ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເດືອນກໍລະກົດປີ2013, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນໄດ້ເດີນທາງໄປຢ້ຽມຢາມບ້ານຖາຢວນຈ່ວງເມືອງເຈີ້ງຕິ້ງແຂວງເຫີເປີຍ. ທ່ານປະທານສີຈິ້ນຜິງພ້ອມດ້ວຍຄະນະແມ່ນໄດ້ເດີນທາງໄປເຖິງບ້ານຖາຢວນຈ່ວງໃນເວລາ 10 ໂມງຍັງຂອງຕອນເຊົ້າວັນທີ 11, ບໍ່ມີລົດຕຳຫຼວດເປີດທາງໃຫ້, ມີພຽງແຕ່ລົດບັສຂະໜາດກາງສອງຄັນເທົ່ານັ້ນ ໂດຍໄດ້ແຂ່ງຝົນເດີນທາງໄປເຖິງປະຕູຕຶກນ້ອຍໆທີ່ເປັນອາຄານຫ້ອງການຂອງຄະນະກຳມະການຊາວບ້ານ.
ເດືອນມັງກອນປີ2008, ທ່ານສີຈິ້ນຜິງ ກຳມະການປະຈຳກົມການເມືອງສູນກາງພັກກອມມູນິດຈີນ ຄະນະເລຂາທິການສູນກາງພັກກອມມູນິດຈີນໃນເວລານັ້ນໄດ້ເດີນທາງໄປສຳຫຼວດຄົ້ນຄວ້າວຽກງານຢູ່ບ້ານຖາຢວນຈ່ວງ, ຕອນນັ້ນ ທ່ານໄດ້ບອກວ່າ ຈະຕ້ອງກັບມາຢາມພວກສະຫາຍອີກຢ່າງແນ່ນອນ. ທ່ານຢິນຈີ້ຜິງ ເລຂາໜ່ວຍພັກບ້ານຖາຢວນຈ່ວງບໍ່ນຶກເລີຍວ່າ ຫຼັງຈາກນັ້ນ 5 ປີ, ທ່ານສີຈິ້ນຜິງໄດ້ ກັບມາຢາມບ້ານຂອງຕົນອີກຄັ້ງໜຶ່ງຢ່າງແທ້ຈິງ.
ທ່ານສີຈິ້ນຜິງໄດ້ສຸ່ມເລືອກໄປເຮືອນຂອງຊາວບ້ານຜູ້ຊື່ວ່າ ເຊ້ຈິ່ນຂ້າຍ. ເມື່ອຫວນຄືນເຖິງສະພາບການໃນເວລານັ້ນ, ທ້າວເຊ້ຈິ່ນຂ້າຍເວົ້າວ່າ “ພະນັກງານບ້ານໄດ້ເຄາະປະຕູ, ທ່ານເລຂາທິການໃຫຍ່ກໍຍ່າງເຂົ້າມາໃນເຮືອນ. ຕອນນັ້ນ, ຂ້ອຍກຳລັງຫຼິ້ນຄອມພິວເຕີ, ນ້ອງສາວກຳລັງເບິ່ງໂທລະພາບ, ສ່ວນຍ່າແລະພໍ່ແມ່ຂ້ອຍຕ່າງກໍຄານຳວຽກອື່ນ, ຕອນນັ້ນ,ຈັ່ງແມ່ນບໍ່ກ້າເຊື່ອໃນສາຍຕາຂອງຕົນເອງເລີຍ.”
ທ່ານສີຈິ້ນຜິງເມື່ອຍ່າງເຂົ້າໄປໃນເຮືອນ ກໍໄດ້ຈັບມືກັບແຕ່ລະຄົນໃນຄອບຄົວທ້າວເຊ້ຈິ່ນຂ້າຍຢ່າງສະໜິດສະໜົມ ພ້ອມທັງໂອ້ລົມກັບຄອບຄົວນັ້ນແບບເປັນກັນເອງ, ທ່ານໄດ້ຖາມດ້ວຍຄວາມສະໜິດສະໜົມກ່ຽວກັບລາຍຮັບຂອງຄອບຄົວ, ການຮຽນຂອງເດັກນ້ອຍ, ການປະກັນໄພຄ່າຄອງຊີບຂອງຜູ້ເຖົ້າ ແລະອື່ນໆ. ເຊິ່ງຍັງຄົງສະໜິດສະໜົມເປັນແບບທຳມະຊາດຄືກັນກັບຕອນທີ່ທ່ານລົງສຳຫຼວດຄົ້ນຄວ້າຢູ່ຊົນນະບົດໃນເມື່ອກ່ອນ.
ວັນທີ 11 ກໍລະກົດປີ2013, ທ່ານສີຈິ້ນຜິງໄດ້ໂອ້ລົມກັບພະນັກງານແລະພີ່ນ້ອງປະຊາຊົນບ້ານຖາຢວນຈ່ວງ.
ຢູ່ສູນເຄື່ອນໄຫວສຳລັບຜູ້ເຖົ້າຂອງບ້ານຖາຢວນຈ່ວງ, ໂຕະຍາວທີ່ປະກອບດ້ວຍໂຕະຫຼາຍໜ່ວຍ, ມີຕັ່ງອີ້ຊະນິດຕ່າງໆວາງຢູ່ອ້ອມໂຕະ, ທຸກສິ່ງຢ່າງໃນເຮືອນຍັງເໝືອນເດີມຄືກັບຕອນທີ່ທ່ານສີຈິ້ນຜິງໄດ້ຈັດການສົນທະນາແລກປ່ຽນຄວາມເຫັນກັບຊາວບ້ານໃນວັນທີ 11 ກໍລະກົດປີ2013.
ນາງ ຕູ້ຈ່ວນ ຄູສອນໂຮງຮຽນປະຖົມບ້ານຖາຢວນຈ່ວງໄດ້ເລົ່າຄືນຫຼັງດ້ວຍຄວາມສຸກໃຈວ່າ: “ທ່ານເລຂາທິການໃຫຍ່ໄດ້ຈັບມືກັບທຸກຄົນ, ມືຂອງທ່ານອົບອຸ່ນຫຼາຍ, ເຮັດໃຫ້ພວກເຮົາຮູ້ສຶກເຖິງຄວາມເອົາໃຈໃສ່ແລະການໃຫ້ກຳລັງໃຈຈາກທ່ານ.”
ວັນທີ 11 ກໍລະກົດປີ2013,ທ່ານສີຈິ້ນຜິງຊອກຮູ້ສະພາບການປະຕິບັດໜ້າທີ່ວຽກງານຂອງຄະນະກຳມະການຊາວບ້ານແລະໜ່ວຍພັກບ້ານຖາຢວນຈ່ວງ.
ຢູ່ເທິງຝາໃນລະບຽງຂອງຕຶກອາຄານຫ້ອງການຂອງຄະນະກຳມະການຊາວບ້ານໄດ້ຕິດ “ໃບຄຳໝັ້ນສັນຍາ” ໃບໜຶ່ງ. ໃນທຸກໆຕົ້ນປີ, ຜູ້ແທນສະມາຊິກພັກແລະຜູ້ແທນຊາວບ້ານກໍໄດ້ຈັດກອງປະຊຸມເພື່ອປຶກສາຫາລືແລະຕົກລົງເປົ້າໝາຍພັດທະນາຂອງບ້ານໃນປີນັ້ນ ເຊິ່ງລ້ວນແຕ່ແມ່ນວຽກງານລະອຽດທີ່ຕິດພັນກັບການພັດທະນາຂອງບ້ານແລະຜົນປະໂຫຍດຂອງຊາວບ້ານ, ຄະນະໜ່ວຍພັກແລະຄະນະກຳມະການຊາວບ້ານໄດ້ຮັບເອົາໜ້າວຽກພ້ອມທັງໃຫ້ຄຳໝັ້ນສັນຍາແລ້ວຕິດໄວ້ຢູ່ເທິງຝາໃນຕຶກອາຄານຫ້ອງການຂອງຄະນະກຳມະການຊາວບ້ານ ເພື່ອຮັບເອົາການຕິດຕາມກວດກາຈາກຊາວບ້ານທັງຫຼາຍ.
ວັນທີ 12 ມັງກອນປີ2008, ທ່ານສີຈິ້ນຜິງໄດ້ເດີນທາງໄປສຳຫຼວດຄົ້ນຄວ້າວຽກງານການກໍ່ສ້າງການຈັດຕັ້ງພັກຂັ້ນຮາກຖານຢູ່ບ້ານຖາຢວນຈ່ວງໂດຍກ່າວວ່າ: “ລົດໄຟແລ່ນໄດ້ໄວກໍແມ່ນຕ້ອງອາໄສຫົວຈັກລົດໄຟ, ຫວັງວ່າພວກສະຫາຍຈົ່ງເສີມຂະຫຍາຍບົດບາດທີ່ເປັນປ້ອມສູ້ຮົບໃຫ້ດີ, ນຳພາປະຊາຊົນກ້າວໄປສູ່ຊີວິດທີ່ອີ່ມໜຳສຳລານໂດຍໄວ.”
ສຳນັກງານຄະນະກຳມະການຊາວບ້ານຖາຢວນຈ່ວງ
ໃນຫຼາຍປີຜ່ານມານີ້, ໂດຍຈື່ຈຳຄຳສັ່ງສອນຂອງທ່ານສີຈິ້ນຜິງໃຫ້ແໜ້ນ, ທ່ານຢິນຈີ້ຜິງ ເລຂາໜ່ວຍພັກບ້ານຖາຢວນຈ່ວງໄດ້ນຳພາຄະນະໜ່ວຍພັກແລະຄະນະກຳມະການຊາວບ້ານປະຕິບັດຕາມ ກົດເຫຼັກ “3 ບໍ່ 3 ປອດໃສຂາວສະອາດ”ຢ່າງເຂັ້ມງວດຄື “ບໍ່ກິນ, ບໍ່ເອົາ, ບໍ່ສໍ້ລາດບັງຫຼວງ”, “ຕົນເອງປອດໃສຂາວສະອາດ, ຄອບຄົວປອດໃສຂາວສະອາດແລະໝູ່ເພື່ອນປອດໃສຂາວສະອາດ”, ແຕ່ລະປີ, ພະນັກງານບ້ານຕ່າງກໍໄດ້ໃຫ້ຄຳໝັ້ນສັນຍາແລະສ້າງຜົນງານທີ່ດີ, ຄອບຄົວສະມາຊິກພັກໄດ້ແຂວນປ້າຍແບບຢ່າງ “ຄອບຄົວຂ້ອຍເປັນສະມາຊິກພັກ” ແລະຮັບຜິດຊອບຕິດຕໍ່ພົວພັນແລະຊ່ວຍເຫຼືອຄອບຄົວຜູ້ທຸກຍາກ.
ທ່ານຢິນຈີ້ຜິງ ເລຂາໜ່ວຍພັກບ້ານຖາຢວນຈ່ວງກ່າວວ່າ: “ທ່ານເລຂາທິການໃຫຍ່ເວົ້າວ່າ: ປະເທດຊາດກໍແມ່ນປະຊາຊົນ, ປະຊາຊົນກໍແມ່ນປະເທດຊາດ.ໃນຖານະເປັນພະນັກງານຂັ້ນຮາກຖານຂອງພັກ, ຕ້ອງມີປະຊາຊົນໄວ້ຢູ່ໃນໃຈ, ເຮັດທຸກສິ່ງຢ່າງຕ້ອງຄິດຫາສ່ວນລວມ, ເມື່ອມີສະຕິເພື່ອສ່ວນລວມກໍຈະສາມາດຮັກສາຄວາມຍຸຕິທຳໄດ້, ແນ່ນອນກໍຈະມີຄວາມສາມັກຄີ,ເຮັດວຽກໃດກໍຈະປະສົບຜົນສຳເລັດໄດ້.”
ຫຸ່ນຈຳລອງຂອງບ້ານຖາຢວນຈ່ວງ
ຢູ່ນິຄົມອັດສະລີຍະທີ່ຫາກໍ່ສ້າງຂຶ້ນໃໝ່ຂອງບ້ານຖາຢວນຈ່ວງ, ລະບົບຄວບຄຸມອຸນຫະພູມແລະຄວາມຊຸ່ມໂດຍອັດຕະໂນມັດ, ການປູກພືດໂດຍບໍ່ໃຊ້ດິນ, ລະບົບປູກພືດໂດຍບໍ່ໃຊ້ດິນກັບການລ້ຽງປາພ້ອມກັນ, ເຊິ່ງເປັນສິ່ງໃໝ່ໆທີ່ໜ້າປະທັບໃຈຫຼາຍ. ນິຄົມແຫ່ງນີ້ໄດ້ລວມເຖິງຫຼາຍອຸດສາຫະກຳເຊັ່ນການຄົ້ນຄວ້າວິທະຍາສາດ, ວັດທະນະທຳ ການທ່ອງທ່ຽວ ແລະອື່ນໆ, ເພື່ອສຸມໃສ່ການບັນລຸເປົ້າໝາຍການພັດທະນາແບບເຊື່ອມໂຍງອຸດສາຫະກຳໃນຊົນນະບົດ.
ວັນທີ 11 ກໍລະກົດປີ2013，ໃນເວລາທີ່ລົງຢ້ຽມຢາມແລະສຳຫຼວດກວດກາວຽກງານຢູ່ບ້ານຖາຢວນຈ່ວງ, ທ່ານສີຈິ້ນຜິງໄດ້ມີຂໍ້ຮຽກຮ້ອງວ່າ: “ພວກສະຫາຍຕ້ອງເຂົ້າສູ່ສັງຄົມອີ່ມໜຳສຳລານລ່ວງໜ້າໃນທົ່ວປະເທດ, ພັດທະນາກະສິກຳໃຫ້ຫັນເປັນອຸດສາຫະກຳ, ພັດທະນາວຽກງານການບໍລິການລ້ຽງດູຜູ້ເຖົ້າໃຫ້ຫັນເປັນຕະຫຼາດແລະພັດທະນາການທ່ອງທ່ຽວໃຫ້ເປັນລະບຽບແບບແຜນ.”
ຂໍ້ຮຽກຮ້ອງນີ້ໄດ້ກາຍເປັນທິດທາງຊີ້ນຳການພັດທະນາບ້ານຖາຢວນຈ່ວງ, ພະນັກງານແລະປະຊາຊົນທົ່ວທັງບ້ານໄດ້ພາກັນສຸມຄວາມພະຍາຍາມຮ່ວມກັນເພື່ອປະຕິບັດຂໍ້ຮຽກຮ້ອງນີ້ໃຫ້ບັນລຸຜົນເປັນຈິງທີ່ດີງາມ.
ບ້ານຖາຢວນໃນທຸກມື້ນີ້ໄດ້ບັນລຸການຫັນກະສິກຳເປັນອຸດສາຫະກຳ, ຜະລິດຕະພັນກະສິກຳຕ່າງໆເຊັ່ນ ເຂົ້າສານ, ແປ້ງໝີ່, ເຫຼົ້າດອງຢາພື້ນເມືອງນີວປ້າງຫຼື burdock ແລະອື່ນໆໄດ້ສົ່ງໄປຂາຍຢູ່ແຫ່ງຕ່າງໆໃນທົ່ວປະເທດ. ວຽກງານການບໍລິການລ້ຽງດູຜູ້ເຖົ້າໄດ້ຫັນເປັນຕະຫຼາດ, ໂດຍໄດ້ສ້າງສູນບໍລິການລ້ຽງດູຜູ້ເຖົ້າ, ປະກອບມີສະໜາມຫັດກາຍບໍລິຫານ, ສຸກສາລາ, ຮ້ານຊຸບເປີມາເກັດແລະພື້ນຖານໂຄງລ່າງອື່ນໆ, ໄດ້ສ້າງຮູບແບບບໍລິການລ້ຽງດູຜູ້ເຖົ້າແບບໃໝ່ຄື ການບໍລິການລ້ຽງດູຜູ້ເຖົ້າຢູ່ໃນເຮືອນ. ນອກນີ້ ຍັງໄດ້ບັນລຸເປົ້າໝາຍຫັນການທ່ອງທ່ຽວໃຫ້ເປັນລະບຽບແບບແຜນ, ປີ2020, ບ້ານຖາຢວນຈ່ວງໄດ້ຕ້ອນຮັບນັກທ່ອງທ່ຽວຫຼາຍກວ່າ 5 ແສນເທື່ອຄົນ, ລາຍຮັບສັງລວມຈາກການທ່ອງທ່ຽວບັນລຸໄດ້ຫຼາຍກວ່າ 8 ລ້ານຢວນ.
ຮູບຖ່າຍລວມໝູ່ຂອງຊາວບ້ານຖາຢວນຈ່ວງ
ທ່ານຢິນຈີ້ຜິງເລຂາໜ່ວຍພັກບ້ານຖາຢວນຈ່ວງໄດ້ຊີ້ໃສ່ຮູບຖ່າຍລວມໝູ່ຂອງຊາວບ້ານທີ່ຕິດຢູ່ເທິງຝາຕຶກອາຄານຫ້ອງການຂອງຄະນະກຳມະການຊາວບ້ານແລະເວົ້າວ່າ “ເບິ່ງແມ້, ພີ່ນ້ອງຊາວບ້ານທັງຫຼາຍມີໃບໜ້າຍີ້ມແຍ້ມແຈ່ມໃສ ຂະໜາດ!” ທຸກໆສາມປີໃດ, ຊາວບ້ານຍິງຊາຍເຖົ້າແກ່ນ້ອຍໃຫຍ່ທົ່ວບ້ານໄດ້ຖ່າຍຮູບຮ່ວມກັນຄັ້ງໜຶ່ງ, ພາບໃນຮູບຖ່າຍກໍສະແດງເຖິງຄວາມຈະເລີນຍິ່ງຂຶ້ນທຸກຄັ້ງ, ພວກຊາວບ້ານກໍມີໜ້າຕາສົດໃສຂຶ້ນທຸກຄັ້ງ.
ທ່ານຢິນຈີ້ຜິງກ່າວວ່າ: “ພວກຊາວບ້ານທັງຫຼາຍໃຜໆກໍມີຄວາມປາຖະໜາຢ່າງໜຶ່ງທີ່ຫວັງວ່າທ່ານເລຂາທິການໃຫຍ່ສີຈິ້ນຜິງຈະກັບມາຢາມບ້ານຖາຢວນຈ່ວງອີກຄັ້ງໜຶ່ງ.” ບ້ານຖາຢວນຈ່ວງໄດ້ບັນລຸຕາມຂໍ້ຮຽກຮ້ອງຂອງທ່ານເລຂາທິການໃຫຍ່ສີຈິ້ນຜິງທີ່ໃຫ້ກ້າວເຂົ້າສູ່ສັງຄົມອີ່ມໜຳສຳລານລ່ວງໜ້າໃນທົ່ວປະເທດ. ພວກເຮົາຈະຈື່ຈຳຄຳສັ່ງສອນຂອງທ່ານເລຂາທິການໃຫຍ່ຢ່າງແນ່ນອນ, ສືບຕໍ່ກໍ້ແຂນເສື້ອຂຶ້ນ, ສູ້ຊົນເຮັດວຽກເພື່ອສ້າງບ້ານຕົນເອງໃຫ້ກາຍເປັນບ້ານແຖວໜ້າໃນການພັດທະນາຊົນນະບົດໃຫ້ຈະເລີນຮຸ່ງເຮືອງ.
ຄຳເຫັນ
0