ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ອາເມຣິກາໄດ້ປະກາດຈະຢຸດຕິການເກັບກຳສະຖິຕິຈຳນວນຜູ້ຕິດເຊື້ອພະຍາດໂຄວິດ-19 ແບບກະທັນຫັນ ເຊິ່ງໄດ້ເຮັດໃຫ້ພວກເຮົາຮູ້ສຶກມິຄວາມກັງວົນ ແລະຕ້ອງລະວັງເພີ່ມຂຶ້ນ.
ໃນຫຼາຍມື້ລຽນຕິດທີ່ຜ່ານມາ, ຍ້ອນວ່າເຊື້ອໂອມິຄຣອນແຜ່ລະບາດຢ່າງວ່ອງໄວທີ່ສຸດ, ຜູ້ຕິດເຊື້ອພະຍາດໂຄວິດ-19 ທີ່ເພີ່ມໃໝ່ຕໍ່ມື້ຢູ່ອາເມຣິກາກໍໄດ້ເພີ່ມຂຶ້ນຢ່າງວ່ອງໄວ ແລະຈຳນວນຜູ້ຕິດເຊື້ອພະຍາດເພີ່ມໃໝ່ຕໍ່ມື້ມີຫຼາຍກວ່າລ້ານກໍລະນີ ເຊິ່ງໄດ້ກາຍເປັນ “ສະພາບປົກກະຕິຄັ້ງໃໝ່”ຢູ່ອາເມຣິກາ. ມາຮອດຕອນເຊົ້າວັນທີ 17 ມັງກອນນີ້, ຈຳນວນຜູ້ຕິດເຊື້ອພະຍາດໂຄວິດ-19 ຢູ່ອາເມຣິກາມີເຖິງ 66.940.000 ກໍລະນີ ແລະມີຜູ້ເສຍຊີວິດຫຼາຍກວ່າ 870.000 ຄົນ.
ອາເມຣິກາມີຄວາມສັບສົນໃນການວາງນະໂຍບາຍປ້ອງກັນ ແລະຄວບຄຸມພະຍາດໂຄວິດ-19, ພັກການເມືອງຕ່າງໆໄດ້ຫັນບັນຫາຕ້ານກັບພະຍາດໂຄວິດ-19 ເປັນບັນຫາການເມືອງ ແລະດຳເນີນການໂຄສະນາແບບລ້າງສະໝອງປະຊາຊົນ ໂດຍມີຈຸດປະສົງເພື່ອປິດບັງຄວາມຈິງ ແລະອື່ນໆ ເຊິ່ງໄດ້ເຮັດໃຫ້ອາເມຣິກາກາຍເປັນ “ປະເທດທີ່ປະລາໄຊໃນການຕ້ານກັບການແຜ່ລະບາດຂອງພະຍາດໂຄວິດ-19”.
ທີ່ຈິງແລ້ວ, ອາເມຣິກາບໍ່ພຽງແຕ່ຕ້ອງມີຄວາມຮັບຜິດຊອບຕໍ່ຄວາມປະລາໄຊໃນການຕ້ານກັບການແຜ່ລະບາດຂອງພະຍາດໂຄວິດ-19 ຢູ່ປະເທດຕົນເທົ່ານັ້ນ, ຍັງຕ້ອງມີຄວາມຮັບຜິດຊອບທີ່ບໍ່ສາມາດປະຕິເສດໄດ້ທີ່ເຮັດໃຫ້ການແຜ່ລະບາດຂອງພະຍາດໂຄວິດ-19 ຢູ່ທົ່ວໂລກຮ້າຍແຮງຂຶ້ນອີກດ້ວຍ.
ການສັນຈອນຂອງຄົນເປັນສາເຫດສຳຄັນທີ່ສຸດທີ່ເຮັດໃຫ້ເຊື້ອພະຍາດໂຄວິດ-19 ແຜ່ລະບາດກວ້າງອອກ. ພາຍຫຼັງເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ເພື່ອຮັບມືກັບການແຜ່ລະບາດຂອງເຊື້ອພະຍາດ, ຫຼາຍປະເທດໄດ້ວາງມາດຕະການປ້ອງກັນ ແລະຄວບຄຸມພະຍາດທີ່ເຂັ້ມງວດ. ໃນໄລຍະທີ່ຫາກໍເກີດມີການແຜ່ລະບາດຂອງພະຍາດໂຄວິດ-19, ລັດຖະບານອາເມຣິກາຈົງໃຈຖືເບົາຄວາມສ່ຽງຂອງການແຜ່ລະບາດຂອງພະຍາດໂຄວິດ-19 ແລະມີຄວາມສັບສົນໃນການເປີດເຜີຍຂໍ້ມູນຂ່າວສານ, ການວາງມາດຕະການປ້ອງກັນ ແລະອື່ນໆ; ພາຍຫຼັງອາເມຣິກາໄດ້ກາຍເປັນຈຸດໃຈກາງຂອງການແຜ່ລະບາດຂອງພະຍາດໂຄວິດ-19 ຂອງທົ່ວໂລກແລ້ວ, ລັດຖະບານອາເມຣິກາຍັງຄົງມີທ່າທີ “ບໍ່ປ້ອງກັນ” ການແຜ່ລະບາດຂອງພະຍາດດັ່ງກ່າວ, ປ່ອຍປະລະເລີຍໃຫ້ຊາວອາເມຣິກາເດີນທາງໄປປະເທດຕ່າງໆໃນທົ່ວໂລກຕາມໃຈ ເຊິ່ງໄດ້ເລັ່ງໃຫ້ການແຜ່ລະບາດຂອງພະຍາດໂຄວິດ-19 ຢູ່ທົ່ວໂລກໄວຂຶ້ນ.
ພ້ອມດຽວກັນນັ້ນ, ອາເມຣິກາຍັງໄດ້ປະຕິບັດຕາມ “ລັດທິຊາດນິຍົມດ້ານວັກຊີນ” ໂດຍທັງປະຕິເສດການຮ່ວມມືກັບສາກົນດ້ານວັກຊີນ ທັງປະຕິບັດ “ລັດທິກໍ່ການຮ້າຍດ້ວຍຂໍ້ອ້າງການຄົ້ນຫາແຫຼ່ງກຳເນີດຂອງເຊື້ອພະຍາດ” , ຕັດສິນແບບຂາດຫຼັກຖານດ້ວຍຕົນເອງວ່າ ປະເທດໃດສົມຄວນເປັນແຫຼ່ງກຳເນີດຂອງເຊື້ອພະຍາດໂຄວິດ-19 ເພື່ອບັນລຸຈຸດປະສົງດ້ານການເມືອງຂອງຕົນ ທັງຖິ້ມໂທດໃສ່ປະເທດອື່ນ ແລະທຳລາຍລະບຽບການສາກົນໃນການຕ້ານກັບການແຜ່ລະບາດຂອງພະຍາດໂຄວິດ-19.
ໃນເດືອນເມສາຂອງປີ 2021, ໃນເວລາໃຫ້ສຳພາດຕໍ່ບໍລິສັດວິທະຍຸກະຈາຍສຽງໂກລຳເບຍ ຫຼື CBS, ທ່ານໂນມາ ໂຕເຣສ, ສະມາຊິກສະພາຕ່ຳຂອງອາເມຣິກາກ່າວວ່າ: “ ຂ້າພະເຈົ້າມີຄວາມໝັ້ນໃຈວ່າ ອາເມຣິກາກຳລັງສົ່ງອອກເຊື້ອພະຍາດ.” ໃນເດືອນພຶດສະພາປີ 2021, ທ່ານໂນມ ໂຈມສະກີ, ນັກວິຊາການທີ່ມີຊື່ສຽງຂອງອາເມຣິກາ ກໍໄດ້ໃຫ້ສຳພາດຕໍ່ສື່ມວນຊົນວ່າ: ຜູ້ນຳອາເມຣິກາບໍ່ພຽງແຕ່ຕ້ອງມີຄວາມຮັບຜິດຊອບຕໍ່ຊາວອາເມຣິກາທີ່ເສຍຊີວິດເທົ່ານັ້ນ, ຍັງຕ້ອງມີຄວາມຮັບຜິດຊອບຕໍ່ຊາວໂລກທີ່ເສຍຊີວິດເຊັ່ນກັນ.
ມາຮອດປັດຈຸບັນ, ເຊື້ອພະຍາດກາຍພັນໂອມິຄຣອນໄດ້ເຮັດໃຫ້ອາເມຣິກາກາຍເປັນຈຸດໃຈກາງຂອງການແຜ່ລະບາດຂອງພະຍາດໂຄວິດ-19 ອີກຄັ້ງໃໝ່. ໃນເວລາທີ່ມີກໍລະນີຕິດເຊື້ອພະຍາດເພີ່ມໃໝ່ຕໍ່ມື້ຢູ່ອາເມຣິກາຫຼາຍກວ່າລ້ານກໍລະນີ, ອາເມຣິກາຍັງໄດ້ຖືເບົາຄວາມອັນຕະລາຍຂອງເຊື້ອພະຍາດກາຍພັນໂອມິ
ຄຣອນ ແລະພັນລະນາວ່າມັນເປັນເຊື້ອພະຍາດທີ່ “ບໍ່ສະແດງອາການ” ຫຼື “ອາການເບົາ”. ສຳລັບກໍລະນີທີ່ຜູ້ຕິດເຊື້ອພະຍາດດັ່ງກ່າວເກີດມີອາການດັ່ງບໍ່ຮູ້ກິ່ນ ແລະປອດມີຈຸດດ່າງດຳນັ້ນ, ອາເມຣິກາບໍ່ໄດ້ກ່າວເຖິງເລື່ອງນີ້ຈັກເທື່ອ. ພ້ອມດຽວກັນນີ້, ອາເມຣິກາຍັງສືບຕໍ່ສົ່ງອອກເຊື້ອພະຍາດສູ່ຕ່າງປະເທດເລື້ອຍໆ.
ຫວ່າງບໍ່ດົນມານີ້, ອາເມຣິກາໄດ້ຍົກເລີກການກວດນິວເຄລອິກຫາເຊື້ອພະຍາດໂຄວິດ-19 ສຳລັບທະຫານໃນກອງທັບອາເມຣິກາທີ່ຈະໄປປະຈຳການຢູ່ຍີ່ປຸ່ນ ເຊິ່ງໄດ້ເຮັດໃຫ້ທະຫານຫຼາຍຄົນຢູ່ຖານທັບອາເມຣິກາປະຈຳຢູ່ຍີ່ປຸ່ນຕິດເຊື້ອພະຍາດໂຄວິດ-19. ພາຍຫຼັງຖານທັບອາເມຣິກາຢູ່ຍີ່ປຸ່ນໄດ້ເກີດມີການແຜ່ລະບາດຂອງເຊື້ອພະຍາດແລ້ວ, ທະຫານອາເມຣິກາຍັງມັກໄປທ່ຽວຢູ່ເຂດທີ່ມີຄົນໜາແໜ້ນໂດຍບໍ່ໃສ່ຜ້າປິດປາກ ເຊິ່ງໄດ້ເຮັດໃຫ້ສະພາບການຕິດເຊື້ອພະຍາດຢູ່ຍີ່ປຸ່ນກຳລັງດີຂຶ້ນຍ້ອນໄດ້ໃຊ້ມາດຕະການ “ປິດປະເທດ”ນັ້ນ ມີການແຜ່ລະບາດຮ້າຍແຮງຂຶ້ນອີກ ແລະມີຈຳນວນກໍລະນີຕິດເຊື້ອພະຍາດເພີ່ມໃໝ່ຕໍ່ມື້ຫຼາຍກວ່າ 8.000 ກໍລະນີ. ສະນັ້ນ, ໃນວັນທີ 9 ມັງກອນນີ້, ທ່ານໂຢຊິມາຊາ ຮາຢາຊິ, ລັດຖະມົນຕີກະຊວງການຕ່າງປະເທດຍີ່ປຸ່ນຈຶ່ງໄດ້ໂທຫາທ່ານອັນໂຕນີ ບຣິນເກນ, ລັດຖະມົນຕີກະຊວງການຕ່າງປະເທດອາເມຣິກາ ເພື່ອສະແດງການປະທ້ວງ.
ຂໍ້ມູນຄວາມຈິງໄດ້ພິສູດໃຫ້ເຫັນແລ້ວວ່າ: ອາເມຣິກາບໍ່ສາມາດປະຕິເສດຄວາມຮັບຜິດຊອບທີ່ເຮັດໃຫ້ການແຜ່ລະບາດຂອງພະຍາດໂຄວິດ-19 ຢູ່ທົ່ວໂລກຮ້າຍແຮງຂຶ້ນ. ການກະທຳຂອງອາເມຣິກາທີ່ປະໝາດຄວາມປອດໄພດ້ານຊີວິດຂອງປະຊາຊົນປະເທດຕົນ ແລະບໍ່ມີຄວາມຮັບຜິດຊອບຕໍ່ວຽກງານສາທາລະນະສຸກຂອງທົ່ວໂລກນັ້ນ ຈະຕ້ອງຖືກປະຊາຄົມໂລກດູຖຸກຢຽບຫຍາມຢ່າງແນ່ນອນ.
ຄຳເຫັນ
0