ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 30 ສິງຫານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາທາງໂທລະສັບກັບທ່ານດີອັສ ກາເນວ ປະທານປະເທດກູບາ.
ທ່ານສີຈິ້ນຜິງກ່າວວ່າ, ພາຍໃຕ້ການນຳພາທີ່ເຂັ້ມແຂງຂອງພັກກອມມູນິດກູບາ, ສະຫາຍກູບາບໍ່ຢ້ານມະຫາອຳນາດ, ສູ້ຊົນຢ່າງບໍ່ຍອມຈຳນົນ, ສາມາດປົກປ້ອງໝາກຜົນຂອງການປະຕິວັດໄດ້ຢ່າງເຂັ້ມແຂງ. ຈີນມີຈຸດຢືນຢ່າງສະເໝີຕົ້ນສະເໝີປາຍວ່າ: ຄວນເຄົາລົບສິດຂອງບັນດາປະເທດໃນການເລືອກເອົາເສັ້ນທາງແຫ່ງການພັດທະນາສັງຄົມຢ່າງເປັນເຈົ້າຕົນເອງ, ຄັດຄ້ານມາດຕະການຂວ້ຳບາດແຕ່ຝ່າຍດຽວຂອງປະເທດອື່ນ, ຄັດຄ້ານອິດທິກຳລັງພາຍນອກຫວັງແຊກແຊງວຽກງານພາຍໃນຂອງປະເທດອື່ນ. ຈີນຈະສະໜັບສະໜູນກູບາກ້າວເດີນຕາມເສັ້ນທາງການພັດທະນາທີ່ສອດຄ່ອງກັບສະພາບຄວາມເປັນຈິງຂອງປະເທດຕົນຄືທີ່ໄດ້ຈັດຕັ້ງປະຕິບັດຜ່ານມາ, ສ້າງສາສັງຄົມນິຍົມໃຫ້ມີຄວາມຈະເລີນຮຸ່ງເຮືອງ ແລະ ຍືນຍົງ, ສະໜັບສະໜູນກູບາດຳເນີນການຕໍ່ສູ້ທີ່ເປັນທຳເພື່ອປົກປັກຮັກສາຄວາມໝັ້ນຄົງດ້ານອະທິປະໄຕແຫ່ງຊາດ ແລະ ຄັດຄ້ານການແຊກແຊງຂອງມະຫາອຳນາດ.
ທ່ານສີຈິ້ນຜິງກ່າວເນັ້ນວ່າ, ບໍ່ວ່າສະຖານະການຈະປ່ຽນແປງໄປແນວໃດກໍຕາມ, ຈີນຈະສືບຕໍ່ຍຶດໝັ້ນໃນທິດທາງທີ່ຈີນ ແລະ ກູບາມີສາຍພົວພັນໄມຕີຈິດມິດຕະພາບທີ່ຖາວອນບໍ່ປ່ຽນແປງ, ຈະບໍ່ປ່ຽນແປງຄວາມປາຖະໜາທີ່ຢາກລົງເລິກການຮ່ວມມືໃນຂົງເຂດຕ່າງໆລະຫວ່າງຈີນ ແລະ ກູບາ, ຈີນຍິນດີເພີ່ມທະວີການແລກປ່ຽນລະຫວ່າງການນຳຂັ້ນສູງກັບກູບາໃຫ້ໃກ້ຊິດກັນກວ່າເກົ່າ, ເພີ່ມທະວີການຖອດຖອນບົດຮຽນເຊິ່ງກັນແລະກັນໃນການຄຸ້ມຄອງພັກ ແລະ ບໍລິຫານລັດ, ລົງເລິກການຮ່ວມມືໃນການຕ້ານກັບພະຍາດໂຄວິດ -19, ຊຸກຍູ້ການຮ່ວມມືຕົວຈິງ, ຊຸກຍູ້ໃຫ້ການພົວພັນຈີນ-ກູບາໄດ້ຮັບການຂະຫຍາຍຕົວຫຼາຍກວ່າເກົ່າ.
ທ່ານດີອັສ ກາເນວກ່າວວ່າ, ກູບາສະແດງຄວາມຂອບໃຈຝ່າຍຈີນທີ່ໃຫ້ການສະໜັບສະໜູນທີ່ລ້ຳຄ່າແກ່ກູບາເປັນເວລາດົນນານ. ກູບາເດີນຕາມເສັ້ນທາງສັງຄົມນິຍົມຢ່າງເດັດດ່ຽວໜຽວແໜ້ນ, ຍິນດີເພີ່ມທະວີການແລກປ່ຽນລະຫວ່າງສອງພັກ ແລະ ການຮ່ວມມືຕົວຈິງໃນຂົງເຂດຕ່າງໆ, ຮ່ວມກັນຊຸກຍູ້ການພັດທະນາພາລະກິດສັງຄົມນິຍົມ ແລະ ຂະຫຍາຍການພົວພັນກູບາ-ຈີນ. ກູບາຍິນດີລົງເລິກການປະສານງານຫຼາຍຝ່າຍກັບຈີນ, ຮ່ວມກັນຄັດຄ້ານລັດທິເຈົ້າອຳນາດ, ການເມືອງມະຫາອຳນາດ, ຄັດຄ້ານການຫັນເອົາບັນຫາກ່ຽວກັບພະຍາດໂຄວິດ-19ເປັນບັນຫາການເມືອງ ແລະ ໃຊ້ເປັນຂໍ້ອ້າງເພື່ອສ້າງຄວາມເສື່ອມເສຍຊື່ສຽງໃຫ້ກັບປະເທດອື່ນ. ກູບາເດັດດ່ຽວຍຶດໝັ້ນໃນນະໂຍບາຍຈີນດຽວ, ຄັດຄ້ານການແຊກແຊງວຽກງານພາຍໃນຂອງຈີນ, ຈະສືບຕໍ່ສະໜັບສະໜູນຫຼັກໝັ້ນຂອງຈີນໃນບັນຫາຜົນປະໂຫຍດແກນກາງຂອງຈີນ ເຊັ່ນ ບັນຫາທີ່ກ່ຽວຂ້ອງກັບໄຕ້ຫວັນ, ບັນຫາທີ່ກ່ຽວຂ້ອງກັບເຂດຊິ່ນຈ່ຽງຈີນ ແລະອື່ນໆ. ກູບາຍິນດີເສີມຂະຫຍາຍບົດບາດທີ່ຕັ້ງໜ້າໃນການເສີມຂະຫຍາຍການພົວພັນລະຫວ່າງອາເມຣິກາລາຕິນກັບຈີນ.
ຄຳເຫັນ
0