ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ປະຊາຊົນຈີນແລະປະຊາຊົນທົ່ວໂລກຮ່ວມກັນເປັນສັກຂີພິຍານຂອງເຫດການສຳຄັນຕ່າງໆຂອງງານກິລາໂອລິມປິກລະດູໜາວປັກກິ່ງຄື: ໄຟສັກສິດງານກິລາໂອລິມປິກລະດູໜາວສົ່ງມາຮອດນະຄອນຫຼວງປັກກິ່ງ, ງານກິລາໂອລິມປິກລະດູໜາວປັກກິ່ງນັບຖອຍຫຼັງ 100 ມື້, ຊຸດກິລາແລະຫຼຽນລາງວັນຂອງງານກິລາໂອລິມປິກລະດູໜາວປັກກິ່ງແລະງານກິລາໂອລິມປິກຄົນພິການລະດູໜາວປັກກິ່ງໄດ້ເປີດເຜີຍຢ່າງເປັນທາງການແລະອື່ນໆ. ປັດຈຸບັນ, ການແຂ່ງຂັນແບບທົດລອງຂອງງານກິລາໂອລິມປິກລະດູໜາວປັກກິ່ງແລະງານກິລາໂອລິມປິກຄົນພິການລະດູໜາວປັກກິ່ງພວມດຳເນີນຢູ່ປັກກິ່ງ, ຢຽນຊິ້ງແລະຈ່າງເຈ່ຍໂຂວເຊິ່ງເປັນເຂດການແຂ່ງຂັນສາມແຫ່ງຂອງງານກິລາໂອລິມປິກຄັ້ງນີ້, ງານກິລາໂອລິມປິກລະດູໜາວໄດ້ກ້າວເຂົ້າສູ່ເວລາປັກກິ່ງແລ້ວ.
ຄຽງຄູ່ກັບງານກິລາໂອລິມປິກລະດູໜາວປັກກິ່ງ 2022 ໄດ້ຫຍັບໃກ້ເຂົ້າມາ, ຈີນຈະປ້ອງກັນພະຍາດໂຄວິດ-19 ແນວໃດໄດ້ກາຍເປັນຈຸດສຸມຂອງປະຊາຄົມໂລກ. ວັນທີ 25 ຕຸລານີ້, ຄະນະກຳມະການໂອລິມປິກສາກົນ, ຄະນະກຳມະການໂອລິມປິກຄົນພິການສາກົນແລະຄະນະກຳມະການຈັດຕັ້ງງານກິລາໂອລິມປິກລະດູໜາວປັກກິ່ງໄດ້ຮ່ວມກັນເປີດເຜີຍ “ຄູ່ມືປ້ອງກັນພະຍາດໂຄວິດ-19 ໃນໄລຍະຈັດງານກິລາໂອລິມປິກລະດູໜາວປັກກິ່ງແລະງານກິລາໂອລິມປິກຄົນພິການລະດູໜາວປັກກິ່ງປີ 2022” ສະບັບທຳອິດ. ຄູ່ມືປ້ອງກັນພະຍາດໂຄວິດ-19 ດັ່ງກ່າວລະບຸວ່າງານກິລາໂອລິມປິກລະດູໜາວຄັ້ງນີ້ຈະດຳເນີນການແຂ່ງຂັນແບບວົງປິດ. ພາຍຫຼັງເດີນທາງເຂົ້າເມືອງຈີນແລ້ວ, ນັກກິລາແລະເຈົ້າໜ້າທີ່ທີ່ໄດ້ສັກວັກຊີນໂຄວິດ-19 ຄົບສອງເຂັມຈະເຂົ້າສູ່ສະຖານທີ່ວົງປິດໂດຍກົງ, ບໍ່ຕ້ອງກັກບໍລິເວນ, ສ່ວນຜູ້ທີ່ບໍ່ໄດ້ສັກວັກຊີນຫຼືວ່າສັກວັກຊີງພຽງໜຶ່ງເຂັມນັ້ນຕ້ອງກັກບໍລິເວນທີ່ເປັນໄລຍະ 21 ວັນ.
ສ່ວນການຄວບຄຸມແບບວົງປິດ, ໝາຍຄວາມວ່າໃນໄລຍະຈັດງານກິລາໂອລິມປິກລະດູໜາວປັກກິ່ງແລະງານກິລາໂອລິມປິກຄົນພິການລະດູໜາວປັກກິ່ງ, ສະຖານທີ່ຕ່າງໆທີ່ກ່ຽວກັບງານກິລາໂອລິມປິກລະດູໜາວປັກກິ່ງຈະເຊື່ອມຕໍ່ກັນດ້ວຍພາຫະນະ, ແລ້ວກາຍເປັນເຂດປິດລ້ອມແລະແຍກອອກກັນກັບສະຖານທີ່ອື່ນໆ.
ເພື່ອຮັບປະກັນໃຫ້ຈັດງານກິລາໂອລິມປິກລະດູໜາວປັກກິ່ງຢ່າງສະດວກ, ເຈົ້າໜ້າທີ່ທີ່ເຮັດວຽກງານກ່ຽວກັບງານກິລາໂອລິມປິກລະດູໜາວແລະງານກິລາໂອລິມປິກຄົນພິການລະດູໜາວປັກກິ່ງແລະນັກກິລາຈີນລ້ວນແຕ່ຕ້ອງສັກວັກຊີນເຂັມທີ 3, ສ່ວນນັກກິລາແລະເຈົ້າໜ້າທີ່ຕ່າງປະເທດ, ໃຫ້“ສົ່ງເສີມສັກວັກຊີນເຂັມທີ 3 ແຕ່ບໍ່ເປັນເລື່ອງບັງຄັບ”. ນອກນີ້, ຈີນຈະໃຫ້ການບໍລິການກວດນິວຄະເລອິກຕະຫຼອດ 24 ຊົ່ວໂມງໃຫ້ແກ່ນັກກິລາແລະເຈົ້າໜ້າທີ່ຕ່າງປະເທດ, ນັກກິລາບໍ່ຕ້ອງເປັນຫ່ວງວ່າຈະມີຜົນກະທົບຕໍ່ການຝຶກອົບຮົມກ່ອນເຂົ້າຮ່ວມການແຂ່ງຂັນແລະເຂົ້າຮ່ວມການແຂ່ງຂັນຢ່າງເປັນທາງການ.
ຖ້າວ່າໃນໄລຍະຈັດງານກິລາໂອລິມປິກລະດູໜາວໄດ້ເກີດມີການແຜ່ລະບາດຂອງພະຍາດແລ້ວຈະເຮັດແນວໃດ? ທ່ານຫວງຊົນ ຮອງຫົວໜ້າຫ້ອງການວຽກງານປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຂອງຄະນະກຳມະການຈັດງານກິລາໂອລິມປິກລະດູໜາວປັກກິ່ງ ກ່າວວ່າ: ເຖິງວ່າບໍ່ຢາກເກີດມີການແຜ່ລະບາດຂອງພະຍາດໂຄວິດ-19, ແຕ່ວ່າຄະນະກຳມະການຈັດງານກິລາໂອລິມປິກລະດູໜາວປັກກິ່ງໄດ້ກຽມພ້ອມແລ້ວ, ເພື່ອຮັບປະກັນບໍ່ໃຫ້ການແຂ່ງຂັນຂາດສະບັ້ນໄປ, ບໍ່ໃຫ້ເກີດສະພາບການແຜ່ລະບາດຂອງພະຍາດໂຄວິດ-19 ຂະໜາດໃຫຍ່, ບໍ່ໃຫ້ເຂດວົງປິດຖືກທຳລາຍແລະບໍ່ໃຫ້ເກີດເຫດການສາທາລະນະອື່ນໆນອກຈາກການແຜ່ລະບາດຂອງພະຍາດແມ່ນເປົ້າໝາຍຂອງຄະນະກຳມະການຈັດງານກິລາໂອລິມປິກລະດູໜາວປັກກິ່ງ.
ວຽກງານກະກຽມຂອງງານກິລາໂອລິມປິກລະດູໜາວປັກກິ່ງໄດ້ຮັບຄວາມສົນໃຈຢ່າງສູງແລະການສະໜັບສະໜູນຢ່າງກວ້າງຂວາງຈາກປະຊາຄົມໂລກ. ຖະແຫຼງການຮ່ວມຂອງກອງປະຊຸມສຸດຍອດກຸ່ມ 20 ປະເທດທີ່ຈັດຂຶ້ນຢູ່ນະຄອນວຽນໄດ້ສະແດງໃຫ້ເຫັນຄວາມຄ່ອງຄອຍຕໍ່ງານກິລາໂອລິມປິກລະດູໜາວແລະງານກິລາໂອລິມປິກຄົນພິການລະດູໜາວປັກກິ່ງ: “ຈີນກຽມພ້ອມແລ້ວຈະຈັດງານກິລາໂອລິມປິກລະດູໜາວແບບປະຢັດ, ມີຄວາມປອດໄພແລະໜ້າຊົມ, ພວກເຮົາຈົ່ງຮ່ວມກັນໃຫ້ກຳລັງໃຈກັບນັກກິລາທັງຫຼາຍຂອງປະເທດຕ່າງໆ, ແລະຮ່ວມກັນມຸ່ງໜ້າໄປສູ່ອະນາຄົດ.”
ຄຳເຫັນ
0