ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສົກຮຽນໃໝ່ມາເຖິງອີກຄັ້ງໜຶ່ງ, ຊາວໜຸ່ມເຍົາວະຊົນຄືອະນາຄົດຂອງປະເທດຊາດ ແລະຄວາມຫວັງຂອງຊາດ. ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເດີນທາງໄປຢ້ຽມຢາມແລະສຳຫຼວດກວດກາວຽກງານຢູ່ໂຮງຮຽນ, ວັງເຍົາວະຊົນແລະສະຖານທີ່ອື່ນໆຫຼາຍເທື່ອ,ເຊິ່ງທ່ານໄດ້ໃຫ້ຄວາມຮັກແພງແລະຄວາມເອົາໃຈໃສ່ຕໍ່ການເຕີບໃຫຍ່ແລະການຝຶກຝົນຕົນເອງຂອງຊາວໜຸ່ມເຍົາວະຊົນໃຫ້ເປັນຜູ້ມີຄວາມຮູ້ຄວາມສາມາດ. ທ່ານໄດ້ເວົ້າກັບພວກນັກຮຽນນັກສຶກສາວ່າ:
“ຄົນຄົນໜຶ່ງສາມາດມີອຸດົມການໄດ້ຫຼາຍຢ່າງ, ແຕ່ອຸດົມການທີ່ສຳຄັນທີ່ສຸດໃນຊີວິດຄວນຕິດພັນກັບປະເທດຊາດແລະປະຊາຊົນ, ນີ້ຄືພື້ນຖານຂອງອຸດົມການຕ່າງໆຂອງຄົນເຮົາ, ທັງເປັນເສົາຄ້ຳຂອງຊີວິດຄົນເຮົາ. ”
“ຊາວໜຸ່ມທັງຫຼາຍຄວນແບກຫາບພາລະກຳປະຫວັດສາດ, ມີຄວາມໝັ້ນໃຈຢ່າງເດັດດ່ຽວໃນການກ້າວເດີນໄປໜ້າ, ມີອຸດົມການທີ່ສູງສົ່ງ, ຮຽນຮູ້ຄຸນສົມບັດອັນຍິ່ງໃຫຍ່, ຝຶກຝົນຕົນເອງໃຫ້ກາຍເປັນຜູ້ມີຄວາມຮູ້ຄວາມສາມາດ, ແບກຫາບພາລະໜ້າທີ່ອັນສຳຄັນ, ພະຍາຍາມສ້າງຕົນເອງໃຫ້ກາຍເປັນຄົນໃໝ່ຂອງຍຸກສະໄໝທີ່ສາມາດແບກຫາບໜ້າທີ່ອັນສຳຄັນໃນການຟື້ນຟູຄວາມຈະເລີນຮຸ່ງເຮືອງຂອງຊາດຈີນ, ສ້າງຜົນງານທີ່ສະຫງ່າລາສີໃນໄວຄະນອງດ້ວຍການສູ້ຊົນຢ່າງບໍ່ລົດລະເພື່ອປະເທດຊາດ, ເພື່ອຊົນຊາດ, ເພື່ອປະຊາຊົນ ແລະເພື່ອມວນມະນຸດ.”
“ໄວໜຸ່ມເປັນໄວທີ່ສະສົມຄວາມຮູ້ແລະປະສົບການໃນຊີວິດ, ຄວນຮຽນຮູ້ແລະຮັບເອົາຄວາມຮູ້ປານວ່າຟອງນ້ຳດູດຊຶມນ້ຳ. ຊາວໜຸ່ມທັງຫຼາຍໃນເວລາຮ່ຳຮຽນ, ຄວນນຳໃຊ້ເວລາໃຫ້ມີຄຸນຄ່າສ່ຳກັບຄຳ, ພະຍາຍາມຮ່ຳຮຽນຢ່າງບໍ່ຮູ້ອິດຮູ້ເມື່ອຍ,ສຸມຄວາມພະຍາຍາມຢ່າງໃຈຈົດໃຈຈໍ່ແລະມ່ວນຊື່ນລື້ນເລີງ, ຍັງຕ້ອງເນັ້ນໃສ່ຈຸດສຸມ, ຮູ້ເລືອກເອົາສິ່ງຍອດຍິ່ງ, ພະຍາຍາມຮ່ຳຮຽນໃຫ້ໄດ້ທັງຄວາມຮູ້ທີ່ກວ້າງຂວາງແລະທັງມີວິຊາສະເພາະ ແລະໃຫ້ມີຄວາມຮູ້ນັບມື້ນັບກວ້າງຂວາງກວ່າເກົ່າແລະມີວີຊາສະເພາະຫຼາຍກວ່າເກົ່າ.”
“ພວກຫຼານຄວນປູກຈິດສຳນຶກກ່ຽວກັບການອອກແຮງງານແມ່ນມີກຽດສະຫງ່າມາແຕ່ຍັງນ້ອຍ, ເລື່ອງຂອງຕົນຄວນເຮັດດ້ວຍຕົນເອງ, ເລື່ອງຂອງຄົນອື່ນກໍໃຫ້ໄປຊ່ວຍ, ເລື່ອງສາທາລະນະປະໂຫຍດກໍ່ຄວນແຂ່ງຂັນກັນເຮັດ, ຜ່ານຈາກການອອກແຮງງານເພື່ອຫວ່ານແນວພັນແຫ່ງຄວາມຫວັງແລະເກັບກ່ຽວເອົາໝາກຜົນ, ທັງຜ່ານຈາກການອອກແຮງງານເພື່ອຝຶກຝົນຫຼໍ່ຫຼອມຕົນເອງໃຫ້ມີຈິດໃຈເຂັ້ມແຂງ. ”
ຄຳເວົ້າຂອງທ່ານສີຈິ້ນຜິງກໍສ່ຳກັບໂມງຮຽນທຳອິດສຳລັບນັກຮຽນນັກສຶກສາທັງຫຼາຍໃນມື້ໄຂສົກຮຽນໃໝ່, ປຽບເໝືອນໄພເຍືອງທາງຊີ້ທິດທາງໃຫ້ເຂົາເຈົ້າກ້າວເດີນໄປໜ້າແລະເຕີບໃຫຍ່ຂຶ້ນເພື່ອກາຍເປັນຄົນທີ່ມີປະໂຫຍດແກ່ຄອບຄົວ, ສັງຄົມແລະປະເທດຊາດ.
ຄຳເຫັນ
0