ວັນ​ທີ 18 ມັງ​ກອນ​ປີ2022, ທ່ານ​ສີ​ຈິ້ນ​ຜິງ​ກ່າວ​ຄຳ​ປາ​ໄສ​ສຳ​ຄັນ​ໃນກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 6 ຂອງ​ຄະ​ນະ​ກຳ​ມະ​ການກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19
 

ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 6 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19, ທ່ານ​ສີ​ຈິ້ນ​ຜິງ​ກ່າວ​ເນັ້ນ​ໜັກ​ວ່າ, ຍຶດ​ໝັ້ນ​ຊຸກ​ຍູ້​ການ​ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ຮອບ​ດ້ານ​ເຂົ້າ​ສູ່​ລວງ​ເລິກ. ນັບ​ແຕ່​ປີ 2013 ຫາ​ປີ 2022, ທ່ານ​ສີ​ຈິ້ນ​ຜິງ​ໄດ້​ກ່າວ​ຄຳ​ປາ​ໄສ​ທີ່​ສຳ​ຄັນ​ໃນ​ກອງ​ປະ​ຊຸມ​ຄົບ​ຄະ​ນະ​ຂອງ​ຄະ​ນະ​ກຳ​ມະ​ການກວດ​ກາ​ວິ​ໄນ​ສູນ​ກາງ​ພັກ​ເມື່ອ​ຕົ້ນ​ປີ​ເປັນ​ເວ​ລາ 10 ປີ​ລຽນ​ຕິດ. ໃນ​ການ​ກ່າວ​ຄຳ​ປາ​ໄສ​ທຸກ​ເທື່ອ, ທ່ານ​ສີ​ຈິ້ນ​ຜິງ​ໄດ້​ກ່າວ​ຄວາມ​ເວົ້າ​ທີ່​ສຳ​ຄັນຫຼາຍ​​ປະ​ໂຫຍກ, ເຊິ່ງ​ສະ​ແດງ​ໃຫ້​ເຫັນ​ເຖິງຄວາມ​ຕັດ​ສິນ​ໃຈ​ທີ່​ເຂັ້ມ​ແຂງ​ຂອງ​ສູນ​ກາງ​ພັກ​ກອມ​ມູ​ນິດ​ຈີນ​ໃນ​ການ​ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ຮອບ​ດ້ານ.

 

ຍຶດ​ໝັ້ນ​ການ​ຕ້ານ​ການ​ສໍ້​ລາດ​ບັງຫຼວງແບບ​ບໍ່​ມີ​ເຂດ​ຕ້ອງ​ຫ້າມ ປົກ​ຄຸມ​ຢ່າງ​ທົ່ວ​ເຖິງ ແລະ​ບໍ່​ໂຍະ​ຍານ​ແມ່ນ​ແຕ່​ໜ້ອຍ​ດຽວ

 

ປີ 2017, ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 7 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 18, ທ່ານ​ສີ​ຈິ້ນ​ຜິງ​ຊີ້​ອອກວ່າ, ຍຶດ​ໝັ້ນ ການ​ຕ້ານ​ການ​ສໍ້​ລາດ​ບັງຫຼວງ​​ແບບບໍ່​ມີ​ເຂດ​​ຕ້ອງຫ້າມ ປົກ​ຄຸມ​ຢ່າງ​ທົ່ວ​ເຖິງ ແລະ​ບໍ່​​ໂຍະ​ຍານ​ແມ່ນ​ແຕ່​ໜ້ອຍ​ດຽວ, ປະ​ໂຫຍກ​ນີ້​ໄດ້​ຖືກ​ຈັດ​ເຂົ້າ​ໃນ​ບົດ​ລາຍ​ງານ​ຂອງກອງ​ປະ​ຊຸມ​ໃຫຍ່​ພັກ​ກອມ​ມູ​ນິດ​ຈີນ​ຄັ້ງ​ທີ 19.

 

ການ​ສໍ້​ລາດ​ບັງຫຼວງ​ພະ​ຍາດ​ມະ​ເຮັງ​ຂອງ​ສັງ​ຄົມ, ແມ່ນ​ໄພ​ຂົ່ມ​ຂູ່​ທີ່​ໜັກ​ໜ່ວງ​ທີ່​ສຸດ​ຢູ່​ຕໍ່​ໜ້າ​ພັກ​ກຳ​ອຳ​ນາດ, ​ແລະກໍ​ແມ່ນ​ປາ​ກົດ​ການ​ທີ່​ປະ​ຊາ​ຊົນກຽດ​ຊັງ​ທີ່​ສຸດ. ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 5 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 18, ທ່ານ​ສີ​ຈິ້ນ​ຜິງ​ຊີ້​ອອກວ່າ: “ຖ້າ​ບໍ່​ຢາກ​ເຮັດ​ຜິດ​ໃຈພວກ​ສໍ້​ລາດ​ບັງຫຼວງ​ເປັນ​ຮ້ອຍ​ເປັນ​ພັນ​ຄົນ, ກໍ​ຈະ​​ເຮັດຜິດ​ໃຈ​ປະ​ຊາ​ຊົນ 1 ຕື້ 300 ລ້ານ​ຄົນ, ນີ້​ເປັນ​ບັນ​ຫາ​ທາງ​ການ​ເມືອງ ແລະ ​ເປັນ​ຄວາມ​ສັດ​ທາ​ຂອງ​ປະ​ຊາ​ຊົນ​ຢ່າງ​ຈະ​ແຈ້ງ​ທີ່​ສຸດ!”

 

ການ​ຕ້ານ​ກັບ​ການ​ສໍ້​ລາດ​ບັງຫຼວງ​ແມ່ນ​ໜ້າ​ທີ່​ທີ່​ຍາວ​ນານ ສັບ​ສົນ ແລະ ລຳ​ບາກ, ບໍ່​ຄວນ​ມີ​ຄວາມ​ຄິດ​ວ່າ ພໍ​​ເປັນໄປ​ໄດ້, ຜ່ອນ​ຄາຍ​ຄວາມ​ພະ​ຍາ​ຍາມ ແລະ ຢຸດ​ເຊົາ​ບາດ​ກ້າວ​ເດີນ​ຊົ່ວ​ຄາວ, ຕ້ອງ​ຍຶດ​ໝັ້ນ​ການ​ເນັ້ນ​​ໃສ່​ສະ​ກັດ​ກັ້ນ, ໃຊ້​ຄວາມ​ກົດ​ດັນ​ສູງ ແລະ ນາບ​ຂູ່​ເປັນ​ໄລ​ຍະ​ຍາວ, ເຮັດ​ໃຫ້​ພວກ​ສໍ້​ລາດ​ບັງຫຼວງ​ບໍ່​ມີ​ບ່ອນ​ລີ້​ຊ່ອນ​ຕົວ, ເຮັດ​ໃຫ້​ທົ່ວ​ພັກ​ມີ​ຄວາມ​ຕື່ນ​ຕົວ ບໍ່​ກ້າ​ສໍ້​ລາດ​ບັງຫຼວງ ບໍ່​ສາ​ມາດ​ສໍ້​ລາດ​ບັງຫຼວງ​ ແລະ​ບໍ່​ຢາກ​ສໍ້​ລາດ​ບັງຫຼວງ.

 

ອະ​ນາ​ໄມ​ເດີ່ນ​ບ້ານ​ເລື້ອຍໆ, ​ກຳ​ຈັດໂຕ​ມ້າ​ບໍ່​ດີ​ທີ່​ເປັນ​ໄພ​ອັນ​ຕະ​ລາຍ​ຕໍ່​ຝູງ​ມ້າທັງ​ໝົດ ເຊິ່ງ​ກົງ​ກັບ​ຄຳ​ສຸ​ພາ​ສິດ​ລາວ​ທີ່​ວ່າ:ປາ​ໂຕ​ດຽວ​ເນົ່າ​ໝົດ​ຂ້ອງ.

 

ປີ 2019, ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 3 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19, ທ່ານ​ສີ​ຈິ້ນ​ຜິງ​ໄດ້​ຝາກຄວາມ​ຫວັງຕໍ່​ອົງ​ການກວດ​ກາ​ວິ​ໄນ​ວ່າ: “ຕ້ອງ​ອະ​ນາ​ໄມ​ເດີ່ນ​ບ້ານ​ເລື້ອຍໆ, ​ກຳ​ຈັດ​ໂຕ​ມ້າ​ບໍ່​ດີ​ທີ່​ເປັນ​ໄພ​ອັນ​ຕະ​ລາຍ​ຕໍ່​ຝູງ​ມ້າ​ທັງ​ໝົດ (ປາ​ໂຕ​ດຽວ​ເນົ່າ​ໝົດ​ຂ້ອງ), ສ້າງ​ຖັນ​ແຖວ​ພະ​ນັກ​ງານກວດ​ກາ​ວິ​ໄນ​ທີ່​ຈົ່ງ​ຮັກ​ພັກ​ດີ ບໍ​ລິ​ສຸດ ແລະ ມີ​ຄວາມ​ຮັບ​ຜິດ​ຊອບ.”

 

ອົງ​ການກວດ​ກາ​ວິ​ໄນ​ເປັນ​ອົງ​ການ​ສະ​ເພາະ​ດ້ານ​ການ​ຕິດ​ຕາມກວດ​ກາ​ຂອງ​ພັກ ແລະ ລັດ​ຖະ​ບານ, ​ໄດ້​ແບກ​ຫາບ​ໜ້າ​ທີ່​ອັນ​ໜັກ​ໜ່ວງ​ທີ່ມອບ​ໝາຍ​ໂດຍ​ພັກ ແລະ ປະ​ຊາ​ຊົນ. ຖ້າ​ວ່າ​ຜູ້​ປະ​ຕິ​ບັດ​ກົດ​ໝາຍ ແລະ ລະ​ບຽບ​ວິ​ໄນ​ຊ້ຳ​ພັດ​ລະ​ເມີດ​ລະ​ບຽບ​ວິ​ໄນ ແລະ ກົດ​ໝາຍ​ເອງ , ກໍ​ເໝືອນ​ກັບ​ຜູ້​ເຝົ້າ​ຮັກ​ສາ​ຊັບ​ສິນ​ລັກ​ເອົາ​ຊັບ​ສິນ​ເອງ, ເຊິ່ງ​ຈະ​ເປັນ​ຜົນ​ຮ້າຍ​ທີ່​ໜັກ​ໜ່ວງກວ່າ, ແລະ​ຈະ​ສ້າງ​ຜົນ​ກະ​ທົບ​ທີ່​ຮ້າຍ​ແຮງກວ່າ.

 

ຖັນ​ແຖວກວດ​ກາ​ວິ​ໄນ​ຕ້ອງ​ນຳ​ໃຊ້​ມາດ​ຕະ​ຖານ​ທີ່​ສູງກວ່າ​ ແລະ ລະ​ບຽບ​ວິ​ໄນ​ທີ່​ເຂັ້ມ​ງວດກວ່າ​ຕໍ່​ຕົນ​ເອງ, ຝຶກ​ຝົນຫຼໍ່ຫຼອມ​ແບບ​ແຜນ​ແນວ​ຄິດ ຄວາມ​ສາ​ມາດທີ່​ເຂັ້ມ​ແຂງ, ຕັ້ງ​ຕົວ ແລະ ເຮັດ​ວຽກ​ດ້ວຍ​ສະ​ຕິ​ພັກ, ປະ​ຕິ​ບັດ​ລະ​ບຽບ​ວິ​ໄນ​ຢ່າງ​ຍຸ​ຕິ​ທຳ, ນຳ​ໃຊ້​ສິດ​ອຳ​ນາດ​ຢ່າງ​ຮອບ​ຄອບ, ຍົກ​ສູງ​ພູມ​ຕ້ານ​ທານ​ຂອງ​ຕົນ​ເອງ​ຢ່າງ​ບໍ່​ຢຸດ​ຢັ້ງ, ເປັນ​ເຈົ້າ​ການ​ຮັບ​ເອົາ​ການ​ຕິດ​ຕາມກວດ​ກາ​ພາຍ​ໃນ​ພັກ ແລະ ວົງ​ການ​ຕ່າງໆ​ຂອງ​ສັງ​ຄົມ, ເປັນ​ຜູ້​ປ້ອງ​ກັນ​ທີ່​ຈົ່ງ​ຮັກ​ພັກ​ດີ​ຕໍ່​ພັກ ແລະ ປະ​ຊາ​ຊົນ.

 

ຊຸກ​ຍູ້​ສະ​ພາບ​ການ​ທີ່ ບໍ່​ກ້າ​ສໍ້​ລາດ​ບັງຫຼວງ ບໍ່​ສາ​ມາດ​ສໍ້​ລາດ​ບັງຫຼວງ ແລະ ບໍ່​ຢາກ​ສໍ້​ລາດ​ບັງຫຼວງ​ດ້ວຍ​ມີ​ການ​ປະ​ສານ​ສົມ​ທົບ​ກັນ​ຢ່າງ​ແໜ້ນ​ແຟ້ນ.

 

ປີ 2020, ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 4 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19, ທ່ານ​ສີ​ຈິ້ນ​ຜິງ​ຊີ້​ອອກວ່າ, ຕ້ອງ​ກຳ​ແໜ້ນ​ກົດ​ເກນ​ກໍ່​ສ້າງ​ແບບ​ແຜນ​ຂອງ​ພັກ ແລະ ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ​ຢ່າງ​ເລິກ​ເຊິ່ງ, ຊຸກ​ຍູ້​ສະ​ພາບ​ການ​ທີ່ ບໍ່​ກ້າ​ສໍ້​ລາດ​ບັງຫຼວງ ບໍ່​ສາ​ມາດ​ສໍ້​ລາດ​ບັງຫຼວງ ແລະ ບໍ່​ຢາກ​ສໍ້​ລາດ​ບັງຫຼວງ.

 

ເຮັດ​ແນວ​ໃດ​ຈຶ່ງ​ສາ​ມາດ​ເຮັດ​ໃຫ້​ພະ​ນັກ​ງານ​ການ​ນຳ “ບໍ່​ກ້າ​ສໍ້​ລາດ​ບັງຫຼວງ ບໍ່​ສາ​ມາດ​ສໍ້​ລາດ​ບັງຫຼວງ ແລະ ບໍ່​ຢາກ​ສໍ້​ລາດ​ບັງຫຼວງ”? ທ່ານ​ສີ​ຈິ້ນ​ຜິງ​ກ່າວ​ເນັ້ນ​ໜັກ​ວ່າ, ຕ້ອງນຳ​ໃຊ້​ການ​ປະ​ຕິ​ບັດ​ວິ​ໄນ ແລະ ກົດ​ໝາຍ​ຢ່າງ​ເຂັ້ມ​ງວດ​ເພື່ອ​ເພີ່ມ​ຄວາມ​ເຂັ້ມ​ແຂງ​ຂອງ​ລະ​ບຽບການ, ຊຸກ​ຍູ້​ໃຫ້​ສ້າງ​ລະ​ບົບ​ລະ​ບຽບ​ການ​ທີ່​ສົມ​ບູນ, ລະ​ບົບ​ຕິດ​ຕາມກວດ​ກາ​ທີ່​ເຂັ້ມ​ງວດ ແລະ ມີ​ປະ​ສິດ​ທິ​ຜົນ​ຢ່າງ​ບໍ່​ຢຸດ​ຢັ້ງ, ເພີ່ມ​ທະ​ວີ​ການ​ສຶກ​ສາ​ອົບ​ຮົມ​ດ້ານ​ອຸ​ດົມ​ການ, ຍົກ​ສູງ​ສະ​ຕິ​ພັກ ແລະ ຄວາມ​ຕື່ນ​ຕົວ, ຮັດ​ແໜ້ນ​ພື້ນ​ຖານ​ດ້ານ​ແນວ​ຄິດ​ທີ່​ບໍ່​ລືມ​ອຸ​ດົມ​ການ​ແຕ່​ຫົວ​ທີ ແລະ ຈື່​ຈຳ​ພາ​ລະ​ກຳ​ຢ່າງ​ໜັກ​ແໜ້ນ.

 

ການ​ສ້າງ​ແບບ​ແຜນ​ຂອງ​ພັກ​, ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ​ ແລະ ຕ້ານ​ກັບ​ການ​ສໍ້​ລາດ​ບັງຫຼວງ​ຈະ​ຢູ່​ບົນ​ເສັ້ນ​ທາງ​ນີ້​ຕະຫຼອດ​ໄປ. ປີ 2015, ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 5 ຂອງ​ຄະ​ນະ​ກຳ​ມະ​ການກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 18, ທ່ານ​ສີ​ຈິ້ນ​ຜິງ​ໄດ້​ກ່າວ​ເນັ້ນ​ໜັກ​ວ່າ: “ການ​ສ້າງ​ແບບ​ແຜນ​ຂອງ​ພັກ, ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ​ ແລະ​ຕ້ານ​ກັບ​ການ​ສໍ້​ລາດ​ບັງຫຼວງຈະ​ຢູ່​ບົນ​ເສັ້ນ​ທາງ​​ນີ້​ຕະຫຼອດ​ໄປ. ປີ 2022, ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 6 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19, ທ່ານ​ສີ​ຈິ້ນ​ຜິງ​ໄດ້​ຊີ້​ອອກ​ອີກ​ເທື່ອ​ໜຶ່ງວ່າ, ຕ້ອງ​ໃຊ້​ຈິດ​ໃຈ​ເດັດ​ດ່ຽວ​ໜຽວ​ແໜ້ນ​ທີ່​ຈະ​ກ້າວ​ເດີນ​ໄປ​​ຂ້າງໜ້າ​ຕະຫຼອດ​ໄປ, ສືບ​ຕໍ່​ດຳ​ເນີນ​ຢ່າງ​ຍືດ​ເຍື້ອ​ຍາວ​ນານ​ບັ້ນ​ສ້າງ​ແບບ​ແຜນ​ພັກ, ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ ແລະ ຕ້ານ​ກັບ​ການ​ສໍ້​ລາດ​ບັງຫຼວງໃຫ້​ດີ.
 

​ບັ້ນ​ສ້າງ​ແບບ​ແຜນ​ພັກ, ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ ແລະ ຕ້ານ​ກັບ​ການ​ສໍ້​ລາດ​ບັງຫຼວງ​ແມ່ນ​ບັ້ນ​ຮົບ​ທີ່​ບໍ່​ໃຫ້​ປະ​ລາ​ໄຊຢ່າງ​ເດັດ​ຂາດ. ນັບ​ແຕ່ກອງ​ປະ​ຊຸມ​ໃຫຍ່​ຂອງ​ພັກ​ກອມ​ມູ​ນິດ​ຈີນ​ຄັ້ງ​ທີ 18 ເປັນ​ຕົ້ນ​ມາ, ພັກ​ກອມ​ມູ​ນິດ​ຈີນ​ໄດ້​ພິ​ຈາ​ລະ​ນາ​ຈາກ​ການເປັນ​ຕາຍ​ຂອງ​ພັກ ແລະ ​ປະ​ເທດ​ຊາດ, ຊຸກ​ຍູ້​ການ​ສ້າງ​ແບບ​ແຜນ​ພັກ ແລະ ການ​ປົກ​ຄອງ​ບໍ​ລິ​ຫານ​ທີ່​ປອດ​ໃສ​ຂາວ​ສະ​ອາດ, ດຳ​ເນີນ​ການ​ຕໍ່​ຕ້ານ​ກັບ​ການ​ສໍ້​ລາດ​ບັງຫຼວງ, ​ແລະໄດ້​ຮັບ​ປະ​ສິດ​ທິ​ຜົນ​ຢ່າງ​ປະ​ຈັກ​ຕາ​​ຂອງຊາວ​ໂລກ.

 

ແຕ່​ການ​ຊັ່ງ​ຊາ​ກຳ​ລັງ​ລະ​ຫວ່າງ​ການ​ສໍ້​ລາດ​ບັງຫຼວງ ກັບ​ການ​ຕ້ານ​ ​ການ​ສໍ້​ລາດ​ບັງຫຼວງ​ຍັງ​ຄົງ​ດຳ​ເນີນ​ໄປຢ່າງ​ດຸ​ເດືອດ, ​ການ​ລົບ​ລ້າງ​ການ​ສໍ້​ລາດ​ບັງຫຼວງ​ທີ່​ເປັນ​ລະ​ບົບ ແລະ ແກ້​ໄຂ​ຄວາມ​ສ່ຽງ​ທີ່​ບົ່ມ​ຊ້ອນຍັງ​ເປັນ​ໜ້າ​ທີ່​ໜັກ​​ໜ່ວງ ແລະ​ຍາວ​ນານ.

 

ໃຊ້​ການ​ປະ​ຕິ​ວັດ​ຕົນ​ເອງ​ທີ່​ຍິ່ງ​ໃຫຍ່ ເພື່ອ​ນຳ​ພາ​ການ​ປະ​ຕິ​ວັດ​ສັງ​ຄົມ​ທີ່​ຍິ່ງ​ໃຫຍ່.

 

ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 6 ຂອງ​ຄະ​ນະ​ກຳ​ມະ​ກາ​ນກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19 ທີ່​ຈັດ​ຂຶ້ນ​ໃນ​ປີ 2022, ທ່ານ​ສີ​ຈິ້ນ​ຜິງ​ໄດ້​ສະ​ເໜີ​ວ່າ “ໃຊ້​ການ​ປະ​ຕິ​ວັດ​ຕົນ​ເອງ​ທີ່​ຍິ່ງ​ໃຫຍ່ ເພື່ອ​ນຳ​ພາ​ການ​ປະ​ຕິ​ວັດ​ສັງ​ຄົມ​ທີ່​ຍິ່ງ​ໃຫຍ່, ຍຶດ​ໝັ້ນ​ຊຸກ​ຍູ້​ການ​ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ຮອບ​ດ້ານ​ກ້າວ​ສູ່​ລວງ​ເລິກ​”, ​ພ້ອມທັງ​​ນຳໃຊ້ “6 ຈຳ​ເປັນ” ເພື່ອ​ບັນ​ລະ​ຍາຍ​ການ​ພົວ​ພັນ​ລະ​ຫວ່າງ​ການ​ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ຮອບ​ດ້ານ ກັບ​ການ​ປະ​ຕິ​ວັດ​ຕົນ​ເອງ.

 

ການ​ປະ​ຕິ​ວັດ​ຕົນ​ເອງ​ຢ່າງ​ກ້າ​ຫານ​ແມ່ນ​ຂີດ​ໝາຍ​ອັນ​ພົ້ນ​ເດັ່ນ​ທີ່​ພັກ​ກອມ​ມູ​ນິດ​ຈີນ ແຕກ​ຕ່າງ​ກັບ​ພັກ​ການ​ເມືອງ​ອື່ນໆ. ໃນ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທີ 6 ຂອງ​ຄະ​ນະ​ກຳ​ມະ​ກາ​ນ​ສູນ​ກາງ​ພັກ​ກອມ​ມູ​ນິດ​ຈີນ​ສະ​ໄໝ​ທີ 19, ທ່ານ​ສີ​ຈິ້ນ​ຜິງ​ກ່າວ​ວ່າ, ພັກ​ກອມ​ມູ​ນິດ​ຈີນ​ມີ​ປະ​ຫວັດ​ສາດ​ດົນ​ປານ​ນີ້, ​ມີ​ຂະ​ໜາດ​ໃຫຍ່​ປານ​ນີ້, ໄດ້​ກຳ​ອຳ​ນາດ​ດົນ​ປານ​ນີ້, ເຮັດ​ແນວ​ໃດ​ຈຶ່ງຈະ​ສາ​ມາດ​ພົ້ນ​ອອກ​ຈາກ​ຮອບ​ໝູນ​ວຽນ​ແຫ່ງ​ຄວາມ​ສິ​ວິ​ໄລ ແລະ​ຄວາມ​ຊຸດ​ໂຊມ​ໃນ​ປະ​ຫວັດ​ສາດ? ສະ​ຫາຍ​ເໝົາ​ເຈີ​ຕຸ່ງ​ໄດ້​ໃຫ້​ຄຳ​ຕອບ​ທຳ​ອິດ​ຢູ່​ໃນ​ເຮືອນ​ຖ້ຳ​ຂອງ​ເມືອງ​ຢຽນ​ອ່ານ, ຄື “ມີ​ແຕ່​ໃຫ້​ປະ​ຊາ​ຊົນ​ຕິດ​ຕາມ​ກວດ​ກາ​ລັດ​ຖະ​ບານ, ລັດ​ຖະ​ບານ​ຈຶ່ງ​ບໍ່​ກ້າ​ລົດ​ລະ​ຄວາມ​ພະ​ຍາ​ຍາມ.” ເມື່ອ​ຜ່ານ​ການ​ບຸກ​ບືນ​ສູ້​ຊົນ​​ມາເປັນ​ເວ​ລາ​ຮ້ອຍ​ປີ, ໂດຍ​ສະ​ເພາະ​ແມ່ນ​ພຶດ​ຕິ​ກຳ​ອັນ​ໃໝ່​ນັບ​ແຕ່ກອງ​ປ​ຊຸມ​ໃຫຍ່​ຂອງ​ພັກ​ກອມ​ມູ​ນິດ​ຈີນ​ຄັ້ງ​ທີ 18 ເປັນ​ຕົ້ນ​ມາ, ພັກ​ກອມ​ມູ​ນິດ​ຈີນ​​ໄດ້​ໃຫ້​ຄຳ​ຕອບ​ທີ 2, ຄື ການ​ປະ​ຕິ​ວັດ​ຕົນ​ເອງ.

 

“ໃຊ້​ການ​ປະ​ຕິ​ວັດ​ຕົນ​ເອງ​ທີ່​ຍິ່ງ​ໃຫຍ່ ເພື່ອ​ນຳ​ພາ​ການ​ປະ​ຕິ​ວັດ​ສັງ​ຄົມ​ທີ່​ຍິ່ງ​ໃຫຍ່.” ນີ້​ກໍ​ແມ່ນ​ຄວາມ​ໝາຍ​ອັນ​ເລິກ​ເຊິ່ງ​ໃນ​ຄວາມ​ເວົ້າ​ຂອງ​ທ່ານ​ສີ​ຈິ້ນ​ຜິງ​ທີ່​ກ່າວ​ໃນ​ກອງ​ປະ​ຊຸມ​ຄົບ​ຄະ​ນະ​ຂອງ​ຄະ​ນະ​ກຳ​ມະ​ການກວດ​ກາ​ວິ​ໄນ​ສູນ​ກາງ​ພັກ​ກອມ​ມູ​ນິດ​ຈີນທຸກ​ຄັ້ງ​.