ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 15 ກຸມພານີ້, 6 ກະຊວງຂອງຫວຽດນາມ, ເຊັ່ນ: ກະຊວງວັດທະນະທຳ, ກະຊວງການຕ່າງປະເທດ, ກະຊວງສາທາລະນະສຸກ ແລະກະຊວງອື່ນໆໄດ້ຈັດກອງປະຊຸມຮ່ວມກັນ, ໂດຍໄດ້ປຶກສາຫາລືແຜນການເປີດບໍລິການດ້ານການທ່ອງທ່ຽວຢູ່ຫວຽດນາມຢ່າງຮອບດ້ານ ເຊິ່ງຈະເລີ່ມແຕ່ວັນທີ 15 ມີນາທີ່ຈະມາເຖິງນີ້ເປັນຕົ້ນໄປ. ລັດຖະບານຫວຽດນາມຮຽກຮ້ອງໃຫ້ກະຊວງຕ່າງໆໃຫ້ວາງແຜນການລະອຽດກ່ຽວກັບການເປີດບໍລິການດ້ານການທ່ອງທ່ຽວຄືນໃໝ່ໂດຍໄວ.
ອີງຕາມແຜນການດັ່ງກ່າວ, ໂຄງການສຳລັບນັກທ່ອງທ່ຽວຕ່າງປະເທດ ແລະພາຍໃນປະເທດທີ່ລວມທັງການເດີນທາງທາງອາກາດ, ທາງນ້ຳ ແລະທາງບົກກໍຈະເປີດບໍລິການຢ່າງຮອບດ້ານ ເຊິ່ງຈະເລີ່ມແຕ່ວັນທີ 15 ມີນາໜ້ານີ້ເປັນຕົ້ນໄປ, ພາຍໃນປະເທດຫວຽດນາມຈະປະຕິບັດມາດຕະການປ້ອງກັນພະຍາດໂຄວິດ-19 “5K” ຄື: ໃສ່ຜ້າປິດປາກ, ຂ້າເຊື້ອພະຍາດ, ບໍ່ລວມກຸ່ມ, ຮັກສາໄລຍະຫ່າງ ແລະແຈ້ງຂໍ້ມູນດ້ານສຸຂະພາບ.
ອີງຕາມແຜນການດັ່ງກ່າວ, ນັກທ່ອງທ່ຽວທີ່ເດີນທາງມາຈາກຕ່າງປະເທດຫຼັງຈາກເຂົ້າຫວຽດນາມແລ້ວບໍ່ຈຳເປັນຕ້ອງລົງທະບຽນຢູ່ບໍລິສັດທ່ອງທ່ຽວອີກ, ແຕ່ຕ້ອງມີໃບຢັ້ງຢືນຜົນການກວດຫາເຊື້ອໂຄວິດ-19ເປັນລົບ; ນັກທ່ອງທ່ຽວທີ່ເດີນທາງເຂົ້າຫວຽດນາມແລ້ວຕ້ອງກວດຫາເຊື້ອໂຄວິດ-19ແບບໄວ; ນັກທ່ອງທ່ຽວທີ່ເດີນທາງຈາກຕ່າງປະເທດຜູ້ມີອາຍຸ 12 ປີຂຶ້ນໄປຕ້ອງສັກວັກຊີນໂຄວິດ-19 ຄົບ 2 ເຂັມຂຶ້ນໄປ; ນັກທ່ອງທ່ຽວຕ້ອງດາວໂຫຼດແອັບຄວບຄຸມພະຍາດໂຄວິດ-19ຂອງຫວຽດນາມ ທັງຕ້ອງມີປະກັນໄພທີ່ສາມາດຊຳລະຄ່າປິ່ນປົວພະຍາດໂຄວິດ-19ໄດ້; ສຳລັບນັກທ່ອງທ່ຽວທີ່ພົບຜົນກວດເປັນບວກ, ກໍຕ້ອງໄດ້ກັກບໍລິເວນ ແລະປິ່ນປົວທັນທີ.
ຄຳເຫັນ
0