ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ທ່ານສີຈິ້ນຜິງ ປະທານປະເທດຈີນໄດ້ສົ່ງຈົດໝາຍຕອບໄປຍັງທ່ານນາງວິກໂຕເຣຍ ອຸດດາສ ເຈົ້າຄອງນະຄອນຕາໂກມາ ແລະ ທ່ານມູຣີ ເຈົ້າຄອງນະຄອນສະເຕລະຄອນ ລັດວໍຊິງຕັງອາເມຣິກາ, ພ້ອມທັງໄດ້ສົ່ງຄຳຢື້ຢາມຖາມຂ່າວໃນຍາມມື້ບຸນໄປຍັງປະຊາຊົນທຸກຖ້ວນໜ້າຂອງສອງນະຄອນດັ່ງກ່າວໂດຍກ່າວວ່າ: “ງານກິລາໂອລິມປິກລະດູໜາວປັກກິ່ງເປັນເລື່ອງທີ່ໜ້າເບີກບານມ່ວນຊື່ນສຳລັບປະຊາຊົນຈີນ, ກໍເປັນງານມະຫາກຳຄັ້ງໜຶ່ງໃນພາລະກິດໂອລິມປິກສາກົນ. ພາຍໃຕ້ການສະໜັບສະໜູນຂອງປະຊາຊົນຈີນ ແລະ ປະຊາຄົມໂລກ, ພວກເຮົາຍ່ອມຈະສາມາດຈັດງານມະຫາກຳກິລາໂອລິມປິກຄັ້ງໜຶ່ງທີ່ກະທັດຮັດ ປອດໄພ ແລະ ໜ້າຊົມຢ່າງແນ່ນອນ, ແລະປະຕິບັດຕາມຄະຕິໂອລິມປິກ ທີ່ວ່າ “ໄວກວ່າເກົ່າ ສູງກວ່າເກົ່າ ເຂັ້ມແຂງກວ່າເກົ່າ ແລະ ສາມັກຄີຫຼາຍກວ່າເກົ່າ, ຊຸກຍູ້ປະຊາຊົນບັນດາປະເທດຮ່ວມກັນກ້າວໄປສູ່ອະນາຄົດ.”
ຈົດໝາຍດັ່ງກ່າວຂອງທ່ານປະທານສີຈິ້ນຜິງໄດ້ສະແດງຄວາມໝັ້ນໃຈຕໍ່ປະຊາຊົນອາເມຣິກາ ກໍຄື ປະຊາຄົມໂລກທີ່ຈີນສາມາດຈັດງານມະຫາກຳກິລາໂອລິມປິກຢ່າງສຳເລັດຜົນ, ແລະປະກາດວ່າ ຈີນຈະອອກແຮງປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນພາລະກິດໂອລິມປິກ ແລະ ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ໃນເວລານີ້, ນັກກິລາຫິມະ ແລະ ນ້ຳກ້ອນທີ່ດີເດັ່ນຂອງທົ່ວໂລກໄດ້ເຕົ້າໂຮມກັນຢູ່ນະຄອນຫຼວງປັກກິ່ງ. ເຂົາເຈົ້າຈະສະແດງຄວາມສາມາດລະດັບສຸດຍອດຂອງຕົນຢູ່ສະໜາມກິລາ, ຮ່ວມກັນສຸມທຸກຄວາມພະຍາຍາມເພື່ອຄວາມໃຝ່ຝັນ ແລະ ກຽດຕິຍົດ, ທັງແລກປ່ຽນວັດທະນະທຳໃນການແຂ່ງຂັນ ແລະ ການສົນທະນາກັນ, ປະຕິບັດຕາມຄະຕິໂອລິມປິກທີ່ວ່າ “ໄວກວ່າເກົ່າ ສູງກວ່າເກົ່າ ເຂັ້ມແຂງກວ່າເກົ່າ ແລະ ສາມັກຄີຫຼາຍກວ່າເກົ່າ”, ແລະຈະເຜີຍແຜ່ຈິດໃຈແຫ່ງສັນຕິພາບ ມິດຕະພາບ ແລະຄວາມກ້າວໜ້າໄປສູ່ທຸກຫົນທຸກແຫ່ງ.
ງານກິລາໂອລິມປິກແມ່ນເວທີທີ່ມະນຸດສະແຫວງຫາຄວາມໃຝ່ຝັນ ແລະປະດິດສ້າງສິ່ງມະຫັດສະຈັນ, ກໍແມ່ນສາຍພານທີ່ເຊື່ອມສານມິດຕະພາບ ແລະ ຄວາມສາມັກຄີ. ວັນທີ 2 ກຸມພານີ້, ການສົ່ງຕໍ່ທວນໄຟງານກິລາໂອລິມປິກລະດູໜາວປັກກິ່ງໄດ້ຈັດຂຶ້ນຢ່າງເປັນທາງການ, ງານມະຫາກຳກິລາທີ່ປະຈັກຕາຊາວໂລກຄັ້ງນີ້ໄດ້ຄ່ອຍໆເປີດສາກ. ພວກເຮົາເຊື່ອໝັ້ນວ່າ, ງານກິລາໂອລິມປິກປັກກິ່ງຈະຂຽນໜ້າໃໝ່ທີ່ໜ້າຊົມ ໂດດເດັ່ນ ແລະ ສຸດຍອດໃນປະຫວັດສາດກິລາໂອລິມປິກສາກົນ, ແລະຈະເຮັດໃຫ້ຈິດໃຈໂອລິມປິກເປັ່ງລັດສະໝີຢູ່ນະຄອນຫຼວງປັກກິ່ງ, ຊຸກຍູ້ໃຫ້ສັງຄົມມະນຸດມີຄວາມຮັບຮູ້ທີ່ເປັນເອກະພາບກັນ ແລະມີຄວາມສາມັກຄີເພີ່ມຂຶ້ນ, ຊຸກຍູ້ປະຊາຊົນບັນດາປະເທດຮ່ວມກັນກ້າວໄປສູ່ອະນາຄົດ.
ຄຳເຫັນ
0