ວັນ​ທີ 1 ມັງ​ກອນ​ປີ 2022, ສັນ​ຍາ​ຄູ່​ຮ່ວມ​ມື​ເສດ​ຖະ​ກິດ​ຮອບ​ດ້ານ​ໃນ​ພາກ​ພື້ນ ຫຼື RCEP ໄດ້​ເກີດ​ມີ​ຜົນ​ບັງ​ຄັບ​ໃຊ້​ຢ່າງ​ເປັນ​ທາງ​ການ. ໃນ​ຖາ​ນະ​ເປັນ​ສັນ​ຍາ​ການ​ຄ້າ​ເສ​ລີ​ທີ່ກວມ​ເອົາ​ປະ​ຊາ​ກອນ ແລະ​ຂະ​ໜາດເສດ​ຖະ​ກິດ​ປະ​ມານ 1/3 ຂອງ​ໂລກ, ​ເມື່ອ​ສັນ​ຍາ RCEP ​ເກີດ​ມີ​ຜົນ​ບັງ​ຄັບ​ໃຊ້ ຈະ​ເຮັດ​ໃຫ້​ສິນ​ຄ້າຫຼາຍກວ່າ 90% ພາຍ​ໃນ​ພາກ​ພື້ນ​​ແຫ່ງນີ້​ເລີ່ມ​ປອດ​ພາ​ສີ​ເທື່ອ​ລະ​ກ້າວ. ໃນ​ມື້​ທຳ​ອິດ​ຂອງ​ປີ​ໃໝ່​ 2022, ສັນ​ຍາ RCEP ໄດ້ສ້າງ​ຄວາມ​ອົບ​ອຸ່ນ​ໃຫ້​ກັບ​ເສດ​ຖະ​ກິດ​ໂລກ​ ທີ່​ກຳ​ລັງ​ຕົກ​ຢູ່​ໃນ​ສະ​ພາບ​ຄວາມໜາວກະ​ດ້າງ ​ຍ້ອນ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19.

10 ປະ​ເທດ​ອາ​ຊຽນ ທີ່​ເປັນ​ຜູ້​ລິ​ເລີ່ມ​ສັນ​ຍາ RCEP ຈະ​ໄດ້​ຮັບ​ໂອ​ກາດ​ການ​ເຕີບ​ໂຕ​ດ້ານ​ການ​ຄ້າ ແລະ​ການ​ລົງ​ທຶນ​ຈາກ​ສັນ​ຍາ​ການ​ຄ້າ​ເສ​ລີ​ສະ​ບັບດັ່ງ​ກ່າວ​ຢ່າງ​ແນ່ນອນ ແລ​ະ​ຊ່ວຍ​ເລັ່ງ​ການ​ຟື້ນ​ຟູ​ເສດ​ຖະ​ກິດ​​ຂອງພາກ​ພື້ນ ​ທີ່​ໄດ້​ຮັບ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ໃຫ້​ໄວ​ຂຶ້ນ.

ທ່ານ​ບຸນ​ເລີດ ຫຼວງ​ປະ​ເສີດ, ຮອງ​ປະ​ທານ​ສະ​ພາ​ການ​ຄ້າ ແລະ​ອຸດ​ສາ​ຫະ​ກຳ​ແຫ່ງ​ຊາດ​ລາວ​ກ່າວ​ວ່າ: ພາຍ​ໃຕ້​ຂອບ​ສັນ​ຍາ RCEP , ເສັ້ນ​ທາງ​ລົດ​ໄຟ​ລາວ-ຈີນ​ຈະ​ເສີມ​ຂະ​ຫຍາຍ​ບົດ​ບາດ​ທີ່​ສຳ​ຄັນ​ກວ່າ​ເກົ່າ ​ເຂົ້າ​ໃນການ​ສົ່ງ​ເສີມ​ການ​ຄ້າ ແລະ​ການ​ລົງ​ທຶນ​ຢູ່​ລາວ.

ທ່ານ​ໂລກ​ຽນ​ຊວນ, ປະ​ທານ​ສະ​ພາ​ການ​ຄ້າ​ຊາວ​ຈີນ​ຕ່າງ​ດ້າວ​ປະ​ຈຳ​ມາ​ເລ​ເຊຍ​ກ່າວ​ວ່າ: ສັນ​ຍາ RCEP ຈະ​​ຊ່ວຍຊູກ​ຍູ້​ການ​ຟື້ນ​ຟູ​ເສດ​ຖະ​ກິດ​ຂອງ​ມາ​ເລ​ເຊຍພາຍຫຼັງ​ການ​ແຜ່​ລະ​ບາດ​ຂອງ​ພະ​ຍາດ​ໂ​ຄວິດ-19. ທ່ານ​ຮ່ວງກວາງ​ຟອງ, ເຈົ້າ​ໜ້າ​ທີ່​ສະ​ພາ​ອຸດ​ສາ​ຫະ​ກຳ ແລະ​ການ​ຄ້າ​ຫວຽດ​ນາມ​ກ່າວ​ວ່າ: ຄາດ​ວ່າ​ສັນ​ຍາ RCEP ຈະ​ກາຍ​ເປັນ​ແຮງ​ຂັບ​ເຄື່ອນ​ອັນ​ໃຫມ່​ ສຳ​ລັບ​ເສດ​ຖະ​ກິດ​ຫວຽດ​ນາມ ແລະ​ຊຸກ​ຍູ້​ກາ​ນ​ພັດ​ທະ​ນາ ແລະ​ການ​ຟື້ນ​ຟູ​ເສດ​ຖະ​ກິດ​ຫວຽດ​ນາມ.

ສິ່ງ​ທີ່​ຕ້ອງ​ກ່າວ​ເຖິງ​ນັ້ນ​ກໍ​ຄື, ພາຍຫຼັງ​ເຊັນ​ສັນ​ຍາ RCEP ແລ້ວ, ຈີນ ທີ່​ເປັນ​ກຸ່ມ​ເສດ​ຖະ​ກິດ​ໃຫຍ່​ອັນ​ດັບ 2 ຂອງ​ໂລກ ແລ​ະ​ຍີ່​ປຸ່ນ ທີ່​ເປັນ​ກຸ່ມ​ເສດ​ຖະ​ກິດ​ໃຫຍ່​ອັນ​ດັບ 3 ຂອງ​ໂລກ ໄດ້​ບັນ​ລຸເປົ້າ​ໝາຍ​ການຫຼຸດ​ພາ​ສີ​ລະ​ຫວ່າງ​ກັນ​ເປັນ​ຄັ້ງ​ທຳ​ອິດ​ໃນ​ປະ​ຫວັດ​ສາດ.  ສິນ​ຄ້າ​ປອດ​ພາ​ສີ​ເຊິ່ງ​ກັນ​ລະ​ກັນ​ລະ​ຫວ່າງ​ຈີນ​ກັບ​ຍີ່​ປຸ່ນ​ ຈະ​ກວ​ມ​ເອົາ 86% ໃນ​ທີ່​ສຸດ ເຊິ່ງ​ລວມ​ທັງເຄື່ອງ​ໃຊ້​ປະ​ຈຳ​ວັນ, ລົດ, ເຄື່ອງ​ໃຊ້​ໄຟ​ຟ້າ ແລະ​ອື່ນໆ. ຕາມ​ການ​ຄາດ​ຄະ​ເນ​ຂອງ​ພາກ​ສ່ວນ​ທີ່​ກ່ຽວ​ຂ້ອງ​ຂອງ​ລັດ​ຖະ​ບານ​ຍີ່​ປຸ່ນ​ໃຫ້​ຮູ້​ວ່າ: ສັນ​ຍາ RCEP ອາດ​ຈະ​ຊຸ​ກ​ຍູ້​ໃຫ້​ລ​ວ​ມຍອດ​ຜະ​ລິດ​ຕະ​ພັນ​ພາຍ​ໃນ​ ຫຼື GDP ຕົວ​ຈິງຂອງ​ຍີ່​ປຸ່ນ​ເພີ່ມ​ຂຶ້ນ​ປະ​ມານ 2,7%.

ໃນ​ປີ 2021 ທີ່​ຫ​າ​ກໍ​ຜ່ານ​ພົ້ນ​ໄປ, ເນື່ອງ​ຈາກວ່າ​ເຊື້ອ​ພະ​ຍາດ​ໂຄວິດ-19 ສືບ​ຕໍ່​ແຜ່​ລະ​ບາດ​ຢູ່​ທົ່ວ​ໂລກ​ຢ່າງ​ຂະ​ໜາດ​ໃຫຍ່, ອາ​ເມ​ຣິ​ກາ ແລະ​ເອີ​ຣົບ​ໄດ້​ເຂົ້າ​ສູ່​ໄລ​ຍະ​ທີ່​ມີ​ການ​ແຜ່​ລະ​ບາດ​ຢ່າງຮ້າຍ​ແຮງ​ທີ່​ສຸດ​ຮອບ​ໃໝ່, ​ໃນ​ນັ້ນ, ອາ​ເມ​ຣິ​ກາໄດ້​ສ້າງ​ສະ​ຖິ​ຕິໂລກ​​ຄັ້ງ​ໃໝ່ ທີ່​ມີ​​ຜູ້​​ຕິດ​ເຊື້ອ​ພະ​ຍາດ​ໂຄວິດ-19 ເພີ່ມ​ໃໝ່ຕໍ່​ມື້ຫຼາຍກວ່າ 1.000.000 ກໍ​ລະ​ນີ ເຊິ່ງ​ໄດ້​ເຮັດ​ໃຫ້​ເສດ​ຖະ​ກິດ​ອາ​ເມ​ຣິ​ກາ ແລະ​ເອີ​ຣົບ​ເສື່ອມ​ໂຊມ​ລົງ​ຕື່ມ​ອີກ ແລະ​​ເຮັດ​ໃຫ້ການ​ຟື້ນ​ຟູ​ເສດ​ຖະ​ກິດ​​ຕ້ອງປະ​ເຊີນ​ກັບ​ຄວາມ​ບໍ່​ແນ່ນອນ ແລະ​ຄວາ​ມ​ສ່ຽງ. ໃນ​ໄລ​ຍ​ະ​ທີ່​ເສດ​ຖະ​ກິດ​ໂລກ​ຕົ​ກ​ຢູ່​ໃນ​ສະ​ພາບ​ຄວາມ​ຫຍຸ້ງ​ຍາກ​ຢູ່​ນັ້ນ, ​ເມື່ອ​ສັນ​ຍາ RCEP ມີ​ຜົນ​ບັງ​ຄັບ​ໃຊ້​ ຈະ​ເສີມ​ຂະ​ຫຍາຍ​ບົດ​ບາດ​ທີ່​ສຳ​ຄັນ​ທີ່​ສຸດ​ໃນ​ການ​ນຳ​ພາ​ການ​ຟື້ນ​ຟູ​ເສດ​ຖະ​ກິດ​ໂລກ.

ຕາມ​ການ​ປະ​ເມີນ​ຂອງກອງ​ປະ​ຊຸມ​ການ​ຄ້າ ແລະ​ການ​ພັດ​ທະ​ນາ​ຂອງ​ອົງ​ການ​ສະ​ຫະ​ປະ​ຊາ​ຊາດ ຫຼື UNCTAD , ສັນ​ຍາ RCEP ຈະ​ເຮັດ​ໃຫ້​ຍອດ​ມູນ​ຄ່າ​ການ​ຄ້າພາຍ​ໃນ​ພາກ​ພື້ນ​ເພີ່ມ​ຂຶ້ນ​ປະ​ມານ 265 ຕຶ້ຢ​ວນ, ​ໃນ​ໄລ​ຍະ​ນັ້ນ, ອາ​ຊີ​ຕາ​ເວັນ​ອອກ​ຈະ​ກາຍ​ເປັນ “​ສູ​ນ​ກາງ​ການ​ຄ້າ​ຂອງ​ໂລກ​ແຫ່ງ​ໃໝ່”. ສ່ວນ 15 ປະ​ເທດ​ທີ່​ໄດ້​ລົງ​ນາມ​ໃນ​ສັນ​ຍາ RCEP ຈະ​ນຳ​ໃຊ້​ເຂດ​ການ​ຄ້າ​ເສ​ລີ​ຂະ​ໜາດ​ໃຫຍ່​ຂອງ​ພາກ​ພື້ນ ​ເພື່ອບັນ​ລຸ​ເປົ້າ​ໝາຍ​ການ​ພັດ​ທະ​ນາປະ​ເທດ​ຕົນ ແລະ​ພາ​ກ​ພື້ນ​ໄດ້​ຢ່າງວ່ອງ​ໄວ, ເຮັດ​ໃຫ້ອາ​ຊີ​ກັບ​ຄືນ​ສູ່​ຖາ​ນະ​ໃຈ​ກາງ​ຂອງ​ເວ​ທີ​ເສດ​ຖະ​ກິດ​ໂລກ ພ້ອມ​ດຽວ​ກັນ​ນີ້ ກໍ​ຈະ​ເປັນ​ການເລັ່ງ​ການເຄື່ອນ​ຍ້າຍ​ສູນກາງ​ເສດ​ຖະ​ກິດ​ໂລກ​ໄປ​ສູ່​ອາ​ຊີ.