ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເດືອນກຸມພາປີ 2018, ທ່ານສີຈິ້ນຜິງໄດ້ເດີນທາງໄປສຳຫຼວດກວດກາວຽກງານຢູ່ບ້ານສ່ານເຫີກິ່ງແຂວງປົກຄອງຕົນເອງເຜົ່າອີລຽງສ່ານແຂວງເສສວນ. ທ່ານໄດ້ໄປຢ້ຽມຢາມເຮືອນຂອງທ້າວຈີຫາວເຢຊິວທີ່ເປັນຄົນທຸກຍາກ ເພື່ອສຳຫຼວດເບິ່ງສະພາບຕົວຈິງ ພ້ອມທັງຝາກຄວາມຢື້ຢາມຖາມຂ່າວຢ່າງອົບອຸ່ນ ແລະ ຮັບຟັງຄວາມຄິດເຫັນຂອງປະຊາຊົນ. ມາຮອດປັດຈຸບັນນີ້, ຢູ່ບ້ານສ່ານເຫີໄດ້ເກີດມີການປ່ຽນແປງຄືແນວໃດ? ຊີວິດການເປັນຢູ່ຂອງທ້າວຈີຫາວເຢຊິວມີສະພາບເປັນແນວໃດ?
ໃນເມື່ອກ່ອນ, ປະຊາຊົນຢູ່ບ້ານສ່ານເຫີມີຊີວິດການເປັນຢູ່ໃນລະດັບຕ່ຳ, ເງື່ອນໄຂດ້ານສາທາລະນະສຸກບໍ່ດີ. ເມື່ອຫວນຄືນເຖິງສະພາບການຕອນທ່ານສີຈິ້ນຜິງໄປສຳຫຼວດກວດກາວຽກງານຢູ່ໃນບ້ານ, ທ້າວຈີຫາວເຢຊິວເວົ້າວ່າ: “ໃນເມື່ອກ່ອນ, ຄົນໃນຄອບຄົວຂ້ອຍເປັນໄຂ້ຫຼືເປັນເຈັບປ່ວຍແລ້ວ ຖ້າຢາກໄປໂຮງໝໍກໍໄກຫຼາຍ, ຄ່າປິ່ນປົວກໍແພງຫຼາຍ, ຈຶ່ງໄດ້ເຊີນໝໍຜີມາຈັດພິທີຢູ່ເຮືອນ, ໝໍຜີບອກວ່າເປັນ ຍ້ອນຜີເຮັດ ຄົນຈຶ່ງເປັນໄຂ້ ແລະເຈັບປ່ວຍ. ໃນເວລາທີ່ທ່ານສີຈິ້ນຜິງມາຢ້ຽມຢາມ ເພິ່ນບອກໃຫ້ພວກເຮົາຮູ້ວ່າ, ໃນອະດີດແມ່ນມີຜີແທ້, ຄວາມງົມງວາຍ, ຄວາມຫຼ້າຫຼັງ ແລະ ຄວາມທຸກຍາກກໍແມ່ນ ຜີ. ຫຼັງຈາກບັນຫາເຫຼົ່ານີ້ໄດ້ຮັບການແກ້ໄຂແລ້ວ, ມີວັດທະນະທຳ, ມີຄວາມສະອາດ, ໄດ້ດຳລົງຊີວິດທີ່ດີແລ້ວ, ຜີ ກໍຈະຖືກຂັບໄລ່ອອກໄປຢ່າງແນ່ນອນ.”
ເຮືອນໃໝ່ຂອງປະຊາຊົນບ້ານສ່ານເຫີ
ໃນການປະຕິບັດວຽກງານຫຼຸດຜ່ອນຄວາມທຸກຍາກຢູ່ເຂດຊົນເຜົ່າສ່ວນໜ້ອຍ, ກໍຕ້ອງຕັ້ງໜ້າຊຸກຍູ້ກາຍປັບປຸງຮີດຄອງປະເພນີໃຫ້ດີຂຶ້ນ. ທ່ານຫຼີຂ້າຍ ເລຂາທີໜຶ່ງປະຈຳບ້ານສ່ານເຫີກ່າວວ່າ,ປັດຈຸບັນນີ້ ປະຊາຊົນບ້ານສ່ານເຫີໄດ້ມີແພດໝໍທີ່ໃຫ້ບໍລິການສະເພາະຕາມສັນຍາທີ່ໄດ້ເຊັນກັນ, ຄອບຄົວທີ່ຫຼຸດພົ້ນອອກຈາກຄວາມທຸກຍາກໄດ້ມີການຮັບປະກັນດ້ານການປິ່ນປົວ 100%, ສາມາດສະກັດກັ້ນໄດ້ກໍລະນີທີ່ຕົກຢູ່ໃນຄວາມທຸກຍາກຍ້ອນເຈັບເປັນ. ທ່ານຫຼີຂ້າຍເວົ້າຕື່ມວ່າ : “ປັດຈຸບັນ ພວກເຮົາໄດ້ສ້າງຄວາມຊິນເຄີຍທີ່ເນັ້ນໃສ່ຄວາມສະອາດ, ແລະຮ່າງກາຍກໍເຂັ້ມແຂງຂຶ້ນຫຼາຍ.”
ນອກນີ້, ໃນຊຸມປີມໍ່ໆມານີ້, ກິ່ງແຂວງລຽງສ່ານໄດ້ຍຶດໝັ້ນພັດທະນາແບບຫຼາຍເຄົ້າ ແລະມີເອກະລັກທີ່ແຕກຕ່າງ, ໂດຍເນັ້ນໃສ່ພັດທະນາອຸດສາຫະກຳທີ່ມີສີສັນພິເສດ, ປູກຝັງ ແລະ ລ້ຽງສັດຕາມເງື່ອນໄຂເອື້ອຍອຳນວຍຂອງທ້ອງຖິ່ນຕົນ, ພະຍາຍາມພັດທະນາຢ່າງໝັ້ນທ່ຽງເປັນໄລຍະຍາວເພື່ອສ້າງຄວາມຮັ່ງມີຂຶ້ນ. ທ່ານຫຼີຂ້າຍ ເລຂາທີໜຶ່ງປະຈຳບ້ານສ່ານເຫີກ່າວຕື່ມວ່າ, ເມື່ອຜ່ານການທົດລອງປູກຝັງຂະໜາດນ້ອຍ ແລະຜູ້ຊ່ຽວຊານສຳຫຼວດຄົ້ນຄວ້າຢູ່ກັບທີ່ໃນໄລຍະເບື້ອງຕົ້ນ, ຢູ່ໃນບ້ານສ່ານເຫີໄດ້ປູກຢູນມູ້ຊ່ຽງ ຫຼື Saussurea costus ເຊິ່ງເປັນຢາພື້ນເມືອງຈີນໃນເນື້ອທີ່ 1000ມູ ເຊິ່ງເປັນຫົວໜ່ວຍວັດແທກເນື້ອທີ່ຂອງຈີນ ຫຼື ປະມານ ຫຼາຍກວ່າ 66 ເຮັກຕາ), ໝາກຄາຍ 370 ມູຫຼື ປະມານ 24 ເຮັກຕາ, ແລະ ໝາກມາດ 2800 ມູຫຼືປະມານ 186 ເຮັກຕາ, ຄາດວ່າອີກ ສອງສາມປີ, ແຕ່ລະຄອບຄົວຈະສາມາດມີລາຍຮັບສະເລ່ຍເພີ່ມຂຶ້ນຫຼາຍກວ່າ 2 ໝື່ນຢວນ.
ໃນເວລາທີ່ສຳຫຼວດກວດກາວຽກງານຢູ່ບ້ານສ່ານເຫີ, ທ່ານສີຈິ້ນຜິງຊີ້ອອກວ່າ, ສິ່ງສຳຄັນທີ່ສຸດ ຄື ຕ້ອງພັດທະນາການສຶກສາຢ່າງທ່ວງທັນກັບສະພາບການ, ບໍ່ຄວນໃຫ້ເດັກນ້ອຍເສຍໂອກາດຢູ່ເສັ້ນເລີ່ມຕົ້ນຢ່າງເດັດຂາດ.
ໃນອະດີດ, ປະຊາຊົນເຜົ່າອີສ່ວນຫຼາຍຮູ້ແຕ່ພາສາເຜົ່າອີເທົ່ານັ້ນ, ເຊິ່ງໄດ້ຈຳກັດການແລກປ່ຽນລະຫວ່າງເຂົາເຈົ້າກັບພາຍນອກ, ການປະກອບອາຊີບກໍປະເຊີນກັບຄວາມຫຍຸ້ງຍາກ ແລະ ການພັດທະນາກໍປະເຊີນກັບອຸປະສັກ. ໃນຊຸມປີມໍ່ໆມານີ້, ກິ່ງແຂວງລຽງສ່ານໄດ້ນຳໃຊ້ນະໂຍບາຍ “ບ້ານໜຶ່ງມີໂຮງອະນຸບານແຫ່ງໜຶ່ງ”, ເຊິ່ງເຮັດໃຫ້ພວກເດັກນ້ອຍສາມາດ ໄດ້ຮັບການສຶກສາເປັນພາສາຈີນກາງກ່ອນການເຂົ້າໂຮງຮຽນປະຖົມ. ທ່ານຫຼີຂ້າຍກ່າວຕື່ມວ່າ: “ບ້ານສ່ານເຫີມີແຜນຈະສ້າງໂຮງອະນຸບານ 4 ແຫ່ງຢູ່ໃນທົ່ວບ້ານ, ເດັກນ້ອຍ 90 ກວ່າຄົນສາມາດໄດ້ຮັບການບໍລິການສຶກສາຄືກັນກັບໂຮງອະນຸບານໃນຕົວເມືອງຢູ່ໃກ້ເຮືອນຂອງຕົນ. ເດັກນ້ອຍທີ່ຢູ່ໃນເກນອາຍຸກະສຽນເຂົ້າໂຮງຮຽນນັ້ນບໍ່ມີຜູ້ໃດປະລະການຮຽນເລີຍ.” ປັດຈຸບັນນີ້, ເດັກນ້ອຍເຜົ່າອີຢູ່ກິ່ງແຂວງລຽງສ່ານສາມາດເວົ້າພາສາຈີນກາງໄດ້ດີ, ພ້ອມທັງໄດ້ຊຸກຍູ້ໃຫ້ສະມາຊິກໃນຄອບຄົວເວົ້າພາສາຈີນກາງນຳກັນ.
ຢູ່ບົນພື້ນຖານດັ່ງກ່າວ, ກິ່ງແຂວງລຽງສ່ານໄດ້ປົວແປງເງື່ອນໄຂດ້ານການສຶກສາຂັ້ນພື້ນຖານຂອງໂຮງຮຽນທີ່ມີຄວາມອ່ອນແອດ້ານການສຶກສາພາກບັງຄັບ; ອອກແຮງປະຕິບັດໂຄງການຫຼຸດຜ່ອນຄວາມທຸກຍາກດ້ວຍການສຶກສາ ແລະໂຄງການອື່ນໆ, ສ້າງໂຮງຮຽນໃຈກາງມາດຕະຖານຂັ້ນຕາແສງໄດ້ 667 ແຫ່ງ, ເປົ້າໝາຍທີ່ “ທຸກຄົນສາມາດເຂົ້າໂຮງຮຽນໄດ້, ທຸກຄົນສາມາດເຂົ້າໂຮງຮຽນທີ່ດີ” ໄດ້ບັນລຸຜົນເປັນຈິງເທື່ອລະກ້າວ.
ທ້າວຈີຫາວເຢຊິວເວົ້າວ່າ, ຄວາມປາຖະໜາສູງສຸດຂອງຕົນກໍແມ່ນ ພວກເດັກນ້ອຍສາມາດໄດ້ຮັບການສຶກສາ, ມີຄວາມຮູ້ມີຄວາມສາມາດສະເພາະຕົວ, ສາມາດຫັນປ່ຽນຊາຕາກຳຂອງຕົນໄດ້. ທ້າວຈີຫາວເຢຊິວເວົ້າຕື່ມວ່າ: “ຂ້ອຍເອງບໍ່ເຄີຍໄດ້ເຂົ້າໂຮງຮຽນຈັກເທື່ອ, ເຖິງຈະແມ່ນຊື່ຂອງຕົນແຕ່ກໍຂຽນບໍ່ຖືກ, ເສຍປຽບຍ້ອນບໍ່ມີຄວາມຮູ້. ຫວັງວ່າ ພວກເດັກນ້ອຍຈະສາມາດເສັງເຂົ້າມະຫາວິທະຍາໄລໄດ້ທັງໝົດ, ມີຄວາມຮູ້ຄວາມສາມາດຫຼາຍກວ່າເກົ່າ, ເພື່ອຮັບໃຊ້ພີ່ນ້ອງປະຊາຊົນ ແລະປະກອບສ່ວນໃຫ້ກັບປະເທດຊາດ.”
ວັນທີ 11 ກຸມພາປີ2018, ທ່ານສີຈິ້ນຜິງໄດ້ໄປຢ້ຽມຢາມເຮືອນຂອງທ້າວຈີຫາວເຢຊິວ, ນາງຈີຫາວຢິວໂກ ລູກສາວຂອງທ້າວຈີຫາວເຢຊິວໄດ້ຮ້ອງເພງ“ທຸງຊາດທຸງຊາດຈັ່ງແມ່ນງາມອີຫຼີ”
ໃນເວລາທີ່ທ່ານສີຈິ້ນຜິງໄປສຳຫຼວດກວດກາວຽກງານຢູ່ບ້ານສ່ານເຫີ, ນາງຈີຫາວຢິວໂກ ລູກສາວຂອງທ້າວຈີຫາວເຢຊິວໄດ້ຮ້ອງເພງ “ທຸງຊາດທຸງຊາດຈັ່ງແມ່ນງາມອີຫຼີ”, ທ່ານສີຈິ້ນຜິງໄດ້ນຳໜ້າຕົບມືຊົມເຊີຍ. ຫຼາຍປີຜ່ານໄປແລ້ວ, ສາວນ້ອຍໄດ້ເຕີບໃຫຍ່ຂຶ້ນ, ມີຮອຍຍິ້ມຫວານໆຢູ່ເທິງໃບໜ້າສະເໝີ, ການຮຽນກໍໄດ້ຄະແນນທີ່ດີ. ນາງຈີຫາວຢິວໂກເວົ້າວ່າ: “ພໍ່ເຖົ້າສີໄດ້ໃຫ້ກຳລັງໃຈແກ່ພວກເຮົາ. ຂ້ອຍໄດ້ບອກຕົນເອງຢູ່ເລື້ອຍໆ ຕ້ອງໝັ່ນຮຽນ, ແລະ ຮຽນໃຫ້ດີທຸກມື້, ຮຽນເອົາຄວາມຮູ້ໃຫ້ໄດ້ຫຼາຍເພື່ອຕອບແທນບຸນຄຸນຂອງປະເທດຊາດ. ຖ້າມີໂອກາດພົບກັບພໍ່ເຖົ້າສີເທື່ອໜ້າ, ຂ້ອຍຈະລາຍງານຜົນງານຮຽນໃຫ້ເພິ່ນໄດ້ຮັບຊາບ.”
ປີ2020, ນາງຈີຫາວຢິວໂກ ສະແດງໃຫ້ເຫັນຈົດໝາຍທີ່ຕົນຂຽນເພື່ອສົ່ງໄປຍັງພໍ່ເຖົ້າສີ.
ປັດຈຸບັນນີ້, ບັ້ນລຶບລ້າງຄວາມທຸກຍາກຂອງກິ່ງແຂວງລຽງສ່ານໄດ້ຮັບໄຊຊະນະຢ່າງຮອບດ້ານແລ້ວ, ຄວາມທຸກຍາກທົ່ວໄປໃນເຂດແຄວ້ນ ແລະ ຄວາມທຸກຍາກເດັດຖານໄດ້ຮັບການແກ້ໄຂຢ່າງຮອບດ້ານ. ແຕ່ການຫຼຸດພົ້ນອອກຈາກຄວາມທຸກຍາກບໍ່ແມ່ນຈຸດສິ້ນສຸດ, ແຕ່ແມ່ນຈຸດເລີ່ມຕົ້ນອັນໃໝ່ສຳລັບຊີວິດການເປັນຢູ່ອັນໃໝ່ ແລະ ການບຸກບືນສູ້ຊົນຄັ້ງໃໝ່. ທ້າວຈີຫາວເຢຊິວມີຄວາມມຸ່ງມາດປາຖະໜາຢ່າງເຕັມປ່ຽມຕໍ່ກັບອະນາຄົດ. ລາວເວົ້າວ່າ: “ຂ້ອຍພວມວາງແຜນຈະສ້າງສວນທ່ອງທ່ຽວຕາມວິຖີຊົນນະບົດມີເອກະລັກພິເສດ, ເພື່ອໃຫ້ນັກທ່ອງທ່ຽວທີ່ມາທ່ຽວບ້ານຂອງພວກເຮົາໄດ້ຊິມສາລີ, ມັນຝຣັ່ງ, ໝີ່ແປ້ງເຂົ້າສານລ່ຽມ ແລະ ອາຫານແຊບໆອື່ນໆ.”
ທ້າວຈີຫາວເຢຊິວຖ່າຍຮູບຢູ່ໜ້າປະຕູເຮືອນໃໝ່ຂອງຕົນ
ທ້າວຈີຫາວເຢຊິວຍັງກ່າວຕື່ມວ່າ, “ຊື່ຂອງລູກສາວເພິ່ນແມ່ນ ຈີຫາວຢິວໂກ ໃນພາສາເຜົ່າອີມີຄວາມໝາຍວ່າ ມີຢູ່ມີກິນ, ມີຄວາມສະຫງົບສຸກ ແລະ ເປັນສິລິມຸງຄຸນ. ປັດຈຸບັນນີ້ ຄວາມປາຖະໜາໄດ້ປາກົດຜົນເປັນຈິງແລ້ວ! ຂໍຂອບໃຈທ່ານເລຂາທິການໃຫຍ່! ຂ້ອຍຈະສືບຕໍ່ກໍ້ແຂນເສື້ອຂຶ້ນ ບຸກບືນຢ່າງສຸດຄວາມສາມາດ, ສ້າງຊີວິດການເປັນຢູ່ໃດ້ນັບມື້ນັບດີຂຶ້ນບົນເສັ້ນທາງທີ່ພັດທະນາຊົນນະບົດໃຫ້ຈະເລີນຮຸ່ງເຮືອງ. ຫວັງວ່າທ່ານເລຂາທິການໃຫຍ່ຈະມາຢ້ຽມຢາມບ້ານຂອງພວກເຮົາອີກເທື່ອໜຶ່ງ.”
ຄຳເຫັນ
0