ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຜູ້ມີຄວາມຮູ້ຄວາມສາມາດເປັນພື້ນຖານສຳລັບການສ້າງປະເທດໃຫ້ຮັ່ງມີ ແລະເປັນຍຸດທະສາດສຳຄັນເພື່ອພັດທະນາປະເທດຊາດໃຫ້ຈະເລີນຮຸ່ງເຮືອງ. ທ່ານສີຈິ້ນຜິງ ປະທານປະເທດຈີນເຄີຍກ່າວເນັ້ນມາຫຼາຍເທື່ອວ່າ ເຕົ້າໂຮມຜູ້ມີຄວາມຮູ້ຄວາມສາມາດໃນທົ່ວປະເທດເພື່ອເສີມຂະຫຍາຍບົດບາດຂອງເຂົາເຈົ້າ. ຈາກການເປັນການນຳທ້ອງຖິ່ນຕະຫຼອດຮອດຂັ້ນສູນກາງ, ເລື່ອງລາວກ່ຽວກັບທ່ານສີຈິ້ນຜິງຮັກແພງແລະເຄົາລົບຜູ້ມີຄວາມຮູ້ຄວາມສາມາດ, ເຕົ້າໂຮມຜູ້ມີຄວາມຮູ້ຄວາມສາມາດແລະນຳໃຊ້ຜູ້ມີຄວາມຮູ້ຄວາມສາມາດນັ້ນໄດ້ຮັບການບອກເລົ່າ ກັນມາຢ່າງກວ້າງຂວາງ.
ຕອນເຮັດວຽກຢູ່ເມືອງເຈີ້ງຕິ້ງ ແຂວງເຫີເປີຍ, ທ່ານສີຈິ້ນຜິງໄດ້ຮູ້ຈັກກັບທ່ານເຈຍຕ້າຊ່ານ ນັກປະພັນຜູ້ມີຊື່ສຽງຂອງເມືອງເຈີ້ງຕິ້ງ.
ປີ1997, ທ່ານສີຈິ້ນຜິງໄປຢ້ຽມຢາມທ່ານເຈຍຕ້າຊ່ານທີ່ເຈັບໜັກໃນເວລານັ້ນ
ທ່ານເຈຍຕ້າຊ່ານເປັນ“ຜູ້ຮູ້ເຈີ້ງຕິ້ງ”ທີ່ແທ້ຈິງ, ຮູ້ດີກ່ຽວກັບປະຫວັດຄວາມເປັນມາຂອງບ້ານເກີດຕົນ. ສ່ວນທ່ານສີຈິ້ນຜິງຫາກໍ່ໄປດຳລົງຕຳແໜ່ງເປັນການນຳຢູ່ເມືອງເຈີ້ງຕິ້ງໄດ້ບໍ່ດົນ, ກໍສາມາດລົມເລື່ອງກ່ຽວກັບປະຫວັດສາດແລະວັດທະນະທຳພື້ນເມືອງແບບສະບາຍທ່າມກາງບັນຍາກາດເວົ້ານົວຫົວມ່ວນນຳກັນໄດ້, ເຊິ່ງໄດ້ສ້າງຄວາມປະທັບໃຈໃຫ້ກັບທ່ານເຈຍຕ້າຊ່ານ. ທ່ານເຈຍຕ້າຊ່ານມັກລົມກັນກັບທ່ານສີຈິ້ນຜິງ ແລະກໍໃຫ້ຄວາມສຳຄັນເປັນຢ່າງຍິ່ງຕໍ່ຄວາມເຫັນແລະທັດສະນະຂອງທ່ານສີຈິ້ນຜິງ. ສ່ວນທ່ານເຈຍຕ້າຊ່ານຜູ້ມີຈິດໃຈເປັນຫ່ວງເປັນໃຍ ປະເທດຊາດແລະປະຊາຊົນ ກໍໄດ້ສ້າງຄວາມປະທັບໃຈອັນເລິກເຊິ່ງໃຫ້ກັບທ່ານສີຈິ້ນຜິງເຊັ່ນດຽວກັນ, ທ່ານເຄົາລົບນັບຖື ນັກປະພັນພື້ນເມືອງທີ່ຝັງຮາກເລິກທ່າມກາງມະຫາຊົນທ່ານນີ້ທີ່ສຸດເລີຍ.
ທ່ານສີຈິ້ນຜິງເຫັນວ່າ: ການພັດທະນາວຽກງານວັດທະນະທຳທ້ອງຖິ່ນ, ຕ້ອງການຜູ້ມີຄວາມຮູ້ຄວາມສາມາດທີ່ເຮັດວຽກເພື່ອປະຊາຊົນຢ່າງດຽວ ທັງມີພື້ນຖານຄວາມຮູ້ດ້ານວັດທະນະທຳອັນເລິກເຊິ່ງຄື ທ່ານເຈຍຕ້າຊ່ານ. ແຕ່ວ່າ ທ່ານເຈຍຕ້າຊ່ານບໍ່ຍອມເປັນເຈົ້າຄົນນາຍຄົນ, ແຕ່ເວລາທ່ານສີຈິ້ນຜິງແຕ່ງຕັ້ງລາວເປັນຫົວໜ້າພະແນກວັດທະນະທຳເມືອງເຈີ້ງຕິ້ງກໍປານວ່າດຶງຂາເຕົ່າ. ພຶດຕິກຳຕົວຈິງໄດ້ພິສູດໃຫ້ເຫັນວ່າ: ທ່ານສີຈິ້ນຜິງມີສາຍຕາອັນແຫຼມຄົມໃນການເບິ່ງຜູ້ມີຄວາມຮູ້ຄວາມສາມາດ.
ຫຼັງຈາກນັ້ນຫຼາຍປີ, ທ່ານສີຈິ້ນຜິງໄດ້ຂຽນບົດຄວາມທີ່ມີຫົວຂໍ້ວ່າ “ຫວນຄືນເຖິງຕ້າຊ່ານ”ໃນບົດນີ້, ທ່ານສີຈິ້ນຜິງໄດ້ຕີລາຄາການປະຕິບັດໜ້າທີ່ວຽກງານຂອງທ່ານເຈຍຕ້າຊ່ານວ່າ: “ນັບຕັ້ງແຕ່ທຳອິດທີ່ຂຶ້ນດຳລົງຕຳແໜ່ງ, ເພິ່ນກໍໄດ້ລົງຮາກຖານໄປຢ້ຽມຢາມປະຊາຊົນເພື່ອຮັບຮູ້ບັນຫາບົກຜ່ອງ,ສ້າງລະບຽບການ, ໃຊ້ເວລາບໍ່ເທົ່າໃດເດືອນ, ກໍສາມາດປັບປຸງລະບົບວັດທະນະທຳທີ່ບໍ່ຄ່ອຍເປັນລະບຽບໃນແຕ່ກ່ອນໃຫ້ກັບມາເປັນລະບຽບຮຽບຮ້ອຍ. ໃນໄລຍະດຳລົງຕຳແໜ່ງ, ຕ້າຊ່ານໄດ້ສຸມຄວາມພະຍາຍາມຈົນສຸດຄວາມສາມາດ, ທຸ້ມເທເຫື່ອແຮງແລະສະຕິປັນຍາຂອງຕົນທັງໝົດເຂົ້າໃນການພັດທະນາວຽກງານວັດທະນະທຳ, ການຄົ້ນຄວ້າ,ອະນຸລັກ,ປະຕິສັງຂອນແລະສ້ອມແປງ,ຂຸດຄົ້ນແລະເກັບຮັກສາວັດຖຸບູຮານຂອງເມືອງເຈີ້ງຕິ້ງ.”
ໃນໄລຍະເຮັດວຽກຢູ່ນະຄອນຟູໂຈ່ວ ແຂວງຟູຈ້ຽນ, ທ່ານສີຈິ້ນຜິງກໍໃຫ້ຄວາມສຳຄັນຢ່າງສູງກັບຜູ້ມີຄວາມຮູ້ຄວາມສາມາດເຊັ່ນກັນ, ທັງໃຫ້ຄວາມສຳຄັນຢ່າງຍິ່ງຕໍ່ການກໍ່ສ້າງຖັນແຖວພະນັກງານ. ສຳລັບການນຳໃຊ້ຜູ້ມີຄວາມຮູ້ຄວາມສາມາດແລະການບຳລຸງສ້າງຜູ້ມີຄວາມຮູ້ຄວາມສາມາດ,ທ່ານສີຈິ້ນຜິງໄດ້ມີການຄົ້ນຄິດຢ່າງເລິກເຊິ່ງທັງມີທັດສະນະກ່ຽວກັບເລື່ອງນີ້ເປັນພິເສດ.
ໃນດ້ານການຄັດເລືອກຜູ້ມີຄວາມຮູ້ຄວາມສາມາດ, ທ່ານສີຈິ້ນຜິງໄດ້ຮຽກຮ້ອງໃຫ້ຕ້ອງເລືອກຜູ້ທີ່ມີທັງຄວາມຮູ້ຄວາມສາມາດແລະຄຸນສົມບັດ, ຄັດຄ້ານການຄັດເລືອກຜູ້ມີຄວາມຮູ້ຄວາມສາມາດໂດຍເນັ້ນແຕ່ວຸດທິການສຶກສາແລະຄະແນນສອບເສັງຢ່າງດຽວເທົ່ານັ້ນ. ໃນເວລານັ້ນ, ໃນດ້ານການຄັດເລືອກພະນັກງານມີທັດສະນະແບບໜຶ່ງທີ່ເຫັນເລື້ອຍໆ ຄື: ຕ້ອງກ້ານຳໃຊ້ພະນັກງານ ໂດຍສະເພາະຕ້ອງກ້າໃຊ້ພະນັກງານຜູ້ທີ່ມີຫາງສຽງທາງລົບແຕ່ມີຄວາມສາມາດ. ແຕ່ສຳລັບທ່ານສີຈິ້ນຜິງບໍ່ໄດ້ເຫັນດີນຳທັດສະນະນີ້. ທ່ານເຫັນວ່າ: ຫາກມີຫາງສຽງທາງລົບກໍສະແດງວ່າ ມີຂໍ້ບົກຜ່ອງຫຼາຍ,ມີຄວາມສາມາດກໍບໍ່ໄດ້ໝາຍຄວາມວ່າຈະມີຄຸນສົມບັດແນ່ນອນ, ຜູ້ເປັນພະນັກງານຕ້ອງມີທັງຄວາມຮູ້ຄວາມສາມາດແລະມີຄຸນສົມບັດໄປພ້ອມຈິ່ງໄດ້.
ເມື່ອຫວນຄືນເຖິງອະດີດທີ່ເຮັດວຽກຢູ່ພາຍໃຕ້ການນຳພາໂດຍກົງຂອງທ່ານສີຈິ້ນຜິງ, ທ່ານລິນປີ້ຟູ ອະດີດນັກສຳຫຼວດຄົ້ນຄວ້າຂອງຫ້ອງວ່າການຄະນະພັກນະຄອນຟູໂຈ່ວໄດ້ກ່າວດ້ວຍຄວາມປະທັບໃຈວ່າ: “ເຮັດວຽກພາຍໃຕ້ການນຳພາຂອງທ່ານເລຂາສີຈິ້ນຜິງ ເຖິງຈະອິດເມື່ອຍລຳບາກແນວໃດກໍເປັນຕາເຮັດ.”
ທ່ານລິນປີ້ຟູ ກຳເນີດໃນຊົນນະບົດ, ຫຼັງຈາກຈົບອາຍຸການເປັນທະຫານພັນທະແລ້ວກໍໄດ້ໄປເຮັດວຽກຢູ່ອົງການປົກຄອງໂດຍກົງ, ທ່ານບໍ່ເຄີຍໄດ້ຮຽນຢູ່ມະຫາວິທະຍາໄລໃນໄລຍະຜ່ານມາ. ແຕ່ທ່ານສີຈິ້ນຜິງກໍບໍ່ເຄີຍໄດ້ດູຖູກທ່ານລິນປີ້ຟູຈັກເທື່ອ, ແຕ່ໄດ້ປະຕິບັດຕໍ່ລາວດ້ວຍຄວາມຈິງໃຈແລະເປັນກັນເອງ. ໃນເວລານັ້ນ, ທ່ານລິນປີ້ຟູໄດ້ຂຽນບົດຄວາມຫຼາຍບົດກ່ຽວກັບການພັດທະນານະຄອນຟູໂຈ່ວ, ທ່ານສີຈິ້ນຜິງໄດ້ຂຽນຄຳເຫັນແນະນຳໃນບົດຄວາມຂອງທ່ານລິນປີ້ຟູ 10 ກວ່າເທື່ອ, ເຊິ່ງໄດ້ກາຍເປັນກຳລັງແຮງອັນເຂັ້ມແຂງໃນການກະຕຸກຊຸກຍູ້ໃຫ້ທ່ານລິນປີ້ຟູພະຍາຍາມປະຕິບັດໜ້າທີ່ວຽກງານຂອງຕົນໃຫ້ສຳເລັດຜົນດ້ວຍດີ.
ເດືອນມິຖຸນາປີ1991, ທ່ານສີຈິ້ນຜິງໄດ້ຂຽນຄຳເຫັນແນະນຳໃນບົດລາຍງານວຽກງານວ່າ: ເຫັນດີໃຫ້ສະຫາຍລິນປີ້ຟູດຳລົງຕຳແໜ່ງເປັນຮອງເລຂາທິການສະມາຄົມຄົ້ນຄວ້າວິທະຍາສາດຂອງຕົວເມືອງຟູໂຈ່ວ.ຈາກນັ້ນບໍ່ດົນ, ທ່ານລິນປີ້ຟູກໍຖືກເລື່ອນຕຳແໜ່ງໃຫ້ເປັນຮອງຫົວໜ້າຫ້ອງການຄົ້ນຄວ້ານະໂຍບາຍຂອງຄະນະພັກນະຄອນຟູໂຈ່ວ, ປີ1995, ທ່ານກໍໄດ້ຖືກເລື່ອນຕຳແໜ່ງຂຶ້ນເປັນຫົວໜ້າຫ້ອງການຄົ້ນຄວ້ານະໂຍບາຍຂອງຄະນະພັກນະຄອນຟູໂຈ່ວ.
ທ່ານສີຈິ້ນຜິງຮູ້ຄັດເລືອກຜູ້ມີຄວາມຮູ້ຄວາມສາມາດ,ຮັກແພງຜູ້ມີຄວາມຮູ້ຄວາມສາມາດ,ເຄົາລົບນັບຖືຜູ້ມີຄວາມຮູ້ຄວາມສາມາດແລະນຳໃຊ້ຜູ້ມີຄວາມຮູ້ຄວາມສາມາດ, ພາຍຫຼັງດຳລົງຕຳແໜ່ງເປັນຜູ້ນຳສູດສຸດຂອງພັກແລະລັດແລ້ວ, ແຕ່ລະປີ, ທ່ານສີຈິ້ນຜິງກໍໄດ້ເຂົ້າຮ່ວມພິທີຍ້ອງຍໍພະນັກງານເຕັກນິກວິທະຍາສາດແຫ່ງຊາດ ເພື່ອມອບລາງວັນໃຫ້ພະນັກງານເຕັກນິກວິທະຍາສາດທີ່ດີເດັ່ນ. ທ່ານຍັງໄດ້ໄປຢ້ຽມຢາມພະນັກງານຄົ້ນຄວ້າວິທະຍາສາດຫຼາຍເທື່ອ, ເດີນທາງໄປສຳຫຼວດກວດກາແລະຢ້ຽມຊົມຜົນງານດ້ານເຕັກນິກວິທະຍາສາດຢູ່ຫຼາຍທ້ອງຖິ່ນ ທັງໄດ້ຝາກຄວາມມຸ້ງຫວັງອັນແຮງກ້າໄວ້ກັບຜູ້ມີຄວາມຮູ້ຄວາມສາມາດດ້ານເຕັກນິກວິທະຍາສາດ.
ຄັນຊັ້ນ, ຄວນຕີລາຄາຜູ້ມີຄວາມຮູ້ຄວາມສາມາດແນວໃດວ່າໄດ້ມາດຕະຖານຫຼືບໍ? ຄຳເວົ້າຕອນໜຶ່ງໃນບົດປາໄສຂອງທ່ານສີຈິ້ນຜິງທີ່ກ່າວເຖິງຜູ້ມີຄວາມຮູ້ຄວາມສາມາດໃນວົງການເຕັກນິກວິທະຍາສາດໃນກອງປະຊຸມບັນດິດຂອງສະຖາບັນວິທະຍາສາດຈີນແລະສະຖາບັນວິສະວະກຳຈີນປີ2018ແມ່ນມີຄວາມໝາຍອັນເລິກເຊິ່ງຊວນໃຫ້ຄິດ.
ທ່ານສີຈິ້ນຜິງກ່າວຄຳປາໄສໃນກອງປະຊຸມບັນດິດຂອງສະຖາບັນວິທະຍາສາດຈີນແລະສະຖາບັນວິສະວະກຳຈີນປີ2018
ທ່ານສີຈິ້ນຜິງເວົ້າວ່າ: “ບັນດິດສອງສະຖາບັນຄືຊັບສົມບັດຂອງປະເທດຊາດ, ຄວາມພາກພູມໃຈຂອງປະຊາຊົນແລະກຽດສັກສີຂອງຊາດ. ເປັນເວລາດົນນານມາແລ້ວ, ນັກວິທະຍາສາດແຕ່ລະເຊັ່ນຄົນທີ່ມີນ້ຳໃຈລັດທິຮັກຊາດອັນດູດດື່ມ ໄດ້ອາໄສລະດັບວິຊາການອັນເລິກເຊິ່ງ ແລະວິໄສທັດວິທະຍາສາດອັນກວ້າງຂວາງ, ໂດຍສາມາດປະກອບສ່ວນອັນສຳຄັນຍິ່ງເພື່ອ ປະເທດຊາດແລະປະຊາຊົນ. ຜົນສຳເລັດຕ່າງໆໃນການປະດິດສ້າງດ້ານເຕັກນິກວິທະຍາສາດຂອງປະເທດຊາດແມ່ນຍາດມາໄດ້ດ້ວຍເຫື່ອແຮງແລະສະຕິປັນຍາຂອງບັນດິດສະຖາບັນວິທະຍາສາດແລະສະຖາບັນວິສະວະກຳທັງຫຼາຍ. ບັນດິດຈຳນວນຫຼວງຫຼາຍຂອງພວກເຮົາລ້ວນແຕ່ມີນ້ຳໃຈອັນສູງສົ່ງຄື “ທຸກໃຈກ່ອນປະຊາຊົນ ແລະສຸກໃຈຕາມຫຼັງປະຊາຊົນ”, ເຂົາເຈົ້າລ້ວນແຕ່ເປັນວິລະຊົນແຫ່ງຊາດທີ່ອຸທິດຕົນເຮັດພາລະກິດອັນຍິ່ງໃຫຍ່ແຕ່ປິດບັງຊື່ສຽງຢູ່ຢ່າງລຽບໆ.”
ຈາກຄຳເວົ້າຕອນນີ້ຂອງທ່ານສີຈິ້ນຜິງ, ພວກເຮົາສາມາດເຫັນໄດ້ວ່າ ວິລະຊົນແຫ່ງຊາດຈີນເຫຼົ່ານີ້ມີຈຸດພິເສດຄືກັນຫຼາຍຈຸດຄື ມີອຸດົມການອັນເດັດດ່ຽວໜຽວແໜ້ນ, ມີນ້ຳໃຈຮັກຊາດທີ່ຈິງໃຈ, ມີຈິດໃຈປະດິດສ້າງຢ່າງຫ້າວຫັນແລະມີຄວາມຮັບຜິດຊອບໂດຍບໍ່ມີການຈົ່ມວ່າແລະກິນແໜງ. ຈຸດພິເສດເຫຼົ່ານີ້ກໍແມ່ນຄຳສັ່ງສອນແລະຄວາມມຸ້ງຫວັງອັນແຮງກ້າທີ່ທ່ານສີຈິ້ນຜິງຝາກໄວ້ນຳຜູ້ມີຄວາມຮູ້ຄວາມສາມາດໃນທຸກຂະແໜງການ ທັງແມ່ນຫຼັກອ້າງອີງອັນສຳຄັນທີ່ທ່ານສີຈິ້ນຜິງໃຊ້ໃນການຕີລາຄາຜູ້ມີຄວາມຮູ້ຄວາມສາມາດປະເພດຕ່າງໆ ນັ້ນກໍຄື: ຕ້ອງຮັກຊາດ,ມີຄວາມຮັບຜິດຊອບ, ມີອຸດົມການແລະກ້າປະດິດສ້າງ.
ຄຳເຫັນ
0