ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 22 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມ ແລະເປັນປະທານພິທີສະເຫຼີມສະຫຼອງການສ້າງຕັ້ງສາຍພົວພັນຄູ່ເຈລະຈາຈີນ-ອາຊຽນ ຄົບຮອບ 30 ປີ. ທ່ານສີຈິ້ນຜິງກ່າວເນັ້ນວ່າ: “ມື້ນີ້, ພວກເຮົາຈະປະກາດການສ້າງສາຍພົວພັນຄູ່ຮ່ວມຍຸດທະສາດຮອບດ້ານຈີນ-ອາຊຽນຢ່າງເປັນທາງການ. ນີ້ແມ່ນຂີດໝາຍອັນໃໝ່ໃນປະຫວັດສາດການພົວພັນລະຫວ່າງສອງຝ່າຍ, ຈະເພີ່ມກຳລັງຂັບເຄື່ອນອັນໃໝ່ໃຫ້ກັບສັນຕິພາບ, ສະຖຽນລະພາບແລະການພັດທະນາເພື່ອສ້າງຄວາມຈະເລີນຮຸ່ງເຮືອງຂອງພາກພື້ນກໍຄືຂອງໂລກ.”
ທ່ານສີຈິ້ນຜິງກ່າວວ່າ: ໃນໄລຍະ 30 ປີທີ່ຈີນແລະອາຊຽນສ້າງຕັ້ງສາຍພົວພັນຄູ່ເຈລະຈາມານີ້ ເປັນຂະບວນການທີ່ບໍ່ທຳມະດາ. 30 ປີຜ່ານມາ ແມ່ນ 30 ປີທີ່ເສດຖະກິດໂລກາພິວັດໄດ້ພັດທະນາເຂົ້າສູ່ລວງເລິກ ແລະສະພາບການສາກົນໄດ້ມີການປ່ຽນແປງຢ່າງເລິກເຊິ່ງ, ແມ່ນ 30 ປີທີ່ຈີນແລະອາຊຽນໄດ້ກຳແໜ້ນໂອກາດຂອງຍຸກສະໄໝ ແລະໄດ້ບັນລຸການຂະຫຍາຍສາຍພົວພັນລະຫວ່າງສອງຝ່າຍແບບກ້າວກະໂດດຂັ້ນ. ພວກເຮົາໄດ້ຜ່ານພົ້ນອອກຈາກເງົາມືດຂອງສົງຄາມເຢັນ, ຮ່ວມກັນຮັກສາສະຖຽນລະພາບຂອງພາກພື້ນ. ພວກເຮົາໄດ້ນຳພາໃຫ້ເສດຖະກິດອາຊີຕາເວັນອອກເຊື່ອມໂຍງເຂົ້າເປັນອັນໜຶ່ງອັນດຽວກັນ, ຊຸກຍູ້ການພັດທະນາເພື່ອສ້າງຄວາມຈະເລີນຮຸ່ງເຮືອງຮ່ວມກັນ ເຊິ່ງໄດ້ເຮັດໃຫ້ປະຊາຊົນຫຼາຍ ກວ່າ 2 ຕື້ຄົນມີຊີວິດການເປັນຢູ່ທີ່ດີຂຶ້ນກວ່າເກົ່າ. ພວກເຮົາໄດ້ເດີນຕາມເສັ້ນທາງທີ່ສະຫວ່າງສະໄຫວບົນຈິດໃຈມິດຕະພາບຖານບ້ານໃກ້ເຮືອນຄຽງ ແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະກ້າວໄປສູ່ການສ້າງປະຊາຄົມຮ່ວມຊາຕາກຳທີ່ນັບມື້ນັບແໜ້ນແຟ້ນຂຶ້ນກວ່າເກົ່າ ເຊິ່ງໄດ້ປະກອບສ່ວນອັນສຳຄັນເຂົ້າໃນການຊຸກຍູ້ພາລະກິດຄວາມກ້າວໜ້າຂອງມວນມະນຸດ.
ທ່ານສີຈິ້ນຜິງຊີ້ອອກວ່າ: ຜົນງານການຮ່ວມມືລະຫວ່າງຈີນ-ອາຊຽນໃນ 30 ປີມານີ້ ແມ່ນເກີດຈາກເງື່ອນໄຂທີ່ເປັນເອກະລັກພິເສດ ຄື: ມີທີ່ຕັ້ງທາງພູມສາດທີ່ໃກ້ກັນ ແລະມີວັດທະນະທຳທີ່ຄ້າຍຄືກັນ, ຍິ່ງບໍ່ສາມາດປາສະຈາກໄດ້ວ່າ: ພວກເຮົາໄດ້ເດີນໄປຕາມກະແສການພັດທະນາຂອງຍຸກສະໄໝຢ່າງຕັ້ງໜ້າ ແລະມີການຕົກລົງທາງປະຫວັດສາດທີ່ຖືກຕ້ອງ ນັ້ນກໍຄື: ໜຶ່ງ, ເຄົາລົບເຊິ່ງກັນແລະກັນ, ຍຶດໝັ້ນໃນຫຼັກການພື້ນຖານຂອງການພົວພັນສາກົນ; ສອງ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ເດີນຕາມເສັ້ນທາງການພັດທະນາໂດຍສັນຕິ; ສາມ, ຊ່ວຍເຫຼືອເຊິ່ງກັນແລະກັນ, ປະຕິບັດຕາມແນວຄວາມຄິດທີ່ເປັນມິດຕໍ່ກັນ, ຈິງໃຈຕໍ່ກັນ, ສ້າງຜົນປະໂຫຍດໃຫ້ແກ່ກັນ ແລະ ກວມລວມ; ສີ່, ມີສ່ວນຮ່ວມແລະຖອດຖອນບົດຮຽນເຊິ່ງກັນແລະກັນ, ຮ່ວມກັນສ້າງລັດທິພາກພື້ນທີ່ເປີດປະຕູ.
ທ່ານສີຈິ້ນຜິງກ່າວເນັ້ນວ່າ: ບົດຮຽນອັນລ້ຳຄ່າໃນ 30 ປີທີ່ຜ່ານມາແມ່ນຊັບສົມບັດຮ່ວມຂອງຈີນແລະອາຊຽນ, ໄດ້ເປັນພື້ນຖານແລະຫຼັກການໃຫ້ແກ່ສອງຝ່າຍໃນການພັດທະນາການພົວພັນຄູ່ຮ່ວມຍຸດທະສາດຮອບດ້ານ. ພວກເຮົາຄວນຖະໜຸຖະໜອມ, ຍຶດໝັ້ນຢ່າງຖາວອນ ແລະພັດທະນາໃຫ້ມີຄວາມອຸດົມສົມບູນຫຼາຍຂຶ້ນຢ່າງບໍ່ຢຸດຢັ້ງໃນພຶດຕິກຳຕົວຈິງຄັ້ງໃໝ່.
ທ່ານສີຈິ້ນຜິງກ່າວເນັ້ນວ່າ: “ເສັ້ນທາງພິສູດມ້າ, ການເວລາພິສູດຄົນ.” ໃນອະດີດ, ປະຈຸບັນນີ້ ແລະ ອະນາຄົດ ຈີນຈະເປັນປະເທດບ້ານໃກ້ເຮືອນຄຽງທີ່ດີ ເພື່ອນມິດທີ່ດີ ແລະ ໝູ່ຄູ່ທີ່ດີຂອງອາຊຽນຕະຫຼອດໄປ. ຈີນຈະສືບຕໍ່ຍຶດໝັ້ນການຖືເອົາອາຊຽນເປັນບຸລິມະສິດໃນວຽກງານການຕ່າງປະເທດກັບປະເທດໃກ້ຄຽງຢ່າງເດັດດ່ຽວໜຽວແໜ້ນ, ສະໜັບສະໜູນຄວາມສາມັກຄີຂອງອາຊຽນ ແລະ ການສ້າງປະຊາຄົມອາຊຽນຢ່າງເດັດດ່ຽວໜຽວແໜ້ນ, ສະໜັບສະໜູນຖານະໃຈກາງຂອງອາຊຽນໃນໂຄງປະກອບພາກພື້ນຢ່າງເດັດດ່ຽວໜຽວແໜ້ນ, ສະໜັບສະໜູນອາຊຽນເສີມຂະຫຍາຍບົດບາດອັນໃຫຍ່ຫຼວງກວ່າເກົ່າໃນວຽກງານພາກພື້ນ ແລະ ສາກົນຢ່າງເດັດດ່ຽວໜຽວແໜ້ນ.
ທ່ານສີຈິ້ນຜິງຊີ້ອອກວ່າ, ການພັດທະນາຂອງຈີນຈະນຳເອົາໂອກາດຫຼາຍ ກວ່າເກົ່າ, ເພີ່ມແຮງຂັບເຄື່ອນທີ່ເຂັ້ມແຂງກວ່າເກົ່າໃຫ້ພາກພື້ນ ແລະ ທົ່ວໂລກ. ຈີນຍິນດີຮ່ວມກັບອາຊຽນກຳແໜ້ນທ່າອ່ຽງລວມ, ລຶບລ້າງອຸປະສັກ, ຮ່ວມກັນຊົມໃຊ້ໂອກາດ, ແລະຮ່ວມກັນສ້າງຄວາມສິວິໄລ, ຈັດຕັ້ງປະຕິບັດການພົວພັນປະຊາຄົມຮ່ວມຍຸດທະສາດຮອບດ້ານຢ່າງແທ້ຈິງ, ຢ່ວງບາດກ້າວອັນໃໝ່ໄປສູ່ການສ້າງຄູ່ຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ຮ່ວມກັນສ້າງບ້ານເມືອງແຫ່ງສັນຕິພາບ ສະຫງົບ ສິວິໄລ ສວຍງາມ ແລະ ມີໄມຕີຈິດມິດຕະພາບ.
ທ່ານສີຈິ້ນຜິງກ່າວຕື່ມວ່າ, ສັນຕິພາບແມ່ນຜົນປະໂຫຍດຮ່ວມໃຫຍ່ທີ່ສຸດຂອງພວກເຮົາ, ກໍແມ່ນຄວາມມຸ່ງຫວັງໃຫຍ່ທີ່ສຸດຮ່ວມກັນຂອງປະຊາຊົນບັນດາປະເທດ. ພວກເຮົາຕ້ອງເປັນຜູ້ສ້າງສາ ແລະ ຜູ້ປົກປັກຮັກສາສັນຕິພາບຂອງພາກພື້ນ, ຍຶດໝັ້ນການສົນທະນາກັນ ແຕ່ບໍ່ເປັນປໍລະປັກກັນ, ເປັນຄູ່ຮ່ວມມື ແຕ່ບໍ່ຮ່ວມກຸ່ມ, ຮ່ວມກັນຮັບມືກັບປັດໄຈດ້ານລົບຊະນິດຕ່າງໆທີ່ເປັນໄພຂົ່ມຂູ່ ແລະ ທຳລາຍສັນຕິພາບ. ພວກເຮົາຕ້ອງປະຕິບັດຕາມລັດທິຫຼາຍຝ່າຍທີ່ແທ້ຈິງ, ຍຶດໝັ້ນໃນຫຼັກການທີ່ຄົນທັງຫຼາຍປຶກສາຫາລືກັນໃນການປະຕິບັດວຽກງານຂອງສາກົນ ແລະ ພາກພື້ນ. ຈີນເດັດດ່ຽວຄັດຄ້ານລັດທິເຈົ້າອຳນາດ ແລະ ການເມືອງມະຫາອຳນາດ, ຈີນຍິນດີເປັນມິດກັບປະເທດໃກ້ຄຽງເປັນໄລຍະຍາວນານ, ຮ່ວມກັນຮັກສາສັນຕິພາບອັນຖາວອນຂອງພາກພື້ນ, ເດັດຂາດຈະບໍ່ສະແຫວງຫາການເປັນເຈົ້າອຳນາດ, ແຮ່ງຈະບໍ່ຂົ່ມເຫັງປະເທດນ້ອຍຢ່າງເດັດຂາດ.
ທ່ານສີຈິ້ນຜິງຊີ້ອອກວ່າ, ຄົນບູຮານຈີນເວົ້າວ່າ “ການວາງແຜນທີ່ຖືກຕ້ອງກັບຄວາມເປັນທຳຈະສາມາດບັນລຸຜົນເປັນຈິງໄດ້ຢ່າງແນ່ນອນ, ການດຳເນີນງານຢ່າງສອດຄ່ອງກັບຄວາມປາຖະໜາຂອງປະຊາຊົນຈະສາມາດສຳເລັດຜົນໄດ້ຢ່າງແນ່ນອນ.” ຂໍໃຫ້ພວກເຮົາຈົ່ງຈື່ຈຳຄວາມປາຖະໜາຂອງປະຊາຊົນທີ່ຢາກມີຊີວິດອັນດີງາມໄວ້ໃນໃຈສະເໝີ, ແບກຫາບພາລະກຳຂອງຍຸກສະໄໝເພື່ອປົກປັກຮັກສາສັນຕິພາບ ແລະ ຊຸກຍູ້ການພັດທະນາ, ຮ່ວມກັນກ້າວເດີນໄປໜ້າ, ບຸກບືນສູ້ຊົນຢ່າງບໍ່ລົດລະ, ສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ຮ່ວມກັນສ້າງພາກພື້ນ ແລະ ໂລກທີ່ມີຄວາມສິວິໄລແລະ ດີງາມກວ່າເກົ່າ.
ຄຳເຫັນ
0