ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 4 ມີນານີ້, ທ່ານວາລາດີເມຍ ປູຕິນ, ປະທານາທິບໍດີຣັດເຊຍ ໄດ້ລົງນາມໃນກົດໝາຍສະບັບໜຶ່ງ ໂດຍໄດ້ກຳນົດວ່າ: ຈະລົງໂທດຜູ້ກະທຳຜິດທີ່ເຜີຍແຜ່ຂ່າວປອມກ່ຽວກັບທະຫານຣັດເຊຍ, ລົງໂທດຜູ້ໃສ່ຮ້າຍປ້າຍສີກອງທັບຣັດເຊຍ ແລະລົງໂທດຜູ້ຮຽກຮ້ອງໃຫ້ປະຕິບັດການລົງໂທດຣັດເຊຍ, ເຊິ່ງໂທດສູງສຸດຈາກການກະທຳຄວາມຜິດດັ່ງກ່າວ ຈະຖືກຕັດສິນຈຳຄຸກ 3 ປີ ຫຼືຖືກປັບໃໝ 1.500.000 ຣູບ. ຖ້າວ່າຂ່າວປອມພາໃຫ້ເກີດມີຜົນກະທົບທີ່ໜັກໜ່ວງ, ຈະຖືກຕັດສິນຈຳຄຸກ 10 ຫາ 15 ປີ.
ພາຍຫຼັງກົດໝາຍດັ່ງກ່າວມີຜົນບັງຄັບໃຊ້ແລ້ວ, CNN ຂອງອາເມຣິກາໄດ້ປະກາດໃນທັນທີວ່າ: ຈະຢຸດຕິການກະຈາຍສຽງຢູ່ຣັດເຊຍ; ສຳນັກຂ່າວສານບລູມເບີກຂອງອາເມຣິກາກໍໄດ້ປະກາດວ່າ: ຈະຢຸດຕິການເກັບກຳຂ່າວຢູ່ຣັດເຊຍເປັນການຊົ່ວຄາວ. ສ່ວນ BBC ຂອງອັງກິດກໍໄດ້ອອກຖະແຫຼງການວ່າ: ຈະໃຫ້ນັກຂ່າວ ແລະພະນັກງານທີ່ກ່ຽວຂ້ອງຂອງ BBC ຢຸດຕິການປະຕິບັດວຽກງານຕ່າງໆຢູ່ຣັດເຊຍເປັນການຊົ່ວຄາວ.
ຣັດເຊຍຫາກໍໄດ້ປະກາດລົງໂທດກ່ຽວກັບຂ່າວປອມ, ສື່ມວນຊົນຝ່າຍຕາເວັນຕົກກໍພາກັນຕົກໃຈ “ໜີອອກຈາກ” ຣັດເຊຍໃນທັນທີ, ຍ້ອນສາເຫດຫຍັງ ຈຶ່ງພາໃຫ້ມີເລື່ອງແບບນີ້ເກີດຂຶ້ນ?
ສຳນັກຂ່າວສານບລູມເບີກໄດ້ປະກາດວ່າ: ຣັດເຊຍໄດ້ດັດແກ້ກົດໝາຍອາດຍາ “ໄດ້ເຮັດໃຫ້ການລາຍງານຂ່າວປົກກະຕິຢູ່ຣັດເຊຍບໍ່ສາມາດດຳເນີນຕໍ່ໄປໄດ້.” BBC ກໍໄດ້ກ່າວວ່າ: ກົດໝາຍທີ່ກ່ຽວຂ້ອງ “ຄືຊິໄດ້ຖືເອົາການລາຍງານຂ່າວທີ່ເປັນອິດສະຫຼະນັ້ນ ເປັນການກະທຳຜິດ”. ຮ້າຍແຮງໄປກວ່ານັ້ນ, ທຳນຽບຂາວຂອງອາເມຣິກາກໍໄດ້ກ່າວວ່າ: “ມີຄວາມເປັນຫ່ວງເສລີພາບໃນການປາກເວົ້າທີ່ຖືກຂົ່ມຂູ່ຢູ່ຣັດເຊຍ.”
ທີ່ຈິງແລ້ວ, ຖ້າວ່າສື່ມວນຊົນຝ່າຍຕາເວັນຕົກສາມາດລາຍງານຂ່າວຕາມຄວາມຈິງຢ່າງພາວະວິໄສ ແລະຍຸຕິທຳແລ້ວ, ກໍບໍ່ຈຳເປັນຕ້ອງຢ້ານວ່າຈະຖືກກົດໝາຍຣັດເຊຍລົງໂທດ. ການທີ່ສື່ມວນຊົນຝ່າຍຕາເວັນຕົກ“ມີຄວາມເປັນຫ່ວງເສລີພາບໃນການປາກເວົ້າຈະຖືກຂົ່ມຂູ່”ນັ້ນ ທີ່ຈິງແລ້ວເກີດຈາກຄວາມເປັນຫ່ວງໃນເລື່ອງທີ່ວ່າ: ຈະບໍ່ມີເສລີພາບໃນການເສກສັນປັ້ນແຕ່ງຂ່າວປອມໄດ້ຕາມໃຈອີກແລ້ວ.
ສື່ມວນຊົນຝ່າຍຕາເວັນຕົກມີປະຫວັດການເສກສັນປັ້ນແຕ່ງຂ່າວປອມມາແຕ່ດົນນານແລ້ວ ເຊັ່ນ: ອົງການຂ່າວລັບອາເມຣິກາໄດ້ປັ້ນແຕ່ງເຫດການ “ຜົງສະບູ” ແລ້ວເປີດບັ້ນສົງຄາມບຸກເຂົ້າອີຣັກ; BBC ຖ່າຍທຳສາລະຄະດີກ່ຽວກັບສົງຄາມຊີຣີ ແຕ່ບໍ່ຖືກກັບສະພາບຄວາມເປັນຈິງ ເຊິ່ງເປັນສາເຫດເຮັດໃຫ້ປະເທດຝ່າຍຕາເວັນຕົກຕ່າງໆຖິ້ມລະເບີດໂຈມຕີຊີຣີຫຼາຍຄັ້ງ; ໃນສອງປີມໍ່ໆມານີ້, ສື່ມວນຊົນຝ່າຍຕາເວັນຕົກຈຳນວນໜຶ່ງໄດ້ເສກສັນປັ້ນແຕ່ງຂ່າວປອມທີ່ວ່າ: “ຢູ່ຊີ່ນຈ່ຽງມີການບັງຄັບອອກແຮງງານ” ແລະອື່ນໆ.ຖ້າເບິ່ງຕາມຄວາມເປັນຈິງແລ້ວ, ສື່ມວນຊົນຝ່າຍຕາເວັນຕົກແມ່ນມີຄະດີຕິດໂຕຢ່າງຫຼວງຫຼາຍຈົນນັບບໍ່ຖ້ວນ.
ຣັດເຊຍດັດແກ້ກົດໝາຍເພື່ອລົງໂທດຂ່າວປອມໃນຄັ້ງນີ້ ໄດ້ເຮັດໃຫ້ BBC, CNN ແລະສື່ມວນຊົນຝ່າຍຕາເວັນຕົກອື່ນໆໜີອອກຈາກຣັດເຊຍໃນທັນທີ ເຊິ່ງໄດ້ສະແດງໃຫ້ເຫັນເຖິງທາດແທ້ອັນຈອມປອມຂອງສື່ມວນຊົນເຫຼົ່ານີ້.
ຄຳເຫັນ
0