ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 19 ພະຈິກ ປີ 2021, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນ ໄດ້ກ່າວຄຳປາໄສສຳຄັນໃນກອງປະຊຸມສົນທະນາກ່ຽວກັບການສ້າງ “ໜຶ່ງແລວໜຶ່ງເສັ້ນທາງ” ຄັ້ງທີ 3 ຢູ່ນະຄອນຫຼວງປັກກິ່ງ.
ເມື່ອເວົ້າເຖິງ “ໜຶ່ງແລວໜຶ່ງເສັ້ນທາງ”, ຄິດວ່າທ່ານຜູ້ຟັງຄົງຈະຮູ້ດີແລ້ວເນາະ. ເດືອນກັນຍາປີ2013, ທ່ານສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມການຮ່ວມມື “ແລວເສດຖະກິດເສັ້ນທາງສາຍໄໝໃໝ່”, ເດືອນຕຸລາປີດຽວກັນ, ທ່ານສີຈິ້ນຜິງໄດ້ສະເໜີຂໍ້ລິເລີ່ມການຮ່ວມມື “ເສັ້ນທາງສາຍໄໝທາງທະເລສະຕະວັດທີ21”, ພາຍໃນບໍ່ເທົ່າໃດປີຜ່ານມາ, ເສັ້ນທາງການຮ່ວມມືແບບຕ່າງຝ່າຍຕ່າງມີຜົນປະໂຫຍດ “ໜຶ່ງແລວໜຶ່ງເສັ້ນທາງ” ໄດ້ຊ່ວຍປ່ຽນແປງຫຍັງແດ່? ຄິດວ່າ ເວົ້າສຳລັບປະຊາຊົນຂອງປະເທດແລະເຂດແຄວ້ນທີ່ຢູ່ລຽບຕາມ “ໜຶ່ງແລວໜຶ່ງເສັ້ນທາງ”, ການປ່ຽນແປງນັ້ນກໍຄື ນ້ຳແລະໄຟຟ້າ, ທາງ ແລະຂົວ, ໂຮງຮຽນ ແລະໂຮງໝໍ, ລາຍໄດ້ທີ່ເພີ່ມຂຶ້ນ, ຊີວິດການເປັນຢູ່ ໄດ້ຮັບການປັບປຸງໃຫ້ດີຂຶ້ນ ແລະ ອະນາຄົດທີ່ໜ້າຄອງຄອຍ.
ໃນກອງປະຊຸມຄັ້ງນີ້, ທ່ານສີຈິ້ນຜິງໄດ້ຫວນຄືນເຖິງເລື່ອງໜຶ່ງໃນຫຼາຍປີກ່ອນ.
ວັນທີ 16 ພຶດສະພາປີ2000, ທ່ານສີຈິ້ນຜິງ ທີ່ເປັນເຈົ້າແຂວງແຂວງຟູຈ້ຽນໃນເວລານັ້ນໄດ້ຕ້ອນຮັບທ່ານ ລາຟານາມາ ເຈົ້າແຂວງແຂວງອິສເຕິນໄຮແລນ ປະເທດປາປົວນີວກີເນ ທີ່ເດີນທາງມາຢ້ຽມຢາມແຂວງຟູຈ້ຽນ. ທ່ານສີຈິ້ນຜິງໄດ້ເລົ່າສູ່ຟັງວ່າ: “ຂ້າພະເຈົ້າໄດ້ແນະນຳເຕັກນິກການປູກອ້ອຍນຽມໃຫ້ເພິ່ນ, ເຈົ້າແຂວງທ່ານນີ້ຟັງແລ້ວກໍມີຄວາມສົນໃຈຫຼາຍ. ຂ້າພະເຈົ້າກໍເລີຍແຕ່ງຕັ້ງທ່ານ ຫຼິນຈ້ານຊີ່ ເຊິ່ງແມ່ນຕົວລະຄອນທີ່ມີຊີວິດຈິງໃນເລື່ອງ ‘ເມືອງມິນນິງ’ໄປສອນເຕັກນິກໃຫ້ເຂົາເຈົ້າ.”
ເລື່ອງ “ເມືອງມິນນິງ” ທີ່ທ່ານສີຈິ້ນຜິງເວົ້າເຖິງນັ້ນແມ່ນລະຄອນໂທລະພາບເລື່ອງໜຶ່ງທີ່ໄດ້ຮັບຄວາມນິຍົມຊົມຊອບຢ່າງສູງຢູ່ຈີນ, ເຊິ່ງເປັນເລື່ອງທີ່ເວົ້າເຖິງເຫດການນັບແຕ່ຊຸມປີ1990 ເປັນຕົ້ນມາ, ປະຊາຊົນແລະພະນັກງານທັງຫຼາຍຂອງ ຊີ່ໄຫກູ້ ເຊິ່ງເປັນເຂດພູດອຍທາງພາກໃຕ້ຂອງເຂດປົກຄອງຕົນເອງເຜົ່າຮຸຍນິງເຊ້ຍ ໄດ້ຕອບສະໜອງກັບຄຳຮຽກຮ້ອງຕາມນະໂຍບາຍຫຼຸດຜ່ອນຄວາມທຸກຍາກຂອງລັດ, ປະຕິບັດໂຄງການຍົກຍ້າຍຖິ່ນຖານເພື່ອຫຼຸດຜ່ອນຄວາມທຸກຍາກໃຫ້ສຳເລັດ, ໂດຍການຊ່ວຍເຫຼືອຈາກແຂວງຟູຈ້ຽນ ທີ່ເປັນແຂວງຈັບຄູ່ຊ່ວຍເຫຼືອ, ຜ່ານຈາກການອອກແຮງງານຢ່າງດຸໝັ່ນພາກພຽນແລະການຄົ້ນຄວ້າຢ່າງບໍ່ລົດລະ, ຈິ່ງສາມາດສ້າງສາພັດທະນາ “ຫາດຊາຍທີ່ແຫ້ງແລ້ງ” ໃຫ້ກາຍເປັນ “ຫາດຊາຍຄຳ”ທີ່ອຸດົມສົມບູນຄືໃນທຸກມື້ນີ້.
ສາເຫດອັນໜຶ່ງທີ່ເຮັດໃຫ້ລະຄອນໂທລະພາບເລື່ອງນີ້ໄດ້ຮັບຄວາມນິຍົມຊົມຊອບຢ່າງສູງກໍຍ້ອນວ່າ ເລື່ອງລາວຕ່າງໆທີ່ສະແດງໃນລະຄອນລ້ວນແຕ່ແມ່ນກຳເນີດມາຈາກສະພາບຄວາມເປັນຈິງ, ຕົວລະຄອນສຳຄັນຕ່າງໆກໍແມ່ນຄົນແທ້ທີ່ມີຊີວິດຈິງ, ສ່ວນເລື່ອງຈິງຄົນແທ້ໃນຊີວິດຕົວຈິງແມ່ນລຳບາກຍາກເຂັນກວ່າທີ່ໄດ້ສະແດງໃນລະຄອນ. ໃນລະຄອນເລື່ອງນີ້, ມີຜູ້ຊ່ຽວຊານເຕັກນິກກະສິກຳຜູ້ໜຶ່ງຊື່ວ່າ ຫຼິງຢີ່ໜົງ, ເຊິ່ງເປັນຕົວແທນໃຫ້ກັບທ່ານສາສະດາຈານ ຫຼິນຈ້ານຊີ່ ຂອງມະຫາວິທະຍາໄລກະສິກຳປ່າໄມ້ຟູຈ້ຽນ. ພາຍໃຕ້ການຊຸກຍູ້ສົ່ງເສີມຈາກທ່ານສີຈິ້ນຜິງ, ທ່ານສາສະດາຈານ ຫຼິນຈ້ານຊີ່ ພ້ອມດ້ວຍທີມງານໄດ້ເດີນທາງໄປເຂດນິງເຊ້ຍເພື່ອເຜີຍແຜ່ເຕັກນິກການຜະລິດອ້ອຍນຽມ, ຈິ່ງເຮັດໃຫ້ການປູກອ້ອຍນຽມ ເປີດໂອກາດໃຫ້ກັບການຮ່ວມມືລະຫວ່າງແຂວງຟູຈ້ຽນແລະເຂດນິງເຊ້ຍ.
ອ້ອຍນຽມສາມາດນຳມາເປັນສ່ວນປະສົມກັບວັດຖຸຊະນິດອື່ນເພື່ອປູກເຫັດທີ່ໃຊ້ເປັນອາຫານ, ແລະກໍສາມາດໃຊ້ເປັນຫົວອາຫານສຳລັບການລ້ຽງສັດ, ນອກນີ້, ຍັງສາມາດໃຊ້ເປັນວັດຖຸດິບໃນການຜະລິດແກັສຊີວະພາບ, ຜະລິດເຈ້ຍ ແລະແປ້ນ fibreboard ອີກດ້ວຍ, ສາມາດເວົ້າໄດ້ວ່າ, ອ້ອຍນຽມເປັນພືດຊີວະພາບ ທັງເປັນພືດເສດຖະກິດ.
ແຂວງອີສະເຕິນໄຮແລນປະເທດປາປົວນີວກີເນ ເປັນແຂວງແຮກສ່ຽວຂອງແຂວງຟູຈ້ຽນປະເທດຈີນ, ພາຍຫຼັງທ່ານສີຈິ້ນຜິງໄດ້ພົບປະກັບ ທ່ານລາຟານາມາ ເຈົ້າແຂວງແຂວງອີສະເຕິນໄຮແລນປະເທດປາປົວນີວກີເນແລ້ວ, ທ່ານສາສະດາຈານຫຼິນຈ້ານຊີ່ໄດ້ເດີນທາງໄປພາກພື້ນປາຊີຟິກໃຕ້, ເຕັກນິກການຜະລິດອ້ອຍນຽມທີ່ທ່ານຄົ້ນຄວ້າພັດທະນານັ້ນໄດ້ຖືກນຳເຂົ້າໄປເຜີຍແຜ່ຢູ່ປາປົວນີວກີເນຢ່າງເປັນທາງການ.
ການກິນອີ່ມນຸ່ງອຸ່ນເປັນບັນຫາທີ່ປາປົວນີວກີເນແກ້ໄຂໄດ້ຍາກເປັນເວລາດົນນານມາແລ້ວ, ທຸກມື້ນີ້, ອ້ອຍນຽມທີ່ມາຈາກປະເທດຈີນກຳລັງປ່ຽນແປງຊີວິດການເປັນຢູ່ຂອງຊາວກະສິກອນປາປົວນີວກີເນ. ເຕັກນິກການຜະລິດອ້ອຍນຽມໄດ້ເສີມຂະຫຍາຍບົດບາດອັນສຳຄັນທີ່ສຸດເຂົ້າໃນການເຮັດໃຫ້ຊາວກະສິກອນປະເທດນີ້ຫຼຸດພົ້ນອອກຈາກຄວາມທຸກຍາກແລະໄດ້ຮັບການພັດທະນາ, ສະນັ້ນ, ເມື່ອເຂົາເຈົ້າເວົ້າເຖິງເລື່ອງນີ້ກໍພາກັນກ່າວວ່າ: “ຂອບໃຈປະເທດຈີນ! ຂອບໃຈທ່ານສີຈິ້ນຜິງ!”
ທ່ານລາຟານາມາ ເຈົ້າແຂງແຂວງອີສະເຕິນໄຮແລນໃນເວລານັ້ນໄດ້ຮັກສາຂອງຂວັນທີ່ທ່ານສີຈິ້ນຜິງມອບໃຫ້ນັ້ນຈົນມາເຖິງທຸກມື້ນີ້. ການຊ່ວຍເຫຼືອອັນອົບອຸ່ນທີ່ທ່ານສີຈິ້ນຜິງໃຫ້ກັບປະຊາຊົນປາປົວນີວກີເນນັ້ນເຮັດໃຫ້ເພິ່ນລືມຍາກທີ່ສຸດ.
ເມື່ອທ່ານສີຈິ້ນຜິງຫວນຄືນເຖິງເລື່ອງນີ້ກໍຮູ້ສຶກປະທັບໃຈຫຼາຍ, ທ່ານກ່າວວ່າ: “ພາຍຫຼັງດຳລົງຕຳແໜ່ງເປັນຮອງປະທານປະເທດແລ້ວ, ຂ້າພະເຈົ້າໄດ້ສືບຕໍ່ເຜີຍແຜ່ອ້ອຍນຽມໃນເວລາເດີນທາງໄປຢ້ຽມຢາມພາກພື້ນປາຊີຟິກໃຕ້, ອາຟຣິກກາ ແລະອາເມຣິກາໃຕ້. ປັດຈຸບັນ, ເຕັກນິກນີ້ໄດ້ຮັບການພັດທະນາເປັນຢ່າງດີຢູ່ 100 ກວ່າປະເທດ ເຊິ່ງໄດ້ສ້າງວຽກເຮັດງານທຳໃຫ້ປະເທດເຫຼົ່ານີ້ຫຼາຍແສນຕຳແໜ່ງງານ.”
ໃນກອງປະຊຸມສົນທະນາກ່ຽວກັບການສ້າງ “ໜຶ່ງແລວໜຶ່ງເສັ້ນທາງ” ຄັ້ງທີ 3, ທ່ານສີຈິ້ນຜິງໄດ້ແນະນຳໃຫ້ຜູ້ມີສ່ວນຮ່ວມແລະຜູ້ສ້າງ “ໜຶ່ງແລວໜຶ່ງເສັ້ນທາງ” ຄິດໄລ່ເບິ່ງວ່າ ໃນໂຄງການຕາມຂອບ “ໜຶ່ງແລວໜຶ່ງເສັ້ນທາງ” ມີຈັກສ່ວນທີ່ໄດ້ສ່ອງແສງໃຫ້ເຫັນເຖິງຄວາມຕ້ອງການທີ່ກ່ຽວພັນກັບຊີວິດການເປັນຢູ່ຂອງປະຊາຊົນໂດຍກົງ. ທ່ານສີຈິ້ນຜິງກ່າວວ່າ: “ໂຄງການເພື່ອຊີວິດການເປັນຢູ່ຂອງປະຊາຊົນເປັນຊ່ອງທາງສຳຄັນໃນການເຮັດໃຫ້ປະຊາຊົນປະເທດທີ່ມີສ່ວນຮ່ວມໃນການກໍ່ສ້າງໂຄງການຮູ້ສຶກວ່າໄດ້ຮັບຜົນປະໂຫຍດຫຼາຍຂຶ້ນຢ່າງວ່ອງໄວທີ່ສຸດ ແລະໄດ້ຮັບປະສິດທິຜົນທັນທີ. ໂຄງການຂະໜາດນ້ອຍແຕ່ມີປະໂຫຍດຫຼາຍຈະສົ່ງຜົນສະທ້ອນໂດຍກົງໃຫ້ກັບປະຊາຊົນ. ໃນຕໍ່ໜ້ານີ້ ຕ້ອງຖືໂຄງການແບບນີ້ເປັນວຽກງານບູລິມະສິດໃນການຮ່ວມມືກັບຕ່າງປະເທດ, ເພີ່ມທະວີການວາງແຜນໃຫ້ເປັນເອກະພາບກັນ, ເສີມຂະຫຍາຍບົດບາດຂອງທຶນຊ່ວຍເຫຼືອຕ່າງປະເທດໃຫ້ເປັນໄມ້ງັດຄື ລົງທຶນໜ້ອຍແຕ່ໄດ້ຮັບປະສິດທິຜົນຫຼາຍ ເພື່ອສ້າງໃຫ້ເປັນໂຄງການທີ່ໃກ້ຊິດຕິດແທດກັບປະຊາຊົນແລະເຕົ້າໂຮມກຳລັງໃຈຂອງປະຊາຊົນ. ”
ທ່ານສີຈິ້ນຜິງຍັງກ່າວເນັ້ນວ່າ: “ຂ້າພະເຈົ້າເຄີຍກ່າວວ່າ: ການຮ່ວມກັນສ້າງ ‘ໜຶ່ງແລວໜຶ່ງເສັ້ນທາງ’ກໍປານວ່າໄດ້ຕິດປີກທັງສອງເບື້ອງໃຫ້ກັບຈີນທີ່ປຽບເໝືອນຄຸດ, ເມື່ອສ້າງໄດ້ດີແລ້ວ, ຄຸດກໍຈະສາມາດບິນໄດ້ສູງແລະບິນໄປໄດ້ໄກກວ່າເກົ່າ. ຕ້ອງປັບປຸງພື້ນຖານການຮ່ວມມືໃຫ້ໝັ້ນຄົງ, ຮັດແໜ້ນພື້ນຖານການພັດທະນາໃຫ້ໝັ້ນແກ່ນ.”
ທຸກມື້ນີ້, ຈີນກັບປະເທດຈຳນວນ 2/3 ໃນໂລກ ແລະ ອົງການຈັດຕັ້ງສາກົນຕົ້ນຕໍຈຳນວນ 1/3 ໃນໂລກໄດ້ບັນລຸຄວາມຮັບຮູ້ທີ່ເປັນເອກະພາບກັນກ່ຽວກັບການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”. ຜົນງານຕົວຈິງອັນໃຫຍ່ຫຼວງ ໄດ້ສ້າງໃຫ້ມີສະພາບການເປີດປະຕູສູ່ພາຍນອກຢ່າງຮອບດ້ານ, ໄດ້ຄົ້ນຄວ້າເສັ້ນທາງໃໝ່ເພື່ອສົ່ງເສີມການພັດທະນາຮ່ວມກັນ, ສ່ວນຜູ້ທີ່ໄດ້ຮັບຜົນປະໂຫຍດທັງໝົດກໍ່ແມ່ນປະຊາຊົນບັນດາປະເທດທີ່ເຂົ້າຮ່ວມການສ້າງ “ໜຶ່ງແລວໜຶ່ງເສັ້ນທາງ”ນັ້ນເອງ.
ຄຳເຫັນ
0