປູກທີ່ກວມເນື້ອທີ່ໃຫຍ່ທີ່ສຸດໃນໂລກ. ຖ້າວ່າ ເອົາຕົ້ນໄມ້ໃນປ່າແຫ່ງນີ້ມາລຽນກັນທີ່ມີໄລຍະຫ່າງລະຫວ່າງຕົ້ນ ຕົ້ນລະໜຶ່ງແມັດ ຈະມີຄວາມຍາວທັງໝົດເທົ່າກັບ12 ຮອບອ້ອມໜ່ວຍໂລກຕາມເສັ້ນສູນສູດ. ວັນທີ 23 ສິງຫາປີ 2021, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປສຳຫຼວດກວດກາວຽກງານຢູ່ນິຄົມປ່າໄມ້ຈີ່ເຊ້ໄຊ້ຫານປ້າ. ດັ່ງນັ້ນ, ພວກເຮົາມາຕິດຕາມການເຄື່ອນໄຫວຂອງທ່ານປະທານສີຈິ້ນຜິງ ເພື່ອຊອກຮູ້ຜົນງານມະຫັດສະຈັນພ້ອມດ້ວຍບົດຮຽນໃນການພັດທະນາໄຊ້ຫານປ້ານຳກັນເລີຍ.
ວັນທີ 23 ສິງຫາປີ 2021, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປສຳຫຼວດກວດກາວຽກງານຢູ່ນິຄົມປ່າໄມ້ຈີ່ເຊ້ໄຊ້ຫານປ້າ.
ໄຊ້ຫານປ້າໃນທຸກມື້ນີ້ ຖືກຂະໜານນາມວ່າ “ຍອດນ້ຳ, ແດນຂີ້ເຝື້ອ, ອານາຈັກດອກໄມ້, ທະເລປ່າໄມ້, ແດນສະຫວັນຂອງນົກ”. ແຕ່ວ່າ ກ່ອນໜ້ານີ້ກວ່າເຄິ່ງສະຕະວັດ, ໂສມໜ້າຂອງດິນແດນແຫ່ງນີ້ຄື “ພາຍຸຊາຍເກີດຂຶ້ນແບບມືດຟ້າມົວດິນ, ນົກບໍ່ມີໄມ້ເພິ່ງພາອາໄສ.”
ປີ1962, ເພື່ອສ້າງສິ່ງກຳບັງບໍ່ໃຫ້ພາຍຸຊາຍພັດຖະຫຼົ່ມນະຄອນຫຼວງປັກກິ່ງ, ກະຊວງປ່າໄມ້ຈີນໄດ້ສ້າງຕັ້ງນິຄົມປ່າໄມ້ຈີ່ເຊ້ໄຊ້ຫານປ້າ. ຜູ້ບຸກເບີກທຳອິດອາຍຸສະເລ່ຍບໍ່ຮອດ 24 ປີ ມີທັງໝົດ 369 ຄົນໄດ້ເດີນທາງມາຈາກ 18 ແຂວງໃນທົ່ວປະເທດມາເຕົ້າໂຮມກັນຢູ່ໄຊ້ຫານປ້າ ເພື່ອເລີ່ມດຳເນີນພາລະກິດການປູກໄມ້ສ້າງປ່າດ້ວຍຄວາມທໍລະຫົດອົດທົນຢູ່ດິນຊາຍທີ່ມີອາກາດໜາວຈັດ.
ໄຊ້ຫານປ້າກ່ອນທີ່ສ້າງຕັ້ງນິຄົມປ່າໄມ້
ແຕ່ວ່າຢູ່ດິນແດນແຫ່ງນີ້ມີແຕ່ພູຫົວໂລ້ນເກືອບບໍ່ມີພືດເລີຍ, ມີພາຍຸຊາຍຕະຫຼອດປີ, ອຸນຫະພູມລົບ 40 ກວ່າອົງສາ. ໃນໄລຍະການປູກໄມ້ສ້າງປ່າໃນເບື້ອງຕົ້ນ, ອັດຕາການລອດຕາຍຂອງຕົ້ນໄມ້ມີບໍ່ຮອດ 8%. ເພື່ອຍົກປະສິດທິພາບໃນການປູກໄມ້ໃຫ້ສູງຂຶ້ນຕື່ມອີກ, “ຊາວໄຊ້ຫານປ້າ”ໄດ້ປັບປຸງຈັກປູກໄມ້ໂດຍອີງຕາມຈຸດພິເສດຂອງພູມສັນຖານທ້ອງຖິ່ນຕົນ, ສາມາດຄົ້ນຄວ້າເຕັກນິກສຳຄັນໄດ້ໃນການກ້າເບັ້ຍໄມ້ຄຸນນະພາບດີ, ທັງໄດ້ປັບປຸງວິທີກ້າເບັ້ຍໄມ້ແບບເກົ່າໃຫ້ດີຂຶ້ນ, ໃນທີ່ສຸດກໍສາມາດປະສົບຜົນສຳເລັດໃນການກ້າເບັ້ຍໄມ້ຢູ່ເຂດທີ່ມີອາກາດໜາວຈັດເປັນຄັ້ງທຳອິດ.
ທ່ານຫຼິວຈຸ່ນ ແລະນາງສີຊູຢ້ຽນ ສອງຜົວເມຍທີ່ປະຕິບັດໜ້າທີ່ເຝົ້າຍາມຖ່າຍຮູບຢູ່ໜ້າປ້ອມຍາມ
ຢູ່ໄຊ້ຫານປ້າ ຍັງມີປ້ອມຍາມ 9 ແຫ່ງ ທີ່ໃຊ້ສະເພາະເຝົ້າຍາມອັກຄີໄພ. ຕະຫຼອດໄລຍະເກືອບ 60 ປີນັບຕັ້ງແຕ່ສ້າງຕັ້ງນິຄົມປ່າໄມ້ໄຊ້ຫານປ້າເປັນຕົ້ນມາ, ມີຄູ່ຜົວເມຍ ຫຼາຍກວ່າ 20 ຄູ່ໄດ້ປະຕິບັດໜ້າທີ່ເຝົ້າຍາມຢູ່ປ້ອມຍາມ, ຈົນມາເຖິງປັດຈຸບັນບໍ່ເຄີຍເກີດມີໄຟໄໝ້ປ່າຈັກເທື່ອ.
ປີ2017, ທ່ານສີຈິ້ນຜິງໄດ້ໃຫ້ທິດຊີ້ນຳສຳຄັນໂດຍປິ່ນອ້ອມວິລະກຳຂອງຜູ້ ສ້າງສາແລະຜູ້ອະນັກລັກປ່າໄມ້ຂອງນິຄົມປ່າໄມ້ໄຊ້ຫານປ້າ ໂດຍຍ້ອງຍໍວ່າ: ເຂົາເຈົ້າໄດ້ສ້າງຈິດໃຈໄຊ້ຫານປ້າຄື “ຈື່ຈຳພາລະກຳຢ່າງໜັກແໜ້ນ, ສ້າງສາພັດທະນາພາລະກິດຢ່າງທໍລະຫົດອົດທົນ ແລະພັດທະນາແບບສີຂຽວ”.
ທ່ານສີຈິ້ນຜິງຍັງເຄີຍຊີ້ໃຫ້ເຫັນວ່າ: ຈີນເປັນປະເທດທີ່ປະກອບສ່ວນຫຼາຍກວ່າໝູ່ໃນໂລກໃນການປູກໄມ້ສ້າງປ່າ. ການປູກໄມ້ສ້າງປ່າຂະໜາດໃຫຍ່ຢ່າງຕໍ່ເນື່ອງແບບນີ້, ມີແຕ່ຢູ່ພາຍໃຕ້ລະບອບສັງຄົມນິຍົມແບບຈີນເທົ່ານັ້ນຈິ່ງຈະເຮັດໄດ້.
ທຸກມື້ນີ້, ເນື້ອທີ່ປ່າໄມ້ຂອງໄຊ້ຫານປ້າໄດ້ເພີ່ມຂຶ້ນຈາກ 16.000 ເຮັກຕາ ເປັນປະມານ 77.000 ເຮັກຕາ, ອັດຕາການປົກຫຸ້ມຂອງປ່າໄມ້ໄດ້ເພີ່ມຂຶ້ນຈາກ 11,4% ເປັນ 82%, ແຕ່ລະປີໄດ້ຮັກສາແຫຼ່ງນ້ຳ ແລະປັບປຸງຄຸນນະພາບນ້ຳໃຫ້ດີຂຶ້ນເຖິງ 284 ລ້ານແມັດກ້ອນ. ນີ້ແມ່ນສີຂຽວທີ່ມະຫັດສະຈັນ ທີ່ຊາວໄຊ້ຫານປ້າ 3 ເຊັ່ນຄົນພາກັນສ້າງຂຶ້ນດ້ວຍຄວາມພະຍາຍາມຢ່າງບໍ່ລົດລະແລະການສູ້ຊົນດ້ວຍຄວາມທໍລະຫົດອົດທົນ.
ໄຊ້ຫານປ້າໃນປັດຈຸບັນ
ຈາກພູພຽງຮົກເຮື້ອທີ່ກວ້າງໃຫຍ່ໄພສານຈົນກາຍມາເປັນທະເລປ່າໄມ້ທີ່ຂຽວອຸ່ມທຸ່ມ, ໄຊ້ຫານປ້າເປັນຕົວຢ່າງທີ່ມີຊີວິດຊີວາກ່ຽວກັບປະຫວັດການປູກໄມ້ສ້າງປ່າຂອງປະເທດຈີນໃໝ່.
ປີ1955, ສູນກາງພັກກອມມູນິດຈີນໄດ້ມີຄຳຮຽກຮ້ອງໃຫ້ຫັນປະເທດຊາດເປັນສີຂຽວ ໂດຍໄດ້ລະດົມຂົນຂວາຍຂະບວນການປູກໄມ້ສ້າງປ່າຢ່າງຂະໜາດໃຫຍ່ແບບບໍ່ເຄີຍມີມາກ່ອນ. ປີ1981, ກອງປະຊຸມເທື່ອທີ 4 ຂອງສະພາປະຊາຊົນແຫ່ງຊາດຈີນຊຸດທີ 5 ໄດ້ພິຈາລະນາແລະຮັບຮອງເອົາມະຕິວ່າດ້ວຍການເປີດຂະບວນການປູກຕົ້ນໄມ້ຕາມພັນທະທົ່ວປວງຊົນ, ໂດຍໄດ້ກຳນົດໃຫ້ການປູກໄມ້ສ້າງປ່າແລະຫັນປະເທດຊາດເປັນສີຂຽວກາຍເປັນພັນທະຕາມກົດໝາຍຂອງພົນລະເມືອງໃນເກນອາຍຸຕາມກົດໝາຍກຳນົດທຸກຄົນ. ນັບແຕ່ນັ້ນມາ, ຂະບວນການປູກຕົ້ນໄມ້ຕາມພັນທະທົ່ວປວງຊົນໄດ້ຈັດຂຶ້ນຢ່າງເປັນຂະບວນຟົດຟື້ນຢູ່ທົ່ວປະເທດຈີນ.
ຜູ້ນຳພັກແລະລັດກໍໄດ້ນຳໜ້າເຂົ້າຮ່ວມກິດຈະກຳປູກຕົ້ນໄມ້. ໃນນີ້, ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈີ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເຂົ້າຮ່ວມກິດຈະກຳປູກຕົ້ນໄມ້ຕາມພັນທະຢູ່ນະຄອນຫຼວງປັກກິ່ງໄດ້ 9 ປີລຽນຕິດ, ເຊິ່ງໄດ້ເສີມຂະຫຍາຍບົດບາດສຳຄັນໃນການນຳພາແລະເປັນແບບຢ່າງໃນການຊຸກຍູ້ການປູກຕົ້ນໄມ້ຕາມພັນທະທົ່ວປວງຊົນ.
ໄຊ້ຫານປ້າໃນປັດຈຸບັນ
ນັບມາຮອດທ້າຍປີ2020, ພົນລະເມືອງຈີນໃນເກນອາຍຸຕາມກົດໝາຍກຳນົດໄດ້ປະຕິບັດພັນທະການປູກຕົ້ນໄມ້ລວມທັງໝົດມີຫຼາຍກວ່າ 17, 5 ຕື້ເທື່ອຄົນ, ໄດ້ປູກຕົ້ນໄມ້ຫຼາຍກວ່າ 78 ຕື້ຕົ້ນ. ອັດຕາການປົກຫຸ້ມຂອງປ່າໄມ້ຂອງຈີນໄດ້ເພີ່ມຂຶ້ນເຖິງ 23,04%, ປະລິມານປ່າໄມ້ສະສົມໄດ້ເພີ່ມຂຶ້ນເຖິງ 17,56 ຕື້ແມັດກ້ອນ.
ໄຊ້ຫານປ້າໃນປັດຈຸບັນ
ເມື່ອສິ່ງແວດລ້ອມນິເວດໄດ້ພັດທະນາແລ້ວ, ຄວາມສີວິໄລກໍຈະມີການພັດທະນາ. ປະເທດຈີນໃນທຸກມື້ນີ້ຈະບໍ່ສະແຫວງຫາແຕ່ການພັດທະນາຢ່າງດຽວທີ່ປາສະຈາກການອະນຸລັກສິ່ງແວດລ້ອມ, ແຕ່ຈະເຮັດຄືດັ່ງທີ່ທ່ານສີຈິ້ນຜິງໄດ້ເວົ້າວ່າ: “ຄວນມີຄວາມຮັບຜິດຊອບສູງຕໍ່ຄວາມສີວິໄລຂອງມວນມະນຸດ, ເຄົາລົບທຳມະຊາດ,ໄປຕາມກົດເກນທຳມະຊາດ,ອະນຸລັກທຳມະຊາດ, ຄົ້ນຄວ້າເສັ້ນທາງທີ່ມະນຸດກັບທຳມະຊາດສາມາດຢູ່ຮ່ວມກັນໄດ້ຢ່າງກົມກຽວ, ຊຸກຍູ້ການພັດທະນາເສດຖະກິດກັບການອະນຸລັກສິ່ງແວດລ້ອມນິເວດໃຫ້ເປັນເອກະພາບກັນແລະປະສານສົມທົບກັນຢ່າງກົມກຽວ, ຮ່ວມກັນສ້າງໂລກທີ່ຈະເລີນຮຸ່ງເຮືອງ,ສະອາດ ແລະສວຍງາມ. ”
ນະທີ່ນີ້, ພວກເຮົາຂໍແນະນຳມິດລາຍການທຸກທ່ານວ່າຖ້າມີໂອກາດກໍພາກັນໄປທ່ຽວໄຊ້ຫານປ້າທີ່ສວຍງາມຂອງຈີນເດີ້.
ຄຳເຫັນ
0