ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຢູ່ປະເທດຈີນ ມີບຸນປະເພນີອັນໜຶ່ງຊື່ວ່າ ບຸນສົງຢາງ ກົງກັບມື້ຂຶ້ນ 9 ຄ່ຳ ເດືອນ 9 ຕາມຈັນທະຄະຕິຈີນ, ທັງເອີ້ນກັນວ່າ ບຸນເຄົາລົບຜູ້ເຖົ້າ.ນັບຕັ້ງແຕ່ບູຮານນະການເປັນຕົ້ນມາ, ໃນຄ່ານິຍົມຂອງຄົນຈີນ, ອັນທີ່ວ່າ ຄວາມກະຕັນຍູຕໍ່ພໍ່ແມ່ແລະເຄົາລົບຜູ້ເຖົ້າກໍແມ່ນສິ່ງສຳຄັນອັນດັບໜຶ່ງໃນຄວາມມີເມດຕາແລະຄຸນນະທຳ. ທຸກມື້ນີ້,ສັງຄົມຈີນໄດ້ເຂົ້າສູ່ໄລຍະທີ່ອັດຕາສ່ວນຂອງປະຊາກອນຜູ້ເຖົ້າເພີ່ມຂຶ້ນ. ໃນງານອວຍພອນບຸນກຸດຈີນປີ2019ຂອງສູນກາງພັກແລະລັດຖະບານຈີນ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນກ່າວວ່າ: “ເຮັດໃຫ້ຜູ້ເຖົ້າມີຄົນເບິ່ງແຍງດູແລ, ມີຄົນເພິ່ງພາອາໄສໄດ້, ມີຄວາມສຸກສຳລານແລະມີຄວາມສຸກສະບາຍ, ເຊິ່ງພົວພັນເຖິງສັງຄົມທີ່ມີຄວາມກົມກຽວແລະມີສະຖຽນລະພາບ.”
ສິ່ງທີ່ທ່ານສີຈິ້ນຜິງເວົ້າມານັ້ນກໍແມ່ນສິ່ງທີ່ທ່ານເປັນຫ່ວງເປັນໃຍທີ່ສຸດ ທັງເປັນເນື້ອໃນສຳຄັນໃນຂະບວນການທີ່ສູນກາງພັກກອມມູນິດຈີນນຳພາປະຊາຊົນທົ່ວປະເທດສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານແລະສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ ກໍຄືຕອບສະໜອງກັບຄວາມມຸ້ງຫວັງຂອງປະຊາຊົນທີ່ຢາກມີຊີວິດການເປັນຢູ່ທີ່ດີງາມ.
ຢູ່ເທິງຖ້ານປຶ້ມໃນຫ້ອງການຂອງທ່ານສີຈິ້ນຜິງໄດ້ວາງຮູບຖ່າຍສອງແຜ່ນຄື ແຜ່ນໜຶ່ງແມ່ນ ທ່ານສີຈິ້ນຜິງຍ່າງຍູ້ລໍ້ທ່ານສີຈຸ້ງຊຸ່ນ ຜູ້ເປັນພໍ່ຮ່ວມກັນກັບຄອບຄົວ, ອີກແຜ່ນໜຶ່ງແມ່ນທ່ານສີຈິ້ນຜິງພວມຈູງມືທ່ານນາງສີຊິ່ນ ຜູ້ເປັນແມ່ຍ່າງເລາະຫຼິ້ນ. ເຖິງຈະຫຍຸ້ງນຳວຽກສ່ວນລວມອັນໜັກໜ່ວງກໍຕາມ, ຂໍພຽງແຕ່ມີເວລາຫວ່າງທ່ານກໍກິນເຂົ້າຮ່ວມກັບແມ່, ຫຼັງກິນເຂົ້າແລ້ວແລ້ວ, ທ່ານສີຈິ້ນຜິງກໍມັກຈູງມືແມ່ຍ່າງເລາະຫຼິ້ນທັງລົມກັບແມ່.
ຈາກຄວາມກະຕັນຍູຕໍ່ພໍ່ແມ່, ເອົາໃຈໃສ່ແລະຮັກແພງພະນັກງານອາວຸໂສ ຈົນຮອດການຢ້ຽມຢາມຜູ້ເຖົ້າທີ່ທຸກຍາກເພື່ອຖາມທຸກສຸກເຂົາເຈົ້າ, ທ່ານສີຈິ້ນຜິງໄດ້ໃຫ້ຄວາມເຄົາລົບນັບຖືຜູ້ເຖົ້າຜູ້ອາວຸໂສແລະຜູ້ມີຄວາມຮູ້ຄວາມສາມາດ,ສຸມຄວາມພະຍາຍາມໃຫ້ຜູ້ເຖົ້າໃນທົ່ວປະເທດໄດ້ຊົມໃຊ້ຊີວິດໃນໄວຊະລາຢ່າງມີຄວາມສຸກ.
ໃນຊຸມປີ1980, ທ່ານສີຈິ້ນຜິງໄດ້ດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງແຂວງເຫີເປີຍ,ໃນເວລານັ້ນ ທ່ານມັກຈະຂີ່ລົດຖີບໄປຊົນນະບົດເພື່ອສຳຫຼວດຄົ້ນຄວ້າວຽກງານ, ແຕ່ທ່ານໄດ້ມອບລົດຈິບທີ່ມີພຽງຄັນດຽວສຳລັບຄະນະພັກເມືອງເຈີ້ງຕິ້ງໃຫ້ພະນັກງານອາວຸໂສນຳໃຊ້. ພະນັກງານອາວຸໂສບໍ່ມີສະຖານທີ່ຈັດກິດຈະກຳບັນເທີງ, ທ່ານສີຈິ້ນຜິງກໍໄດ້ຈັດສັນເອົາຫ້ອງປະຊຸມໃຫຍ່ທີ່ຄະນະພັກເມືອງແລະອົງການປົກຄອງເມືອງນຳໃຊ້ຮ່ວມກັນນັ້ນດັດແປງໃຫ້ເປັນຫ້ອງບັນເທີງສະເພາະພະນັກງານອາວຸໂສ. ເພື່ອເບິ່ງແຍງດູແລສຸຂະພາບຂອງພະນັກງານອາວຸໂສໃຫ້ດີ, ພາຍໃຕ້ການຊີ້ນຳນຳພາຂອງທ່ານສີຈິ້ນຜິງເມືອງເຈີ້ງຕິ້ງໄດ້ຈັດຕັ້ງປະຕິບັດມາດຕະການຕ່າງໆເຊັ່ນ: ໃຫ້ບູລິມະສິດແກ່ພະນັກງານອາວຸໂສໃນການກວດສຸຂະພາບ, ຈັດຫ້ອງຄົນນອນເຈັບສະເພາະພະນັກງານອາວຸໂສ,ເອົາຄ່າປິ່ນປົວຄືນໃຫ້ພະນັກງານອາວຸໂສໄດ້ໄວເປັນພິເສດເປັນຕົ້ນ, ເຊິ່ງໄດ້ຊ່ວຍແກ້ໄຂຄວາມຫຍຸ້ງຍາກໃນຊີວິດການເປັນຢູ່ຫຼາຍຢ່າງໃຫ້ພະນັກງານອາວຸໂສ.
ວັນທີ 7 ທັນວາ ປີ1984, ທ່ານສີຈິ້ນຜິງທີ່ດຳລົງຕຳແໜ່ງເປັນເລຂາຄະນະພັກເມືອງເຈີ້ງຕິ້ງແຂວງເຫີເປີຍໃນເວລານັ້ນໄດ້ຂຽນບົດຄວາມລົງໃນໜັງສືພິມປະຊາຊົນລາຍວັນເປັນເທື່ອທຳອິດ,ເຊິ່ງບົດຄວາມມີຫົວຂໍ້ວ່າ “ພະນັກງານໜຸ່ມແລະໄວກາງຄົນຕ້ອງເຄົາລົບຜູ້ເຖົ້າ”, ບົດຄວາມໄດ້ເນັ້ນໜັກວ່າ “ຕ້ອງສືບທອດຄຸນສົມບັດທີ່ດີຂອງພະນັກງານອາວຸໂສ”, “ອອກແຮງເສີມຂະຫຍາຍມູນເຊື້ອທີ່ດີງາມຂອງພະນັກງານອາວຸໂສ”,”ເອົາໃຈໃສ່ເບິ່ງແຍງຊີວິດໃນໄວຊະລາຂອງພະນັກງານອາວຸໂສດ້ວຍຄວາມກະຕືລືລົ້ນ” ແລະທັດສະນະອື່ນໆອີກຫຼາຍຢ່າງ, ຈົນມາເຖິງທຸກມື້ນີ້, ທັດສະນະເຫຼົ່ານີ້ຍັງມີຄຸນປະໂຫຍດຫຼາຍໃນຊີວິດຕົວຈິງ.
ຕົ້ນຊຸມປີ1990, ແຂວງຟູຈ້ຽນໄດ້ລົງມືກໍ່ສ້າງສະໜາມບິນສາງເລີ້, ສະຫາຍອາວຸໂສຈາກກອງທັບຈຳນວນໜຶ່ງໄດ້ຮັບເຊີນໃຫ້ໄປເຂົ້າຮ່ວມພິທີເລີ່ມລົງມືກໍ່ສ້າງ. ໃນຄືນກ່ອນມື້ຈັດພິທີ, ທ່ານສີຈິ້ນຜິງ ເລຂາຄະນະພັກນະຄອນຟູໂຈ່ວໃນເວລານັ້ນໄດ້ມອບໝາຍໃຫ້ເລຂາຂອງຕົນເຮັດແຈ້ງການເຖິງພະນັກງານຂັ້ນຮາກຖານໂດຍສະເພາະວ່າ: ມື້ຕໍ່ມາຈະມີລົມແຮງ, ອາກາດໜາວ, ຕ້ອງໂທແຈ້ງສະຫາຍອາວຸໂສແຕ່ລະຄົນເພື່ອເຕືອນໃຫ້ພວກທ່ານນຸ່ງເຄື່ອງໃຫ້ຫຼາຍເພື່ອຮັກສາສຸຂະພາບ.
ພາຍຫຼັງດຳລົງຕຳແໜ່ງເປັນປະທານປະເທດແລ້ວ, ຄົນທັງຫຼາຍກໍມັກຈະເຫັນເລື້ອຍໆວ່າທ່ານສີຈິ້ນຜິງໄດ້ໃຫ້ການເຄົາລົບນັບຖືຜູ້ເຖົ້າ.
ໃນເວລາຢ້ຽມຢາມເຮືອນຂອງແມ່ເຖົ້າສືປາຊ່ານຢູ່ບ້ານສິບແປດຖ້ຳກິ່ງແຂວງຊ່ຽງຊີ່ ແຂວງຫູນານ, ທ່ານສີຈິ້ນຜິງໄດ້ຍ່າງໄປເປີດເບິ່ງເລົ້າເຂົ້າຂອງແມ່ເຖົ້າທັງຖາມດ້ວຍຄວາມເປັນຫ່ວງເປັນໃຍວ່າ: “ເຂົ້າກຸ້ມກິນບໍ?” “ໄດ້ປູກຕົ້ນໄມ້ໃຫ້ໝາກບໍ?” “ໄດ້ລ້ຽງໝູບໍ?”
ທ່ານສີຈິ້ນຜິງຢ້ຽມຢາມເຮືອນຂອງພໍ່ເຖົ້າຫວາງເກີ້ຊ່າງ
ຢູ່ເຮືອນພໍ່ເຖົ້າຫວາງເກີ້ຊ່າງທີ່ມີອາຍຸ 83 ປີຢູ່ບ້ານຈູ່ຊຸ່ນແຂວງຊ່ານຕຸ່ງ, ທ່ານສີຈິ້ນຜິງໄດ້ຍ່າງກວດເບິ່ງເຮືອນຂອງພໍ່ເຖົ້າແຕ່ລະຫ້ອງ ທັງສອບຖາມວ່າ ເຮືອນພໍ່ເຖົ້າມີດິນປູກຝັງເທົ່າໃດ? ມີລາຍໄດ້ເທົ່າໃດ?ຍັງມີຄວາມຫຍຸ້ງຍາກຫຍັງອີກບໍ?
ໃນເວລາຖ່າຍຮູບຮ່ວມກັບຜູ້ແທນທີ່ເຂົ້າຮ່ວມພິທີຍ້ອງຍໍຜູ້ດີເດັ່ນໃນການສ້າງຄວາມສິວິໄລທາງຈິດໃຈທົ່ວປະເທດ, ທ່ານສີຈິ້ນຜິງເຊີນຊວນທ່ານຫວງຊູ້ຮວາ ແລະທ່ານຫວງຕ້າຟ່າໄປນັ່ງຢູ່ຂ້າງຕົນເອງ.
ວັນທີ 17 ພະຈິກປີ2017, ທ່ານສີຈິ້ນຜິງໄດ້ພົບປະກັບຜູ້ແທນ 600 ກວ່າຄົນທີ່ເຂົ້າຮ່ວມພິທີຍ້ອງຍໍຜູ້ດີເດັ່ນໃນການສ້າງຄວາມສິວິໄລທາງຈິດໃຈທົ່ວປະເທດຈີນດ້ວຍຄວາມສະໜິດສະໜົມ, ຕອນກຽມຖ່າຍຮູບລວມໝູ່, ທ່ານສີຈິ້ນຜິງໄດ້ເຫັນທ່ານຫວງຊູ້ຮວາ ອາຍຸ 93 ປີແລະທ່ານຫວງຕ້າຟ່າທີ່ມີອາຍຸ 82 ປີພວມຢືນຢູ່ທ່າມກາງຜູ້ແທນທັງຫຼາຍ ທ່ານກໍເວົ້າດ້ວຍຄວາມຍິ້ມແຍ້ມແຈ່ມໃສວ່າ: “ພວກສະຫາຍອາຍຸຫຼາຍປານນີ້ແລ້ວ, ແຕ່ສຸຂະພາບຍັງແຂງແຮງດີສົມຄວນເນາະ. ພວກສະຫາຍບໍ່ຕ້ອງຢືນແລ້ວ, ມານັ່ງຢູ່ຂ້າງຂ້າພະເຈົ້າພີ້. ”ບັນຍາກາດແບບນີ້ໄດ້ເຮັດໃຫ້ຜູ້ແທນທັງຫຼາຍຮູ້ສຶກປະທັບໃຈຫຼາຍ.
ສິ່ງທີ່ໜ້າສົນໃຈທີ່ສຸດກໍຄື ໃນຕົ້ນປີ2020 ທີ່ຫາກໍ່ເກີດມີສະພາບການແຜ່ລະບາດຂອງພະຍາດໂຄວິດ-19, ພາຍໃຕ້ການບັນຊາການແລະວາງແຜນຍຸດທະສາດດ້ວຍຕົນເອງຂອງທ່ານສີຈິ້ນຜິງ, ປະເທດຈີນໄດ້ເປີດບັ້ນຕໍ່ຕ້ານພະຍາດໂຄວິດ-19ໂດຍບໍ່ເສຍດາຍຫຍັງໝົດເພື່ອຊ່ວຍກອບກູ້ຊີວິດຄົນເຈັບບໍ່ວ່າຄົນເຈັບທີ່ມີອາຍຸສູງປານໃດຫຼືມີອາການໜັກປານໃດກໍຕາມ, ກໍຈະບໍ່ປ່ອຍປະເດັດຂາດ. ສະເພາະແຕ່ແຂວງຫູເປີຍກໍສາມາດປິ່ນປົວຜູ້ຕິດເຊື້ອພະຍາດໂຄວິດ-19 ທີ່ມີອາຍຸຫຼາຍກວ່າ 80 ປີໃຫ້ຫາຍດີໄດ້ປະມານ 3000 ກວ່າຄົນ, ໃນນີ້ມີ 7 ຄົນມີອາຍຸຫຼາຍກວ່າ 100 ປີ, ຄົນເຈັບອາຍຸສູງທີ່ມີອາການສາຫັດຫຼາຍຄົນກໍໄດ້ຮັບການຊ່ວຍເຫຼືອກອບກູ້ຊີວິດຈາກພະຍາດ, ມີຜູ້ເຖົ້າອາຍຸ 70 ປີຄົນໜຶ່ງໄດ້ຕິດເຊື້ອພະຍາດໂຄວິດ-19, ພະນັກງານແພດໝໍ 10 ກວ່າຄົນໄດ້ເອົາໃຈໃສ່ປິ່ນປົວແລະດູແລເພິ່ນຫຼາຍສິບມື້, ໃນທີ່ສຸດກໍສາມາດຟື້ນຟູສຸຂະພາບເພິ່ນໄດ້, ສ່ວນຄ່າປິ່ນປົວເກືອບ 1,5ລ້ານຢວນ ແມ່ນທາງລັດເປັນຜູ້ຮັບຜິດຊອບທັງໝົດ.
“ໃຫ້ຜູ້ເຖົ້າສາມາດຊົມໃຊ້ຊີວິດໃນໄວຊະລາທີ່ມີຄວາມສົມບູນພູນສຸກ” ເຊິ່ງເປັນສິ່ງທີ່ທ່ານສີຈິ້ນຜິງເປັນຫ່ວງເປັນໃຍມາໂດຍຕະຫຼອດ. ທ່ານໄດ້ປະຕິບັດຕົວຈິງໃນການເຄົາລົບນັບຖືຜູ້ເຖົ້າ, ຮັກແພງແລະຊ່ວຍເຫຼືອຜູ້ເຖົ້າຕະຫຼອດມາ ເຊິ່ງໄດ້ເປັນແບບຢ່າງທີ່ດີໃຫ້ແກ່ທົ່ວສັງຄົມໃນການເຄົາລົບຜູ້ເຖົ້າແລະກະຕັນຍູຕໍ່ພໍ່ແມ່, ທັງໄດ້ນຳພາປະຊາຊົນທົ່ວປະເທດໃຫ້ສືບຕໍ່ເສີມຂະຫຍາຍມູນເຊື້ອອັນດີງາມໃນການຮັກແພງຜູ້ເຖົ້າ, ຖືວ່າເປັນການສ້າງບັນຍາກາດທີ່ດີໃນການຮັບມືກັບບັນຫາທີ່ອັດຕາສ່ວນຂອງປະຊາກອນຜູ້ເຖົ້າເພີ່ມຂຶ້ນ,ສ້າງລະບົບນະໂຍບາຍແລະສະພາບແວດລ້ອມທາງສັງຄົມໃນການລ້ຽງດູຜູ້ເຖົ້າ, ມີຄວາມກະຕັນຍູຕໍ່ຜູ້ເຖົ້າແລະເຄົາລົບນັບຖືຜູ້ເຖົ້າ.
ຄຳເຫັນ
0