蒙龙

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

ຈີນ​ສະ​ໜັບ​ສະ​ໜູນຣັດ​ເຊຍ​ແລະ​ອູ​ແກ​ຣນ​ແກ້​ໄຂ​ບັນ​ຫາ​ໂດຍ​ຜ່ານ​ການ​ເຈ​ລະ​ຈາ​ກັນ

2022-02-26 13:52:20 CRI

ວັນ​ທີ 25 ກຸມ​ພາ​ນີ້, ທ່ານ ​ສີ​ຈິ້ນ​ຜິງ ປະ​ທານ​ປະ​ເທດແຫ່ງ ສ​ປ ຈີນ​ໄດ້​ໂທ​ລະ​ສັບ​ສົນທະນາກັບ ​ທ່ານ ​ວະ​ລາ​ດິ​ເມຍ ປູ​ຕິນ ປະ​ທາ​ນາ​ທິ​ບໍ​ດີແຫ່ງສະ​ຫະ​ພັນ​ຣັດ​ເຊຍໂດຍ​ກ່າວ​ວ່າ: ຈີນ​ມີຫຼັກ​ໝັ້ນ​ຂອງຕົນ​ໂດຍ​ອີງ​ຕາມ​ຄວາມ​ຖືກຜິດ​ຂອງ​ບັນ​ຫາ​ອູ​ແກ​ຣນ, ຕ້ອງ​ປະ​ຖິ້ມ​ແນວ​ຄິດ​ສົງ​ຄາມ​ເຢັນ, ໃຫ້​ຄວາມ​ສຳ​ຄັນ ​ແລະ ​ເຄົາ​ລົບ​ຄວາມ​ກັງວົນ​ດ້ານ​ຄວາມ​ໝັ້ນ​ຄົງ​ທີ່​ສົມ​ເຫດ​ສົມ​ຜົນ​ຂອງ​ປະ​ເທດ​ຕ່າງໆ ເພື່ອ​ສ້າງ​ກົນ​ໄກ​ຄວາມ​ໝັ້ນ​ຄົງ​ຂອງເອີ​ຣົບ​ທີ່ກ້ຳເກິ່ງກັນ, ມີ​ປະ​ສິດ​ທິ​ຜົນ ແລະ ຍືນ​ຍົງໂດຍ​ຜ່ານ​​ການ​ເຈ​ລະ​ຈາ​ກັນ. ຈີນ​ສະ​ໜັບ​ສະ​ໜູນ​​ຣັດ​ເຊຍ ​ແລະ​ ອູ​ແກ​ຣນ​ແກ້​ໄຂ​ບັນ​ຫາ​ໂດຍ​ຜ່ານ​​ການ​ເຈ​ລະ​ຈາ​ກັນ. ທ່ານ ​ວະ​ລາ​ດິ​ເມຍ ປູ​ຕິນ​ກ່າວ​ວ່າ: ຍິນ​ດີ​ດຳ​ເນີນ​ການ​ເຈ​ລະ​ຈາ​ຂັ້​ນ​ສູງ​ກັບ​ອູ​ແກ​ຣນ.

ນີ້​ເປັນ​ການ​ສົນ​ທະ​ນາ​ທີ່​ສຳ​ຄັນ​ທີ່​ສຸດ​ຄັ້ງ​ໜຶ່ງ, ແມ່ນ​ຄວາມ​ພະ​ຍາ​ຍາມຫຼ້າ​ສຸດ​ຂອງ​ຈີນເພື່ອ​ຊຸກ​ຍູ້​ການ​ແກ້​ໄຂ​ບັນ​ຫາ​ອູ​ແກ​ຣນໂດຍຜ່ານຊ່ອງທາງ​ການ​ເມືອງ. ກ່ອນ​ໜ້າ​ນີ້, ທ່ານ​ສີ​ຈິ້ນ​ຜິງ​ໄດ້​ໂທ​ລະ​ສັບ​ສົນທະນາກັບ​ ທ່ານ ​ເອັມມານູແອນ ມາ​ຄ​ຣົງ ປະ​ທາ​ນາ​ທິ​ບໍ​ດີ​ຝ​ຣັ່ງ ໂດຍ​ກ່າວ​ເນັ້ນ​ວ່າ: ຝ່າຍ​ຕ່າງໆ​ທີ່​ກ່ຽວ​ຂ້ອງ​ຄວນ​ຍຶດ​ໝັ້ນ​ທິດ​ທາງລວມໃນການ​​ແກ້​ໄຂ​ບັນ​ຫາ​ໂດຍຜ່ານຊ່ອງທາງ​ການ​ເມືອງ, ນຳ​ໃຊ້​ເວ​ທີຫຼາຍ​ຝ່າຍເຊິ່ງ​ລວມ​ທັງ​ກົນ​ໄກ​ນໍ​ມັນ​ດີ ຢ່າງ​ເຕັມ​ທີ່ ເພື່ອ​ສະ​ແຫວງ​ຫາ​ການ​ແກ້​ໄຂ​ບັນ​ຫາ​ອູ​ແກ​ຣນ​ຢ່າງ​ຮອບ​ດ້ານໂດຍ​ຜ່ານ​​ການ​ສົນ​ທະ​ນາ​ ແລະ​ ປຶກ​ສາ​ຫາ​ລື​ກັນ. ນອກນີ້, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ຈີນ​ກໍ​ໄດ້​​ໂທ​ລະ​ສັບສົນທະນາ​​ກັບ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ຣັດ​ເຊຍ ແລະ ອາ​ເມ​ຣິ​ກາ ຕ່າງຫາກ ເພື່ອຊີ້ແຈງຫຼັກ​ໝັ້ນ​ຂອງ​ຈີນ. ຈີນ​ໄດ້​ຊຸກ​ຍູ້​ການ​ສົນ​ທະ​ນາ ​ແລະ ການ​ເຈ​ລະ​ຈາ​ກັນ​ກ່ຽວ​ກັບ​ບັນ​ຫາ​ອູ​ແກ​ຣນ ທັງ​ໄດ້​ສະເໜີແຜນ​ການ​ແກ້​ໄຂ​ບັນ​ຫາ​ອູ​ແກ​ຣນ​ໂດຍຜ່ານ​ຊ່ອງທາງ​ການ​ເມືອງ ເຊິ່ງໄດ້​ສ່ອງ​ແສງ​ໃຫ້​ເຫັນ​ເຖິງ​ນ້ຳ​ໃຈ​ຄວາມຮັບ​ຜິດ​ຊອບ​ຂອງ​ຈີນ​ໃນຖານະ​ເປັນ​ປະ​ເທດ​ໃຫຍ່.

ພ້ອມດຽວກັນນີ້, ໃນການ​ສົນ​ທະ​ນາ​ລະ​ຫວ່າງ​ປະ​ມຸກ​ລັດ​ສອງ​ປະ​ເທດ​ຈີນ​ແລະ​ຣັດ​ເຊຍໃນຄັ້ງນີ້ ​ຍັງ​ໄດ້​ສົ່ງ​ສັນຍານ​ສຳ​ຄັນ​ອັນ​ໜຶ່ງ​ອອກ​ມາ ນັ້ນກໍ່ຄື: ເຖິງວ່າ​ຣັດ​ເຊຍ​ ແລະ​ ອູ​ແກ​ຣນ​ເກີດ​ມີການ​ປະ​ທະ​ກັນ​ທາງ​ການ​ທະ​ຫານກໍ່ຕາມ, ແຕ່​ສອງ​ຝ່າຍ​ຍັງ​ມີ​ໂອ​ກາດ​ທີ່ຈະ​ແກ້​ໄຂ​ບັນ​ຫາ​ໂດຍ​ຜ່ານ​​ການ​ເຈ​ລະ​ຈາກັນ​. ວັນ​ທີ 24 ກຸມ​ພາ​ນີ້, ຝ່າຍ​ຣັດ​ເຊຍ​ກ່າວ​ວ່າ: ຖ້າ​ອູ​ແກ​ຣນ​ກຽມ​ພ້ອມແລ້ວ​ວ່າ ຕົນຈະວາງໂຕ​ເປັນ​ກາງ ແລະ ບໍ່​ຕິດຕັ້ງ​ອາ​ວຸດ​ຢູ່​ໃນ​ດິນ​ແດນ​ຂອງ​ຕົນ​ແລ້ວ, ຣັດ​ເຊຍ​ຈຶ່ງຈະຍິນ​ດີ​ເຈ​ລະ​ຈາ​ກັບ​ອູ​ແກ​ຣນ. ໃນ​ເວ​ລາ​ໂທ​ລະ​ສັບ​ສົນທະນາ​ກັບ​ທ່ານ​ປະ​ທານ​ສີ​ຈິ້ນ​ຜິງ, ທ່ານ​ປະ​ທາ​ນາ​ທິ​ບໍ​ດີ​ປູ​ຕິນ​ໄດ້​ສະ​ແດງ​ໃຫ້​ເຫັນ​ເຖິງເຈດຈຳນົງຂອງຣັດເຊຍອີກຄັ້ງໜຶ່ງທີ່ຢາກ​​ເຈ​ລະ​ຈາ​ກັບອູແກຣນ. ​ກ່ອນ​ໜ້າ​ນີ້, ທ່ານ​ເຊ​ເລນ​ສະ​ກີ ປະ​ທານາ​ທິ​ບໍ​ດີ​ອູ​ແກ​ຣນໄດ້​ກ່າວ​ວ່າ: “ບໍ່​ມີຫຍັງເປັນຕາຢ້ານໃນການ​ເຈ​ລະ​ຈາ​ກັບ​ຣັດ​ເຊຍ ເພາະພວກ​ເຮົາ​ກຽມ​ພ້ອມ​ທຸກ​ບັນ​ຫາ​ໃນ​ການ​ເຈ​ລະ​ຈາ​ກັນ”.

ການ​ສະ​ແດງ​ທ່າ​ທີ​ເຫຼົ່າ​ນີ້​ສະ​ແດງ​ໃຫ້​ເຫັນ​ຢ່າງ​ເຕັມ​ທີ່​ວ່າ: ປະ​ຕູ​ໃນການ​ແກ້​ໄຂ​ບັນ​ຫາ​ອູ​ແກ​ຣນດ້ວຍຊ່ອງ​ທາງ​ການ​ເມືອງ​ຍັງ​ບໍ່​ທັນ​ປິດເທື່ອ. ກາ​ນ​ເປັນ​ປໍ​ລະ​ປັກ​ກັນ​ຈະ​ບໍ່​ສາ​ມາດ​ແກ້​ໄຂ​ບັນ​ຫາໃຫ້ລຸລ່ວງໄປໄດ້, ການ​ສົນ​ທະ​ນາ​ກັນ​ຈຶ່ງແມ່ນທາງ​ເລືອກ​ທີ່​ຖືກ​ຕ້ອງ​ ແລະ ມີເຫດ​ຜົນ​ໃນ​ການ​ແກ້​ໄຂວິ​ກິດ​ການ​ອູ​ແກ​ຣນ.

​ວົງ​ການ​ພາຍນອກ​ໄດ້​ເອົາ​ໃຈ​ໃສ່​ຕິດຕາມ ແລະ ເຫັນວ່າ: ວັນ​ທີ 25 ກຸມ​ພາ​ນີ້, ​ໃນ​ຂະ​ນະ​ທີ່ທ່ານ​ເຊ​ເລນ​ສະ​ກີ ປະ​ທານາ​ທິ​ບໍ​ດີ​ອູ​ແກ​ຣນ ສະ​ແດງ​ເຈດຈຳນົງທີ່​ຢາກ​ເຈ​ລະ​ຈາ​ກັບ​ຣັດ​ເຊຍ​ນັ້ນ, ທ່ານ​ຍັງ​ໄດ້​ສະ​ແດງ​ຄວາມ​ຜິດ​ຫວັງ​ກັບ​ກຸ່ມ​ນາ​ໂຕ ໂດຍ​ກ່າວ​ວ່າ: ຕົນ​ໄດ້​ຖາມ​ຜູ້​ນຳ​ປະ​ເທດ​ເອີ​ຣົບ 27 ທ່ານ​ວ່າ: ອູ​ແກ​ຣນ​ຈະ​ສາ​ມາດ​ເຂົ້າ​ເປັນ​ສະ​ມາ​ຊິກຂອງ​ກຸ່ມ​ນາ​ໂຕໄດ້ຫຼື​ບໍ່, ແຕ່​ບໍ່​ມີທ່ານໃດ​​ຕອບ​ຄຳ​ຖາມ​ຂອງ​ຕົນ, “ໂລກ​ຕາ​ເວັນ​ຕົກ​ໄດ້​ປະ​ຖິ້ມ​ອູ​ແກ​ຣນ​ຢ່າງ​ສິ້ນ​ເຊີງ​ແລ້ວ”. ນ້ຳ​ສຽງ​ຂອງ​ທ່ານ​​ເຕັມ​ໄປ​ດ້ວຍ​ຄວາມຂົມຂື່ນ ​ແລະໝົດຫົນທາງ​ ຍ້ອນ​ຖືກປະເທດຕາເວັນຕົກ​ຕົວະ ແລະ ຖືກ​ປະ​ຖິ້ມໃຫ້ຮັບມືພຽງລຳພັງ.

ບັນ​ຫາ​ອູ​ແກ​ຣນໄດ້​ວິວັດທະນາການມາ​ຈົນຮອດ​ປັດ​ຈຸ​ບັນ, ກຸ່ມ​ນາ​ໂຕ​ທີ່​ນຳ​ພາ​ໂດຍ​ອາ​ເມ​ຣິ​ກາ​ຕ້ອງມີ​ຄວາມ​ຮັບ​ຜິດ​ຊອບ​ທີ່ບໍ່ສາມາດປະຕິເສດ​ໄດ້. ພາຍຫຼັງ​ສົງ​ຄາມ​ເຢັນ​ສິ້ນ​ສຸ​ດ​ລົ​ງ​ແລ້ວ, ອາ​ເມ​ຣິ​ກາ​ໄດ້​ຊຸກ​ຍູ້​ໃຫ້​ກຸ່ມ​ນາ​ໂຕ​ຂະ​ຫຍາຍ​ອິດທິພົນໄປ​ສູ່​ທິດ​ຕາ​ເວັນ​ອອກ 5 ຄັ້ງ, ໄດ້ບຽດຍຶດສະ​ພາບ​ແວດ​ລ້ອມ​ດ້ານຄວາມ​ໝັ້ນ​ຄົງຂອງ​ປະ​ເທດ​ຣັດ​ເຊຍເລື້ອຍໆ ເຊິ່ງໄດ້ກາຍ​ເປັນ​ຮາກ​ເຫງົ້າຂອງບັນຫາ​ທີ່​ເຮັດ​ໃຫ້​ການ​ພົວ​ພັນ​ລະ​ຫວ່າງ​ຣັດ​ເຊຍ​ກັບ​ອາ​ເມ​ຣິ​ກາ ​ແລະ​ນາ​ໂຕ​ ເຄັ່ງ​ຕຶງ​ຂຶ້ນ​ເລື້ອຍໆ. ນັບ​ແຕ່​ປີ 2014 ເປັນ​ຕົ້ນ​ມາ, ອາ​ເມ​ຣິ​ກາ​ໄດ້​ໃຫ້​ການ​ຊ່ວຍ​ເຫຼືອ​ທາງ​ການ​ທະ​ຫານຫຼາຍ​ຕື້​ໂດ​ລາ​ສະ​ຫະ​ລັດ​ໃຫ້​ແກ່​ອູ​ແກ​ຣນ, ນາ​ໂຕ ​ແລະ​ ອູ​ແກ​ຣນ​ໄດ້​ຈັດ​ການ​ຊ້ອມ​ຮົບ​​ຂະ​ໜາດ​ໃຫຍ່ຮ່ວມກັນ​ເລື້ອຍໆ ເຊິ່ງ​ໄດ້​ຊຸກ​ຍູ້ໃຫ້​ອູ​ແກ​ຣນ​ເປັນແນວ​ໜ້າສຸດ​ໃນການ​ສະ​ກັດ​ກັ້ນ​ຣັດ​ເຊຍ ແລະ ​ເຮັດ​ໃຫ້​ອູ​ແກ​ຣນ​ເກີດ​ມີ​ “ຄວາມ​ເພີ້​ຝັນ” ດ້ວຍການຢາກອີງ​ອາ​ໄສ​ອາ​ເມ​ຣິ​ກາ ​ແລະ ​ນາ​ໂຕເພື່ອ​ສະ​ແຫວງ​ຫາ​ຄວາມ​ໝັ້ນ​ຄົງ. ແຕ່​ວ່າ, ເມື່ອຜະເຊີນກັບຄຳ​ຮ້ອງ​ຂໍຂອງອູແກຣນເພື່ອ​ເຂົ້າ​ເປັນ​ສະ​ມາ​ຊິກ​ນາ​ໂຕ​, ນາ​ໂຕທີ່​ນຳ​ພາ​ໂດຍ​ອາ​ເມ​ຣິ​ກາ​ພັດ​ໄດ້​ກ່າວ “ປະ​ຕິ​ເສດ” ຕະ​ຫຼອດມາ, ເຫດ​ຜົນ​ເລິກໆກໍ​ຈະ​ແຈ້ງ​ທີ່​ສຸດ​ແລ້ວ, ນັ້ນ​ກໍ​ຄື: ພວກເຂົາພຽງ​ແຕ່​ຖື​ອູ​ແກ​ຣນ​ເປັນ “ໝາກເດີນໂຕໜຶ່ງ” ໃນການສະ​ກັດ​ກັ້ນ​ຣັດ​ເຊຍ​ເທົ່າ​ນັ້ນ, ແຕ່​​ບໍ່ຢາກ “ຖະຫຼຳເລິກ” ຍ້ອນ​ອູ​ແກ​ຣນ.

ຫວ່າງ​ມໍ່ໆ​ມາ​ນີ້, ທ່ານ​ຕຸນ​ຊີ ກັບ​ບາດ ອະດີດສະມາຊິກສະພາຕ່ຳອາເມຣິກາ ໄດ້ໃຫ້​ສຳ​ພາດ​ຕໍ່​ນັກ​ຂ່າວ​ວ່າ: ​ຂໍ​ພຽງ​ແຕ່ລັດ​ຖະ​ບານ​ອາ​ເມ​ຣິ​ກາ​ໃຫ້ການຮັບ​ປະ​ກັນ​ວ່າ ບໍ່​ຮັບ​ເອົາ​ອູ​ແກ​ຣນເຂົ້າ​ເປັນ​ສະ​ມາ​ຊິກ​ນາ​ໂຕ, ກໍ​ສາ​ມາດ​ຫລີກລ່ຽງ​ການ​ປະ​ທະ​ກັນ​ທາງ​ການ​ທະ​ຫານລະຫວ່າງ​ຣັດ​ເຊຍ ​ແລະ ​ອູ​ແກ​ຣນໄດ້, ແຕ່​ພວກ​ເຂົາ​ຕັ້ງ​ໃຈ​ບໍ່​ຢາກເຮັດແບບນັ້ນ, ພວກ​ເຂົາ​ຢາກ​ໃຫ້​ຣັດ​ເຊຍ ​ແລະ​ ອູ​ແກ​ຣນ​ເກີດ​ມີການ​ປະ​ທະ​ກັນ. ດ້ານ​ໜຶ່ງ, ເພື່ອ​ໃຫ້​ລັດ​ຖະ​ບານ​ອາ​ເມ​ຣິ​ກາ​ມີ​ຂໍ້​ອ້າງ​ທີ່​ຈະ​ແຈ້ງກວ່າ​ເກົ່າເພື່ອ​ລົງ​ໂທດ​​ຣັດ​ເຊ​ຍ​ຢ່າງ​ເຂັ້ມ​ງວດກວ່າ​ເກົ່າ. ອີກ​ດ້ານ​ໜຶ່ງ, ວິ​ສາ​ຫະ​ກິດ​ອຸດ​ສາ​ຫະ​ກຳ​ທາງ​ການ​ທະ​ຫານ​ຂອງ​ອາ​ເມ​ຣິ​ກາ​ກໍ​ຈະ “ລ້ຳ​ລວຍ” ຍ້ອນ​ການ​ປະ​ທະ​ກັນ​ລະ​ຫວ່າງ​ຣັດ​ເຊຍ ​ແລະ ​ອູ​ແກ​ຣນ.

ຈາກ​ການ​ຕົວະ​ຕົ້ມ ​ແລະ​ ປະ​ຖິ້ມ​ອູ​ແກ​ຣນ, ກໍ່ຄືການ​ປະ​ຖິ້ມ​ພັນ​ທະ​ມິດ​ແລ້ວ​ຖອນ​ທະ​ຫານ​ອອກ​ຈາກ​ອັ​ຟ​ກາ​ນິ​ສະ​ຖານ, ​ການ​ກະ​ທຳ​ຂອງ​ອາ​ເມ​ຣິ​ກາທັງໝົດໄດ້​ສ່ອງ​ແສງ​ໃຫ້​ເຫັນ​ທາດ​ແທ້ຂອງ​ລັດທິເຈົ້າ​ອຳ​ນາດຢ່າງເຕັມປ່ຽມ ຄື: “ອາ​ເມ​ຣິ​ກາ​ຕ້ອງ​ມາ​ກ່ອນ”. ຄົນ​ທີ່​ຢາກ​ເພິ່ງ​ພາອາໄສອາ​ເມ​ຣິ​ກາຈົນ​ເຖິງ​ມີ​ບາງ​ຄົນ​ຢາກ​ຢືນ​ຢູ່​ເທິງ​ລົດ​ທະ​ຫານ​ອາ​ເມ​ຣິ​ກາ​ນັ້ນ ​ຕ້ອງ​ຄິດ​ໃໝ່ ແລະ ຄິດໃຫ້ດີໆ​ວ່າ: ອາ​ເມ​ຣິ​ກາເຮັດແບບ​ນີ້​ຍັງເປັນໜ້າ​ເຊື່ອ​ຖືຫຼື​ບໍ່?

ອີງ​ຕາມ​ການ​ລາຍ​ງານ​ຂ່າວຫຼ້າ​ສຸດ, ທ່ານ​ເປ​ສ​ໂຄ​ຟ ໂຄ​ສົກ​ປະ​ທາ​ນາ​ທິ​ບໍ​ດີ​ຣັດ​ເຊຍ​ກ່າວ​ວ່າ: ທ່ານ​ ວະ​ລາ​ດິ​ເມຍ ປູ​ຕິນ ກຽມ​ຈະ​ສົ່ງ​ຄະ​ນະ​ຜູ້​ແທນ​ໄປ​ນະ​ຄອນ​ມິນ​ສ ເພື່ອ​ເຈ​ລະ​ຈາ​ກັບ​ຄະ​ນະ​ຜູ້​ແທນ​ອູ​ແກ​ຣນ. ປະ​ຊາ​ຄົມ​ໂລກ​ຫວັງ​ໃຫ້​ຣັດ​ເຊຍ​ແລະ​ ອູ​ແກ​ຣນ​​ຮັກ​ສາຄວາມອົດ​ທົນ​ອົດກັ້ນ ແລະ ໃຈເຢັນເຢັນ ເພື່ອ​ສະ​ແຫວງ​ຫາ​ການ​ແກ້​ໄຂ​ບັນ​ຫາ​ໂດຍ​ສັນ​ຕິໂດຍຜ່ານ​ຮູບ​ການ​ເຈ​ລະ​ຈາ​. ຫຼັກ​ໝັ້ນ​ພື້ນ​ຖານ​ຂອງຈີນແມ່ນ​ເຄົາ​ລົບອະ​ທິ​ປະ​ໄຕ​ ແລະ ​ຜືນ​ແຜ່ນ​ດິນ​ອັນ​ຄົບ​ຖ້ວນ​ຂອງ​ບັນ​ດາ​ປະ​ເທດໃນໂລກ ພ້ອມ​ທັງປະ​ຕິ​ບັດ​ຕາມ​ຈຸດ​ປະ​ສົງ ​ແລະ ຫຼັກ​ການ​ຂອງ​ກົດ​ບັດ​ສະ​ຫະ​ປະ​ຊາ​ຊາດ ຢ່າງ​ສະ​ເໝີ​ຕົ້ນ​ສະ​ເໝີ​ປາຍ, ຈີນ​ຈະ​ສືບ​ຕໍ່​ຊຸກ​ຍູ້​ການ​ເຈາ​ລະ​ຈາ​ກັນ​ດ້ວຍ​ຮູບ​ການ​ຂອງ​ຕົນ ແລະ ຊຸກ​ຍູ້​ໃຫ້​ແກ້​ໄຂ​ບັນ​ຫາ​ອູ​ແກ​ຣນ​ໂດຍຜ່ານ​ທາງ​ການ​ເມືອງ.

ຄຳ​ເຫັນ

0