ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 27 ສິງຫານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາທາງໂທລະສັບກັບທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ.
ທ່ານສີຈິ້ນຜິງຊີ້ອອກວ່າ, ໃນຊຸມປີມໍ່ໆມານີ້, ການພົວພັນຈີນ-ຟິລິບປິນໄດ້ຮັບການປັບປຸງໃຫ້ດີຂຶ້ນ, ມີຄວາມແໜ້ນແຟ້ນກວ່າເກົ່າ ແລະ ຍົກລະດັບໃຫ້ສູງຂຶ້ນ, ໄດ້ສ້າງການພົວພັນຄູ່ຮ່ວມມືຍຸດທະສາດຮອບດ້ານ, ໄດ້ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ, ທັງໄດ້ເພີ່ມພະລັງທີ່ສ້າງສັນໃຫ້ແກ່ສັນຕິພາບ ແລະ ສະຖຽນລະພາບຂອງພາກພື້ນ. ຈີນໃຫ້ຄວາມສຳຄັນຢ່າງສູງຕໍ່ການພົວພັນກັບຟິລິບປິນ, ສະໜັບສະໜູນຟິລິບປິນໃນການປະຕິບັດນະໂຍບາຍການຕ່າງປະເທດສັນຕິພາບທີ່ເປັນເອກະລາດ ແລະ ເປັນເຈົ້າຕົນເອງຢ່າງເດັດດ່ຽວໜຽວແໜ້ນ, ຍິນດີຮ່ວມກັບຟິລິບປິນລົງເລິກມິດຕະພາບ ແລະ ຄວາມໄວ້ເນື້ອເຊື່ອໃຈກັນ, ຍຶດໝັ້ນໃນທິດທາງໃຫຍ່ທີ່ເປັນບ້ານໃກ້ເຮືອນຄຽງທີ່ດີຕໍ່ກັນ, ຮັບປະກັນໃຫ້ການພົວພັນລະຫວ່າງສອງປະເທດກ້າວເດີນໄປຕາມເສັ້ນທາງທີ່ຖືກຕ້ອງຢ່າງສະເໝີຕົ້ນສະເໝີປາຍ.
ທ່ານສີຈິ້ນຜິງກ່າວເນັ້ນວ່າ, ການເອົາຊະນະການແຜ່ລະບາດຂອງພະຍາດໂຄວິດ-19 ໂດຍໄວ, ບັນລຸການເຕີບໂຕດ້ານເສດຖະກິດແມ່ນວຽກງານທີ່ຮີບດ່ວນຂອງບັນດາປະເທດໃນສະເພາະໜ້ານີ້. ຈີນຈະສືບຕໍ່ເພີ່ມທະວີການຮ່ວມມືກັບຟິລິບປິນໃນການຕ້ານກັບພະຍາດໂຄວິດ-19, ໃຫ້ການສະໜັບສະໜູນ ແລະ ຄວາມຊ່ວຍເຫຼືອແກ່ຟິລິບປິນຕາມຄວາມສາມາດຂອງຕົນ. ການເຊື່ອມຈອດລະຫວ່າງຂໍ້ລິເລີ່ມທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ກັບແຜນການ “ສ້າງສາພັດທະນາຢ່າງຂະໜາດໃຫຍ່” ຂອງຟິລິບປິນ ໄດ້ຮັບໝາກຜົນທີ່ສຳຄັນ. ຈີນຍິນດີນຮ່ວມກັບຟິລິບປິນສຸມຄວາມພະຍາຍາມເພື່ອຊຸກຍູ້ການຈັດຕັ້ງປະຕິບັດໂຄງການຮ່ວມມືຫຼາຍກວ່າເກົ່າ, ເຮັດໃຫ້ໝາກຜົນແຫ່ງການຮ່ວມມືຈີນ-ຟິລິບປິນສ້າງຜົນປະໂຫຍດໃຫ້ແກ່ປະຊາຊົນສອງຊາດຫຼາຍກວ່າເກົ່າ.
ທ່ານດູເຕີເຕກ່າວວ່າ, ໃນ 5 ປີຜ່ານມານີ້, ຟິລິບປິນ ແລະ ຈີນໄດ້ເປີດຍຸກໃໝ່ແຫ່ງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງຝ່າຍ. ຟິລິບປິນຊົມເຊີຍຈີນທີ່ໄດ້ປະກອບສ່ວນໃນການນຳໜ້າສາມັກຄີທົ່ວໂລກເພື່ອຕ້ານກັບພະຍາດໂຄວິດ-19, ຂອບໃຈນຳຈີນທີ່ໃຫ້ການຊ່ວຍເຫຼືອເຊິ່ງລວມທັງວັກຊີນແກ່ຟິລິບປິນ, ຫວັງວ່າຈະສືບຕໍ່ເພີ່ມທະວີການຮ່ວມມືກັບຈີນໃນການຕ້ານກັບພະຍາດໂຄວິດ-19. ຟິລິບປິນຍິນດີຕ້ອນຮັບຈີນລົງທຶນເຂົ້າເຖິງໂຄງການໃນແຜນພັດທະນາຂອງຟິລິບປິນຫຼາຍກວ່າເກົ່າ, ຫວັງວ່າການຮ່ວມມືຕົວຈິງຂອງສອງປະເທດໃນຂົງເຂດພື້ນຖານໂຄງລ່າງ, ກະສິກຳ ແລະ ຂົງເຂດອື່ນໆໄດ້ຮັບໝາກຜົນຫຼາຍກວ່າເກົ່າ. ຟິລິບປິນທະນຸຖະໜອມມິດຕະພາບກັບຈີນ, ຈະບໍ່ເຮັດເລື່ອງທີ່ເປັນການທຳລາຍຜົນປະໂຫຍດຂອງຈີນໃນການເມືອງພູມີພາກ, ຍິນດີຕັ້ງໜ້າຊຸກຍູ້ການພົວພັນລະຫວ່າງອາຊຽນ-ຈີນໃຫ້ພັດທະນາຢ່າງຕໍ່ເນື່ອງ.
ຄຳເຫັນ
0