ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ມະຫາວິທະຍາໄລຈອນສ໌ ຮອບກິນສ໌ ຂອງອາເມຣິກາໄດ້ເປີດເຜີຍຕົວເລກສະຖິຕິຫຼ້າສຸດກ່ຽວກັບການແຜ່ລະບາດຂອງພະຍາດໂຄວິດ-19 ໃນວັນທີ 1 ພະຈິກນີ້ໂດຍສະແດງໃຫ້ເຫັນວ່າ: ຈຳນວນຜູ້ເສຍຊີວິດແລ້ວຍ້ອນເປັນພະຍາດໂຄວິດ-19 ຢູ່ໃນໂລກມີຫຼາຍກວ່າ 5 ລ້ານຄົນ. ນີ້ແມ່ນເລື່ອງທີ່ໜ້າເຈັບແສບທີ່ສຸດເລື່ອງໜຶ່ງ. ມັນໄດ້ເຕືອນໃຫ້ຊາວໂລກຮ່ວມແຮງຮ່ວມໃຈກັນຕໍ່ສູ້ກັບພະຍາດໂຄວິດ-19 ທີ່ເປັນສັດຕູຮ່ວມທີ່ອັນຕະລາຍແລະມີຄວາມສະຫຼາດອີກເທື່ອໜຶ່ງ,ປະຊາຄົມໂລກຕ້ອງເພີ່ມທະວີການຮ່ວມມືແລະຄວາມສາມັກຄີກັນ,ໃຊ້ການກະທຳທີ່ເຂັ້ມແຂງກວ່າເກົ່າ,ຈຶ່ງຈະເຮັດໃຫ້ການຕ້ານກັບພະຍາດໂຄວິດ-19 ໄດ້ຮັບໄຊຊະນະໃນທີ່ສຸດ.
ໃນ 1 ປີກວ່າທີ່ຜ່ານມາ, ຈີນໄດ້ຍຶດໝັ້ນການຖືເອົາປະຊາຊົນແລະຊີວິດຢູ່ເໜືອທຸກສິ່ງທຸກຢ່າງ, ປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢ່າງຖືກຕ້ອງແມ່ນຢຳແລະປະສານງານກັນໂດຍເຄື່ອນໄຫວເປັນແບບປົກກະຕິແລະຮັບມືສຸກເສີນ, ໄດ້ປະສານສົມທົບການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ກັບການພັດທະນາເສດຖະກິດສັງຄົມ,ນຳໜ້າໂລກໃນການຄວບຄຸມການແຜ່ລະບາດຂອງພະຍາດໂຄວິດ-19,ນຳໜ້າຟື້ນຟູການຜະລິດແລະການເຮັດວຽກ,ນຳໜ້າການບັນລຸເປົ້າໝາຍການເຕີບໂຕທາງດ້ານເສດຖະກິດຈາກຕົວເລກລົບເປັນຕົວເລກບວກແລະອື່ນໆ. ພ້ອມດຽວກັນນີ້, ຈີນໄດ້ຕັ້ງໜ້າສະໜອງແຜນການຮັບມືດ້ານມະນຸດສະທຳຂອງໂລກທີ່ອົງການສະຫະປະຊາຊາດລິເລີ່ມ, ໄດ້ໃຫ້ການຊ່ວຍເຫຼືອວັດຖຸແລະອຸປະກອນໃຫ້ແກ່ 150 ກວ່າປະເທດແລະອົງການຈັດຕັ້ງສາກົນ,ໄດ້ສົ່ງອອກວັດຖຸແລະອຸປະກອນປ້ອງກັນພະຍາດໂຄວິດ-19 ໃຫ້ແກ່ 200 ກວ່າປະເທດແລະເຂດແຄວ້ນ,ໄດ້ສະໜອງຜ້າປິດປາກ 320 ກວ່າຕື້ອັນແລະຊຸດປ້ອງກັນພະຍາດ 3,9 ຕື້ຊຸດແລະນ້ຳຢາກວດຫາເຊື້ອໄວຣັດໂຄວິດ-19 ທັງໝົດ 5,6 ຕື້ຊຸດ. ການຂົນສົ່ງວັດຖຸອຸປະກອນສຸກເສີນອີກແລ້ວອີກຕື່ມ,ການຮ່ວມແຮງຮ່ວມໃຈກັນອີກແລ້ວອີກຕື່ມຂອງໂລກບໍ່ພຽງແຕ່ໄດ້ມອບຄວາມອົບອຸ່ນຈາກການຊ່ວຍເຫຼືອເຊິ່ງກັນແລະກັນເທົ່ານັ້ນ,ຫາກຍັງໄດ້ສ້າງຄວາມໝັ້ນໃຈໃຫ້ກັບໂລກໃນການເອົາຊະນະການແຜ່ລະບາດຂອງພະຍາດໂຄວິດ-19 ອີກດ້ວຍ.
ວັກຊີນໂຄວິດ-19 ແມ່ນອາວຸດທີ່ເຂັ້ມແຂງທີ່ສຸດໃນການເອົາຊະນະການແຜ່ລະບາດຂອງພະຍາດໂຄວິດ-19. ແຕ່ປະເທດທີ່ພັດທະນາແລ້ວຈຳນວນໜຶ່ງໄດ້ປະຕິບັດຕາມ “ລັດທິຊາດນິຍົມດ້ານວັກຊີນໂຄວິດ-19”, ໄດ້ກັກຕູນວັກຊີນຫຼາຍເກີນກວ່າຄວາມຕ້ອງການຂອງຕົນ,ສົ່ງຜົນເຮັດໃຫ້ປະເທດພວມພັດທະນາຂາດແຄນວັກຊີນໂຄວິດ-19,ເຮັດໃຫ້ອັດຕາການສັກວັກຊີນໂຄວິດ-19 ຢູ່ໃນລະດັບຕ່ຳ.
ປັດຈຸບັນ, ຈີນໄດ້ສະໜອງວັກຊີນໂຄວິດ-19 ຫຼາຍກວ່າ 1,6 ຕື້ຫຼອດໃຫ້ກັບ 100 ກວ່າປະເທດແລະອົງການຈັດຕັ້ງສາກົນ, ໃນໝົດປີນີ້ຈະສະໜອງວັກຊີນໃຫ້ກັບໂລກໃຫ້ໄດ້ຫຼາຍກວ່າ 2 ຕື້ຫຼອດ. ຈີນພວມດຳເນີນການຮ່ວມມືດ້ານການຜະລິດວັກຊີນໂຄວິດ-19 ກັບ 16 ປະເທດ,ຍັງໄດ້ຮ່ວມກັບ 30 ປະເທດສ້າງຂໍ້ລິເລີ່ມການພົວພັນຄູ່ຮ່ວມມືວັກຊີນໂຄວິດ-19 “ໜຶ່ງແລວໜຶ່ງເສັ້ນທາງ”. ວັນທີ 30 ຕຸລາຜ່ານມາ, ທ່ານ ສີຈິ້ນຜິງ ປະທານປະເທດຈີນຍັງໄດ້ເຂົ້າຮ່ວມກອງປະຊຸມໄລຍະທີໜຶ່ງຂອງກອງປະຊຸມສຸດຍອດຜູ້ນຳກຸ່ມ 20 ປະເທດຫຼື G20 ຄັ້ງທີ 16 ໂດຍຜ່ານທາງວິດີໂອພ້ອມທັງກ່າວຄຳປາໄສທີ່ສຳຄັນໂດຍທ່ານກ່າວເນັ້ນໜັກວ່າ: ຈີນຍິນດີຮ່ວມກັບບັນດາຝ່າຍພະຍາຍາມຍົກສູງອັດຕາການໃຊ້ວັກຊີນໂຄວິດ-19 ແລະຄວາມສາມາດເຂົ້າເຖິງວັກຊີນແລະຄວາມສາມາດຊື້ວັກຊີນຂອງປະເທດພວມພັດທະນາ,ເພື່ອປະກອບສ່ວນຢ່າງຕັ້ງໜ້າເຂົ້າໃນການສ້າງກຳແພງປ້ອງກັນດ້ານວັກຊີນໂຄວິດ-19 ໃຫ້ກັບໂລກ.
ປັດຈຸບັນ, ວິສາຫະກິດວັກຊີນຂອງຈີນໄດ້ດຳເນີນການຮ່ວມມືຜະລິດວັກຊີນຢູ່ຫຼາຍປະເທດເຊັ່ນ: ສະຫະລັດອາຣັບເອມີເຣດ, ອິນໂດເນເຊຍ, ມາເລເຊຍ, ເອຢິບ,ບຣາຊີນແລະປະເທດອື່ນໆ.
ທ່ານ ເຕໂດຣສ໌ ອັດຮາໂນມ ເກເບຣເຢຊຸສ ຜູ້ອຳນວຍການໃຫຍ່ອົງການອະນາໄມໂລກກ່າວວ່າ: “ປະສົບການຂອງຈີນໃນການຕ້ານກັບພະຍາດໂຄວິດ-19 ໄດ້ສະແດງໃຫ້ເຫັນທ່າແຮງດ້ານລະບອບຂອງຈີນ.” ມາດຕະການທີ່ເຂັ້ມແຂງຂອງຈີນບໍ່ພຽງແຕ່ສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄດ້ໃນຂອບເຂດທົ່ວປະເທດຈີນເທົ່ານັ້ນ,ຍັງຊ່ວຍສະກັດກັ້ນພະຍາດບໍ່ໃຫ້ແຜ່ລາມໄປສູ່ປະເທດອື່ນອີກດ້ວຍ,ເຊິ່ງບໍ່ພຽງແຕ່ໄດ້ປ້ອງກັນປະຊາຊົນພາຍໃນປະເທດຕົນເທົ່ານັ້ນ,ຫາກຍັງໄດ້ຊ່ວຍປ້ອງກັນຊາວໂລກນຳອີກ.
ພະຍາດໂຄວິດ-19 ຍັງສືບຕໍ່ແຜ່ລະບາດຢູ່ໃນໂລກ, ສັງຄົມມະນຸດໄດ້ເກີດມີການປ່ຽນແປງຢ່າງເລິກເຊິ່ງ. ໂດຍຜະເຊີນໜ້າກັບທ່ວງທ່າດ້ານການຕ້ານກັບພະຍາດໂຄວິດ-19 ຂອງໂລກທີ່ຂ້ຽວຂາດ, ປະເທດໃຫຍ່ຕ້ອງເປັນແບບຢ່າງເພື່ອສະໜອງວັກຊີນໂຄວິດ-19 ແລະຜະລິດຕະພັນສາທາລະນະອື່ນໆໃຫ້ຫຼາຍກວ່າເກົ່າ; ບັນດາປະເທດຕ້ອງຮ່ວມແຮງຮ່ວມໃຈກັນຕ້ານພະຍາດໂຄວິດ-19,ຕໍ່ສູ້ກັບພະຍາດແບບຄຽງບ່າຄຽງໄຫຼ່ກັນເພື່ອຊຸກຍູ້ການສ້າງປະຊາຄົມຮ່ວມສາທາລະນະສຸກຂອງມວນມະນຸດ. ນີ້ແມ່ນທາງເລືອກທີ່ຖືກຕ້ອງພຽງໜຶ່ງດຽວຂອງມວນມະນຸດໃນການເອົາຊະນະການແຜ່ລະບາດຂອງພະຍາດໂຄວິດ-19.
ຄຳເຫັນ
0