ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄຽງຄູ່ກັບງານກິລາໂອລິມປິກຄົນພິການລະດູໜາວປັກກິ່ງໃກ້ຈະໄຂຂຶ້ນຢ່າງເປັນທາງການໃນອີກບໍ່ດົນ, ນັກກິລາຄົນພິການຈາກປະເທດຕ່າງໆທົ່ວໂລກ ຕ່າງກໍມີຄວາມໃຝ່ຝັນຂອງຕົນ, ໂດຍຈະແຂ່ງຂັນຢ່າງສຸດຂີດ, ທ້າທາຍຂີຈຳກັດ ເຊິ່ງຈະເປັນການສະແດງໃຫ້ເຫັນເຖິງຈິດໃຈ ແລະສະເໜ່ຂອງກິລາ, ຄືດັ່ງບັນເລງເພງສັນລະເສີນຊີວິດທີ່ເຕີບໃຫຍ່ບໍ່ມີວັນສິ້ນສຸດ.
ບ້ານພັກນັກກິລາໃນງານກິລາໂອລິມປິກຄົນພິການລະດູໜາວ ເປັນ “ບ້ານພັກນັກກິລາ”ຢ່າງແທ້ຈິງ. ບ້ານພັກນັກກິລາໃນງານກິລາໂອລິມປິກຄົນພິການລະດູໜາວປັກກິ່ງ 2022 ທີ່ນະຄອນຫຼວງປັກກິ່ງ, ເມືອງຢຽນຊີ້ງ ແລະນະຄອນຈ່າງເຈ່ຍໂຂ ໄດ້ເປີດນຳໃຊ້ຢ່າງເປັນທາງການໃນວັນທີ 25 ກຸມພາທີ່ຜ່ານມານີ້. ຕາມຜູ້ຮັບຜິດຊອບທີ່ກ່ຽວຂ້ອງຂອງບ້ານພັກນັກກິລາດັ່ງກ່າວໄດ້ແນະນຳໃຫ້ຮູ້ວ່າ: ເພື່ອບັນລຸເປົ້າໝາຍການຈັດ “ງານກິລາໂອລິມປິກສອງຄັ້ງ ໃຫ້ມີຄວາມໜ້າເບິ່ງໜ້າຊົມຄືກັນ” ແລະເຮັດໃຫ້ງານກິລາໂອລິມປິກຄົນພິການລະດູໜາວສາມາດຈັດຂຶ້ນຢ່າງສະດວກ ແລະປອດໄພ, ຈຶ່ງໄດ້ປັບປ່ຽນບ້ານພັກນັກກິລາງານກິລາໂອລິມປິກລະດູໜາວປັກກິ່ງ ມາເປັນບ້ານພັກນັກກິລາງານກິລາໂອລິມປິກຄົນພິການລະດູໜາວ ໂດຍໃຊ້ເວລາພຽງ 44 ຊົ່ວໂມງເທົ່ານັ້ນ ຄື: ເລີ່ມແຕ່ເວລາ 12 ໂມງຂອງວັນທີ 23 ກຸມພາ ຫາເວລາ 8 ໂມງຂອງວັນທີ 25 ກຸມພາທີ່ຜ່ານມານີ້.
ເພື່ອສ້າງ “ບ້ານພັກນັກກິລາ” ທີ່ມີຄວາມປອດໄພ, ອົບອຸ່ນ ແລະຢູ່ສະບາຍ, ການສ້າງສິ່ງອຳນວຍຄວາມສະດວກຈຶ່ງແມ່ນວຽກງານທີ່ສຳຄັນທີ່ສຸດ. ຢູ່ຕາມ ບ້ານພັກນັກກິລາສຳລັບງານກິລາໂອລິມປິກຄົນພິການລະດູໜາວປັກກິ່ງ, ລະບຽງ ແລະໃນເຮືອນແມ່ນປູດ້ວຍແຜ່ນກາໂລກັນມື່ນ, ມືຈັບປ່ອງຢ້ຽມ, ປັກສຽບໄຟຟ້າ, ສະວິກ ແລະປຸ່ມກົດຮ້ອງຂໍການຊ່ວຍເຫຼືອ ຕ່າງກໍຖືກຕິດຕັ້ງຢູ່ບ່ອນຕ່ຳ ເພື່ອຄວາມສະດວກຂອງຄົນພິການ, ຢູ່ຕາມຫ້ອງນ້ຳໄດ້ຕິດຕັ້ງອຸປະກອນອະນາໄມ ແລະອຸປະກອນອາບນ້ຳທີ່ສະດວກ, ຢູ່ຕາມໂຕະກິນເຂົ້າໄດ້ເພີ່ມລາຍການອາຫານທີ່ເປັນໜັງສືສຳລັບຄົນຕາບອດ. ການຄຸ້ມຄອງຕ່າງໆໄດ້ນຳໃຊ້ລະບົບອັດສະລິຍະ, ການບໍລິການແມ່ນມີຄວາມລະອຽດຮອບຄອບ ແລະການເບິ່ງແຍງດູແລແມ່ນອີງຕາມຄວາມຕ້ອງການຂອງນັກກິລາ ເຊິ່ງຈະເຮັດໃຫ້ນັກກິລາຮູ້ສຶກເຖິງ “ຄວາມອົບອຸ່ນປານວ່າຢູ່ໃນເຮືອນຂອງຕົນເອງ”.
ເມື່ອເບິ່ງໃນໄລຍະຍາວແລ້ວ, ວຽກງານກະກຽມງານກິລາໂອລິມປິກຄົນພິການລະດູໜາວປັກກິ່ງ ທີ່ລວມທັງການສ້າງບ້ານພັກນັກກິລາ ກໍເປັນການຊຸກຍູ້ການພັດທະນາວຽກງານຄົນພິການ ແລະຊຸກຍູ້ການສ້າງສັງຄົມແບບກວມລວມ. ໃນໄລຍະຈັດງານກິລາໂອລິມປິກຄົນພິການລະດູໜາວປັກກິ່ງ, ຄວາມເປັນລະບຽບແບບແຜນ, ການໃຊ້ງານ ແລະຄວາມເປັນລະບົບຂອງສິ່ງອຳນວຍຄວາມສະດວກຕ່າງໆສຳລັບຄົນພິການຢູ່ນະຄອນຫຼວງປັກກິ່ງໄດ້ຮັບການຍົກສູງຂຶ້ນຢ່າງເດັ່ນຊັດ, ການກໍ່ສ້າງສິ່ງອຳນວຍຄວາມສະດວກໃນດ້ານການກິນດື່ມ, ການພັກເຊົາ ແລະການປິ່ນປົວພະຍາດຢູ່ນະຄອນຈ່າງເຈ່ຍໂຂ ໄດ້ຮັບຜົນສຳເລັດເບື້ອງຕົ້ນ. ສາມາດເວົ້າໄດ້ວ່າ: ການຮັບປະກັນໃຫ້ຄົນພິການໄດ້ຮັບສິດ ແລະຜົນປະໂຫຍດທີ່ສະເໝີພາບກັນໃນດ້ານກິລາ, ວັດທະນະທຳ, ການສຶກສາ, ການປະກອບອາຊີບ ແລະອື່ນໆ ແລະຮ່ວມກັນຊົມໃຊ້ໝາກຜົນຂອງການພັດທະນາເສດຖະກິດສັງຄົມ ຈະກາຍເປັນມໍລະດົກອັນລ້ຳຄ່າຂອງງານກິລາໂອລິມປິກຄົນພິການລະດູໜາວປັກກິ່ງ.
ໃນຫວ່າງມໍ່ໆມານີ້, ທ່ານແອນດຣູ ປາສັນສ, ປະທານຄະນະກຳມະການໂອລິມປິກຄົນພິການສາກົນ ໄດ້ສະແດງຄວາມຍ້ອງຍໍຊົມເຊີຍໃນລະດັບສູງ ຕໍ່ວຽກງານກະກຽມງານກິລາໂອລິມປິກຄົນພິການລະດູໜາວປັກກິ່ງໃນດ້ານຕ່າງໆ ໂດຍກ່າວວ່າ: ວຽກງານບໍລິການຕ່າງໆສຳລັບງານກິລາໂອລິມປິກຄົນພິການລະດູໜາວປັກກິ່ງໄດ້ສຸມໃສ່ຄວາມລະອຽດຮອບຄອບ ທີ່ເຮັດໃຫ້ນັກກິລາທັງຫຼາຍມີຄວາມຮູ້ສຶກທີ່ດີໃນວລາເຂົ້າຮ່ວມການແຂ່ງຂັນ. ພວກເຮົາມີຄວາມຫວັງເປັນຢ່າງຍິ່ງຕໍ່ກັບງານກິລາໂອລິມປິກຄົນພິການລະດູໜາວໃນຄັ້ງນີ້.
ໃນງານກິລາໂອລິມປິກລະດູໜາວປັກກິ່ງທີ່ໄດ້ດຳເນີນໄປເປັນເວລາ 16 ວັນ, ຈີນໄດ້ຈັດງານກິລາທີ່ງ່າຍດາຍ, ປອດໄພ ແລະໜ້າເບິ່ງໜ້າຊົມໃຫ້ກັບໂລກ ເຊິ່ງໄດ້ຮັບຄວາມຍ້ອງຍໍຊົມເຊີຍຢ່າງກວ້າງຂວາງຈາກວົງຄະນາຍາດໂອລິມປິກ ກໍຄືປະຊາຄົມໂລກ. ໂດຍອີງຕາມເປົ້າໝາຍຂອງການຈັດ “ງານກິລາໂອລິມປິກທັງສອງຄັ້ງ ໃຫ້ໜ້າເບິ່ງໜ້າຊົມຄືກັນ”, ຈີນມີຄວາມໝັ້ນໃຈວ່າ: ຈະສາມາດຈັດງານກິລາໂອລິມປິກຄົນພິການລະດູໜາວໄດ້ຢ່າງໂດດເດັ່ນ ແລະໜ້າເບິ່ງໜ້າຊົມເຊັ່ນກັນ.
ຄຳເຫັນ
0