ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 5 ມັງກອນນີ້, ຢູ່ນະຄອນຫຼວງພະນົມເປັນ, ກອງທະຫານຮັກສາພະອົງຂອງກຳປູເຈຍໄດ້ຈັດພິທີມອບຫຼຽນໄຊໃຫ້ໜ່ວຍງານຜູ້ຊ່ຽວຊານຈາກໂຮງຮຽນກອງທັບປົດປ່ອຍປະຊາຊົນຈີນທີ່ໄປຊ່ວຍເຫຼືອກຳປູເຈຍງວດທີ 12, ເພື່ອສະແດງຄວາມຍ້ອງຍໍຊົມເຊີຍການປະກອບສ່ວນຂອງໜ່ວຍງານຜູ້ຊ່ຽວຊານດັ່ງກ່າວໃນການສ້າງສາພັດທະນາໂຮງຮຽນທະຫານບົກຂອງກອງທະຫານຮັກສາພະອົງຂອງກຳປູເຈຍ.
ທ່ານວົງປີໄຊ ຜູ້ບັນຊາການສູງສຸດ ທ່ານໂມຢຸນ ຮອງຫົວໜ້າເສນາທິການປະສົມທັງເປັນຫົວໜ້າໂຮງຮຽນທະຫານບົກຂອງກອງທະຫານຮັກສາພະອົງຂອງກຳປູເຈຍ ທ່ານຈູ່ຊ້ວຍເຟີ່ຍ ຮອງທີ່ປຶກສາການທະຫານສະຖານທູດຈີນປະຈຳກຳປູເຈຍ ແລະທ່ານອື່ນໆໄດ້ເຂົ້າຮ່ວມພິທີດັ່ງກ່າວ.
ໃນພິທີມອບຫຼຽນໄຊ, ທ່ານວົງປີໄຊກ່າວວ່າ: ໃນຫຼາຍປີມານີ້, ການຮ່ວມມືໃນຂົງເຂດຕ່າງໆລະຫວ່າງກອງທັບສອງປະເທດກຳປູເຈຍແລະຈີນໄດ້ດຳເນີນໄປຢ່າງສະດວກແລະໄດ້ຮັບຜົນສຳເລັດຢ່າງຫຼວງຫຼາຍ, ກອງທັບຈີນໄດ້ປະກອບສ່ວນຢ່າງຫຼວງຫຼາຍເຂົ້າໃນການປັບປຸງແລະຝຶກອົບຮົມຜູ້ມີຄວາມຮູ້ຄວາມສາມາດໃຫ້ກອງທັບກຳປູເຈຍ, ກຳປູເຈຍຂໍສະແດງຄວາມຂອບໃຈຢ່າງຈິງໃຈຕໍ່ກັບເລື່ອງນີ້, ແລະຈະພະຍາຍາມສຸດຂີດເພື່ອຊຸກຍູ້ການຮ່ວມມືຕົວຈິງລະຫວ່າງສອງກອງທັບກຳປູເຈຍແລະຈີນໃຫ້ໄດ້ຮັບການຂະຫຍາຍຕົວໃຫຍ່ຫຼວງກວ່າເກົ່າ.
ທ່ານຈູ່ຊ້ວຍເຟີ່ຍ ຮອງທີ່ປຶກສາການທະຫານສະຖານທູດຈີນປະຈຳກຳປູເຈຍກ່າວວ່າ: ລັດຖະບານແລະກອງທັບຈີນຈະເຮັດຄືທີ່ໄດ້ເຮັດຜ່ານມາເພື່ອສືບຕໍ່ໃຫ້ການຊ່ວຍເຫຼືອແລະການສະໜັບສະໜູນແກ່ລັດຖະບານແລະກອງທັບກຳປູເຈຍຕາມຄວາມສາມາດຂອງຕົນ. ກອງທັບປົດປ່ອຍປະຊາຊົນຈີນຈະເປັນເພື່ອນມິດທີ່ຮ່ວມແຮງຮ່ວມໃຈກັບປະຊາຊົນແລະກອງທະຫານຮັກສາພະອົງຂອງກຳປູເຈຍຕະຫຼອດໄປ.
ຄຳເຫັນ
0