ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເພື່ອເປັນການສະໜັບສະໜູນມາດຕະການທີ່ມີປະສິດທິຜົນໃນການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແລະຫຼຸດອັດຕາອາການໜັກແລະການເສຍຊີວິດຈາກການເປັນພະຍາດໃຫ້ໜ້ອຍລົງ, ຈີນໄດ້ຕັ້ງໜ້າຊຸກຍູ້ວຽກງານສັກວັກຊີນໂຄວິດ-19 ຢູ່ແຫ່ງຕ່າງໆໃນທົ່ວປະເທດມາໂດຍຕະຫຼອດ. ຫວ່າງມໍ່ໆມານີ້, ໃນຈຳນວນກຸ່ມຄົນທີ່ເຮັດວຽກຢູ່ບ່ອນມີຄວາມສ່ຽງສູງໃນຂະແໜງການຈຸດສຸມຢູ່ແຫ່ງຕ່າງໆທີ່ໄດ້ສັກວັກຊີນໂຄວິດ-19 ຄົບ 6 ເດືອນແລ້ວ, ກໍ່ໄດ້ເລີ່ມສັກວັກຊີນໂຄວິດ-19 ເຂັມທີສາມຕາມໆກັນ.
ເນື່ອງຈາກການແຜ່ລະບາດຂອງພະຍາດໂຄວິດ-19 ຢູ່ໃນໂລກ ປັດຈຸບັນຍັງສືບຕໍ່ແຜ່ລະບາດຄືເກົ່າ, ພະຍາດໂຄວິດ-19 ກາຍພັນໄດ້ແຜ່ລະບາດໄວຂຶ້ນ ໄດ້ເຮັດໃຫ້ການປ້ອງກັນການແຜ່ລະບາດຂອງພະຍາດໂຄວິດ-19 ໄດ້ຮັບຄວາມກົດດັນຢ່າງຕໍ່ເນື່ອງ, ສະນັ້ນວັກຊີນໂຄວິດ-19 ຈຶ່ງມີບົດບາດສຳຄັນຫຼາຍ. ອີງຕາມຜົນການຄົ້ນຄວ້າພາຍໃນແລະຕ່າງປະເທດສະແດງໃຫ້ເຫັນວ່າ: ວັກຊີນໂຄວິດ-19 ໄດ້ເສີມຂະຫຍາຍບົດບາດອັນໃຫຍ່ຫຼວງໃນການປ້ອງກັນບໍ່ໃຫ້ຕິດເຊື້ອແລະຫຼຸດອັດຕາການເປັນພະຍາດ. ແຕ່ວ່າ, ຫຼັງຈາກສັກວັກຊີນແລ້ວ,ເມື່ອເວລາຜ່ານໄປໄດ້ໄລຍະໃດໜຶ່ງ, ແຮງຕ້ານທານຂອງບາງຄົນໄດ້ຫຼຸດລົງ,ປະສິດທິຜົນດ້ານການປ້ອງກັນພະຍາດກໍ່ໄດ້ຫຼຸດລົງ. ແຕ່ວ່າ, ຫາກວ່າສັກວັກຊີນສອງເຂັມແລ້ວແລະໄປສັກເຂັມທີສາມອີກກໍ່ຈະມີປະສິດທິຜົນໃນການປ້ອງກັນພະຍາດທີ່ດີ. ຫຼັງຈາກສັກເຂັມທີສາມແລ້ວ, ການປ້ອງກັນຈາກສານຕ້ານທານໃຫ້ວັກຊີນແລະລະດັບສານຕ້ານທານສັງລວມໃນຮ່າງກາຍຈະຍົກສູງຂຶ້ນຫຼາຍເທົ່າຫຼືຫຼາຍສິບເທົ່າ,ໃນຂະນະດຽວກັນປະສິດທິຜົນຂອງວັກຊີນກໍ່ໄດ້ຮັບການຍົກສູງຂຶ້ນ. ກ່ຽວກັບພະຍາດໂຄວິດ-19 ກາຍພັນເດວຕາ,ເບຕາແລະອື່ນໆ, ການສັກວັກຊີນໂຄວິດ-19 ເຂັມທີ 3 ຈະມີປະສິດທິຜົນດ້ານການປ້ອງກັນພະຍາດສູງຂຶ້ນຢ່າງຫຼວງຫຼາຍ.
ແຫ່ງຕ່າງໆຂອງຈີນໄດ້ສ້າງຮົ້ວເຫຼັກເພື່ອປ້ອງກັນພະຍາດໂຄວິດ-19 ໂດຍຜ່ານການສັກວັກຊີນໂຄວິດ-19 ເຂັມທີ 3.
ໃນຂະນະດຽວກັນ, ຈີນກໍ່ຍັງສືບຕໍ່ສະໜອງວັກຊີນໂຄວິດ-19 ໃຫ້ແກ່ປະເທດອື່ນໆ. ເດືອນກັນຍາປີນີ້, ທ່ານ ສີຈິ້ນຜິງ ປະທານປະເທດຈີນໄດ້ກ່າວໃນກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດຊຸດທີ 76 ໂດຍໄດ້ເນັ້ນໜັກໃຫ້ວັກຊີນໂຄວິດ-19 ເປັນຜະລິດຕະພັນສາທາລະນະຂອງໂລກ,ເພື່ອຮັບປະກັນການແບ່ງປັນວັກຊີນໂຄວິດ-19 ໃນຂອບເຂດທົ່ວໂລກຢ່າງຍຸດຕິທຳແລະສົມເຫດສົມຜົນ; ພ້ອມດຽວກັນນັ້ນ, ຍັງໄດ້ກ່າວເນັ້ນວ່າຈີນຈະພະຍາຍາມສະໜອງວັກຊີນໂຄວິດ-19 ທັງໝົດ 2 ຕື້ຫຼອດໃຫ້ກັບຕ່າງປະເທດພາຍໃນໝົດປີນີ້,ພ້ອມທັງຈະໃຫ້ການຊ່ວຍເຫຼືອລ້າວັກຊີນໂຄວິດ-19 ອີກ 100 ລ້ານຫຼອດໃຫ້ແກ່ປະເທດພວມພັດທະນາໃນປີນີ້ບົນພື້ນຖານການບໍລິຈາກເງິນ 100 ລ້ານໂດລາສະຫະລັດໃຫ້ກັບແຜນດຳເນີນງານ ວັກຊີນໂຄວິດ-19.
ນັບມາຮອດວັນທີ 17 ຕຸລານີ້, ຈີນໄດ້ສະໜອງວັກຊີນໂຄວິດ-19 ຫຼາຍກວ່າ 1,5 ຕື້ຫຼອດໃຫ້ແກ່ 100 ກວ່າປະເທດແລະອົງການຈັດຕັ້ງສາກົນ. ວັນທີ 13 ຕຸລານີ້, ຢູ່ສະໜາມບິນສາກົນວັດໄຕທີ່ນະຄອນຫຼວງວຽງຈັນຂອງປະເທດລາວ, ທ່ານ ຈ່ຽງໄຈ້ຕົ່ງ ເອກອັກຄະລັດຖະທູດຈີນປະຈຳລາວໄດ້ຕາງໜ້າໃຫ້ລັດຖະບານຈີນມອບວັກຊີນໂຄວິດ-19 ທັງໝົດ 1 ລ້ານຫຼອດເຊິ່ງເປັນງວດທີ 6 ແລ້ວທີ່ຈີນຊ່ວຍເຫຼືອລັດຖະບານລາວພ້ອມທັງກ່າວວ່າ: ຈີນແລະລາວແມ່ນຄູ່ຮ່ວມຊາຕາກຳ,ພວກຂ້າພະເຈົ້າຍິນດີສືບຕໍ່ຖືເອົາການຊ່ວຍເຫຼືອ ຕ້ານພະຍາດໂຄວິດ-19 ໃນປະເທດລາວເປັນບຸລິມະສິດ, ຈະສຸມທຸກກຳລັງເພື່ອໃຫ້ການຊ່ວຍເຫຼືອລ້າວັກຊີນໂຄວິດ-19 ແກ່ປະເທດລາວທັງໝົດ 6,8 ລ້ານຫຼອດພາຍໃນປີນີ້, ຈະສະໜັບສະໜູນລາວບັນລຸເປົ້າໝາຍໃນການສັກວັກຊີນໂຄວິດ-19 ໃນປີນີ້ໃຫ້ເກີນຄາດໝາຍ,ເພື່ອຮ່ວມກັນສ້າງປະຊາຄົມສາທາລະນະສຸກຂອງມວນມະນຸດ.
ພະຍາດໂຄວິດ-19 ຍັງສືບຕໍ່ແຜ່ລະບາດຢູ່ໃນໂລກ,ການເອົາຊະນະໃນບັ້ນຮົບຕ້ານການແຜ່ລະບາດຂອງພະຍາດໂຄວິດ-19 ແມ່ນຄວາມມຸ່ງຫວັງອັນຮີບດ່ວນຂອງປະຊາຊົນບັນດາປະເທດ. ໂດຍຜະເຊີນໜ້າກັບການຕໍ່ສູ້ທີ່ຂ້ຽວຂາດແລະສຳຄັນທີ່ພົວພັນເຖິງອະນາຄົດແລະຊາຕາກຳຂອງມວນມະນຸດໃນປັດຈຸບັນນີ້, ຈີນໄດ້ດຳເນີນການສັກວັກຊີນໂຄວິດ-19 ເຂັມທີ 3 ຢູ່ພາຍໃນປະເທດ,ພ້ອມທັງໄດ້ສືບຕໍ່ປະຕິບັດຕາມຄຳໝັ້ນສັນຍາຂອງຕົນຢ່າງຕັ້ງໜ້າໃນການຊ່ວຍເຫຼືອວັກຊີນໂຄວິດ-19 ໃຫ້ກັບຕ່າງປະເທດ. ຈີນພວມສະແດງໃຫ້ເຫັນເຖິງນ້ຳໃຈຮັບຜິດຊອບຂອງຕົນທີ່ມີຕໍ່ສາກົນໃນການປ້ອງກັນພະຍາດໂຄວິດ-19 ທັງຊ່ວຍຮັກສາສຸຂະພາບແລະຄວາມປອດໄພຂອງມວນມະນຸດຢ່າງຕັ້ງໜ້າ.
ຄຳເຫັນ
0