ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 25 ມັງກອນນີ້, ເນື່ອງໃນໂອກາດບຸນປະເພນີປີໃໝ່ຂອງສອງປະເທດຈີນ-ຫວຽດນາມໃກ້ຈະໝູນວຽນມາເຖິງນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ແລະທ່ານຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມໄດ້ສົ່ງສານອວຍພອນເຊິ່ງກັນແລະກັນເນື່ອງໃນໂອກາດບຸນປີໃໝ່.
ໃນສານອວຍພອນຂອງທ່ານສີຈິ້ນຜິງໄດ້ລະບຸວ່າ, ຈີນ ແລະ ຫວຽດນາມເປັນປະເທດສັງຄົມນິຍົມທີ່ມີພູຜາປ່າໄມ້ ແລະ ແມ່ນ້ຳຕິດຈອດກັນ, ແມ່ນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ. ປັດຈຸບັນນີ້, ການປ່ຽນແປງໃນຮອບຮ້ອຍປີທີ່ບໍ່ເຄີຍມີມາກ່ອນ ແລະ ການແຜ່ລະບາດຂອງພະຍາດໂຄວິດ-19ທີ່ຮ້າຍແຮງ ແລະ ສະຫຼັບສັບຊ້ອນ, ໂລກໄດ້ເຂົ້າສູ່ໄລຍະທີ່ມີການປ່ຽນແປງອັນໃຫຍ່ຫຼວງ ແລະ ມີຄວາມປັ່ນປ່ວນທີ່ໜັກໜ່ວງ, ແຕ່ຈີນ ແລະ ຫວຽດນາມໄດ້ມີຜົນປະໂຫຍດຮ່ວມກັນຢ່າງກວ້າງຂວາງກວ່າເກົ່າ. ສອງພັກຈີນ ແລະ ຫວຽດນາມລ້ວນແຕ່ຖືປະຊາຊົນເປັນໃຈກາງ, ໄດ້ລົງເລິກການຮ່ວມມືມິດຕະພາບລະຫວ່າງຈີນ-ຫວຽດນາມຢ່າງບໍ່ຢຸດຢັ້ງ, ສອງປະເທດໄດ້ປະສານສົມທົບກັນຊຸກຍູ້ການພັດທະນາເສດຖະກິດສັງຄົມ ການປ້ອງກັນແລະຄວບຄຸມພະຍາດໂຄວິດ-19, ຊຸກຍູ້ພາລະກິດການປະຕິຮູບແລະເປີດປະຕູສູ່ພາຍນອກ, ການປ່ຽນແປງໃໝ່ຂອງສອງປະເທດໄດ້ຮັບຜົນສຳເລັດອັນໃໝ່ຢ່າງບໍ່ຢຸດຢັ້ງ, ເຊິ່ງສະແດງໃຫ້ເຫັນເຖິງທ່າແຮງ ແລະ ພະລັງແຮງຂອງລະບອບສັງຄົມນິຍົມທີ່ມີຊີວິດຊີວາ.
ທ່ານສີຈິ້ນຜິງກ່າວຕື່ມວ່າ, ເມື່ອຈ້ອງເບິ່ງປີ 2022, ຂ້າພະເຈົ້າຍິນດີສືບຕໍ່ແລກປ່ຽນ ກັບສະຫາຍເລຂາທິການໃຫຍ່ຫງວຽນຟູຈ້ອງຢ່າງໃກ້ຊິດ, ຊີ້ນຳນຳພາທິດທາງການຂະຫຍາຍການພົວພັນຈີນ-ຫວຽດນາມ. ຫວັງໃຫ້ສອງຝ່າຍປະຕິບັດຕາມຈິດໃຈ “4 ດີ” ຄື ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ, ຮັດແໜ້ນມິດຕະພາບອັນເປັນມູນເຊື້ອ, ເພີ່ມທະວີຄວາມໄວ້ເນື້ອເຊື່ອໃຈກັນດ້ານການເມືອງ, ລົງເລິກການຮ່ວມມືທີ່ຕິດແທດຕົວຈິງ, ຄຸ້ມຄອງ ແລະ ຄວບຄຸມຂໍ້ຂັດແຍ້ງກັນຢ່າງເໝາະສົມ, ຮ່ວມມືກັນຮັບມືກັບສິ່ງທ້າທາຍ, ຊຸກຍູ້ການພົວພັນຈີນ-ຫວຽດນາມໃຫ້ໄດ້ຮັບໝາກຜົນອັນໃໝ່, ຊຸກຍູ້ການຮ່ວມມືພາກພື້ນໃຫ້ກ້າວຂຶ້ນສູ່ລະດັບສູງກວ່າເກົ່າ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ໃນສານອວຍພອນຂອງທ່ານຫງວຽນຟູຈ້ອງໄດ້ລະບຸວ່າ, ພາຍໃຕ້ເບື້ອງຫຼັງທີ່ ສະຖານະການສາກົນ ແລະພາກພື້ນເກີດມີການປ່ຽນແປງຢ່າງເລິກເຊິ່ງ ພາລະກິດການສ້າງສັງຄົມນິຍົມຂອງສອງປະເທດພວມກ້າວເຂົ້າສູ່ໄລຍະໃໝ່ນັ້ນ, ຂ້າພະເຈົ້າຍິນດີຮ່ວມກັບສະຫາຍເລຂາທິການໃຫຍ່, ສືບຕໍ່ເອົາໃຈໃສ່ ແລະ ຊີ້ນຳນຳພາຂັ້ນຕ່າງໆ ພາກສ່ວນຕ່າງໆ ແລະ ທ້ອງຖິ່ນຕ່າງໆຂອງສອງຝ່າຍຈັດຕັ້ງປະຕິບັດຄວາມເຫັນທີ່ເປັນເອກະພາບກັນລະຫວ່າງການນຳຂັ້ນສູງໃຫ້ດີ, ເພີ່ມທະວີຄວາມໄວ້ເນື້ອເຊື່ອໃຈກັນດ້ານການເມືອງ, ເພີ່ມທະວີການຮ່ວມມືທີ່ຕິດແທດຕົວຈິງໃນຂົງເຂດຕ່າງໆ, ໂດຍສະເພາະແມ່ນການຮ່ວມມືໃນການຕ້ານກັບພະຍາດ ແລະ ການຮ່ວມມືທາງດ້ານເສດຖະກິດການຄ້າ ການລົງທຶນ, ເພີ່ມທະວີການແລກປ່ຽນ ການໄປມາຫາສູ່ກັນລະຫວ່າງປະຊາຊົນ, ເພີ່ມກຳລັງຊຸກດັນອັນໃໝ່ເພື່ອຊຸກຍູ້ການພົວພັນມິດຕະພາບຖານບ້ານໃກ້ເຮືອນຄຽງ ແລະ ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ-ຈີນໃຫ້ກ້າວຂຶ້ນສູ່ລະດັບສູງກວ່າເກົ່າ.
ຄຳເຫັນ
0