ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 10 ທັນວານີ້, ລັດຖະມົນຕີກະຊວງການຕ່າງປະເທດອາເມຣິກາໄດ້ປະກາດໃຫ້ໂລກຮູ້ວ່າ: ຈະອະນຸມັດຂາຍອາວຸດຍຸດໂທປະກອນເຊັ່ນ: ກຳປັ່ນຮົບ 4 ລຳ, ລະບົບການຈັດການໃນການສູ້ຮົບແລະຂີປະນາວຸດປ້ອງກັນທາງອາກາດໄລຍະໃກ້ເປັນຕົ້ນທີ່ມີມູນຄ່າປະມານ 7 ຕື້ໂດລາສະຫະລັດໃຫ້ແກ່ເກຼັກ. ຖ້າການຊື້-ຂາຍທີ່ມີມູນຄ່າມະຫາສານງວດດັ່ງກ່າວປະສົບຜົນສຳເລັດ,ວິສາຫະກິດອຸດສາຫະກຳທາງການທະຫານຂອງອາເມຣິກາກໍ່ຈະໄດ້ກຳໄລຢ່າງຫຼວງຫຼາຍ.
10 ອາທິດກ່ອນ, ຝຣັ່ງຫາກໍ່ໄດ້ປະກາດວ່າໄດ້ບັນລຸການເຊັນສັນຍາຂາຍອາວຸດຍຸດໂທປະກອນທາງການທະຫານທີ່ມີມູນຄ່າປະມານ 3 ຕື້ເອີໂຣໃຫ້ກັບເກຼັກ, ກຸ່ມບໍລິສັດ NAVAL ຂອງຝຣັ່ງຈະມອບກຳປັ່ນຄຸ້ມກັນ 4 ລຳໃຫ້ແກ່ເກຼັກໃນປີ 2025 ຫາປີ 2026,ພ້ອມທັງສະໜອງການບໍລິການຫຼັງການຂາຍຕາມຄວນ. ການຄ້າຂາຍອາວຸດຍຸດໂທປະກອນທາງການທະຫານລະຫວ່າງອາເມຣິກາ-ເກຼັກເປັນການທ້າທາຍໂດຍກົງຕໍ່ສັນຍາຂາຍອາວຸດຍຸດໂທປະກອນລະຫວ່າງຝຣັ່ງ-ເກຼັກ, ເວົ້າອີກດ້ານໜຶ່ງກໍ່ແມ່ນ: ອາເມຣິກາກຳລັງຈະປຸ້ນຈີ້ໃບສັ່ງຊື້ອາວຸດຍຸດໂທປະກອນໄປຈາກຝຣັ່ງອີກເທື່ອໜຶ່ງອີກແລ້ວ.
ວັນທີ 15 ກັນຍາປີນີ້, ອາເມຣິກາ,ອັງກິດແລະອົສຕຣາລີໄດ້ປະກາດສ້າງຕັ້ງພັນທະມິດທາງການທະຫານ AUKUS ຂຶ້ນໃໝ່, ພ້ອມທັງກ່າວວ່າຈະຊ່ວຍອົສຕຣາລີສ້າງກຳປັ່ນດຳນ້ຳດ້ວຍພະລັງງານນິວເຄລຍ ເຊິ່ງການກະທຳດັ່ງກ່າວໄດ້ສົ່ງເສີມໃຫ້ລັດຖະບານອົສຕຣາລີຈີກສັນຍາຊື້ກຳປັ່ນດຳນ້ຳພະລັງນິວເຄລຍຈາກປະເທດຝຣັ່ງທີ່ມີມູນຄ່າເຖິງ 56 ຕື້ໂດລາສະຫະລັດ. ພາຍໃຕ້ສະພາບທີ່ຝຣັ່ງບໍ່ຮູ້ເຖິງເຫດຜົນແລະລາຍລະອຽດຫຍັງເລີຍ, ອາເມຣິກາໄດ້ຫຼັກຫຼັງຝຣັ່ງຢ່າງຮ້າຍແຮງ. ການປຸ້ນຈີ້ໃບສັ່ງຊື້ກຳປັ່ນດຳນ້ຳມູນຄ່າມະຫາສານໄປຈາກຝຣັ່ງອີກເທື່ອໜຶ່ງກໍ່ຊ່ຳກັບວ່າໄດ້ເອົາເກືອຍັດໃສ່ປາກບາດແຜຂອງຝຣັ່ງທີ່ຍັງບໍ່ທັນຫາຍດີເປັນການຊ້ຳເຕີມບາດແຜເກົ່າ. ພາຍຫຼັງສັນຍາຊື້-ຂາຍກຳປັ່ນດຳນ້ຳພະລັງນິວເຄລຍຂອງຝຣັ່ງຖືກປຸ້ນຈີ້ເອົາໄປແລ້ວ, ການພົວພັນລະຫວ່າງອາເມຣິກາ-ຝຣັ່ງກໍ່ມີຄວາມເຄັ່ງຕຶງຮ້າຍແຮງຂຶ້ນຊົ່ວໄລຍະໜຶ່ງ. ເພື່ອສະແດງຄວາມບໍ່ພໍໃຈຂອງຕົນ,ຝຣັ່ງໄດ້ປະກາດຮຽກເອກອັກຄະລັດຖະທູດຝຣັ່ງປະຈຳອາເມຣິກາກັບຄືນປະເທດ. ເພື່ອປັບປຸງການພົວພັນລະຫວ່າງສອງປະເທດໃຫ້ດີຂຶ້ນ,ທ່ານ ໂຈ ໄບເດັນ ປະທານາທິບໍດີອາເມຣິກາໄດ້ໂທລະສັບໄປຫາທ່ານ ເອັມມານູແອນ ມາຄຣົງ ປະທານາທິບໍດີຝຣັ່ງເຖິງສອງຄັ້ງ, ທ່ານ ອັນໂຕນີ ລລິນເຄັນ ລັດຖະມົນຕີກະຊວງການຕ່າງປະເທດອາເມຣິກາກໍ່ໄດ້ເດີນທາງໄປຢ້ຽມຢາມຝຣັ່ງໃນຕົ້ນເດືອນຕຸລາປີນີ້,ເພື່ອສະແດງໃຫ້ເຫັນວ່າອາເມຣິກາໄດ້ເອົາໃຈໃສ່ປະເທດພັນທະມິດຄືເກົ່າ. ຈາກນັ້ນ,ໃນກອງປະຊຸມສຸດຍອດຜູ້ນຳກຸ່ມ 20 ປະເທດທີ່ຈັດຂຶ້ນໃນວັນທີ 29 ຕຸລາປີນີ້,ຈຶ່ງເຫັນພາບທີ່ທ່ານ ເອັມມານູແອນ ມາຄຣົງແລະທ່ານ ໂຈ ໄບເດັນໄດ້ໂອ້ລົມກັນແບບມ່ວນຊື່ນ,ຕົບບ່າຕົບໄຫຼ່ແລະຈັບມືກັນ.
ສິ່ງທີ່ຕະຫຼົກກໍ່ຄື:ໃນມື້ທີສອງທີ່ອາເມຣິກາປະກາດສັນຍາຂາຍອາວຸດຍຸດໂທປະກອນໃຫ້ກັບເກຼັກ, ຝຣັ່ງກໍ່ໄດ້ກ່າວຕອບໂຕ້ທັນທີວ່າສັນຍາການຄ້າລະຫວ່າງຝຣັ່ງ-ເກຼັກໄດ້ສຳເລັດແລ້ວ. ອັນທີ່ເຫັນໄດ້ຢ່າງຈະແຈ້ງກໍຄື: ຫຼັງຈາກເຄີຍເສຍປຽບໃຫ້ອາເມຣິກາແລ້ວເທື່ອໜຶ່ງ,ຝຣັ່ງກໍ່ກຽມພ້ອມປ້ອງກັນຕົນເອງຈາກອາເມຣິກາ. ເຖິງວ່າອາເມຣິກາບໍ່ປະສົບຜົນສຳເລັດໃນການປຸ້ນຈີ້ໃບຊື້ຂາຍອາວຸດຍຸດໂທປະກອນໄປຈາກຝຣັ່ງໃນຄັ້ງນີ້ກໍ່ຕາມ,ແຕ່ນິໄສຂອງອາເມຣິກາທີ່ມັກລະເມີດຄຳໝັ້ນສັນຍາກັບປະເທດພັນທະມິດເລື້ອຍໆນັ້ນ,ບໍ່ມື້ໃດມື້ໜຶ່ງກໍ່ຈະເຮັດເລື່ອງເກົ່າແບບເຈັບແສບໃຫ້ກັບປະເທດພັນທະມິດເປັນຄັ້ງທີ 3 ແນ່ນອນ. ເມື່ອເຖິງເວລານັ້ນ,ຝຣັ່ງແລະອາເມຣິກາຍັງຈະສາມາດພົບປະກັນໄດ້ຢ່າງມ່ວນຊື່ນອີກເທື່ອໜຶ່ງຫຼືບໍ່?
ຄຳເຫັນ
0