ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 1 ທັນວານີ້, ຢູ່ໂຮງຮຽນມັດທະຍົມອ໋ອກສຟອດລັດມິຊີແກນຂອງອາເມຣິກາໄດ້ເກີດຄະດີຍິງກັນເສຍຊີວິດທີ່ສະເທືອນໄປທົ່ວປະເທດອາເມຣິກາເຫດການໜຶ່ງ, ທ້າວ ອີທານ ຄຳບລີ ນັກຮຽນ ມ. ປາຍປີທີ 2 ທີ່ມີອາຍຸພຽງ 15 ປີໄດ້ຍິງນັກຮຽນເສຍຊີວິດ 4 ຄົນ, ພ້ອມກັນນັ້ນຍັງໄດ້ເຮັດໃຫ້ 8 ຄົນໄດ້ຮັບບາດເຈັບ. ອາວຸດທີ່ມືປືນໃຊ້ໃນການກໍ່ເຫດແມ່ນຂອງຂວັນ ວັນຄຣິສ໌ມາສທີ່ພໍ່ແມ່ຊື້ເປັນຂອງຂວັນໃຫ້ລາວລ່ວງໜ້າ, ໃນ 4 ວັນກ່ອນເກີດເຫດ, ແມ່ຂອງທ້າວ ອີທານ ຄຳບລີ ຍັງເຄີຍໄດ້ພິມບົດຄວາມລົງໃນສື່ສັງຄົມອອນລາຍວ່າ:ສອງພໍ່ລູກກຳລັງທົດລອງຂອງຂວັນວັນຄຣິສ໌ມາສທີ່ຊື້ມາໃໝ່.
ແຕ່ວ່າ,ເມື່ອປະຊາຊົນອາເມຣິກາສ່ວນຫຼາຍໄດ້ສະແດງຄວາມໄວ້ອາໄລຢ່າງສຸດຊຶ້ງຕໍ່ຜູ້ປະສົບເຄາະຮ້າຍໃນເຫດດັ່ງກ່າວແລ້ວ,ທ່ານ ໂທມັສ ມັສຊີ ສະມາຊິກພັກຣີພັບບຣີກັນຂອງລັດຄັນຕັກກີອາເມຣິກາພັດໄດ້ໂພສຮູບຖ່າຍລວມຂອງຄອບຄົວຕົນໃນວັນຄຣິສມາສແຜ່ນໜຶ່ງລົງໃນ Twitter , ຢູ່ໃນຮູບ, ຈະເຫັນວ່າໃນມືຂອງແຕ່ລະຄົນໃນຄອບຄົວໂທມັສມັສຊີລ້ວນແຕ່ຖືປືນກະບອກໜຶ່ງ,ທັງເຮັດທ່າທີຍິ້ມໃສ່ກ້ອງ. ຢູ່ລຸ່ມຮູບຍັງຂຽນຂໍ້ຄວາມປະກອບຮູບວ່າ: ແມຣີຄຣິສມາສ! ຊັນຕາຄລອສໃນວັນຄຣີສມາສຈົ່ງສົ່ງລູກປືນມາໃຫ້ແດ່!
ທີ່ຈິງແລ້ວ, ໃນສາຍຕານັກການເມືອງບາງທ່ານຂອງອາເມຣິກາ,ເຫດການຍິງກັນເສຍຊີວິດທີ່ເກີດຂຶ້ນຢູ່ອາເມຣິກາແມ່ນເລື່ອງທຳມະດາທີ່ສຸດແລ້ວ.
ທ່ານ ໂທມັສ ມັສຊີ ບໍ່ແມ່ນນັກການເມືອງພຽງຄົນດຽວທີ່ໂພສຮູບຖ່າຍລວມຄອບຄົວທີ່ແຕ່ລະຄົນຖືປືນກະບອກໜຶ່ງໃນວັນຄຣິສມາສ. ກ່ອນວັນຄຣິສມາສໃນປີ 2015, ທ່ານນາງ ມີສເຕຍ ຟີໂອຣີ ສະມາຊິກສະພາຕ່ຳເພດຍິງລັດເນວາດາກໍ່ເຄີຍໄດ້ໂພສຮູບຖ່າຍລວມຄອບຄົວທີ່ແຕ່ລະຄົນມືຖືປືນຄົນລະກະບອກໃນວັນຄຣີສມາສລົງໃນສື່ສັງຄົມອອນລາຍ,ພ້ອມທັງສະແດງການສະໜັບສະໜູນສິດຖືຄອງແລະນຳໃຊ້ປືນ.
ອັນທີ່ແຕກຕ່າງກັນກັບສະມາຊິກລັດຖະສະພາອາເມຣິກາທັງຫຼາຍທີ່ມັກໂອ້ອວດດ້ວຍການຖືປືນສະຫຼອງວັນຄຣີສມາສຢ່າງມ່ວນຊື່ນນັ້ນແມ່ນຮູບພາບແຜ່ນໜຶ່ງຢູ່ສື່ສັງຄົມອອນລາຍຄື: ຢູ່ສະຖານທີ່ໄວ້ອາໄລຫຼັງເກີດເຫດຍິງກັນຢູ່ໂຮງຮຽນດີທຣອຍ, ນັກຮຽນຍິງຜູ້ໜຶ່ງທີ່ລອດຊີວິດໃນເຫດການຍິງກັນດັ່ງກ່າວທັງໄຫ້ທັງມີນ້ຳຕາທັງຊູປ້າຍເຈ້ຍແຜ່ນໜຶ່ງ,ຢູ່ເທິງປ້າຍເຈ້ຍມີຂໍ້ຄວາມທີ່ຂຽນວ່າ: “ຖ້າຂ້ອຍເສຍຊີວິດໃນເຫດຍິງກັນຢູ່ໂຮງຮຽນ,ຂໍໃຫ້ດອຍສົບຂອງຂ້ອຍຢູ່ເທິງຂັ້ນໄດຂອງລັດຖະສະພາອາເມຣິກາ”,ຜູ້ສາວຄົນນີ້ພວມຢູ່ໃນໄລຍະທີ່ສົມຄວນເຕີບໃຫຍ່ຢ່າງມ່ວນຊື່ນພັດຕ້ອງເປັນຫ່ວງວ່າຕົນຈະເສຍຊີວິດແບບບັງເອີນໃນເຫດຍິງກັນຢ່າງຮ້າຍແຮງ,ເຮັດໃຫ້ຄົນຮູ້ສຶກທໍ້ຖອຍໃຈແລະເສົ້າໃຈ.
ປ້າຍເຈ້ຍເພື່ອຮ້ອງຟ້ອງແບບບໍ່ມີສິດມີສຽງຂອງຜູ້ສາວອາເມຣິກາໃນຄະດີຍິງກັນຈົນເສຍຊີວິດແລະຮູບພາບຖ່າຍລວມໝົດຄອບຄົວທີ່ແຕ່ລະຄົນຖືປືນຄົນລະກະບອກຂອງສະມາຊິກລັດຖະສະພາອາເມຣິກາເພື່ອສະຫຼອງວັນຄຣິສມາສ,ເປັນປະກົດການທີ່ສ້າງຄວາມແຕກແຍກກັນໃນສັງຄົມທັງເປັນເລື່ອງຕະຫຼົກທີ່ເຮັດໃຫ້ຄົນຮູ້ສຶກຢາກສຽດສີ. ສ່ວນປະຊາຊົນອາເມຣິກາທີ່ໝົດຫົນທາງແກ້ໄຂ,ໝົດຫວັງແລະບໍ່ມີສິດມີສຽງໃນເຫດການຍິງກັນດ້ວຍຄວາມຮຸນແຮງ. ກໍ່ຈຳເປັນຕ້ອງຍອມຮັບຊາຕາກຳທີ່ອາດຈະເສຍຊີວິດຍ້ອນການຍິງກັນທີ່ມັກເກີດຂຶ້ນເລື້ອຍໆໃນສັງຄົມອາເມຣິກາ.ຜູ້ທີ່ເສຍຊີວິດຍ້ອນການຍິງກັນຜູ້ຕໍ່ໄປຈະແມ່ນໃຜຍັງບໍ່ມີໃຜຮູ້.
ການເອົາປືນແລະຄະດີຍິງກັນຈົນເສຍຊີວິດຢູ່ໂຮງຮຽນເປັນ “ຂອງຂວັນສຳລັບວັນຄຣິສມາສ”ແມ່ນເລື່ອງທີ່ປະຊາຊົນອາເມຣິກາຄິດຢາກໃຫ້ເກີດຂຶ້ນບໍ່? ຄິດວ່າອາເມຣິກາຄວນທົບທວນຕົນເອງຄືນໃໝ່ຢ່າງເລິກເຊິ່ງເພື່ອແກ້ໄຂບັນຫາທີ່ບໍ່ເພິ່ງປາຖະໜານີ້.
ຄຳເຫັນ
0