ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນັບແຕ່ກອງປະຊຸມໃຫຍ່ຂອງພັກຄອມມູນິດຈີນຄັ້ງທີ 18 ເປັນຕົ້ນມາ, ໃນໄລຍະທີ່ຈັດກອງປະຊຸມສະພາປະຊາຊົນແຫ່ງຊາດຈີນ ແລະ ກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນ ຫຼືເອີ້ນສັ້ນໆວ່າ ກອງປະຊຸມສອງສະພາທົ່ວປະເທດທຸກຄັ້ງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນໄດ້ແລກປ່ຽນຄວາມຄິດເຫັນແບບເຊິ່ງໜ້າກັບສະມາຊິກສອງສະພາ, ເພື່ອປຶກສາຫາລືກ່ຽວກັບວຽກງານສຳຄັນຂອງລັດ ແລະຊີວິດການເປັນຢູ່ຂອງປະຊາຊົນ. ການແລກປ່ຽນຄວາມເຫັນຢ່າງສະໜິດສະໜົມກັນທຸກເທື່ອ, ຄວາມເວົ້າທີ່ອົບອຸ່ນທຸກຄວາມ, ໄດ້ສະແດງໃຫ້ເຫັນເຖິງຈິດໃຈຮັກແພງປະຊາຊົນຢ່າງເລິກເຊິ່ງຂອງຜູ້ນຳ, ພ້ອມທັງໄດ້ສ່ອງແສງໃຫ້ເຫັນເຖິງປະຊາທິປະໄຕປະຊາຊົນທົ່ວຂະບວນການຂອງຈີນ.
“ມີຄອບຄົວໜຶ່ງ, ມີ 3 ຮຸ່ນຄົນລວມທັງໝົດ 7 ຄົນ, ລ້ວນແຕ່ເຮັດວຽກຢູ່ສະໜາມການກໍ່ສ້າງ. ພໍ່ເຖົ້າຢ້ຽນຊວນຈົ່ງ ອາຍຸ 70 ກວ່າປີແມ່ນຫົວໜ້າຄອບຄົວນີ້, ພໍ່ເຖົ້າເວົ້າສູ່ຟັງວ່າ, ທ່ານເລຂາທິການໃຫຍ່ໄດ້ອ່ານບົດລາຍງານກອງປະຊຸມໃຫຍ່ຂອງພັກຄັ້ງທີ 19 ດົນເຖິງ 3 ຊົ່ວໂມງປາຍ, ເຊິ່ງພໍ່ເຖົ້າແມ່ນຢືນຟັງບົດລາຍງານຈົນໝົດ, ເພາະຄິດວ່າ ຖ້າບໍ່ໄດ້ຢືນຟັງຈົນຈົບ, ກໍຈະຮູ້ສຶກຜິດຕໍ່ທ່ານເລຂາທິການໃຫຍ່, ເພາະວ່າແມ່ນພັກເຮັດໃຫ້ປະຊາຊົນພວກເຮົາຫຼຸດພົ້ນອອກຈາກຄວາມທຸກຍາກ ແລະ ມີຄວາມຮັ່ງມີຂຶ້ນ.” “ພໍ່ເຖົ້າຜົມຫງອກຜູ້ໜຶ່ງ ເປັນຊາວກະສິກອນທີ່ບໍ່ເຄີຍເຂົ້າໂຮງຮຽນຈັກເທື່ອ, ມີຄວາມສັດທາຢ່າງເລິກເຊິ່ງປານນີ້ຕໍ່ກັບທ່ານເລຂາທິການໃຫຍ່ ແລະ ພັກເຮົາ.”
ທີ່ສະເໜີມາເທິງນັ້ນແມ່ນສະພາບທີ່ທ່ານຫວງຈິວເຊີ່ງ ສະມາຊິກສະພາປະຊາຊົນແຫ່ງຊາດຈີນເລົ່າເລື່ອງທີ່ຜູ້ເຖົ້າຄົນໜຶ່ງ “ຢືນຟັງບົດລາຍງານ” ສູ່ທ່ານສີຈິ້ນຜິງຟັງ ໃນເວລາທີ່ທ່ານສີຈິ້ນຜິງເຂົ້າຮ່ວມການພິຈາລະນາຂອງຄະນະຜູ້ແທນແຂວງເຫີນານໃນກອງປະຊຸມຄັ້ງທີ 2 ຂອງສະພາປະຊາຊົນແຫ່ງຊາດຈີນຊຸດທີ 13 ເມື່ອວັນທີ 8 ມີນາປີ 2019.
ເມື່ອໄດ້ຟັງເລື່ອງນີ້ແລ້ວ, ທ່ານສີຈິ້ນຜິງໃຫ້ຄຳຕອບຢ່າງອົບອຸ່ນວ່າ: “ຂໍຜ່ານສະຫາຍ ຝາກຄວາມຢືິ້ຢາມຖາມຂ່າວໄປຍັງສະຫາຍຜູ້ນີ້ເດີ! ”
ຫຼັງຈາກນັ້ນ, ສະມາຊິກຄະນະຜູ້ແທນທີ່ເຂົ້າຮ່ວມກອງປະຊຸມຢູ່ແຫ່ງນັ້ນໄດ້ຕົບມືຢ່າງຄຶກຄື້ນ.
ພາຍຫຼັງກອງປະຊຸມສິ້ນສຸດລົງແລ້ວ, ທ່ານຫວງຈິວເຊີ່ງໄດ້ຟ້າວໂທລະສັບໄປຫາພໍ່ເຖົ້າຢ້ຽນຊວນຈົ່ງໃນທັນທີ, ແລະເວົ້າວ່າ: “ລຸງຊວນຈົ່ງ, ທ່ານເລຂາທິການໃຫຍ່ສີຈິ້ນຜິງໄດ້ຝາກຄວາມຢື້ຢາມຖາມຂ່າວມາຫາລຸງໄດ໋! ລຸງດີໃຈບໍ່?”
ພໍ່ເຖົ້າຢ້ຽນຊວນຈົ່ງເວົ້າດ້ວຍຄວາມຕື່ນເຕັ້ນດີໃຈວ່າ: “ດີໃຈແທ້! ຂອບໃຈຫຼາຍໆ!”
ທ່ານຫວງຈິວເຊິ່ງ ຜູ້ແທນສະພາປະຊາຊົນແຫ່ງຊາດຈີນ
ໃນເວລາທີ່ປະກອບຄຳເຫັນເທື່ອນັ້ນ, ໂດຍຢູ່ເຊີ່ງໜ້າກັບທ່ານສີຈິ້ນຜິງ, ທ່ານຫວງຈິວເຊີ່ງໄດ້ກ່າວຄວາມໃນໃຈບາດດຽວເລີຍເປັນເວລາ 10 ນາທີໂດຍບໍ່ໄດ້ອ່ານບົດຄຳເຫັນ ດ້ວຍສຳນຽງນະຄອນຊິ້ນຢາງແຂວງເຫີນານ.
ທ່ານຫວງຈິວເຊີ່ງບອກວ່າ, ຕົນເອງແມ່ນເຕີບໃຫຍ່ຂຶ້ນໂດຍໄດ້ຮັບການຊ່ວຍເຫຼືອອາຫານຈາກຫຼາຍໆຄອບຄົວ, ບຸກບືນສູ້ຊົນນຳພາທີມງານໄດ້ຮັບລາງວັນ “ລູປ່ານ” ທີ່ເປັນລາງວັນໂຄງການກໍ່ສ້າງຄຸນນະພາບດີເດັ່ນລະດັບຊາດ 2 ຄັ້ງ; ໄດ້ເວົ້າເຖິງປະສົບການທີ່ຕິດຕາມເອົາໃຈໃສ່ກຳມະກອນທີ່ມາຈາກຊົນນະບົດຜ່ານໜ່ວຍພັກເຄື່ອນທີ່; ພ້ອມນັ້ນຍັງໄດ້ເວົ້າເຖິງບັ້ນລຶບລ້າງຄວາມທຸກຍາກໄດ້ປ່ຽນແປງຊາຕາກຳຂອງຊາວກະສິກອນເປັນພັນເປັນໝື່ນຄົນ.
ທ່ານຫວງຈິວເຊີ່ງເວົ້າວ່າ: “ທ່ານເລຂາທິການໃຫຍ່ມີວຽກຫຼາຍປານນີ້, ແຕ່ຍັງໄດ້ຕິດຕາມເອົາໃຈໃສ່ກຳມະກອນທີ່ມາຈາກຊົນນະບົດ, ຂ້ອຍຕ້ອງນຳພາພວກອ້າຍນ້ອງເຮັດວຽກຢ່າງດຸໝັ່ນ ແລະ ເຮັດວຽກໃຫ້ດີ.”
ໃນຖານະເປັນຜູ້ຕາງໜ້າກຳມະກອນທີ່ມາຈາກຊົນນະບົດຂອງນະຄອນຊິ້ນຢາງແຂວງເຫີນານ ເຊິ່ງເປັນເຂດທີ່ໝັ້ນການປະຕິວັດເກົ່າພູຕ້າເປສ່ານ, ທ່ານຫວງຈິວເຊີ່ງທີ່ເປັນຜູ້ແທນສະພາປະຊາຊົນແຫ່ງຊາດບໍ່ພຽງແຕ່ໄດ້ນຳເອົາເນື້ອໃນໃຈຄວາມຂອງຄຳປາໄສທີ່ສຳຄັນ ແລະ ຄຳຊີ້ນຳຂອງທ່ານສີຈິ້ນຜິງໄປເຜີຍແຜ່ໃຫ້ພີ່ນ້ອງປະຊາຊົນຢູ່ບ້ານເກີດຂອງຕົນໄດ້ຮັບຮູ້ ແລະ ເຂົ້າໃຈເທົ່ານັ້ນ, ຍັງໄດ້ປະຕິບັດໜ້າທີ່ຮັບຜິດຊອບຂອງຜູ້ແທນປະຊາຊົນ, ສົ່ງຫາງສຽງຂອງປະຊາຊົນໄປສູ່ກອງປະຊຸມສອງສະພາທົ່ວປະເທດ.
ທ່ານຫວງຈິວເຊິ່ງ
ໃນຫຼາຍປີຜ່ານມານີ້, ທ່ານຫວງຈິວເຊີ່ງໄດ້ນຳພາອ້າຍນ້ອງກຳມະກອນທີ່ມາຈາກຊົນນະບົດສູ້ຊົນເຮັດວຽກຢູ່ໃນຕົວເມືອງ. ປັດຈຸບັນນີ້, ລາຍຮັບໄດ້ເພີ່ມຂຶ້ນແລ້ວ, ຊີວິດການເປັນຢູ່ກໍໄດ້ດີຂຶ້ນແລ້ວ, ທ່ານຫວງຈິວເຊີ່ງໄດ້ເລັງສາຍຕາໄປສູ່ບ້ານເກີດຂອງເຂົາເຈົ້າ ຄື ຊົນນະບົດ, ຢາກປະກອບສ່ວນເຂົ້າໃນການພັດທະນາຊົນນະບົດໃຫ້ຈະເລີນ. ສະນັ້ນ, ໃນກອງປະຊຸມສອງສະພາປີ 2022, ທ່ານຫວງຈິວເຊີ່ງໄດ້ນຳສະເໜີ “ຂໍ້ສະເໜີກ່ຽວກັບການອອກແຮງແກ້ໄຂບັນຫາຂາດແຄນຜູ້ມີຄວາມຮູ້ຄວາມສາມາດຂອງຊົນນະບົດໃນການພັດທະນາຊົນນະບົດໃຫ້ຈະເລີນ” ແລະ “ຂໍ້ສະເໜີກ່ຽວກັບການເລັ່ງແກ້ໄຂບັນຫາຕິດໜີ້ເງິນເດືອນຂອງກຳມະກອນທີ່ມາຈາກຊົນນະບົດໃນຂົງເຂດການກໍ່ສ້າງວິສະວະກຳ.”
ທ່ານຫວງຈິວເຊີ່ງກ່າວວ່າ, ປັດຈຸບັນນີ້, ແຫ່ງຕ່າງໆໄດ້ສົ່ງເສີມໃຫ້ກຳມະກອນທີ່ມາຈາກຊົນນະບົດກັບຄືນໄປສ້າງທຸລະກິດຢູ່ບ້ານເກີດຂອງຕົນ, ແລະໄດ້ປະກາດໃຊ້ນະໂຍບາຍທີ່ດີ. ໃນເມື່ອກ່ອນ, ຂ້າພະເຈົ້າສາມາດພາພີ່ນ້ອງປະຊາຊົນຈາກຊົນນະບົດໄປເຮັດວຽກຢູ່ໃນຕົວເມືອງ, ປັດຈຸບັນກໍສາມາດພາເຂົາເຈົ້າກັບຄືນໄປສູ່ຊົນນະບົດ, ແລະສ້າງຜົນປະໂຫຍດໃຫ້ກັບບ້ານເກີດເມືອງນອນ.
ດັ່ງນັ້ນ, ທ່ານຫວງຈິວເຊີ່ງໄດ້ນຳພາກຳມະກອນທີ່ມາຈາກຊົນນະບົດຜູ້ມີຄວາມຮູ້ຄວາມສາມາດ ແລະ ມີຫົວຄິດປະດິດສ້າງກັບຄືນໄປບ້ານເກີດ, ຊຸກຍູ້ການພັດທະນາເສດຖະກິດທ້ອງຖິ່ນໂດຍຜ່ານຫຼາຍມາດຕະການ. ຕົວຢ່າງວ່າ, ໄດ້ສະໜັບສະໜູນສະມາຊິກພັກເຄື່ອນທີ່ກັບຄືນບ້ານເກີດ ສ້າງສະຫະກອນຮ່ວມມືເພື່ອສ້າງທຸລະກິດ; ສ້າງສູນຫຼຸດຜ່ອນຄວາມທຸກຍາກ ໂດຍຮັບເອົາຄອບຄົວທຸກຍາກເຂົ້າມາເຮັດວຽກຢູ່ໃນສູນ, ເຊິ່ງໄດ້ເຮັດໃຫ້ຄອບຄົວທຸກຍາກ 126 ຄອບຄົວສາມາດຫຼຸດພົ້ນອອກຈາກຄວາມທຸກຍາກໄດ້ຢ່າງສະດວກ; ຢູ່ເຂດອ້ອມຂ້າງສູນຫຼຸດຜ່ອນຄວາມທຸກຍາກ, ໄດ້ສ້າງແຫຼ່ງທ່ອງທ່ຽວນິຄົມຊານ້ຳມັນ, ພັດທະນາການທ່ອງທ່ຽວ ພ້ອມທັງຊຸກຍູ້ທຸລະກິດໃບຊາ, ເຊິ່ງໄດ້ຊ່ວຍເຫຼືອພີ່ນ້ອງປະຊາຊົນທີ່ທຸກຍາກມີຄວາມຮັ່ງມີຂຶ້ນ ແລະກ້າວໄປສູ່ຄວາມອີ່ມໜຳສຳລານຢ່າງໝັ້ນທ່ຽງ; ທ່ານຍັງໄດ້ລະດົມທຶນພັດທະນາການປູກຜັກ, ໝາກສະໂຕເບຣີໃນໂຮງເຮືອນ, ແລະອື່ນໆ, ເຊິ່ງໄດ້ຊ່ວຍເຫຼືອຊາວບ້ານ 520 ຄອບຄົວຜູ້ຍົກຍ້າຍຖິ່ນຖານບັນລຸເປົ້າໝາຍທີ່ “ສາມາດຍ້າຍອອກມາໄດ້, ແລະສາມາດຄົງຕົວຢ່າງໝັ້ນທ່ຽງໄດ້, ສາມາດສ້າງຄວາມຮັ່ງມີຂຶ້ນໄດ້”.
“ມາຈາກທ່າມກາງປະຊາຊົນ, ເຂົ້າຢູ່ທ່າມກາງປະຊາຊົນ”, ທ່ານຫວງຈິວເຊີ່ງເວົ້າວ່າ, ຕົນເອງຈະຈື່ຈຳຄວາມເວົ້າສຳຄັນຂອງທ່ານສີຈິ້ນຜິງໄວ້ຕະຫຼອດໄປ.
“ປັດຈຸບັນ, ພວກເຮົາຕັ້ງໜ້າຈັດຕັ້ງສ້າງໂຮງຮຽນນອກໂມງການໃຫ້ແກ່ກຳມະກອນທີ່ມາຈາກຊົນນະບົດ, ຊ່ວຍເຫຼືອໃຫ້ຄົນທັງຫຼາຍໄດ້ຮຽນຮູ້ຄວາມສາມາດຫຼາຍຢ່າງ, ສາມາດໄດ້ເງິນເດືອນສູງດ້ວຍສີມືຂອງຕົນ. ຂ້ອຍເອງມາຈາກຮາກຖານ, ຈະຍຶດໝັ້ນປະຕິບັດຕາມອຸດົມການແຕ່ຫົວທີ ທີ່ “ເຮັດວຽກຕົວຈິງ ແລະ ເຮັດວຽກທີ່ດີຕໍ່ປະຊາຊົນໃຫ້ຫຼາຍ”, ເສີມຂະຫຍາຍບົດບາດຂອງຜູ້ແທນປະຊາຊົນຢ່າງເຕັມສ່ວນ, ນຳເອົາຫາງສຽງຂອງປະຊາຊົນໄປສະເໜີຕໍ່ກອງປະຊຸມສອງສະພາ, ປະກອບສ່ວນເຂົ້າໃນການພັດທະນາຊົນນະບົດໃຫ້ຈະເລີນ.
ເມື່ອເວົ້າເຖິງຈຸດນີ້, ໃນສາຍຕາຂອງທ່ານຫວງຈິວເຊີ່ງໄດ້ສະແດງໃຫ້ເຫັນກຳລັງແຫ່ງຄວາມໜັກແໜ້ນ ແລະ ຄວາມໝັ້ນໃຈ.
ຄຳເຫັນ
0