ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 18 ມັງກອນປີ 2017, ໃນໂອກາດກ່າວປາຖະກະຖາກ່ຽວກັບ “ການຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດ” ທີ່ມີລັກສະນະປະຫວັດສາດຢູ່ຫໍປະຊຸມນານາຊາດທີ່ເຊີແນວ, ທ່ານສີຈິ້ນຜິງ ປະທານປະເທດຈີນໄດ້ບັນລະຍາຍກ່ຽວກັບທັດສະນະປະຊາຄົມຮ່ວມຊາຕາກຳຂອງມວນມະນຸດຢ່າງເປັນລະບົບ. ເດືອນກຸມພາປີ 2022, ໄຟໂອລິມປິກໄດ້ໄຕ້ຂຶ້ນຢູ່ນະຄອນຫຼວງປັກກິ່ງອີກຄັ້ງໜຶ່ງເຊິ່ງຫ່າງຈາກກິລາໂອລິມປິກລະດູຮ້ອນທີ່ປັກກິ່ງ 14 ປີ, ສະນັ້ນຈຶ່ງສາມາດເວົ້າໄດ້ວ່າ, ຈາກການໄຂພິທີຫາການປິດພິທີ, ຈາກວຽກງານການກະກຽມຫາການແຂ່ງຂັນ, ຈາກການອອກແບບສະໜາມກິລາຫາການສືບຕໍ່ນຳໃຊ້ສະໜາມກິລາຫຼັງງານກິລາໂອລິມປິກສິ້ນສຸດລົງຕະຫຼອດຮອດນັກກິລາແລະອາສາສະໝັກແລະອື່ນໆ, ງານກິລາໂອລິມປິກລະດູໜາວປັກກິ່ງລ້ວນແຕ່ໄດ້ປະຕິບັດການເຄື່ອນໄຫວຕົວຈິງໃນການສ້າງປະຊາຄົມຮ່ວມຊາຕາກຳຂອງມວນມະນຸດ.
ວັນທີ 2 ທັນວາປີກາຍນີ້, ກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 76 ໄດ້ປຶກສາຫາລືເປັນເອກະພາບກັນຮັບຮອງເອົາມະຕິຢຸດຍິງໃນໄລຍະຈັດງານກິລາໂອລິມປິກທີ່ປະເທດຈີນແລະຄະນະກຳມະການໂອລິມປິກສາກົນເປັນຜູ້ຮ່າງ, ແລະມີ 173 ປະເທດສະມາຊິກຮ່ວມກັນລິເລີ່ມ, ມະຕິດັ່ງກ່າວໄດ້ຜ່ານການຮັບຮອງຢ່າງເປັນເອກະພາບການ, ເຊິ່ງໄດ້ສະແດງໃຫ້ເຫັນວ່າປະເທດສະມາຊິກອົງການສະຫະປະຊາຊາດສະໜັບສະໜູນງານກິລາໂອລິມປິກລະດູໜາວປັກກິ່ງແລະງານກິລາໂອລິມປິກສາກົນ, ທັງໄດ້ສະແດງໃຫ້ເຫັນເຖິງຄວາມຕັດສິນໃຈຢ່າງເດັດດ່ຽວຂອງປະຊາຄົມໂລກທີ່ຮ່ວມແຮງຮ່ວມໃຈກັນ, ເພື່ອເອົາຊະນະການແຜ່ລະບາດຂອງພະຍາດໂຄວິດ-19 ຮ່ວມກັນ, ສ້າງສັນຕິພາບຮ່ວມກັນແລະກ້າວໄປສູ່ອະນາຄົດຮ່ວມກັນ.
ງານກິລາໂອລິມປິກລະດູໜາວປັກກິ່ງແມ່ນງານກິລາໂອລິມປິກພຽງຄັ້ງດຽວທີ່ສາມາດຈັດຂຶ້ນຕາມເວລາກຳນົດພາຍໃຕ້ສະພາບການທີ່ເກີດມີການແຜ່ລະບາດຂອງພະຍາດໂຄວິດ-19. ຄວາມງ່າຍ, ຄວາມປອດໄພແລະໜ້າເບິ່ງໜ້າຊົມແມ່ນຄຳໝັ້ນສັນຍາຂອງຈີນໃນການຈັດງານກິລາໂອລິມປິກລະດູໜາວປັກກິ່ງ, ທັງໄດ້ສະແດງໃຫ້ເຫັນເຖິງທັດສະນະຄວາມປອດໄພຄື: “ທ່ານປອດໄພແລ້ວຂ້າພະເຈົ້າຈຶ່ງປອດໄພ.” ງານກິລາໂອລິມປິກລະດູໜາວປັກກິ່ງຈຶ່ງໄດ້ປະຕິບັດຕາມມາດຕະການປ້ອງກັນແລະຄວບຄຸມພະຍາດແບບວົງປິດ, ເຮັດແບບນີ້ກໍເພື່ອຮັບປະກັນຄວາມປອດໄພໃຫ້ກັບຄະນະນັກກິລາທີ່ເຂົ້າຮ່ວມການແຂ່ງຂັນ, ການກວດກາຢ່າງລະອຽດຮອບຄອບແລະຖືກຕ້ອງແລະການນຳໃຊ້ວິທະຍາສາດເຕັກນິກຂັ້ນສູງຢ່າງຫຼວງຫຼາຍ, ໄດ້ຊ່ວຍປ້ອງກັນບໍ່ໃຫ້ເຊື້ອພະຍາດແຜ່ລະບາດ, ທັງຮັບປະກັນການຖ່າຍທອດສົດການແຂ່ງຂັນຂອງງານກິລາໂອລິມປິກລະດູໜາວໄດ້ເປັນຢ່າງດີ.
ປັກກິ່ງແມ່ນຕົວເມືອງພຽງແຫ່ງດຽວໃນໂລກທີ່ໄດ້ຈັດງານກິລາໂອລິມປິກທັງລະດູຮ້ອນແລະງານກິລາໂອລິມປິກລະດູໜາວ, ໂດຍສະເພາະແມ່ນໄດ້ຈັດງານກິລາໂອລິມປິກລະດູໜາວ, ໃນ 5 ປີຜ່ານມາ, ຈີນໄດ້ເຮັດໃຫ້ເປົ້າໝາຍທີ່ປະຊາຊົນ 300 ລ້ານຄົນເຂົ້າຮ່ວມຫຼິ້ນກິລາຫິມະແລະນ້ຳກ້ອນບັນລຸຜົນເປັນຈິງ, ເຮັດໃຫ້ປະຊາຊົນຈີນຫຼາຍກວ່າເກົ່າຮູ້ຈັກແລະໄດ້ຫຼິ້ນກິລາຫິມະແລະນ້ຳກ້ອນຢ່າງມ່ວນຊື່ນ.
ຈາກຄຳຂວັນ “ຈັດງານກິລາໂອລິມປິກຕາມທິດສີຂຽວ, ຖືກຫຼັກວິທະຍາສາດເຕັກນິກແລະວັດທະນະທຳ” ຂອງການຈັດງານກິລາໂອລິມປິກລະດູຮ້ອນປີ 2008, ຫາງານກິລາໂອລິມປິກລະດູໜາວປັກກິ່ງ 2022 ຈີນໄດ້ຍຶດໝັ້ນການເດີນຕາມເສັ້ນທາງການພັດທະນາຕາມທິດສີຂຽວ, ປ່ອຍກາກບອນຕ່ຳແລະແບບຍືນຍົງ, ທັດສະນະ “ຈັດງານກິລາໂອລິມປິກຕາມທິດສີຂຽວ” ໄດ້ເຈືອຈານເຂົ້າໃນຈິດໃຈປະຊາຊົນ. ສູນລອຍນ້ຳຮູບຈັດຕຸລັດແຫ່ງຊາດຈີນໄດ້ກາຍເປັນສະໜາມກິລາແຫ່ງທຳອິດທີ່ໄດ້ດັດແປງຈາກສະລອຍນ້ຳໃຫ້ມາເປັນສະໜາມກິລາເທິງນ້ຳກ້ອນ, ສະໜາມກິລານະຄອນຫຼວງຈາກສະໜາມແຂ່ງຂັນບານສົ່ງໄດ້ດັດແປງໃຫ້ມາເປັນສະໜາມກິລາ ເທິງນ້ຳກ້ອນ...... ສະໜາມກິລາຫຼາຍແຫ່ງທີ່ເຄີຍຖືກນຳໃຊ້ໃນງານກິລາໂອລິມປິກລະດູຮ້ອນປັກກິ່ງປີ 2008 ໄດ້ຖືກປັບປຸງເພື່ອນຳໃຊ້ເຂົ້າໃນການແຂ່ງຂັນກິລາໂອລິມປິກລະດູໜາວປັກກິ່ງ, ທັງໝົດນີ້ໄດ້ບັນລຸເປົ້າໝາຍທີ່ເຮັດໃຫ້ສະໜາມກິລາໂອລິມປິກໄດ້ຖືກນຳໃຊ້ຢ່າງຕໍ່ເນື່ອງ.
ປັດຈຸບັນ, ສະຖານະການສາກົນໄດ້ປ່ຽນແປງຢ່າງໃຫຍ່ຫຼວງ, ພະຍາດໂຄວິດ-19 ສືບຕໍ່ແຜ່ລະບາດໃນຂອບເຂດທົ່ວໂລກຢ່າງໜັກໜ່ວງ. ມະນຸດເຮົາມີຄວາມປາຖະໜາຢ່າງແຮງກ້າແບບບໍ່ເຄີຍມີມາກ່ອນທີ່ຢາກຮ່ວມກັນຜ່ານຜ່າຄວາມຫຍຸ້ງຍາກແລະຮ່ວມກັນກ້າວໄປໜ້າ. ຢາກແຂ່ງຂັນຄືກັບໂອລິມປິກ, ຢາກມີຄວາມສາມັກຄີກັນຄືໂອລິມປິກແລະຢາກ “ຮ່ວມກັນກ້າວໄປສູ່ອະນາຄົດ” ຄືກັບໂອລິມປິກ. ນີ້ແມ່ນຂໍ້ຮຽກຮ້ອງຮ່ວມກັນທີ່ຢາກໃຫ້ງານກິລາໂອລິມປິກລະດູໜາວປັກກິ່ງລິເລີ່ມສ້າງປະຊາຄົມຮ່ວມຊາຕາກຳຂອງມວນມະນຸດ; ພ້ອມກັນນັ້ນ, ກໍໄດ້ສະແດງໃຫ້ເຫັນເຖິງທັດສະນະປະຊາຄົມຮ່ວມຊາຕາກຳຂອງມວນມະນຸດໃນການສ້າງໂລກທີ່ມີສັນຕິພາບຖາວອນ, ມີຄວາມປອດໄພໂດຍທົ່ວໄປ, ມີຄວາມຈະເລີນຮຸ່ງເຮືອງຮ່ວມກັນ, ເປີດປະຕູສູ່ພາຍນອກແລະກວມລວມ, ໂປ່ງໃສແລະສວຍງາມ.
ຄຳເຫັນ
0