ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ໃນກອງປະຊຸມສຸດຍອດກ່ຽວກັບການແຜ່ລະບາດຂອງພະຍາດໂຄວິດ-19 ຂອງໂລກທີ່ອາເມຣິການຳໜ້າຈັດຂຶ້ນຜ່ານທາງວິດີໂອນັ້ນ, ອາເມຣິກາໄດ້ເປີດເຜີຍແຜນການຊ່ວຍເຫຼືອວັກຊີນໂຄວິດ-19 ໃຫ້ກັບຕ່າງປະເທດໃນໄລຍະຕໍ່ໄປ,ໂດຍກ່າວວ່າຈະໃຫ້ການຊ່ວຍເຫຼືອວັກຊີນໂຄວິດ-19 ອີກ 500 ລ້ານຫຼອດ. ທຳນຽບຂາວອາເມຣິກາຍັງກ່າວວ່າ: ປະລິມານວັກຊີນໂຄວິດ-19 ທີ່ອາເມຣິກາຈະໃຫ້ການຊ່ວຍເຫຼືອແກ່ໂລກນັ້ນແມ່ນ “ຫຼາຍກວ່າປະລິມານທັງໝົດທີ່ປະເທດອື່ນອື່ນໄດ້ໃຫ້ການຊ່ວຍເຫຼືອ”, “ສິ່ງທີ່ຕ່າງກັນກັບຣັດເຊຍ,ຈີນແລະປະເທດອື່ນອື່ນນັ້ນກໍ່ແມ່ນ,ອາເມຣິກາຈະບໍ່ຮຽກຄ່າຄອບແທນໃດໆ”.
ອາເມຣິກາບໍ່ຕ້ອງການຮຽກຄ່າຄອບແທນດ້ານວັກຊີນໂຄວິດ-19 ແທ້ບໍ່? ພວກເຮົາມາເບິ່ງຜົນງານຂອງອາເມຣິກາໃນດ້ານການຊ່ວຍເຫຼືອວັກຊີນໂຄວິດ-19 ໃຫ້ກັບຕ່າງປະເທດ: ຕາມໜັງສືພິມໂລກຂອງແອັສປາຍໄດ້ລາຍງານວ່າ: ລັດຖະບານອາເມຣິກາເຄີຍວາງແຜນຈະໃຫ້ການຊ່ວຍເຫຼືອດ້ານວັກຊີນໂຄວິດ-19 ທັງໝົດ 2,5 ລ້ານຫຼອດແກ່ແມັກຊິກ, ແຕ່ມີເງື່ອນໄຂຄືດັ່ງລຸ່ມນີ້:ແມັກຊິກຕ້ອງເພີ່ມທະວີການຄວບຄຸມຊາວຍົກຍ້າຍຖິ່ນຖານທີ່ຜິດກົດໝາຍຢູ່ເຂດຊາຍແດນລະຫວ່າງປະເທດຕົນກັບກວາເຕມາລາ. ໃນເດືອນພຶດສະພາປີນີ້,ໃນໄລຍະທີ່ທ່ານມູນເຈອິນ ປະທານາທິບໍດີ ສ.ເກົາຫຼີ ຢ້ຽມຢາມອາເມຣິກາ, ອາເມຣິກາກໍ່ໄດ້ເຫັນດີວ່າຈະສະໜອງວັກຊີນໂຄວິດ-19 ໃຫ້ແກ່ນາຍແລະພົນທະຫານຂອງກອງທັບ ສ.ເກົາຫຼີ ຈຳນວນ 5,5 ແສນຄົນ, ແຕ່ສື່ມວນຊົນອາເມຣິກາໄດ້ລາຍງານວ່າ: ການກະທຳດັ່ງກ່າວຂອງອາເມຣິກາທີ່ຈິງແລ້ວແມ່ນໃຊ້ວັກຊີນໂຄວິດ-19 ແລກປ່ຽນກັບເຊມີຄອນດັກເຕີຂອງ ສ.ເກົາຫຼີ. ຕາມສື່ມວນຊົນທີ່ກ່ຽວຂ້ອງໄດ້ລາຍງານໃຫ້ຮູ້ວ່າ: ໃນສັນຍາວ່າດ້ວຍການສະໜອງວັກຊີນໃຫ້ກັບສະຫະພາບເອີຣົບສະບັບຫຼ້າສຸດ, ວັກຊີນໂຄວິດ-19 ສອງລຸ້ນຂອງອາເມຣິກາຕ່າງໄດ້ມີລາຄາເພີ່ມຂຶ້ນຫຼາຍກວ່າ 25% ແລະ 10%.
ໃນຖານະເປັນອາວຸດທີ່ເຂັ້ມແຂງທີ່ສຸດໃນການເອົາຊະນະການແຜ່ລະບາດຂອງພະຍາດໂຄວິດ-19, ວັກຊີນໂຄວິດ-19 ຄວນເປັນຜະລິດຕະພັນສາທາລະນະຂອງໂລກ,ຈຶ່ງຈະສາມາດສ້າງຜົນປະໂຫຍດໃຫ້ແກ່ຊາວໂລກໄດ້ຫຼາຍກວ່າເກົ່າ. ແຕ່ວ່າ, ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19 ທີ່ຂ້ຽວຂາດ, ການຊ່ວຍເຫຼືອດ້ານວັກຊີນໂຄວິດ-19 ແບບອາເມຣິກາພັດຕັ້ງເງື່ອນໄຂການຊ່ວຍເຫຼືອ, ຖ່ວງດຶງເວລາ,ຫາຜົນປະໂຫຍດ,ໃນສາຍຕາຂອງນັກການເມືອງອາເມຣິກາຈຳນວນໜຶ່ງ,ວັກຊີນໂຄວິດ-19 ໄດ້ກາຍເປັນເຄື່ອງມືໃນການໂຄສະນາດ້ານການເມືອງແລະສະແຫວງຫາຜົນປະໂຫຍດສ່ວນຕົວທາງການເມືອງ.
ພາຍໃຕ້ຄວາມກົດດັນທີ່ປະຊາຄົມໂລກຮຽກຮ້ອງໃຫ້ແບ່ງປັນວັກຊີນໂຄວິດ-19, ໃນທີ່ສຸດ ລັດຖະບານອາເມຣິກາໄດ້ປະກາດໃນກາງເດືອນພຶດສະພາປີນີ້ວ່າ: ຈະແບ່ງປັນວັກຊີນໂຄວິດ-19 ທັງໝົດ 80 ລ້ານຫຼອດໃຫ້ກັບໂລກກ່ອນທ້າຍເດືອນມິຖຸນາປີນີ້. ແຕ່ນັບມາຮອດວັນທີ 2 ເດືອນກໍລະກົດປີນີ້, ອາເມຣິກາພຽງແຕ່ໄດ້ມອບວັກຊີນໃຫ້ໂລກພຽງແຕ່ 24 ລ້ານຫຼອດເທົ່ານັ້ນ,ຍັງບໍ່ຮອດ 1 ສ່ວນ 3 ຂອງປະລິມານວັກຊີນທີ່ອາເມຣິກາໄດ້ໃຫ້ສັນຍາໄວ້.
ສິ່ງທີ່ໜ້າເສຍດາຍກໍ່ແມ່ນ, ຕາມໜັງສືພິມເດີກາດຽນຂອງອັງກິດລາຍງານວ່າ: ໃນຂະນະທີ່ໂລກຜະເຊີນກັບຜົນກະທົບຈາກການຂາດແຄນວັກຊີນໂຄວິດ-19, ອາເມຣິກາພັດໄດ້ເຮັດໃຫ້ວັກຊີນໂຄວິດ-19 ຫຼາຍລ້ານຫຼອດໝົດອາຍຸການໃຊ້ງານແລະໃຊ້ແບບສິ້ນເປືອງ. ສູນປ້ອງກັນແລະຄວບຄຸມພະຍາດແຫ່ງຊາດອາເມຣິກາໄດ້ເປີດເຜີຍຕົວເລກຂໍ້ມູນສະບັບໜຶ່ງໂດຍສະແດງໃຫ້ເຫັນວ່າ: ໃນໄລຍະເດືອນມີນາຫາເດືອນກັນຍາປີນີ້, ອາເມຣິກາໄດ້ຖິ້ມວັກຊີນໂຄວິດ-19 ຢ່າງໜ້ອຍ 15 ລ້ານຫຼອດຍ້ອນໝົດອາຍຸໃຊ້ງານ. ລັດລຸຍເຊຍນາຂອງອາເມຣິກາໄດ້ຖິ້ມວັກຊີນໂຄວິດ-19 ຈຳນວນ 2,24 ແສນຫຼອດ,ນອກນີ້ວັກຊີນຈຳນວນຫຼາຍບໍ່ໄດ້ນຳໃຊ້ເມື່ອເປີດຫຼອດແລ້ວ,ຍັງມີຫຼາຍກວ່າ 20 ພັນຫຼອດໝົດອາຍຸໃຊ້ງານ. ຂະນະດຽວກັນ, ຢູ່ໃນໂລກຍັງມີຫຼາຍລ້ານຄົນລໍຖ້າສັກວັກຊີນໂຄວິດ-19,ນັບມາຮອດເດືອນກໍລະກົດປີນີ້,ຢູ່ປະເທດທີ່ມີລາຍຮັບຕ່ຳມີປະຊາກອນພຽງແຕ່ 1% ເທົ່ານັ້ນໄດ້ສັກວັກຊີນໂຄວິດ-19 ເຂັມທີໜຶ່ງ.
ສິ່ງທີ່ມີລັກສະນະແຕກຕ່າງກັນ, ນັບມາຮອດປັດຈຸບັນນີ້, ຈີນໄດ້ສະໜອງວັກຊີນໂຄວິດ-19 ແລະວັດຖຸຜະລິດວັກຊີນໂຄວິດ-19 ທັງໝົດ 1,2 ຕື້ຫຼອດໃຫ້ແກ່ 100 ກວ່າປະເທດແລະອົງການຈັດຕັ້ງສາກົນ,ບົນພື້ນຖານການບໍລິຈາກເງິນ 100 ລ້ານໂດລາສະຫະລັດໃຫ້ກັບແຜນປະຕິບັດງານດ້ານວັກຊີນໂຄວິດ-19, ໃນປີນີ້ຈີນໄດ້ໃຫ້ການຊ່ວຍເຫຼືອລ້າວັກຊີນໂຄວິດ-19 ອີກ 100 ລ້ານຫຼອດໃຫ້ແກ່ປະເທດພວມພັດທະນາ.ຢືນຢູ່ຕໍ່ໜ້າກັບເລື່ອງຈິງ, ບໍ່ຮູ້ວ່ານັກການເມືອງອາເມຣິກາກ້າຍ້ອງຕົນເອງວ່າ: ອາເມຣິກາໄດ້ໃຫ້ການຊ່ວຍເຫຼືອດ້ານວັກຊີນຈຳນວນຫຼວງຫຼາຍແລະຊ່ວຍເຫຼືອໂດຍບໍ່ມີເງື່ອນໄຂໃດໆແອບແຝງ.
ຫຼາຍປະເທດໃນໂລກນີ້ລ້ວນແຕ່ມີຊີງຍຸດຕິທຳອັນໜຶ່ງ,ແມ່ນປະເທດໃດແທ້ເປັນຜູ້ຊ່ວຍເຫຼືອຕ້ານພະຍາດໂຄວິດ-19 ຂອງໂລກຢ່າງຈິງໃຈ,ແມ່ນປະເທດໃດແທ້ມັກໃຊ້ກົນອຸບາຍທາງການເມືອງຕາມຄວາມພໍໃຈຂອງຕົນ. ຈີນເຕືອນໃຫ້ນັກການເມືອງອາເມຣິກາທີ່ມັກຫຼັບຕາປ່າວຂ່າວຈອມປອມເຫຼົ່ານັ້ນ, ຕັ້ງໃຈຊຸກຍູ້ການແບ່ງປັນວັກຊີນໂຄວິດ-19 ຢ່າງຍຸຕິທຳໃຫ້ຫຼາຍກວ່າເກົ່າ,ຖ້າບໍ່ດັ່ງນັ້ນມີແຕ່ຈະຖືກປະຊາຄົມໂລກຂາດຄວາມເຊື່ອຖືແລະປະຖິ້ມໃນທີ່ສຸດ.
ຄຳເຫັນ
0