ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 8 ທັນວານີ້, ກອງປະຊຸມເວທີປຶກສາຫາລືສິດທິມະນຸດໃຕ້ໃຕ້2021 ໄດ້ຈັດຂຶ້ນຢູ່ນະຄອນຫຼວງປັກກິ່ງ ພາຍໃຕ້ຫົວຂໍ້ທີ່ວ່າ “ຖືປະຊາຊົນໄວ້ຢູ່ໃນຖານະສູງກວ່າໝູ່ ແລະ ການບໍລິຫານສິດທິມະນຸດໃນທົ່ວໂລກ”. ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍຕໍ່ເວທີປຶກສາຫາລືດັ່ງກ່າວ.
ທ່ານສີຈິ້ນຜິງຊີ້ອອກວ່າ: ສິດທິມະນຸດແມ່ນຂີດໝາຍແຫ່ງຄວາມກ້າວໜ້າດ້ານຄວາມສິວິໄລຂອງມວນມະນຸດ. ການຖະນຸຖະໜອມ ແລະ ຮັກສາຊີວິດ ຄ່ານິຍົມ ແລະ ກຽດສັກສີຂອງຄົນ, ທຸກຄົນສາມາດຊົມໃຊ້ສິດທິມະນຸດ, ແມ່ນຄວາມມຸ່ງມາດປາຖະໜາຮ່ວມຂອງສັງຄົມມະນຸດ. ການຍຶດໝັ້ນຖືເອົາປະຊາຊົນໄວ້ຢູ່ໃນຖານະສູງກວ່າໝູ່, ຖືເອົາຄວາມມຸ່ງຫວັງຂອງປະຊາຊົນທີ່ຢາກມີຊີວິດການເປັນຢູ່ທີ່ດີງາມເປັນເປົ້າໝາຍສູ້ຊົນ, ແມ່ນຄວາມຮັບຜິດຊອບທີ່ຍຸກສະໄໝມອບໃຫ້ແກ່ບັນດາປະເທດໃນໂລກ.
ທ່ານສີຈິ້ນຜິງກ່າວເນັ້ນວ່າ, ພັກກອມມູນິດຈີນເປັນພັກການເມືອງທີ່ເຄົາລົບ ແລະ ປົກປ້ອງສິດທິມະນຸດຢ່າງສະເໝີຕົ້ນສະເໝີປາຍ. ຈີນຍຶດໝັ້ນຖືປະຊາຊົນເປັນໃຈກາງ, ຖືເອົາຜົນປະໂຫຍດຂອງປະຊາຊົນໄວ້ຢູ່ໃນຖານະສູງກວ່າໝູ່, ຊຸກຍູ້ວຽກງານສິດທິມະນຸດດ້ວຍການພັດທະນາ, ຊຸກຍູ້ປະຊາທິປະໄຕປະຊາຊົນໃນທຸກຂັ້ນຕອນ, ຊຸກຍູ້ການພັດທະນາຢ່າງເສລີ ແລະ ຮອບດ້ານຂອງຄົນ, ໄດ້ບຸກເບີກເສັ້ນທາງພັດທະນາສິດທິມະນຸດທີ່ສອດຄ່ອງກັບກະແສລວມຂອງຍຸກສະໄໝຢ່າງສຳເລັດຜົນ, ຊຸກຍູ້ພາລະກິດສິດທິມະນຸດຂອງຈີນໄດ້ຮັບຜົນສຳເລັດຢ່າງພົ້ນເດັ່ນ,
ປະຊາຊົນຈີນ 1,4 ຕື້ກວ່າຄົນມີຄວາມຮູ້ສຶກທີ່ໄດ້ຮັບຜົນປະໂຫຍດ, ມີຄວາມຮູ້ສຶກທີ່ມີຄວາມຜາສຸກ ແລະ ມີຄວາມຮູ້ສຶກປອດໄພໃນດ້ານການປົກປ້ອງສິດທິມະນຸດນັບມື້ນັບເພີ່ມຂຶ້ນ. ພຶດຕິກຳໃນການປະຕິບັດວຽກງານສິດທິມະນຸດມີຄວາມຫຼາກຫຼາຍ, ປະຊາຊົນບັນດາປະເທດໃນໂລກຄວນ ແລະ ສາມາດເລືອກເອົາເສັ້ນທາງພັດທະນາສິດທິມະນຸດທີ່ສອດຄ່ອງກັບສະພາບການຂອງປະເທດຕົນຢ່າງເປັນເຈົ້າຕົນເອງ. ຈີນຍິນດີຮ່ວມກັບປະເທດພວມພັດທະນາທັງຫຼາຍ, ເຊີດຊູຄ່ານິຍົມຮ່ວມຂອງມວນມະນຸດ,ປະຕິບັດຕາມລັດທິຫຼາຍຝ່າຍທີ່ແທ້ຈິງ, ປະກອບສ່ວນສະຕິປັນຍາ ແລະ ກຳລັງແຮງເຂົ້າໃນການຊຸກຍູ້ການພັດທະນາພາລະກິດສິດທິມະນຸດສາກົນຢ່າງປອດໃສ.
ຄຳເຫັນ
0