ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມສຸດຍອດຜູ້ນຳປະເທດພາຄີໃນສົນທິສັນຍາວ່າດ້ວຍຊີວະນານາພັນຂອງອົງການສະຫະປະຊາຊາດປີ 2021 ພວມຈັດຂຶ້ນຢູ່ນະຄອນຄຸນໝິງແຂວງຢຸນໜານປະເທດຈີນ, ກ່ອນຈັດກອງປະຊຸມ, ທ່ານ ໂປນ ສະມິດ ເລຂາທິການໃຫຍ່ສະຫະພັນອະນຸລັກສວນພຶກສາຊາດສາກົນຫວັງວ່າກອງປະຊຸມຄັ້ງນີ້ຈະສາມາດຮັບຮອງເປົ້າໝາຍການອະນຸລັກຊີວະນານາພັນຕາມຄວາມມຸ່ງຫວັງອັນແຮງກ້າແລະສາມາດປະເມີນຜົນໄດ້,ຫວັງວ່າກອງປະຊຸມຄັ້ງນີ້ຈະກາຍເປັນຈຸດພິກປີ້ນຂອງຄວາມເສຍຫາຍດ້ານຊີວະນານາພັນ.
ຈີນແມ່ນປະເທດໜຶ່ງທີ່ໄດ້ເຊັນສົນທິສັນຍາວ່າດ້ວຍຊີວະນານາພັນກ່ອນໝູ່, ໃນຂະນະດຽວກັນຈີນກໍ່ແມ່ນປະເທດໜຶ່ງທີ່ມີຊີວະນານາພັນທີ່ອຸດົມສົມບູນທີ່ສຸດໃນໂລກ. ເປັນເວລາດົນນານມາແລ້ວ,ເພື່ອອະນຸລັກຊີວະນານາພັນ, ຈີນໄດ້ສຸມທຸກຄວາມພະຍາຍາມຢ່າງບໍ່ລົດລະ,ພ້ອມທັງໄດ້ສຸມກຳລັງເຂົ້າໃນການສ້າງສິ່ງແວດລ້ອມທຳມະຊາດທີ່ມະນຸດແລະທຳມະຊາດສາມາດຢູ່ຮ່ວມກັນໄດ້ຢ່າງກົມກຽວ.
ມະນຸດແລະທຳມະຊາດຄວນຢູ່ຮ່ວມກັນຢ່າງກົມກຽວ. ມີແຕ່ເຄົາລົບທຳມະຊາດ,ເຮັດຕາມກົດເກນທຳມະຊາດ,ອະນຸລັກທຳມະຊາດເທົ່ານັ້ນຈຶ່ງຈະສາມາດສ້າງສວນໂລກທີ່ມະນຸດແລະທຳມະຊາດສາມາດຢູ່ຮ່ວມກັນໄດ້ຢ່າງກົມກຽວ.
ໃນຫຼາຍສິບປີຜ່ານມາ, ປະເພດພືດແລະລະບົບນິເວດທາງບົກ 90%, ພືດຊັ້ນສູງ 65% ແລະຝູງສັດປ່າຫວງຫ້າມ 85% ຢູ່ພາຍໃນປະເທດຈີນລ້ວນແຕ່ໄດ້ຮັບການອະນຸລັກຢ່າງມີປະສິດທິຜົນ, ປະລິມານການປົກປັກຮັກສາແລະເກັບກຳພັນທຸກຳຂອງສິ່ງທີ່ມີຊີວິດກໍ່ຢູ່ແຖວໜ້າຂອງໂລກ. ຢູ່ສວນພຶກສາຊາດເຂດຮ້ອນຂອງເຂດສິບສອງພັ່ນນາໄດ້ມີພືດ 13 ພັນກວ່າຊະນິດ, ທະນີຢູ່ໄຫຫຼຳຈາກ 2 ຝູງທີ່ມີຈຳນວນບໍ່ຮອດ 10 ໂຕໄດ້ເພີ່ມຂຶ້ນເປັນ 5 ຝູງທີ່ມີຈຳນວນ 33 ໂຕ, ເນື້ອທີ່ການອະນຸລັກຖິ່ນທີ່ຢູ່ອາໄສຂອງໝີແພນດາໄດ້ເພີ່ມຂຶ້ນປະມານ 1 ເທົ່າ,ຈຳນວນຝູງເຍືອງຕິເບດຈາກເຄີຍມີບໍ່ຮອດ 7 ໝື່ນໂຕໄດ້ເພີ່ມຂຶ້ນເປັນເກືອບ 3 ແສນໂຕ. ມາດຕະການຕ່າງໆຂອງຈີນໃນການອະນຸລັກຊີວະນານາພັນຢ່າງຕັ້ງໜ້າມາຮອດປັດຈຸບັນນີ້ໄດ້ຮັບໝາກຜົນຫຼາຍພໍສົມຄວນ.
ເພື່ອສ້າງສວນໂລກທີ່ມີການປະສົມປະສານດ້ານເສດຖະກິດແລະສິ່ງແວດລ້ອມທີ່ດີ, ໃນກອງປະຊຸມສຸດຍອດຜູ້ນຳປະເທດພາຄີໃນສົນທິສັນຍາວ່າດ້ວຍຊີວະນານາພັນຄັ້ງທີ 15, ທ່ານ ສີຈິ້ນຜິງ ປະທານປະເທດຈີນໄດ້ປະກາດວ່າ: ຈີນຈະສ້າງຕັ້ງກອງທຶນປົກປັກຮັກສາຊີວະນານາພັນຄຸນໝິງແລະນຳໜ້າຈັດສັນທຶນ 1,5 ຕື້ຢວນ,ເພື່ອສະໜັບສະໜູນວຽກງານອະນຸລັກຊີວະນານາພັນຂອງປະເທດພວມພັດທະນາ. ກ່ອນໜ້ານີ້, ຈີນໄດ້ສ້າງຕັ້ງກອງທຶນການຮ່ວມມືໃຕ້-ໃຕ້ວ່າດ້ວຍການປ່ຽນແປງຂອງດິນຟ້າອາກາດ,ໄດ້ລິເລີ່ມສ້າງຕັ້ງສະຫະພັນສາກົນເພື່ອການພັດທະນາແບບສີຂຽວ “ໜຶ່ງແລວໜຶ່ງເສັ້ນທາງ”,ພ້ອມທັງດຳເນີນການແລກປ່ຽນແລະຮ່ວມມືດ້ານການອະນຸລັກສິ່ງແວດລ້ອມກັບ 100 ກວ່າປະເທດ,ພະຍາຍາມຊຸກຍູ້ການຮ່ວມມືດ້ານການອະນຸລັກຊີວະນານາພັນສາກົນ,ເພື່ອອຸທິດສະຕິປັນຍາຂອງຈີນເຂົ້າໃນການອະນຸລັກຊີວະນານາພັນ. ຈີນບໍ່ພຽງແຕ່ແມ່ນຜູ້ເຂົ້າຮ່ວມແລະຜູ້ປະກອບສ່ວນເພື່ອສ້າງຄວາມສີວິໄລດ້ານລະບົບນິເວດຂອງໂລກເທົ່ານັ້ນ,ຍັງຈະກາຍເປັນຜູ້ນຳໜ້າດ້ານວຽກງານອັນໃຫຍ່ຫຼວງນີ້ອີກດ້ວຍ,ເພື່ອສືບຕໍ່ປະກອບສ່ວນເຂົ້າໃນການສ້າງຄວາມສີວິໄລດ້ານລະບົບນິເວດຂອງໂລກ.
ຄວາມສີວິໄລດ້ານລະບົບນິເວດແມ່ນທ່າອຽງປະຫວັດສາດຂອງການພັດທະນາອະລິຍະທຳມະນຸດ. ຈີນຈະຮ່ວມມືກັບປະຊາຄົມໂລກພ້ອມກັນກ້າວເດີນໄປໜ້າ, ຮ່ວມກັນສ້າງປະຊາຄົມຮ່ວມຊີວິດລະຫວ່າງມະນຸດກັບທຳມະຊາດ,ຮ່ວມກັນສ້າງສິ່ງແວດລ້ອມນິເວດທີ່ມະນຸດແລະສິ່ງທີ່ມີຊີວິດສາມາດຢູ່ຮ່ວມກັນໄດ້ຢ່າງກົມກຽວ.
ຄຳເຫັນ
0