ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 1 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ປະກອບຄຳເຫັນທາງລາຍລັກອັກສອນຕໍ່ກອງປະຊຸມສຸດຍອດໂລກ ຂອງກອງປະຊຸມຜູ້ນຳປະເທດພາຄີໃນສົນທິສັນຍາຂອບສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 26.
ທ່ານສີຈິ້ນຜິງຊີ້ອອກວ່າ, ປະຈຸບັນ, ຜົນກະທົບທາງລົບຈາກການປ່ຽນແປງຂອງດິນຟ້າອາກາດໄດ້ພົ້ນເດັ່ນຂຶ້ນຊູ່ມື້, ການເຄື່ອນໄຫວອັນຮີບດ່ວນຂອງທົ່ວໂລກໄດ້ເພີ່ມຂຶ້ນຢ່າງຕໍ່ເນື່ອງ. ການເຮັດແນວໃດຈຶ່ງຈະສາມາດຮັບມືກັບການປ່ຽນແປງຂອງດິນຟ້າອາກາດ, ຊຸກຍູ້ການຟື້ນຟູເສດຖະກິດໂລກ, ແມ່ນຫົວຂໍ້ຂອງຍຸກສະໄໝທີ່ພວກເຮົາພວມປະເຊີນຢູ່.
ທ່ານສີຈິ້ນຜິງໄດ້ມີຂໍ້ສະເໜີ 3 ຂໍ້, ຄື: ໜຶ່ງ, ຮັກສາຄວາມເຫັນທີ່ເປັນເອກກະພາບກັນຂອງຫຼາຍຝ່າຍ. “ສົນທິສັນຍາໃນຂອບສປຊ ກ່ຽວກັບການປ່ຽນແປງຂອງດິນຟ້າອາກາດ” ແລະ “ສັນຍາປາຣີ” ແມ່ນຫຼັກການພື້ນຖານຂອງກົດໝາຍທີ່ປະຊາຄົມໂລກຮ່ວມມືກັນໃນການຮັບມືກັບການປ່ຽນແປງຂອງດິນຟ້າອາກາດ. ສອງ, ສຸມໃສ່ການປະຕິບັດງານຕົວຈິງ. ຝ່າຍຕ່າງໆຄວນເຄົາລົບ ແລະ ປະຕິບັດຕາມຄຳໝັ້ນສັນຍາ, ກຳນົດເປົ້າໝາຍ ແລະ ວິໄສທັດທີ່ຕິດແທດຕົວຈິງ ແລະ ມີຄວາມເປັນໄປໄດ້, ສຸມທຸກຄວາມພະຍາຍາມຢ່າງສຸດຄວາມສາມາດຕາມສະພາບຄວາມເປັນຈິງຂອງປະເທດຕົນ, ຊຸກຍູ້ການຈັດຕັ້ງປະຕິບັດມາດຕະການ ຮັບມືກັບການປ່ຽນແປງຂອງດິນຟ້າອາກາດ. ປະເທດທີ່ພັດທະນາແລ້ວບໍ່ພຽງແຕ່ຕ້ອງປະຕິບັດໜ້າທີ່ວຽກງານຂອງຕົນໃຫ້ຫຼາຍເທົ່ານັ້ນ, ຍັງຄວນໃຫ້ການສະໜັບສະໜູນທີ່ດີກວ່າເກົ່າແກ່ປະເທດພວມພັດທະນາ. ສາມ, ເລັ່ງລັດການຫັນປ່ຽນຮູບແບບການພັດທະນາຕາມທິດສີຂຽວ. ຕ້ອງຖືການປະດິດສ້າງໃໝ່ດ້ານວິທະຍາສາດເຕັກໂນໂລຊີເປັນແຮງຂັບເຄື່ອນ, ຊຸກຍູ້ການຫັນປ່ຽນ ແລະ ຍົກລະດັບ ຊັບພະຍາກອນດ້ານພະລັງງານ, ໂຄງປະກອບອຸດສາຫະກຳ ແລະ ໂຄງປະກອບການບໍລິໂພກ, ຊຸກຍູ້ໃຫ້ເສດຖະກິດສັງຄົມພັດທະນາຕາມທິດສີຂຽວ, ຄົ້ນຄວ້າຊ່ອງທາງໃໝ່ທີ່ປະສານສົມທົບການພັດທະນາ ແລະ ການອະນຸລັກ.
ກອງປະຊຸມສຸດຍອດຜູ້ນຳໂລກໄດ້ຈັດຂຶ້ນໃນໄລຍະດຳເນີນກອງປະຊຸມປະເທດພາຄີໃນ “ສົນທິສັນຍາຂອບສປຊ ກ່ຽວກັບການປ່ຽນແປງຂອງດິນຟ້າອາກາດ” ຄັ້ງທີ 26 ຢູ່ນະຄອນກຼາສໂກປະເທດອັງກິດແຕ່ວັນທີ 1 ຫາ ວັນທີ 2 ພະຈິກນີ້.
ຄຳເຫັນ
0