ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 2 ກັນຍານີ້, ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສຜ່ານທາງວິດີໂອຕໍ່ກອງປະຊຸມສຸດຍອດການຄ້າການບໍລິການໂລກຂອງງານຕະຫຼາດນັດການຄ້າການບໍລິການສາກົນຈີນ2021, ເນື້ອໃນຄຳປາໄສມີດັ່ງນີ້:
ສະບາຍດີທ່ານຜູ້ມີກຽດ, ທ່ານຍິງທ່ານຊາຍແລະເພື່ອນມິດທີ່ເຄົາລົບນັບຖື:
ຂ້າພະເຈົ້າ ຂໍຕາງໜ້າໃຫ້ລັດຖະບານຈີນ ແລະປະຊາຊົນຈີນແລະໃນນາມສ່ວນຕົວ ຂໍສະແດງຄວາມຍິນດີຕ້ອນຮັບບັນດາທ່ານດ້ວຍຄວາມອົບອຸ່ນແລະສະແດງຄວາມຢື້ຢາມຖາມຂ່າວອັນຈິງໃຈຕໍ່ບັນດາທ່ານຜູ້ມີກຽດທີ່ເຂົ້າຮ່ວມງານຕະຫຼາດນັດການຄ້າການບໍລິການສາກົນຈີນ2021!
ງານຕະຫຼາດນັດຄັ້ງນີ້ມີຫົວຂໍ້ວ່າ “ເປີດອະນາຄົດດ້ວຍດີຈີຕອນ, ການບໍລິການຊຸກຍູ້ການພັດທະນາ”, ເຊື່ອໝັ້ນວ່າ: ພາຍໃຕ້ການມີສ່ວນຮ່ວມຢ່າງຕັ້ງໜ້າຂອງບັນດາຝ່າຍ, ງານຄັ້ງນີ້ຈະເປັນງານມະຫາກຳທີ່ມີເອກະລັກພິເສດທີ່ພົ້ນເດັ່ນແລະປະສົບຜົນສຳເລັດຢ່າງຫຼວງຫລາຍ.
ການຄ້າການບໍລິການເປັນສ່ວນປະກອບອັນສຳຄັນຂອງການຄ້າສາກົນ ແລະເປັນຂົງເຂດສຳຄັນຂອງການຮ່ວມມືດ້ານເສດຖະກິດການຄ້າສາກົນ ເຊິ່ງມີບົດບາດສຳຄັນໃນການສ້າງສະພາບການພັດທະນາອັນໃໝ່. ພວກຂ້າພະເຈົ້າຍິນດີຮ່ວມກັບບັນດາຝ່າຍ,ຍຶດໝັ້ນໃນການເປີດປະຕູສູ່ພາຍນອກແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຮ່ວມກັນຊົມໃຊ້ກາລະໂອກາດການພັດທະນາການຄ້າການບໍລິການ ແລະຮ່ວມກັນຊຸກຍູ້ໃຫ້ເສດຖະກິດໂລກຟື້ນຄືນ ແລະເຕີບໂຕ.
ພວກຂ້າພະເຈົ້າຈະຍົກສູງລະດັບການເປີດປະຕູສູ່ພາຍນອກ, ຊຸກຍູ້ການປະຕິບັດມາດຕະການຄຸ້ມຄອງພິເສດກ່ຽວກັບການຄ້າການບໍລິການຂ້າມຊາດໃນທົ່ວປະເທດຈີນ, ຄົ້ນຄວ້າການສ້າງເຂດສາທິດກ່ຽວກັບການພັດທະນາການຄ້າການບໍລິການດ້ວຍການປະດິດສ້າງລະດັບຊາດ, ພວກຂ້າພະເຈົ້າຈະເປີດກວ້າງຊ່ອງທາງການຮ່ວມມື, ເພີ່ມທະວີການສະໜັບສະໜູນການພັດທະນາຂະແໜງການບໍລິການຂອງບັນດາປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ຮ່ວມກັບໂລກຊົມໃຊ້ໝາກຜົນການພັດທະນາເຕັກນິກຂອງຈີນ.ພວກຂ້າພະເຈົ້າຈະເພີ່ມທະວີການສ້າງລະບຽບການໃນຂົງເຂດການບໍລິການ, ສະໜັບສະໜູນແຫ່ງຕ່າງໆເຊັ່ນ:ນະຄອນຫຼວງປັກກິ່ງໃຫ້ດຳເນີນການທົດລອງປະຕິບັດໄປກ່ອນກ່ຽວກັບການເຊື່ອມໂຍງກົດລະບຽບວ່າດ້ວຍສັນຍາການຄ້າເສລີສາກົນທີ່ມີລະດັບສູງ, ສ້າງເຂດສາທິດການຄ້າດີຈີຕອນ. ພວກຂ້າພະເຈົ້າຈະສືບຕໍ່ສະໜັບສະໜູນວິສາຫະກິດຂະໜາດກາງແລະນ້ອຍພັດທະນາດ້ວຍການປະດິດສ້າງ,ລົງເລິກການປະຕິຮູບຕະຫຼາດ OTC ໃໝ່（New OTC(Over the Counter) Market）,ສ້າງຕັ້ງຕະຫຼາດຫຼັກຊັບປັກກິ່ງ, ເພື່ອສ້າງໃຫ້ເປັນແນວຮົບຫຼັກເພື່ອຮັບໃຊ້ວິສາຫະກິດຂະໜາດກາງແລະນ້ອຍທີ່ມີການປະດິດສ້າງໃໝ່.
ທ່ານຍິງທ່ານຊາຍແລະເພື່ອນມິດທັງຫຼາຍ!
ນະໂອກາດນີ້, ຂ້າພະເຈົ້າຂໍຮຽກຮ້ອງໃຫ້ພວກເຮົາຈົ່ງຮ່ວມມືກັນຕ້ານກັບພະຍາດ,ຮ່ວມກັນຜ່ານຜ່າຄວາມຫຍຸ້ງຍາກໃນປັດຈຸບັນ,ຍຶດໝັ້ນການນຳໃຊ້ “ກະແຈຄຳ”ແຫ່ງສັນຕິພາບ,ການພັດທະນາ,ການຮ່ວມມືແລະຕ່າງຝ່າຍຕ່າງມີຜົນປະໂຫຍດເພື່ອແກ້ໄຂບັນຫາຕ່າງໆທີ່ເສດຖະກິດໂລກ, ການຄ້າແລະການລົງທຶນສາກົນພວມປະເຊີນຢູ່ໃນປັດຈຸບັນແລະຮ່ວມກັນສ້າງອະນາຄົດທີ່ດີງາມກວ່າເກົ່າ!
ຂໍຂອບໃຈ!
ຄຳເຫັນ
0